မိူဝ်ႈဝႃးပွတ်းၼႂ် ယွၼ်ႉပၢင်တိုၵ်းသိုၵ်းမၢၼ်ႈတင်းသိုၵ်းၶၢင် ပွတ်းလႅၼ်လိၼ်မိူင်းၶၢင်ႁၢဝ်ႈႁႅင်း၊ ၵူၼ်းဝၢၼ်ႈတႆး ဢမ်ႇယွမ်းမွၵ်ႈသိပ်းဝၢၼ်ႈ ပၢႆႈၶဝ်ႈပိုင်ႈႁူမ်ႈမိူင်းၶႄႇ။

ဝၼ်းတီႈ 10/04/2014 (မိူဝ်ႈဝႃး) ပွတ်းၼႂ်၊ ၵူၼ်းၼႂ်းပိုၼ်ႉတီႈ ၼႂ်းဝၢၼ်ႈၼႂ်းဢိူင်ႇ ထုင်ႉလွႆႁူဝ်သိူဝ် ပွတ်းဝၢၼ်ႈဝဵင်းလူင် ၸႄႈဝဵင်းဝၢၼ်ႈၸႄႈ၊ ၸႄႈမိူင်းၶၢင် လၢႆဝၢၼ်ႈ ဢွၼ်ၵၼ်ပၢႆႈၽေး ၶဝ်ႈၸူးမိူင်းၶႄႇ၊ ယွၼ်ႉသိုၵ်းမၢၼ်ႈ တင်းသိုၵ်းၶၢင် ပဵၼ်ပၢင်တိုၵ်းၵၼ်ႁၢဝ်ႈႁႅင်း ပွတ်းတွၼ်ႈၼၼ်ႉ။

သိုၵ်းမၢၼ်ႈဢၼ်မႃးတိုၵ်းသိုၵ်းၶၢင် (KIA) ၼႆႉ ပဵၼ်တပ်ႉၸုမ်းလူင် (တပ်ႉမ) 88 လုၵ်ႉတၢင်းတိူင်းမၵူၺ်းမႃး။ ၸႂ်ႉသၢႆသိုၵ်း 2 သၢႆသေယၼ်ႇၶိုၼ်ႈ၊ ယိုဝ်းၵွင်ႈလူင်သႂ်ႇတပ်ႉပၢင်သဝ်းသိုၵ်းၶၢင်၊ သွင်ၾၢႆႇလႆႈတိုၵ်းယိုဝ်းၵၼ် ႁၢဝ်ႈႁႅင်း။ တေႃႇထိုင်မိူဝ်ႈဝႃးၵၢင်ၶမ်ႈၼႆႉ ယင်းတိုၵ်ႉယိုဝ်းၵၼ်ယူႇ။ လႆႈႁူႉဝႃႈ ယွၼ်ႉပိူဝ်ႈၾၢႆႇသိုၵ်းမၢၼ်ႈ ဢမ်ႇလိူဝ်လႆႈ ၶေႃႈၸီႉသင်ႇႄလႈ လႅၼ်ႈၶိုၼ်ႈတိၵ်းတိၵ်း၊ လႅပ်ႈတေ တၢႆၼမ်ဝႆႉ။ သိုၵ်းမၢၼ်ႈ ဢၼ်ႁွတ်ႈၽႅဝ်တီႈႁူင်းယႃၼမ်ႉၶမ်း မီး 40 ပၢႆ- ၽူႈၵွၼ်းတပ်ႉၵွင်ၼႂ်း KIA လၢတ်ႈတီႈၽူႈတွႆႇႁွၵ်ႈ ၼင်ႇၼႆ။

တီႈႁူင်းႁဵၼ်းဝၢၼ်ႈၸၢၼ်း ၼႂ်းဢိူင်ႇမၢၼ်ႈဝဵင်းလူင်ၼၼ်ႉ မၢၵ်ႇလူင်သိုၵ်းမၢၼ်ႈတူၵ်းသႂ်ႇလႄႈ ႁူင်းႁဵၼ်းလူႉၵွႆၽွင်ႈ၊ ၵူၺ်းၵႃႈ ဢမ်ႇမီးၵူၼ်းတိူဝ်ႉဝၢတ်ႇၸဵပ်း။ ႁဝ်းၶႃႈၵူၼ်းဝၢၼ်ႈတင်းဝၢၼ်ႈၼႆႉ ဢွၼ်ၵၼ်ပၢႆႈၶဝ်ႈၸူးမိူင်းၶႄႇ၊ ယွၼ်ႉပိူဝ်ႈ တီႈမိူင်းၶႄႇမီးပီႈၼွင်ႉ။ ၵူၼ်းၸိူဝ်းဢမ်ႇမီးပီႈၼွင်ႉၼၼ်ႉ ပၢႆႈၵႂႃႇၼွၼ်းတီႈ ဝတ်ႉ/ၵျွင်းၼမ်ႉလဝ်း လႄႈ တီႈဝတ်ႉ ၼွင်တဝ်းၸိူဝ်းၼႆႉ။ ဢၼ်ပၢႆႈၸိူဝ်းၼႆႉ ဝၢၼ်ႈတႆး 10  ဝၢၼ်ႈပၢႆ၊ ႁူဝ်ၵူၼ်းႁဵင်ပၢႆ- ၸၢႆးယီႈ ၵေႃႉပၢႆႈႁွတ်ႈၽႅဝ် လႅၼ်လိၼ်မိူင်းၶႄႇ လၢတ်ႈ။

ဝၢၼ်ႈဢၼ်လႆႈပၢႆႈၸိူဝ်းၼၼ်ႉ မိူၼ်ၼင်ႇဝၢၼ်ႈႁူၺ်ႈ၊ ဝၢၼ်ႈမွၼ်း၊ ႁူဝ်ႁိၼ်၊ ၵွင်းၼွင်၊ ၵုၼ်ၵႅင်း၊ ၼွင်လုၵ်း၊ ၼွင်လူမ်ႇ၊ သူၼ်ၶႃး ၸိူဝ်းၼႆႉ၊ ပဵၼ်ပိုၼ်ႉတီႈၼႃႈလိၼ်ၶွင်သိုၵ်းၶၢင် (KIA) တပ်ႉၸုမ်း 3 ၵုမ်းၵမ်။