ပူၼ်ႉမႃးမိူဝ်ႈဝၼ်းတီႈ 07/04/2014 ႁူဝ်ပဝ်ႈပႃႇတီႇၼူၵ်ႉယုင်း (NLD) ၸၢႆးတုၺ်ႈ တႃႈၶီႈလဵၵ်း တင်း ၶွမ်ႇပၼီႇ ဢၼ်ၶုတ်းၶမ်း ႁူဝ်ဝၢၼ်ႈၼႃးႁႆးလူင်၊ မႃးတီႈဝၢၼ်ႈၼႃးႁႆးလူင်သေ ႁွင်ႉၵူၼ်းဝၢၼ်ႈမႃးႁူပ်ႉဢုပ်ႇၵုမ်ၵၼ်သေဝႃႈ လွင်ႈၵူၼ်းဝၢၼ်ႈလုသုမ်းတီႈလိၼ် ယွၼ်ႉၵၢၼ်ၶုတ်းၶမ်းၼၼ်ႉ တေသၢႆႈတႅၼ်းပၼ်ၼိုင်ႈဢေႇၵႃႉ 22,000 ဝၢတ်ႇ (ငိုၼ်းထႆး)။ ႁႂ်ႈႁၢၼ်ႉၸႂ်သေ လူင်းလၢႆးမိုဝ်းပၼ်/ ႁပ်ႉဢဝ်ငိုၼ်း- ဝႃႈၼႆ။

ၵႃႈၵွၼ်ႇပူၼ်ႉမႃးလၢႆပီၼၼ်ႉ လူင်ပွင်ၸိုင်ႈမၢၼ်ႈပၼ်ပႃႇမိတ်ႉ (ဢၼုၺၢတ်ႈ) ၶုတ်းမိူင်ၶမ်း ၶၢဝ်းတၢင်းႁိုင် 3-4-5 ပီ၊ မိူဝ်ႈလဵဝ် ပၼ်ပီလႂ်ပီၼၼ်ႉၵူၺ်း။ ၵွပ်ႈၶဝ်တေလႆႈ တေႃႇဢႃႇယုၶွၼ်ႇၶုတ်းၶမ်း လႄႈၶဝ်ၵေႃႈမႃးတဵၵ်းႁိပ်ႈ ၵူၼ်းဝၢၼ်ႈ လူင်းလၢႆးမိုဝ်း။ ၵူၺ်းၵႃႈ ၵူၼ်းဝၢၼ်ႈၼႂ်းပိုၼ်ႉတီႈလၢတ်ႈဝႃႈ ပေႃးသၢႆႈတႅၼ်းပၼ်ၵႃႈတီႈလိၼ် ၼိုင်ႈဢေႇၵႃႉ 22,000 ဝၢတ်ႇ၊ ႁဝ်းတေၵိၼ်ႁၢႆၸၢႆႇသဵင်ႈၵူၺ်း တေဢမ်ႇမီးတီႈႁဵတ်းၵၢၼ်ႁႃၵိၼ်လဵင်ႉတွင်ႉၵႂႃႇၶၢဝ်းယၢဝ်းမိူဝ်းၼႃႈ၊ လွင်ႈၼႆႉ ပႆႇၸႂ်ႈလၢႆးၵႄႈလိတ်ႈတီႈလီ- ဝႃႈၼႆ။

ထႅင်ႈလွင်ႈၼိုင်ႈ ၵူၼ်းဝၢၼ်ႈၼႂ်းပိုၼ်ႉတီႈၶဝ်မႆႈၸႂ်ဝႃႈ- ပေႃးမီးၵၢၼ်သိုပ်ႇၶုတ်းၶမ်းၵႂႃႇၸိူင်ႉၼႆတိၵ်းတိၵ်း ဝၢၼ်ႈႁဝ်း တၵ်းႁၢမ်းဢမ်ႇႁၢင်ႉ။ မိူဝ်ႈပႃႇတီႇၵၢၼ်မိူင်း တင်း ၶွမ်ႇပၼီႇၶုတ်းၶမ်း မႃးတဵၵ်းႁႂ်ႈလူင်းလၢႆးမိုဝ်း ဝၼ်းတီႈ 07/04/14 ၵူၼ်းဝၢၼ်ႈၶဝ်ပႆႇယွမ်းလူင်းလၢႆးမိုဝ်း။ ၶွမ်ႇပၼီႇၶဝ်ၵေႃႈ လၢတ်ႈဝႆႉဝႃႈ တေမႃးထႅင်ႈ။ ၵူၼ်းဝၢၼ်ႈၼႂ်းပိုၼ်ႉတီႈၶဝ်ၵေႃႈ ႁူၺ်းသူၼ်းၵူၼ်းဝၢၼ်ႈဝႆႉဝႃႈ တေဢမ်ႇယွမ်းလူင်းလၢႆးမိုဝ်း။ ပေႃးဝႃႈ ဝၢႆးသွၼ်းၼမ်ႉသင်ၶၢၼ်(သၢင်းၵျၢၼ်ႇ)ယဝ်ႉ ၶွမ်ႇပၼီႇၶုတ်းၶမ်းၶဝ် တေမႃးတဵၵ်းႁႂ်ႈၵူၼ်းဝၢၼ်ႈလူင်းလၢႆးမိုဝ်းထႅင်ႈ။ လွင်ႈၼႆႉ ၵူၼ်းဝၢၼ်ႈၼႂ်းပိုၼ်ႉတီႈၵေႃႈ ၶႂ်ႈႁွင်ႉ ဢဝ်ၵူၼ်းႁဵတ်းၵၢၼ်သိုဝ်ႇၶၢဝ်ႇၶဝ်ၵႂႃႇဢဝ်ၶၢဝ်ႇ/ထၢႆႇႁၢင်ႈ/ တွင်ႈထၢမ်ၵၢင်ၵူၼ်းဝၢၼ်ႈ- လႆႈႁူႉၼင်ႇၼႆ။

ၶၢဝ်းတၢင်း 2-3 ပီမႃးၼႆႉ လၢႆလၢႆၶွမ်ႊပၼီႊ မိူၼ်ၼင်ႇၶွမ်ႊပၼီႊၸၢႆးတိပ်ႉ/ လွႆၶမ်းလူင်/ ၸၢႆးမွၼ်းၶမ်း/ KML ၸိူဝ်းၼႆႉ ႁူမ်ႈမိုဝ်းၵၼ်တင်းၸုမ်းယိပ်းၵွင်ႈၵၢင်ႇၼႂ်းပိုၼ်ႉတီႈသေ ၶုတ်းၶမ်း ၶိုင်ထွင်ၶမ်း လၢင်ႉၶမ်း၊ ပွတ်းဝၢၼ်ႈ ၼႃးႁႆးလူင်၊ ဝၢၼ်ႈၼေႃႇ ၼႂ်းဢိူင်ႇမိူင်းလဵၼ်း ၵိင်ႇၸႄႈဝဵင်းတႃႈလိူဝ်ႇ ၸႄႈတွၼ်ႈတႃႈၶီႈလဵၵ်း ၸိုင်ႈတႆးပွတ်းဢွၵ်ႇ။ ႁဵတ်းႁႂ်လိၼ်သူၼ်ႁႆႈၼႃးၵူၼ်းဝၢၼ်ႈၵူၼ်းမိူင်းလုၵွႆ၊ ဢမ်ႇၽုၵ်ႇၵိၼ်လႆႈ။ မႄႈၼမ်ႉႁွင်ႈ ၼမ်ႉၵႄးၸိူဝ်းၼႆႉ ၶုၼ်ႇဢူၼ်၊ ပႃးထၢတ်ႈၶေႊမီႊၶိူဝ်ႊလ်လႄႈ ယဵၼ်းပဵၼ်ၼမ်ႉပႅတ်ႈလၢႆ၊ ဢမ်ႇၸႂ်ႉလႆႈ။

ဢွင်ႈတီႈၶုတ်းၶမ်း ပွတ်းဝၢၼ်ႈၼႃးႁႆးလူင် ဢိူင်ႇမိူင်းလဵၼ်းၼႆႉ မီးၾၢႆႇႁွင်ႇဝဵင်းတႃႈၶီႈလဵၵ်း၊ ပေႃးၶီႇလူတ်ႉၶိူင်ႈ ၵႂႃႇၶၢဝ်းတၢင်းမွၵ်ႈ 1 ၸူဝ်ႈမူင်း။

ယွၼ်ႉပိူဝ်ႈၶဝ်ၶုတ်းၶမ်း တၢင်းႁူဝ်ဝၢၼ်ႈသေ ပွႆႇၼမ်ႉလၢႆႇပႃးထၢတ်ႈၶေးမီးၶိူဝ်းလ် ဢၼ်ၸၢင်ႈပဵၼ်ၽေး လႆလူင်း ၸူးမႄႈၼမ်ႉ၊ လွင်ႈမႃးၸွမ်းၼမ်ႉ။ ပွႆႇၶီႈပိူဝ်ႉၶီႈၵူမ်ႇၶီႈဢုင် ဢၼ်ပဵၼ်လိၼ်ပဵၼ်သၢႆး လႆလူင်းလတ်းၶဝ်ႈဝၢၼ်ႈ၊ လတ်းတူင်ႈၼႃးၵူၼ်းဝၢၼ်ႈၵူၼ်းမိူင်းၸိူဝ်းၼႆႉလႄႈ ႁဵတ်းႁႂ်ႈလိၼ်သူၼ် ႁႆႈ ၼႃးၵူၼ်းမိူင်းမွၵ်ႈ 200 ဢေႇၵႃႉပၢႆလႆႈ လုၵွႆ၊ မေႃယႃ(သြႃႇမ)ၼၢင်းလႃႈ ၵေႃႉႁဵတ်းၵၢၼ်ၾၢႆႇယူႇလီပွတ်းတွၼ်ႈၼၼ်ႉ လၢတ်ႈ။