ဝၢႆးသိုၵ်းမၢၼ်ႈထွၼ်ဢွၵ်ႇၼႂ်းဢိူင်ႇႁႃႈဝၢၼ်ႈၵႂႃႇတၢင်းပၢင်ႇၸေႈဝၼ်းတီႈ 21/07/2014 ၊ ပၢင်တိုၵ်းယဝ်ႉၵႂႃႇယွၼ်ႉ ထုၵ်ႇတပ်ႉသိုၵ်းၸိုင်ႈတႆး (SSPP/SSA) လိုပ်ႈတိုၵ်းယဝ်ႉတေႃႇထိုင်မိူဝ်ႈၼႆႉဝၼ်းတီႈ 23/07/2014 ၵူၼ်းပၢႆႈၽေးသိုၵ်း ၸိူဝ်းမီးတီႈဝတ်ႉဝၢၼ်ႈဝၢပ်ႈၸႄႈဝဵင်းၵေးသီးယၢမ်းလဵဝ်တင်းမူတ်းမီး 270 ပၢႆ။ မိူဝ်ႈလဵဝ်ၵူၼ်းပၢႆႈၽေးၵမ်ႈၽွင်ႈၵေႃႈ ပွၵ်ႈႁိူၼ်း၊ ၵမ်ႈၽွင်ႈၵေႃႈပႆႇႁတ်းပွၵ်ႈႁိူၼ်း၊ ၵွပ်ႈပႆႇဝၢင်းၸႂ်ငဝ်းလၢႆးၵၢၼ်သိုၵ်း၊ ယင်းတိုၵ်ႉၶၢတ်ႇႈတၢင်းၸွႆႈထႅမ် ၶူဝ်းၶွင် ၸႂ်ႉသွႆၵွၼ်ႈသီ၊ ၽွင်သၵ်ႉၶူဝ်း၊ယႃႈသီၶဵဝ်ႈၸိူဝ်းၼႆႉ- လႆႈႁူႉၼင်ႇၼႆ။

မိူဝ်ႈလဵဝ်သိုၵ်းမၢၼ်ႈၼႆႉမႃးၶွၼ်ႈတုမ်ယူႇတီႈၼမ်ႉပုၵ်းၼမ်ဝႆႉ၊ ပေႃးဝႃႈၶဝ်လေႃႇတိုၵ်းတပ်ႉဝၢၼ်ႈတၢပ်ႈယဝ်ႉ ၶဝ်ၸၢင်ႈ မႃးလေႃႇတိုၵ်းတီႈတႃႈၽႃသွင်ႇ။ ပွတ်းၶူဝ်တႃႈၽႃသွင်ႇၼၼ်ႉသိုၵ်းမၢၼ်ႈတိုၵ်ႉပၵ်းယူႇသေထႅမ်ႁႅင်းသိုၵ်းဝႆႉယူႇ၊ ႁဵတ်း ႁႂ်ႈသိုၵ်းမၢၼ်ႈတင်းသိုၵ်းတႆးယင်းတိုၵ်ႉၶဵင်ႈၶႅင်ၵၢၼ်သိုၵ်းတေႃႇၵၼ်ငႃၵၼ်ဝႆႉယူႇပွတ်းတွၼ်ႈၼၼ်ႉ- ၸဝ်ႈၼႃႈတီႈ ၼႂ်း တပ်ႉသိုၵ်းၸိုင်ႈတႆး (SSPP/SSA)ၵေႃႉၼိုင်ႈလၢတ်ႈၼင်ႇၼႆ။

ဢိင်ၼိူဝ်သိုၵ်းမၢၼ်ႈ ထွၼ်ဢွၵ်ႇၵႂႃႇၼႂ်းဢိူင်ႇႁႃႈဝၢၼ်ႈ ပၢင်တိုၵ်းယဝ်ႉၵႂႃႇသေ ၵူၼ်းဝၢၼ်ႈၵမ်ႈၽွင်ႈၵေႃႈ ႁူမ်ၸူမ်းသေ ၶိုၼ်းပွၵ်ႈမိူဝ်းႁိူၼ်း၊ ၵူၺ်းၵႃႈ ၵမ်ႈၽွင်ႈတႄႉပႆႇဝၢင်းၸႂ်၊ ဢမ်ႇႁူႉဝႃႈသိုၵ်းမၢၼ်ႈ တေမႃးၶိုၼ်းမိူဝ်ႈလႂ်လႄႈ တိုၵ်ႉမူၵ်းယူႇ ၼႂ်းထိူၼ်ႇၸိူဝ်းၼႆႉၵေႃႈမီး- ဝႃႈၼႆ။

ၵဵဝ်ႇၵပ်းလွင်ႈၼႆႉၵူၼ်းၸမ်ၸႂ်သိုၵ်းမၢၼ်ႈတီႈၵေးသီးၵေႃႉၼိုင်ႈလၢတ်ႈဝႃႈ- တီႈၵေးသီးၼႆႉငိၼ်းၶၢဝ်ႇဝႃႈသိုၵ်းမၢၼ်ႈ ၶဝ်ႁၢင်ႈႁႅင်းသိုၵ်းပိူဝ်ႈတႃႇၵႂႃႇလေႃႇတိုၵ်းသိုၵ်းတႆးထႅင်ႈ၊ ပေႃးထွမ်ႇၶဝ်လၢတ်ႈတႄႉဝႃႈၶဝ်ၵေႃႈဢမ်ႇလိူဝ်လႆႈၸၼ်ႉပႃႈ ၼိူဝ်၊ ပေႃးၵႂႃႇတိုၵ်းသိုၵ်းတႆးၼႆ ၶႃၶဝ်ၶွၼ်ၼိုင်ႈမိူၼ်ယဵပ်ႇယူႇၼႂ်းပႃႇႁဵဝ်ႈဝႆႉယဝ်ႉ၊ တေတၢႆႁိုဝ်တေလိပ်းႁိုဝ် ဢမ်ႇႁူႉ၊ ၵူၺ်းၵႃႈၶေႃႈၸီႉသင်ႇတၢင်းၼိူဝ်ၼႆႉ ပေႃးဝႃႈတိုၵ်းလႆႈတပ်ႉသိုၵ်းတႆးတီႈႁိမ်းႁႃႈဝၢၼ်ႈၼႆၸိုင် တေၵုမ်းလႆႈပႃး တႃႈၽႃသွင်ႇၵဵင်းလိူၼ်ၸိူဝ်းၼႆႉ။ ၵဵဝ်ႇၵပ်းလွင်ႈၽႅၼ်ၵၢၼ်သိုၵ်းသေတႃႇတေၵႂႃႇတိုၵ်းတပ်ႉသိုၵ်းတႆးထႅင်ႈၼၼ်ႉ လႆႈငိၼ်းဝႃႈသိုၵ်းမၢၼ်ႈႁၢင်ႈႁႅၼ်းပႃးတပ်ႉၶွမ်ႊမၢၼ်ႊတူဝ်ႊၸွႆႈထႅမ် - ဝႃႈၼႆ။

ဢိင်ၼိူဝ်ၼႂ်းတပ်ႉသိုၵ်းၸိုင်ႈတႆး (SSPP/SSA) တင်းသိုၵ်းမၢၼ်ႈပဵၼ်ပၢင်တိုၵ်းၵၼ်သေ ၵူၼ်းဝၢၼ်ႈပၢင်ႇၸေႈ၊ ဝၢၼ်ႈၵျွင်း၊ ဝၢၼ်ႈပႃတႅပ်း၊ ဝၢၼ်ႈပၢင်ႇမူင်ႈ၊ ဝၢၼ်ႈၶၢၼ်၊ ဝၢၼ်ႈမႆႉၵေး ၸိူဝ်းၼႆႉ လႆႈပၢႆႈယၢၼ်ႁိူၼ်းယေးတီႈယူႇ။ ၵူၼ်းဝၢၼ်ႈၵမ်ႈၽွင်ႈပၢႆႈၵႂႃႇတီႈဝတ်ႉ(ၵျွင်း)မုၼ်ၸဝ်ႈတီႈ ဝၢၼ်ႈဝၢပ်ႈ။ ၵမ်ႈၼမ်တႄႉတိုၵ်ႉပၢႆႈမူၵ်းယူႇၸွမ်းထိူၼ်ႇ ၸွမ်းယုမ်း။