ပၼ်ႁႃယႃႈမဝ်းၵမ်ၼႂ်းမိူင်းတႆးၽႄႈမၢၵ်ႈၼမ်လၢႆတေႃႇ ႁၢၼ်ႉဝၼ်းၼႆႉၼၼ်ႉ သူၼ်ႇၼိုင်ၵေႃႈ ပဵၼ်ယွၼ်ႉသိုၵ်းၼႂ်းမိူင်း လႄႈၸုမ်းလႂ်ၸုမ်းၼၼ်ႉ ပိူဝ်ႈႁႃငိုၼ်းၵေႃႇတင်ႈတပ်ႉသိုၵ်း ၵေႃႇတင်ႈဢဵၼ်ႁႅင်း ၵွင်ႈၵၢင်ႇ ဢမ်ႇၵွမ်ႉသိုၵ်းၸုမ်းယိပ်းၵွင်ႈၵၢင်ႇၵူၺ်း ၸုမ်းသိုၵ်းမၢၼ်ႈၵေႃႈ ပဵၼ်တူဝ်ထႅၼ်ႈမၼ်း။

ယွၼ်ႉယႃႈမဝ်းၵမ်ၼႆႉသေ ပၼ်ႁႃမၼ်းၽႄႈၸွတ်ႇၵႂၢင်ႈထိုင်ၵူၼ်းဝၢၼ်ႈၵူၼ်းမိူင်း ၼႂ်းမိူင်းတႆးယႂ်ႇလူင် မႃးၵူႈမိုဝ်ႉ ၵူႈဝၼ်းလႄႈ လႆႈတုၵ်းယွၼ်းထိုင်ၻွၵ်ႉတူဝ်ႇၸၢႆးမွၵ်ႇၶမ်း ၵႅမ်ၸွမ်ၸိုင်ႈၵေႃႉတီႈ 2 လႄႈၸၢႆးဢၢႆႈပဝ်း ႁူဝ်ပဝ်ႈပႃႇတီႇ သိူဝ်ၽိူၵ်ႇ ၸွႆႈၵႄႈလိတ်ႈပၼ်။

ပူၼ်ႉမႃးမိူဝ်ႈဝၼ်းတီႈ 15 လိူၼ်မၢတ်ႉၶျ် မွၵ်ႈယၢမ်း 11.30 မူင်း တီႈဝၢၼ်ႈၽူၺ်းႁုင်း ၸႄႈဝဵင်းလၢႆးၶႃႈၼၼ်ႉ ၵေႃႉပဵၼ်ပေႃႈ မဝ်းမႃႈယႃႈမႃႉသေဢဝ်မိတ်ႈ လိုပ်ႈလမ်းတႅင်းမေးမၼ်း။ ၵူၺ်းၵႃႈမေးမၼ်းလႅၼ်ႈပၢႆႈ ဢွၵ်ႇႁိူၼ်း ပူၼ်ႉလွတ်ႈၵႂႃႇသေတႃႉ သမ်ႉလႆႈႁၼ်လုၵ်ႈယိင်းဢွၼ်မၼ်း 9 လိူၼ်တိုၵ်ႉၼွၼ်းယူႇလႄႈ ဢဝ်မိတ်ႈၼႂ်းမိုဝ်းမၼ်း ၵႂႃႇတႅင်းလုၵ်ႈယိင်းဢွၼ်ႇမၼ်း 9 လိူၼ်ၼၼ်ႉ 8 ၵမ်း တၢႆထင်တီႈၼႂ်းႁိူၼ်း - ၼႆယဝ်ႉ။

ယွၼ်ႉမဝ်းယွင်ႇမႃႈယႃႈမႃႉသေ ဢမ်ႇႁူႉဢမ်ႇႁၼ် လုၵ်ႈဢွၵ်ႇတွင်ႉဢွၵ်ႇသႆႈ ဢၼ်ႁၵ်ႉႁွမ်ႁူမ်ႇတူမ်း ယုင်းဢမ်ႇပၼ်ၸပ်း မတ်းဢမ်ႇပၼ်ၶူပ်း ဢုမ်ႈဢုမ်ႈႁွပ်ႇႁွပ်ႇ ႁေႃႇႁေႃႇတူမ်းတူမ်းမႃးၸိူဝ်းၼၼ်ႉ ၸူဝ်ႈၵႃႈၽႅပ်ႉတႃဢွၼ်ၵူၺ်း မိူဝ်ႈယႃႈမႃႉၶဝ်ႈၼႂ်း သူပ်းၼႂ်းပၢၵ်ႇ ၼႂ်းတူဝ်ၼႂ်းၸႂ်ယဝ်ႉၵေႃႈ လိုမ်းဝၢၼ်ႈ လိုမ်းမိူင်း လိုမ်းလုၵ်ႈလိုမ်းမေး လိုမ်းတၢင်းႁၵ်ႉတၢင်းပႅင်း ဢၼ်ႁူင်ႁႅၼ် ၶႅၼ်မႃးတင်းၸူဝ်ႈတင်း ပၢၼ်ၼၼ်ႉ သုတ်းသဵင်ႈႁၢႆၵႂႃႇၸွမ်းယႃႈမႃႉပႅတ်ႈမူတ်းသဵင်ႈ။ ၵူၼ်းဝၢၼ်ႈၵူၼ်းၶူင်ႇ ၵူၼ်းႁူႉၸၵ်းမိုတ်းၵိုဝ်း ၵူၼ်းတင်းၼမ်တင်းလၢႆ မိူဝ်ႈလႆႈယိၼ်းၸိူင်ႉၼႆ ငိၼ်းထိုင်ဢူၵ်းထိုင်ၸႂ် ပေႃးဢမ်ႇသုတ်းဢမ်ႇသဵင်ႈ။

ၸိူင်ႉႁိုဝ်ၵေႃႈလီ ၾၢႆႇၼိုင်ႈၵေႃႈ ပူၼ်ႉမႃးမိူဝ်ႈၶၢဝ်းယၢမ်း 10.30 မူင်း ဝၼ်းတီႈ 5 လိူၼ်ဢေးပရိူဝ်ႇလ်ၼႆႉ တပ်ႉသိုၵ်းၵူၼ်းမိူင်း(တပ်ႉၸုမ်း 7 ၵဝ်ႇၶွင် ပႃႇတီႇမႂ်ႇသုင်ၸိုင်ႈတႆးလႄႈတပ်ႉသိုၵ်းၸိုင်ႈတႆး) လႆႈပိုတ်ႇႁူင်းတိုတ်းယႃႈ တီႈၵိင်ႇႄၸႈဝဵင်းၵႃလိ ၸႄႈဝဵင်းၵုၼ်ႁဵင်လႄႈမီးၾၢႆႇၽွင်းဢၼ်ၵဵဝ်ႇၶွင်ႈလၢႆၸုမ်း မႃးပိုတ်ႇပၢင်ပၼ် - ၼႆယဝ်ႉ။