လွင်ႈၵိုတ်းယိုဝ်းၼႆႉ ၵူၼ်းပွင်ႇၸႂ် ဢမ်ႇမိူၼ်ၵၼ် ၵမ်ႈၽွင်ႈ ႁၼ်ဝႃႈ ပေႃးၵိုတ်းယိုဝ်းယဝ်ႉ မိူၼ်တၢင်း သုမ်းသိုၵ်း၊ ပေႃးႁိုင်မႃး မၢၼ်ႈဢဝ်သုၼ်ႇ ပၢႆးမၢၵ်ႈမီးပၼ်သေ ယႃႉၵဝ်းၼႂ်းႁဝ်း ႁႂ်ႈႁၼ်ၽိတ်းၵၼ် တႅၵ်ႇ ၵၼ်ပဵၼ် လၢႆၾၢႆႇလၢႆၸုမ်းသေ ၸၢင်ႈႁဵတ်းႁႂ်ႈႁႅင်းဢူၼ်ႈဢွၼ်ႇ၊ ၵမ်းလိုၼ်းသုတ်းၵေႃႈ ႁဵတ်းပီႇတုၸိတ်ႉ၊ ယဝ်ႉၵေႃႈ ဝၢင်းၶိူင်ႈ ဢမ်ႇၼၼ် ႁၢႆၵႂႃႇလွႆးလွႆး မၼ်းဢမ်ႇပႅၵ်ႇပိူင်ႈ ၵၼ်တင်းမၢင်ၸုမ်းဢၼ်ယၢမ်ႈပဵၼ် ပူၼ်ႉမႃး မၢင်ၸိူဝ်း ႁၼ်ၼင်ႇၼႆၵေႃႈမီး။

မၢင်ၸိူဝ်းၵမ်ႈၽွင်ႈႁၼ်ဝႃႈ သိုၵ်းတေႃႇသိုၵ်း ၵိုတ်းယိုဝ်းၵၼ်ႁင်းၵူၺ်း၊ ၵၢၼ်သၢင်ႈလွင်ႈငမ်းယဵၼ်ၼႆႉ ပေႃးဢမ်ႇႁူမ်ႈပႃး ၵူၼ်းမိူင်း မၼ်းဢမ်ႇလႆႈ၊ သိုၵ်းၵိုတ်းယိုဝ်းၵၼ်ၵူၺ်းလႄႈ ၵူၼ်းမိူင်းဢမ်ႇလႆႈႁပ်ႉ ၽွၼ်းလီသင်ၸွမ်း၊ သိုၵ်းတေႃႇသိုၵ်းၼႆႉ ဝၼ်းၼိုင်ႈမႃး ၸၢင်ႈယိုဝ်းၵၼ်ၶိုၼ်းၵူၺ်း -ဝႃႈၼႆ။

တၢင်းႁၼ်လၢၵ်ႇလၢႆ ပၢႆးဝူၼ်ႉလၢၵ်ႇလၢႆၸိူဝ်းၼၼ်ႉ ၶႂ်ႈမၢၼ်ႇမႅၼ်ႈၵေႃႈတေမီး ၶႂ်ႈၽိတ်းၵေႃႈတေမီးယူႇ။ ၵူၺ်းၵႃႈ ဢၼ် ပဵၼ်တႄႉမၼ်း ပေႃးဢမ်ႇမီးၵူၼ်းမိူင်းၵေႃႈ ဢမ်ႇမီးလူင်ပွင်ၸိုင်ႈ၊ လူင်ပွင်ၸိုင်ႈၼၼ်ႉ ပဵၼ်ၽူႈပူၵ်းပွင်ၵူၼ်းမိူင်းပဵၼ် တူဝ်တႅၼ်းၵူၼ်းမိူင်း၊ တပ်ႉသိုၵ်းလုၵ်ႉၽိုၼ်ႉၵေႃႈ ယွၼ်ႉၵၢၼ်မိူင်း ယွၼ်ႉၵူၼ်းမိူင်းလႄႈ ၸင်ႇလုၵ်ႉၽိုၼ်ႉ၊ ၽူႈလုၵ်ႉၽိုၼ်ႉ ၼၼ်ႉၵေႃႈ ပဵၼ်ၵူၼ်းမိူင်းၵူၺ်းၼင်ႇၼႆ။ ပေႃးလူင်ပွင်ၸိုင်ႈလႄႈ ၸုမ်းလုၵ်ႉၽိုၼ်ႉၵိုတ်းယိုဝ်းၵၼ်သေ တူၵ်းလူင်းၵၼ်လႆႈ လီၵေႃႈ ၽွၼ်းလီမၼ်း ၵႂႃႇတူၵ်းတီႈၵူၼ်းမိူင်းၶိုၼ်းၵူၺ်း။

ၵၢၼ်ၵိုတ်းယိုဝ်းၼႆႉ တေလီ/ တေႁၢႆႉ တေယိုဝ်းၵၼ် ဢမ်ႇယိုဝ်းၵၼ်ၶိုၼ်းၼၼ်ႉ မၼ်းယူႇတီႈငဝ်ႈၶၢမ်ႇ ပိုၼ်ႉပၢႆးဝူၼ်ႉ တင်ႈတႄႇပိုၼ်ၽၢဝ်ႇလႄႈ တင်ႈတႄႇဢုပ်ႇဢူဝ်းၵၼ်ၼၼ်ႉယဝ်ႉ။ ပေႃးလူင်ပွင်ၸိုင်ႈမီး ပၢႆးဝူၼ်ႉၸိုၼ်ႈသႂ် ၶႂ်ႈသၢင်ႈမိူင်းႁူမ်ႈ တုမ်ၵတ်းယဵၼ်ယူႇတႄႉၸိုင် လၢႆးႁဵတ်းလၢႆးသၢင်ႈၵေႃႈ လၢတ်ႈၸိူင်ႉ ႁိုဝ် ထုၵ်ႇလႆႈႁဵတ်းၸွမ်းၼင်ႇၼၼ်၊ ပေႃးလၢတ်ႈမဵဝ်း ၼိုင်ႈ ႁဵတ်းမဵဝ်းၼိုင်ႈ မီးၽႅၼ်ဢမ်ႇသိုဝ်ႈသႂ်ၼႆၸိုင် မၼ်းဢမ်ႇၸႂ်ႈသၢင်ႈလွင်ႈငမ်းယဵၼ်။ ဢဝ်လွင်ႈငမ်းယဵၼ်ႁေႉၼႃႈ ယွၵ်ႇႁႂ်ႈၽူႈလုၵ်ႉၽိုၼ်ႉလိုမ်းတူဝ်၊ “သွၼ်ႉလၢပ်ႇ ၼႂ်းႁွႆးယုမ်ႉ” ၼႆၸိုင် ၵၢၼ်ငမ်းယဵၼ် ၶၢဝ်းယၢဝ်းမၼ်းတိုၼ်းတေ ဢမ်ႇၵိူတ်ႇၶိုၼ်ႈလႆႈ။

ၵူၼ်းၵမ်ႈၽွင်ႈႁၼ်ဝႃႈ ယွၼ်ႉမီးၸုမ်းလုၵ်ႉၽိုၼ်ႉလႄႈ ဝၢၼ်ႈမိူင်းဢမ်ႇၵတ်းယဵၼ်၊ ဢမ်ႇမီးၸုမ်းလုၵ်ႉ ၽိုၼ်ႉယိပ်းၵွင်ႈ ၵၢင်ႇ ဝၢၼ်ႈမိူင်းဢမ်ႇသုၵ်ႉယုင်ႈ ၵူၼ်းၸိူဝ်းႁၼ်ၼင်ႇၼႆၼၼ်ႉ ပဵၼ်ၵူၼ်းဝူၼ်ႉႁၼ် ဢမ်ႇၵႆ၊ ၵူၼ်းမီးပၢႆးဝူၼ်ႉၸိုင် ၶဝ်မုင်ႈ ႁၼ်ၾၢႆႇၼႃႈၾၢႆႇလင် ႁူႉပိုၼ်းပဵၼ်မႃးလႄႈ မုင်ႈႁၼ်တေပဵၼ်ၵႂႃႇ ၶၢဝ်းၼႃႈ၊ ၵၢၼ်လုၵ်ႉၽိုၼ်ႉ ပေႃးမီးမႃးၵေႃႈ ယွၼ်ႉၵၢၼ် မိူင်းဢမ်ႇတူၵ်းလူင်းၵၼ်လႆႈလႄႈ ၸင်ႇၵိူတ်ႇမီး မႃး၊ ၾၢႆႇၼိုင်ႈၸႂ်ႉဢဵၼ်ႁႅင်းဝိပ်ႇငႅၼ်းၵူႈလၢႆး၊ ၾၢႆႇၼိုင်ႈ ၸႂ်ႉလွင်ႈထုၵ်ႇတြႃး ဢုပ်ႇႁူၺ်းဢဝ်၊ ၾၢႆႇတြႃး ဢၼ်ဢုပ်ႇဢဝ်ၼၼ်ႉ ဢမ်ႇပေႉၾၢႆႇဢၼ်ၸႂ်ႉဢဵၼ်ႁႅင်းဝိပ်ႇဢဝ်ၼၼ်ႉလႄႈ ၵမ်းလိုၼ်းသုတ်း ၵေႃႈ ၵႃႈလႆႈၸႂ်ႉဢဵၼ်ႁႅင်းသဵတ်ႈၵႃႈသဵတ်ႈႁူဝ်ၶိုၼ်း ၵၢၼ်တိုၵ်းၵၼ်ၼၼ်ႉ ၵမ်းလိုၼ်းသုတ်းၵေႃႈ ယဝ်ႉတီႈဢုပ်ႇၵၼ် ၼိူဝ်ၽိူၼ်ၵူၺ်း။

ပေႃးဢမ်ႇတိုၵ်းၶိုၼ်းၵေႃႈ ႁူႉတေသုမ်းၼၼ်ႉ ပဵၼ်သၽႃႇဝမၼ်း၊ ၵၢၼ်လုၵ်ႉၽိုၼ်ႉ ပေႃးမီးၽူႈတဵၵ်း တဵင်ၵေႃႈ ႁူႉမီးၽူႈလုၵ်ႉၽိုၼ်ႉၼၼ်ႉ ပဵၼ်သၽႃႇဝမၼ်းၼင်ႇၵဝ်ႇ ပေႃးဢမ်ႇလုၵ်ႉၽိုၼ်ႉၵေႃႈ ပွႆႇၾၢႆႇ ၼိုင်ႈ ပေႉလုမ်းလုမ်းၵူၺ်းယဝ်ႉ၊ သိုၵ်းမၢၼ်ႈၶဝ်ပေႉၵိၼ်တဵၵ်းတဵင်ၵူၼ်းမိူင်းမႃးၸိူင်ႉႁိုဝ် ပဵၼ်ႁိုဝ်ၼၼ်ႉ ဢမ်ႇတၢပ်ႈသပ်းလႅင်း တူဝ်ထူပ်းတႃႁၼ်ၵၼ်မႃး တၢင်းမိူင်းယူႇ၊ ဢၼ်သိုၵ်းမၢၼ်ႈၶဝ် ႁဵတ်းသၢင်ႈၵၢၼ် မိူၵ်ႈလိူင်းပူၼ်ႉမႃးၼၼ်ႉ ပဵၼ်ပိုၼ်းၵိုၵ်းဝႆႉ ၼႂ်းလုမ်ႈၾႃႉယဝ်ႉ ယၢမ်းလဵဝ် တေတေႃႇသူႈလၢႆးလႂ် ဢုပ်ႇဢူဝ်းဢဝ်ၼႄႇ? ဢဝ်ၵွင်ႈတိုၵ်းဢဝ်ၼႄႇၼၼ်ႉ ယူႇတီႈငဝ်းလၢႆးပဵၼ်မႃး ပၼ်မႃးၼၼ်ႉၵူၺ်း။

ၶၢဝ်းၵိုတ်းယိုဝ်းၼႆႉ ဢမ်ႇဝႃႈၾၢႆႇလူင်ပွင်ၸိုင်ႈ ၾၢႆႇလုၵ်ႉၽိုၼ်ႉ ဢၼ်လမ်ႇလွင်ႈသုတ်း ပဵၼ်လၢႆးႁဵတ်း သၢင်ႈတေႃႇၵၼ်၊ ၼႄၼမ်ႉၸႂ်သိုဝ်ႈယူဝ်းတေႃႇၵၼ်၊ သၢင်ႈလွင်ႈယုမ်ႇယမ်တေႃႇၵၼ်၊ ဢၼ်ပူၼ်ႉမႃး ႁႂ်ႈဢဝ်ပဵၼ်တွၼ်ႈသွၼ်၊ ၾၢႆႇလူင် ပွင်ၸိုင်ႈၵေႃႈ ႁႂ်ႈမီးၸႂ်ြတႃးၽဵင်ႇၶိုင်ႈ သုၼ်ႇၵူၼ်းမိူင်းၸၢဝ်းၶိူဝ်း မိူင်းႁူမ်ႈတုမ်မီးၼၼ်ႉ ႁႂ်ႈပၼ်သုၼ်ႇၶဝ် လွတ်ႈလႅဝ်း ၽဵင်ႇပဵင်းၵၼ်၊ ဢမ်ႇၸႂ်ႈဝႃႈ ၸၢဝ်းၶိူဝ်းမၢၼ်ႈလူဝ်ႇ ယႂ်ႇသုင်လိူဝ်ၸၢဝ်းၶိူဝ်းတၢင်ႇၶိူဝ်း၊ ႁဵတ်းၸွမ်းလၢႆးဢုပ်ႉပိူင်ႇတီႇမူဝ်ႊၶရေႊသီႊ ၸႅတ်ႈၸၢင်ႇ ၼႂ်းမၢႆမီႈပိူင်ပိုင်းၸိုင်ႈမိူင်း။

ဢၶၢၼ်း (1) နိူင်ငံတော် အခြေခံမူ ပႅၵ်ႈ6/(င) နိူင်ငံတော်၌ တရားမျှတခြင်း လွတ်လပ်ခြင်းနှင့် ညီမျှခြင်း တည်းဟူသော လောကပါလ တရားများ ပိုမိုထွန်းကားရေးခွင့် ၼၼ်ႉ ပႃးဝႆႉတႅၵ်ႇလႅင်းလီငၢမ်းယဝ်ႉလႄႈ ၵၢၼ်ထူပ်းမိုဝ်း လူဝ်ႇၼႄႁႂ်ႈ ၵူၼ်းမိူင်း ယုမ်ႇယမ်လႆႈလႄႈ ၸုမ်းလုၵ်ႉၽိုၼ်ႉဝႆႉဝၢင်းၸႂ်လႆႈၼၼ်ႉ လမ်ႇလွင်ႈတႄႉတႄႉ။

ၸုမ်းလုၵ်ႉၽိုၼ်ႉၵေႃႈ လူဝ်ႇမီးယိူင်းဢၢၼ်း ပုၼ်ႈတႃႇၵူၼ်းမိူင်းလႄႈ ဝၢၼ်ႈမိူင်း ႁႂ်ႈထုၵ်ႇမႅၼ်ႈသိုဝ်ႈယူဝ်း၊ ဢမ်ႇဢဝ်ပၢႆးဝူၼ်ႉ သုၼ်ႇတူဝ်ၸဝ်ႈၵဝ်ႇ မႃးႁူမ်ႇငမ်းသုၼ်ႇဝၢၼ်ႈမိူင်း၊ ပေႃးၸဝ်ႈၵဝ်ႇ ပႆႇမႅၼ်ႈၸႂ် ပႆႇႁပ်ႉ ပႆႇၽွမ်ႉၸွမ်းၼႆၸိူဝ်းၼၼ်ႉ ဢမ်ႇလူဝ်ႇ မီး၊ ၸုမ်းလုၵ်ႉၽိုၼ်ႉ ၸုမ်းႁဵတ်းၵၢၼ်လိၵ်ႈလၢႆး ၾိင်ႈငႄႈ ၸိူဝ်းၼႆႉ ၵဵဝ်ႇၵၢၼ်ၸိူဝ်ႉၸၢတ်ႈဝၢၼ်ႈမိူင်းတင်းမူတ်းလႄႈ ထုၵ်ႇၽွမ်ႉႁူမ်ႈၵၼ်၊ ပၢႆးဝူၼ်ႉလၢၵ်ႇလၢႆ ပိူင်ႈၵၼ်ၼႆသေတႃႉ လၢႆးႁဵတ်းတႄႉ ႁႂ်ႈမၼ်းၵွင်ႉၵၢႆႇၵၼ်ၵႂႃႇ၊ လွင်ႈၼႆႉလမ်ႇလွင်ႈ တႄႉတႄႉ။

ပိူင်လူင် ၽူႈဢွၼ်ႁူဝ်ၵူႈၸုမ်းထုၵ်ႇလႆႈဝူၼ်ႉယဵၼ်ၽိုၵ်းႁႂ်ႈၸႂ်ယဵၼ် ဝူၼ်ႉၵႂၢင်ႈႁၼ်ၵႆ၊ ၶတ်းၸႂ်ၵႂႃႇၸွမ်း ယိူင်းဢၢၼ်း ဢၼ်ႁဝ်းတိၵ်ႈထၢၼ်ႇဝႆႉ၊ မီးပၼ်ႁႃသင်မႃး ၸႂ်ယဵၼ်ၵႄႈၵႂႃႇ၊ ၽူႈဢွၼ်ႁူဝ် ဝႆႉတႃႇၵႄႈ ပၼ်ႁႃယဝ်ႉ ပေႃးဢမ်ႇမီးပၼ်ႁႃၵေႃႈ ဢမ်ႇလူဝ်ႇမီးၽူႈဢွၼ်ႁူဝ်ၼၼ်ႉ ပဵၼ်သၽႃႇဝမၼ်း၊ ၵွပ်ႈၼႆ တေလီတေႁၢႆႉမၼ်းယူႇတီႈၽူႈဢွၼ်ႁူဝ်ပဵၼ်ၼိုင်ႈ ၵူၼ်းၸွမ်း ပဵၼ်သွင်ၼၼ်ႉၵူၺ်း။

ၵိုတ်းယိုဝ်းယဝ်ႉ ၵၢၼ်ဢၼ်ထုၵ်ႇႁူမ်ႈၵၼ်ႁဵတ်းသၢင်ႈ ႁႂ်ႈၼေၼမ်ႉတူဝ်ၵႂႃႇၼႆႉ…

1. ဢွၼ်ႁူမ်ႈသၢင်ႈမိူင်းႁူမ်ႈတုမ်ၸႅတ်ႈၸၢင်ႇ (ၾႅတ်ႇတရႄႇမူႇ)

2. ငဝ်ႈငၢမ်ႇပိုၼ်ႉ မိူင်းႁူမ်ႈတုမ်ပဵၼ် 7မိူင်း 7တိူင်းသေ ပဵၼ်မႃးလႄႈ သုၼ်ႇဢုပ်ႉပိူင်ႇ ၸေႈမိူင်းလႄႈ တိူင်းႁႂ်ႈၸႂ်ႉလၢႆး ၵၢၼ်လိူၵ်ႈတင်ႈ ႁႃၽူႈဢွၼ်ႁူဝ် ဢမ်ႇၸႂ်ႈလၢႆး တႅင်ႇတင်ႈ ၽူႈဢွၼ်ႁူဝ် ၼင်ႇပဵၼ်ယူႇ ဝၼ်းမိူဝ်ႈလဵဝ်။

3. မိူင်းႁူမ်ႈတုမ်ၼႆႉ ငဝ်ႈၶၢမ်ႇပိုၼ်ႉ ၸုၵ်းၼိူဝ်ၸၢဝ်းၶိူဝ်း၊ ၼႂ်းမိူင်းႁူမ်ႈတုမ် ၵူႈၸၢဝ်းၶိူဝ်း ႁႂ်ႈမီးသုၼ်ႇ ၽဵင်ႇပဵင်းၵၼ်၊ ၵူၼ်းမိူင်းႁႂ်ႈမီးသုၼ်ႇ တႅပ်းတတ်းတူဝ်ၵဝ်ႇ လွတ်ႈလႅဝ်း။

4. တပ်ႉသိုၵ်းမိူင်းႁူမ်ႈတုမ်ၼၼ်ႉ ငဝ်ႈၶၢမ်ႇပိုၼ်ႉၸုၵ်းၼိူဝ် ၵူၼ်းၸၢဝ်းၶိူဝ်း မိူင်းႁူမ်ႈတုမ်သေ ပဵၼ်မႃး မီးမႃး၊ ၵွပ်ႈၼၼ် တပ်ႉသိုၵ်းမိူင်းႁူမ်ႈတုမ်ၼၼ်ႉ ၸၢဝ်းၶိူဝ်းမၢၼ်ႈဢမ်ႇထုၵ်ႇ ပဵၼ်ယႂ်ႇ ၵူႈတွၼ်ႈသေ ဢဝ်ၸၢဝ်းၶိူဝ်းပဵၼ် လုၵ်ႈၼွင်ႉ ၵူၼ်းၸႂ်ႉၵူၺ်း၊ ၼင်ႇႁိုဝ်တေမၢၼ်ႇမႅၼ်ႈ ၸွမ်းပိူင်တပ်ႉမိူင်းႁူမ်ႈ တုမ်ၼၼ်ႉ တပ်ႉသိုၵ်းၼႆႉ ထုၵ်ႇလီမႄးဢဝ် ၸေႈမိူင်း တိူင်းသေ ၶွတ်ႇၽွတ်ႈၶိုၼ်ႈမႃး။

5. တပ်ႉႁူမ်ႇလူမ်ႈၸေႈမိူင်း တိူင်းၼၼ်ႉ ႁႂ်ႈဢဝ်ၵူၼ်းၼႂ်းၸေႈမိူင်း/တိူင်းသေ ၶွတ်ႇၽွတ်ႈၶိုၼ်ႈပဵၼ်၊ ႁူဝ်ပဝ်ႈၸေႈမိူင်း မီးပုၼ်ႈၽွၼ်းၵုမ်းၵမ်ၵမ်းသိုဝ်ႈ။

6. လုမ်းတြႃးၸေႈမိူင်းၼၼ်ႉ ႁႂ်ႈမီးသုၼ်ႇဢႃႇၼႃႇတႅပ်းတတ်း လွတ်ႈလႅဝ်း၊ ယႃႇႁႂ်ႈၽၢႆႇတပ်ႉလႄႈ ၽၢႆႇဢုပ်ႉပိူင်ႇၶဝ် မႃးယုင်ႈၵဝ်းၸွမ်း၊ ၵိုတ်းယိုဝ်းၵၼ်ယဝ်ႉၼႆႉ ထုၵ်ႇလႆႈဢွၼ်ၵၼ် ႁူမ်ႈသၢင်ႈမူၼ်ႉမႄး ႁႂ်ႈပေႃးလႅၵ်ႈလၢႆႈၶိုၼ်ႈသင်ႉၵႂႃႇ။

7. ၵိုတ်းယိုဝ်းၵၼ်ၼႆႉ တႃႇႁူမ်ႈၽဵဝ်ႈယႃႈမဝ်းၵမ်ၼၼ်ႉၵေႃႈ လမ်ႇလွင်ႈပိူင်ၼိုင်ႈ၊ ၵွပ်ႈယႃႈမဝ်းၵမ် ပဵၼ်ၽေး ၸမ်တူဝ် ၵူၼ်းမိူင်းလႄႈ ၵၢၼ်မိူင်းတူၵ်းလူင်းၵၼ်လႆႈ ဢမ်ႇတူၵ်းလူင်းလႆႈ ဝႆႉတွၼ်ႈၼိုင်ႈ၊ ၶၢဝ်းၵိုတ်းယိုဝ်းၵၼ်ၼႆႉ ႁူမ်ႈၵၼ်ၽဵဝ်ႈယႃႈမဝ်းၵမ် ယႃႇႁႂ်ႈလုၵ်ႈဢွၼ်ႇ မိူင်းတႆး တိတ်းၸပ်း ယႃႈၽိၼ်ႇ ယႃႈမႃႉၼၼ်ႉ လမ်ႇလွင်ႈပိူင်ၼိုင်ႈ၊ မိူဝ်ႈပႆႇၵိုတ်းယိုဝ်းၵၼ် ၵုမ်ႇသေႉၼႄးၵၼ် ၽႂ်ၵေႃႈဝႃႈ ၽႂ်ၸိုဝ်ႈ ၸႂ်ႈမၢၼ်ႇမႅၼ်ႈ၊ လူင်ပွင်ၸိုင်ႈၵေႃႈ ၼႄးၸုမ်းလုၵ်ႉၽိုၼ်ႉ ယူႇ၊ ၵွပ်ႈၼႆ ၶၢဝ်းယၢမ်းၵိုတ်း ယိုဝ်းၵၼ်ၼႆႉ ၽႂ်ဢမ်ႇလူဝ်ႇၼေးၽႂ်သေ ႁူမ်ႈၵၼ်ၽဵဝ်ႈယႃႈၼႆႉ တေပဵၼ်ၽွၼ်းလီၵူၼ်းမိူင်း ၶၢဝ်းၼႃႈတႄႉတႄႉ။

ၵူၺ်းၵႃႈ ပၢႆးဝူၼ်ႉၵူၼ်းၵႃႉလႄႈ ပၢႆးဝူၼ်ႉ ၵူၼ်းၵၢၼ်မိူင်း တေဢမ်ႇမိူၼ်ၵၼ်၊ ပၢႆးဝူၼ်ႉၵူၼ်းၵႃႉတႄႉ ၽႂ်ၶႂ်ႈပဵၼ်သင်ပဵၼ် မၼ်းလူဝ်ႇလႆႈမီးငိုၼ်း ယူႇမူၼ်ႈၵိၼ်သိူဝ်းၼႂ်းတူင်ႇဝူင်းၵူၼ်းၵူၺ်း၊ ပၢႆးဝူၼ်ႉၵူၼ်း ၵၢၼ်မိူင်းသမ်ႉ ယႃႈၽိၼ်ႇ ပဵၼ်ၽေး ၵူၼ်းတင်းလုမ်ႈၾႃႉၽႂ်ၵႂႃႇၵူဝ်ႈဢိူၵ်ႇၸွမ်းၵေႃႈ ၸိုဝ်ႈလူႉ၊ တေပႃးၵူၼ်းမိူင်းလူႉလႄႈ ဢမ်ႇၸႂ်ႈၽူႈႁၵ်ႉၸိူဝ်ႉၸၢတ်ႈဝၢၼ်ႈမိူင်း လႆႈၼႆၼၼ်ႉလႄႈ ၽႂ်ၽႂ်ၵေႃႈ ဢွၼ်ၵၼ်ငိူင်ႉဝႄႈၵၼ်ယူႇ။

ၵူၺ်းၵႃႈ ၽဵဝ်ႈယႃႈၽိၼ်ႇၼႆသေ ဢမ်ႇမီးၽႅၼ်ပူၵ်းပွင်ၸွႆႈၵူၼ်းမိူင်းသင်ၼၼ်ႉ ဢမ်ႇၸႂ်ႈလူင်ပွင်ၸိုင်ႈ ပုၼ်ႈတႃႇၵူၼ်းမိူင်း၊ သင်ဝႃႈၵိုတ်းယိုဝ်းၵၼ်ယဝ်ႉ ႁူမ်ႈၵၼ်ၽဵဝ်ႈယႃႈၽိၼ်ႇၼႆႉ လူင်ပွင်ၸိုင်ႈဢမ်ႇသူၼ် ၸႂ် ဢမ်ႇႁူမ်ႈမိုဝ်းၸွမ်းၼၼ်ႉ ဢမ်ႇၸႂ်ႈတၢင်းၽိတ်းၸုမ်းလုၵ်ႉၽိုၼ်ႉ၊ သင်ဝႃႈၸုမ်းလုၵ်ႉၽိုၼ်ႉ ဢမ်ႇႁွမ်းၸွမ်းသေ ၵုမ်ႇၼေးလူင်ပွင်ၸိုင်ႈယူႇၵူၺ်းၸိုင် ၼၼ်ႉပဵၼ်ၾၢင်ႁၢင်ႈ ဢမ်ႇၶႂ်ႈႁႂ်ႈယႃႈမဝ်းၵမ်ႁၢႆ ဢမ်ႇမီးၼမ်ႉၸႂ်ၸိုၼ်ႈသႂ် ပုၼ်ႈတႃႇၵူၼ်းမိူင်း၊ လႄႈဢမ်ႇၶႂ်ႈႁဵတ်းသၢင်ႈ လွင်ႈယုမ်ႇယမ်တေႃႇၵၼ် ၼၼ်ႉၵူၺ်း။

သင်ဝႃႈႁဵတ်းသၢင်ႈလႆႈၼင်ႇလၢတ်ႈမႃးပႃႈၼိူဝ်ၸိုင် တႃႇတေတိုၵ်းၵၼ်ၶိုၼ်းၼၼ်ႉတေဢမ်ႇမီး သင်ဝႃႈ တူၵ်းလူင်းၵၼ်လႆႈ ႁူမ်ႈသၢင်ႈလႆႈ ၼင်ႇလၢတ်ႈမႃးၼႆႉၵေႃႈ ၽွၼ်းလီမၼ်းႁူႉတိုၼ်းၵႂႃႇတူၵ်းတီႈ ၵူၼ်းမိူင်းလႄႈ ဝၢၼ်ႈမိူင်းတင်းမူတ်းၵူၺ်း၊ ၽူႈတႅမ်ႈယုမ်ႇယမ်ၼင်ႇၼႆ။

လွႆလဵင်းမိူင်းယႆ
(ၽူႈႁၢပ်ႇၵၢၼ်ၸိူဝ်ႉၸၢတ်ႈၵေႃႉၼိုင်ႈ)