ဝၼ်းတီႈ 23/07/2014 (မိူဝ်ႈဝႃး) ၵၢင်ၶမ်ႈယၢမ်း 8 မူင်းၶိုင်ႈ၊ ၵူၼ်းၼုမ်ႇဝဵင်းၼမ်ႉၶမ်း ၸိုဝ်ႈႁွင်ႉၸၢႆးဢၢႆႈပွင်း (ႁွင်ႉၸၢႆးၼုမ်ႇၶိူဝ်း) ဢႃႇယု 24 ပီ၊ ပေႃႈမႄႈၸိုဝ်ႈ လုင်းၸေႃးဝုၼ်း + ပႃႈၼၢင်းၶမ်းမုင်ႇ ယူႇပွၵ်ႉလူင် ဝဵင်းၼမ်ႉၶမ်း၊ ထုၵ်ႇၵူၼ်းၼႂ်းၸုမ်းပျီႇတုၸိတ်ႉ ၸုမ်းၼိုင်ႈ ဢဝ်ၵွင်ႈယိုဝ်းတၢႆပႅတ်ႈ တီႈပွၵ်ႉၼွင်ၸၢင်ႉ ၼႂ်းၵၢင်ဝဵင်းၼမ်ႉၶမ်း။

ၵဵဝ်ႇၵပ်းလွင်ႈၼႆႉ ၵူၼ်းၼႂ်းၸုမ်းပျီႇတုၸိတ်ႉမျဵဝ်ႉမႃႉ ၵေႃႉၼိုင်ႈလၢတ်ႈဝႃႈ- ၶႃသွင်ၵေႃႉၼႆႉ လုၵ်ႉတၢင်း ၼွင်ၶၢင်သေ ၶီႇလူတ်ႉၶိူင်ႈမႃးတၢင်းၼွင်ၸၢင်ႉ၊ တီႈပွၵ်ႉၵွင်းၼွင်ၸၢင်ႉၼၼ်ႉ သမ်ႉမီးၸုမ်းပျီႇတုၸိတ်ႉ ဢဝ်ႁူမ်ႇလူမ်ႈဝႆႉ။ ပျီႇတုၸိတ်ႉၶဝ်ၵေႃႈ ႁႄႉၵူတ်ႇထတ်း ၸွပ်ႇထၢမ်။ ပၼ်ပူၼ်ႉၵႂႃႇသေတႃႉ ဝၢႆးၼၼ်ႉ ထုၵ်ႇၵူၼ်းၼႂ်းၸုမ်းပျီႇတုၸိတ်ႉၶဝ် လမ်းၸွမ်းတၢင်းလင်ယဝ်ႉၵေႃႈ ဢဝ်ၵွင်ႈၸမ်ႈၼႃႈၽၢၵ်ႇသေ ယိုဝ်းတၢႆထင်တီႈၵမ်းလဵဝ်။

ၵူၼ်းဢၼ်ယူႇႁိမ်းၸမ်ၵၼ် ႁူႉႁၼ်ၸွမ်းလၢတ်ႈၼႄဝႃႈ- ၵူၼ်းၵေႃႉဢၼ်ၶီႇသွၼ်ႉလူတ်ႉၶိူင်ႈၸၢႆးပွင်းပွင်း မႃးၸွမ်း ၵၼ်  ပဵၼ်ၵူၼ်းပွၵ်ႉမူဝ်ၶမ်း ၸို်ဝ်ႈႁွင်ႉၸၢႆးဢၢႆႈၵူင်ႇ (ႁွင်ႉၸၢႆးၼေႃႇၶမ်း)၊ မၼ်းၼႆႉ  ပေႃးဝႃႈတႆးၵေႃႉမၼ်း ထုၵ်ႇယိုဝ်းတၢႆ မၼ်းၵေႃႈတူၵ်းၸႂ်/ ၵႂင်သေ လၢၵ်ႈဢဝ်လူတ်ႉၶိူင်ႈ ၶီႇမိူဝ်းႁိူၼ်းမၼ်းပွၵ်ႉမူဝ်ၶမ်း၊ မိူဝ်းၽႅဝ်တီႈႁိူၼ်းယဝ်ႉ လၢႆႈသိူဝ်ႈလၢႆႈၶူဝ်းယဝ်ႉ ၶိုၼ်းပွၵ်ႈမႃး ႁွပ်ႇၶၢပ်ႈတူဝ်တႆးၵေႃႉမၼ်းၶိုၼ်း။ မိူဝ်ႈၽွင်းၸၢႆးဢၢႆႈၵူင်ႇ တိုၵ်ႉၵွတ်ႇတႆးၵေႃႉမၼ်းသေ ႁွင်ႉပၢဝ်ႇယူႇၼၼ်ႉ ပျီႇတုၸိတ်ႉၶဝ်မႃးလၢတ်ႈမၼ်းဝႃႈ ပၢႆႈလႄႈပၢႆႈလႄႈ၊ ပေႃးမႂ်းဢမ်ႇပၢႆႈၵေႃႈ တေယိုဝ်းမႂ်းတၢႆၸွမ်းထႅင်ႈ- ဝႃႈၼႆ။

ၶၢပ်ႈတူဝ်တၢႆ ၸၢႆးဢၢႆႈပွင်းၼႆႉ ပျီႇတုၸိတ်ႉၶဝ် ဢဝ်တၢင်ႇၵႃး ၵႂႃႇတၢင်းဝဵင်းသႃႇ (ပွၵ်ႉၵွင်းလွႆ ဝဵင်းၼမ်ႉၶမ်း) -ၵူၼ်းဢၼ်ယူႇႁိမ်းၵိၼ်ၸမ် ႁၼ်သိုဝ်ႈၼႃႈတႂ်ႈတႃၵေႃႉၼိုင်ႈလၢတ်ႈ။

ၸၢႆးဢၢႆႈပွင်း (ၸၢႆးၼုမ်ႇၶိူဝ်း) ၵေႃႉဢၼ်တၢႆၵႂႃႇၼႆႉ ထုၵ်ႇၸီႉၼႄးဝႃႈ- ပဵၼ်ၵူၼ်းၶွင်တပ်ႉသိုၵ်းၸိုင်ႈတႆး၊ ယိပ်းၵွင်ႈပွတ်း ရတ်ႉသျိူဝ်ႊ။ ၸဝ်ႈၼႃႈတီႈၼႂ်းပိုၼ်ႉတီႈႁၢင်ႈႁႅၼ်း ပိူဝ်ႈတႃႇၶပ်းၶိုင် ပိုတ်ႇၶၻီး (ဢမု) ၼႆႉထႅင်ႈၵွၼ်ႇ- ၾၢႆႇၽွင်းငမ်းၸႄႈဝဵင်းၼမ်ႉၶမ်း ၵေႃႉၼိုင်ႈလၢတ်ႈ။

လွင်ႈဢၼ်ၸဝ်ႈၼႃႈတီႈၾၢႆႇၽွင်းငမ်းၶဝ် တေဢဝ်လိူင်ႈ(ၸွႆးတြႃး)ၸိူဝ်းၼႆႉ တၢင်းၸုမ်းၶၢဝ်ႇၽူႈတွႆႇႁွၵ်ႈ ပႆႇယိုၼ် ယၼ်။

ၵူၼ်းၼႂ်းပိုၼ်ႉတီႈ ၼႂ်းပွၵ်ႉၼႂ်းယွမ်ႇလၢတ်ႈဝႃႈ- ၶႃသွင်ၵေႃႉ ၸၢႆးဢၢႆႈပွင်း တင်းၸၢႆးဢၢႆႈၵူင်ႇၼႆႉ ပဵၼ်ၵူၼ်းလီ၊ ဢမ်ႇတွၼ်ႉပၢၼ်းၽိတ်းပိူၼ်ႈၼႂ်းပွၵ်ႉၼႂ်းယွမ်ႇ၊ ပဵၼ်ၵူၼ်းမေႃၸွႆႈၼႃႈဝၢၼ်ႈတႃသူၼ်-ဝႃႈၼႆ။