ၵၢၼ်ဢုပ်ႇဢူဝ်းလွင်ႈငမ်းယဵၼ် ဢၼ်ႁွင်ႉမွၵ်ႇဝႆႉၸုမ်းဝႃႉ၊ ၸုမ်းမိူင်းလႃး ပႃးၸဵမ်ၸုမ်းဝၢၼ်ႈႁႆးၼၼ်ႉ ပိူဝ်ႈတႃႇလွင်ႈ ငမ်းယဵၼ်ၶိုပ်ႈၼႃႈၼၼ်ႉ လူင်ပွင်ၸိုင်ႈတဵင်းၸဵင်ႇၸႅင်ႈဝႃႈ ၵွပ်ႈတၢင်းမိူင်းရၶႅင်ႇယုင်ႈ ယၢင်ႈ လႄႈလိူၼ်ႈၶၢႆႉဝၼ်း ဢုပ်ႇဢူဝ်း ၵႂႃႇတၢင်းၼႃႈလူၺ်ႈဢမ်ႇတတ်းမၵ်းဝၼ်း။ ၾၢႆႇၼိုင်ႈၵေႃႈ တိုၵ်ႉပဵၼ်ပၢင်တိုၵ်းၵၼ်ယူႇ။

SSPP/SSA တင်းမၢၼ်ႈဢုပ်ႇလွင်ႈငမ်းယဵၼ် တီႈတူၼ်ႈတီး

ပိူဝ်ႈတႃႇႁူပ်ႉဢုပ်ႇဢူဝ်းလွင်ႈငမ်းယဵၼ်ထႅင်ႈ ၸွမ်းၼင်ႇၸုမ်းလူင်ပွင်ၸိုင်ႈတဵင်းၸဵင်ႇ ႁွင်ႉမွၵ်ႇဝႆႉၼၼ်ႉ တပ်ႉသိုၵ်းမိူင်းဝႃႉ ၽွမ်ႈႁူမ်ႈ UWSA ငဝ်ႈငုၼ်းပၢင်သၢင်း ဢၢင်ႈၵႂႃႇ မိူဝ်ႈဝၼ်းထိ 15/06/12 ၊ ၵူၺ်းၵႃႈဢမ်ႇပဵၼ်။ ၵွပ်ႈၸုမ်းလူင်ပွင်ၸိုင်ႈ တဵင်းၸဵင်ႇ ပွင်ႇလႅင်းၸႅင်ႈမႃးဝႃႈ ၵွပ်ႈတၢင်းမိူင်းရၶႅင်ႇသုၵ်ႉ သၵ်ႉလႄႈ လိူၼ်ႈၶၢႆႉၵၢၼ်ဢုပ်ႇဢူဝ်းၵႂႃႇတၢင်းၼႃႈထႅင်ႈ လူၺ်ႈဢမ်ႇတတ်းမၵ်းဝၼ်း/ၶၢဝ်းယၢမ်း- ၼႆယဝ်ႉ။

ပိူဝ်ႈတႃႇဢုပ်ႇဢူဝ်းလွင်ႈငမ်းယဵၼ်ၼႆႉ ဢူးတဵင်းၸေႃႇ ၵႅမ်ႁူဝ်ပဝ်ႈ 3 ၶွမ်ႊမတီႊၶိုင်ပွင်လွင်ႈငမ်းယဵၼ် မိူင်းႁူမ်ႈတုမ် တႅမ်ႈလိၵ်ႈႁွင်ႉမွၵ်ႇထိုင်ပႃႇတီႇမႂ်ႇသုင်ၸိုင်ႈတႆး/တပ်ႉသိုၵ်းၸိုင်ႈတႆး SSPP/SSA ငဝ်ႈငုၼ်းဝၢၼ်ႈႁႆး ႁႂ်ႈၵႂႃႇဢုပ်ႇတီႈ ၼေႇပျီႇတေႃႇ၊ ပိူဝ်ႈတႃႇႁႂ်ႈလွင်ႈငမ်းယဵၼ်ၶိုပ်ႈၼႃႈၶိုၼ်ႈသင်ႉ ထႅင်ႈလိူဝ်ၵဝ်ႇ။ ၼွၵ်ႈသေၼၼ်ႉ တပ်ႉသိုၵ်းဢူၺ်းလီၻီႊမွၵ်း ၶရႅတ်ႊတိၵ်ႊ NDAA မိူင်းလႃးၵေႃႈ လႆႈႁပ်ႉလိၵ်ႈမွၵ်ႇမိူၼ်ၼင်ႇ SSPP/SSA ၼင်ႇၵဝ်ႇ။ သင်ဝႃႈဢုပ်ႇဢူဝ်းဝႃႉယဝ်ႉတူဝ်ႈၸိုင် လႆႈငိၼ်းဝႃႈ တေသိုပ်ႇဢုပ်ႇဢူဝ်းၸုမ်းမိူင်းလႃး NDAA ။

ၵဵဝ်ႇၵပ်းလွင်ႈၼႆႉ ၸဝ်ႈၼႃႈတီႈၸၼ်ႉသုင်ၸုမ်းမိူင်းလႃး ၵေႃႉၼိုင်ႈလၢတ်ႈဝႃႈ- ၾၢႆႇမၢၼ်ႈၸႅင်ႈမႃးထႅင်ႈ ဝၼ်းထိ 17/06/12 (ၶမ်ႈဝႃး)ဝႃႈ- ႁႂ်ႈပဵၼ်လင်ဝၼ်းထိ 20 လိူၼ်ၵျုၼ်ႊၼႆႉ- ဝႃႈၼႆ။

ၸုမ်းဝႃႉ UWSA ၊ ၸုမ်းပၢင်သၢင်း NDAA ၼႆႉ လႆႈလူင်းလၢႆးမိုဝ်းလွင်ႈငမ်းယဵၼ်ဝႆႉၸွမ်းၵၼ်တင်း ဢူးဢွင်ႇတွင်း တင်းဢူးတဵင်းၸေႃႇ။ ဝႃႉလူင်းလၢႆးမိုဝ်းမိူဝ်ႈဝၼ်းထိ 06/09/11 ၊ မိူင်းလႃး 07/09/11 ၊ ၸုမ်း SSPP/SSA ဝၢၼ်ႈႁႆး မိူဝ်ႈ 28/01/12 ။

ၵူၺ်းၵႃႈ ၾၢႆႇၶိုင်ပွင်လွင်ႈငမ်းယဵၼ် ဢၼ်ၶိုၼ်းမႄးၶွတ်ႇၽွတ်ႈမႂ်ႇသေ ပိုၼ်ၽၢဝ်ႇမိူဝ်ႈ 19/05/12 ဢၼ်ၻွၵ်းတိူဝ်ႊၸၢႆးမွၵ်ႇ ၶမ်းပဵၼ်ႁူဝ်ပဝ်ႈၼၼ်ႉ ဢမ်ႇပႃးဢူးဢွင်ႇတွင်း၊ ၵူၺ်းၵႃႈ ဢူးတဵင်းၸေႃႇ တိုၵ်ႉပဵၼ်ၵႅမ် ႁူဝ်ပဝ်ႈထိ 3 (တၢင်တူဝ်ၽူႈတႅၼ်း သၽႃးၶဝ် 19 ၵေႃႉ)၊ ၵႅမ်ႁူဝ်ပဝ်ႈတၢင်တူဝ်ၾၢႆႇသိုၵ်း ပဵၼ်ၸွမ်သိုၵ်းလူင် ၸူဝ်းဝိၼ်း၊ ၵႅမ်ႁူဝ်ပဝ်ႈတၢင်တူဝ်ၾၢႆႇလူင်ပွင်ၸိုင်ႈ ပဵၼ်ဢူးဢွင်ႇမိၼ်း။

ၵၢၼ်ဢုပ်ႇဢူဝ်းလွင်ႈငမ်းယဵၼ်တၢင်းၼႃႈၼႆႉ တေႃႇထိုင်မိူဝ်ႈလဵဝ် ၸုမ်းဝႃႉလႄႈသင်၊ ၸုမ်းမိူင်းလႃးလႄႈ သင်တေဢုပ်ႇသင် လၢႆလၢႆပႆႇႁူႉသေတႃႉ တၢင်း SSPP/SSA ဝၢၼ်ႈႁႆးတႄႉ ၵမ်ႈၽွင်ႈလၢမ်းဝႃႈ တိုၼ်းတေ ပႃးလွင်ႈ ဢၼ်ၶဝ်တိုၵ်ႉလႆႈယိုဝ်းၵၼ် ယူႇမိူဝ်ႈလဵဝ်ၼႆႉ၊ ၵွပ်ႈဝႃႈတင်ႈတႄႇလႆႈလူင်းလၢႆးမိုဝ်းၵိုတ်းယိုဝ်း ၵၼ် မိူဝ်ႈဝၼ်းထိ 28/01/12 မႃးၼႆႉ တီႈဢေႇသုတ်း သွင်ၾၢႆႇလႆႈယိုဝ်းၵၼ် 18 ပွၵ်ႈယဝ်ႉ- ဝႃႈၼႆ။

လိုၼ်းသုတ်း သွင်ၾၢႆႇလႆႈပဵၼ်ပၢင်တိုၵ်းၵၼ်ထႅင်ႈ ဝၼ်းထိ 17/06/12 (မိူဝ်ႈဝႃး) ယၢမ်းဝၢႆးဝၼ်း 3 မူင်း တေႃႇထိုင်ၵၢင်ၶမ်ႈ 7 မူင်းပၢႆ၊ သိုၵ်းမၢၼ်ႈၶမယ 516 ၵႂႃႇယိုဝ်းသိုၵ်းတႆး SSPP/SSA (တပ်ႉၵွင် 187 လႄႈ 192) တပ်ႉၸုမ်း 36 ဢၼ်ပၵ်းၼႂ်း ၵႄႈတွင်ႁဵဝ်းတင်းမိူင်းဢွတ်ႇ ၼႂ်းၸႄႈဝဵင်းမိူင်းသူႈ၊ သိုၵ်းမၢၼ်ႈ တပ်ႉၶမယ 517 ၵႂႃႇထႅမ်ႁႅင်းသိုၵ်းထႅင်ႈ၊ ၾၢႆႇမၢၼ်ႈမီးလွင်ႈ ဝၢတ်ႇၸဵပ်းၼမ်ဝႆႉ၊ ၾၢႆႇမၢၼ်ႈယဵပ်ႇမၢၵ်ႇတၢႆ 2 ၵေႃႉ- ၼႆယဝ်ႉ။

ၵပ်းၵၢႆႇလွင်ႈၼႆႉ ယူႇတီႈ SSPP/SSA လႆႈတွင်ႈထၢမ်ၵႂႃႇတီႈ ၸဝ်ႈၼႃႈတီႈ G1 တီႈတိူင်းသိုၵ်းဝၼ်း ဢွၵ်ႇၵၢင် (ၶူဝ်လမ်)၊ ၵွပ်ႈသင်လႆႈမႃးယိုဝ်း။ G1 တွပ်ႇၵႄႈဝႃႈ- ၵွပ်ႈဝႃႈ SSA ၶဝ်ယိပ်းၵွင်ႈသေထဝ်ႇ ၵႂႃႇထဝ်ႇၶိုၼ်းယူႇ ၸွမ်းတၢင်း ၸင်ႇလႆႈၵႂႃႇယိုဝ်း- ဝႃႈၼႆ။

တၢင်း SSPP/SSA ဝႃႈ ပွတ်းတွင်ႁဵဝ်းမိူင်းဢွတ်ႇၼႆႉ ပဵၼ်တီႈႁဝ်းတူင်ႉၼိုင်တႃႇသေႇလႄႈ ႁဝ်းၵေႃႈတိုၼ်း ပႃးၵွင်ႈၵႂႃႇမႃး၊ ပေႃးသူၸဝ်ႈတေမႃးၵေႃႈ ထုၵ်ႇလႆႈၸႅင်ႈႁဝ်းၵွၼ်ႇ- ဝႃႈၼႆ။