ၵူၼ်းဝၢၼ်ႈပၢႆႈတင်းဝၢၼ်ႈ ယွၼ်ႉထုၵ်ႇ ထတ်းထၢမ် လွင်ႈသိုၵ်းမၢၼ်ႈထုၵ်ႇၶႃႈတၢႆ
ယွၼ်ႉၽူႈမီးၸၼ်ႉသိုၵ်းမၢၼ်ႈ ထုၵ်ႇၶႃႈတၢႆ တီႈလႅၼ်လိၼ် တႆး-ၶႄႇၼၼ်ႉ
ၽူႈယႂ်ႇၵူၼ်းလူင်ဝၢၼ်ႈ တီႈဝၢၼ်ႈ ၼွင်မႃႉတႃ ၸႄႈဝဵင်းၼမ်ႉၶမ်း ၸိုင်ႈတႆး
ပွတ်းႁွင်ႇ၊ ထုၵ်ႇႁွင်ႉတူဝ်ၵုမ်းၶင် ထတ်းထၢမ်ပေႃႉထုပ်ႉ၊
ႁဵတ်းႁႂ်ႈၵူၼ်းဝၢၼ်ႈ သီႇပၢၵ်ႇပၢႆ ပၢႆႈၽေးၶဝ်ႈပိုင်ႈႁူမ်ႈမိူင်းၶႄႇ။
ၵဵဝ်ႇၵပ်းလွင်ႈၼႆႉ
ဝၢႆးၽူႈမီးၸၼ်ႉသိုၵ်းမၢၼ်ႈ 2 ၵေႃႉ ထုၵ်ႇၶႃႈတၢႆ ပူၼ်ႉမႃးမိူဝ်ႈဝၼ်းတီႈ
29/07/2014 ယဝ်ႉ ၽူႈယႂ်ႇၵူၼ်းလူင်ၼႂ်းတပ်ႉသိုၵ်းမၢၼ်ႈ၊
ပႃးၸဵမ်ၽူႈၵွၼ်းတပ်ႉၸုမ်းလူင် (တပ်ႉမ) 88 ၸိူဝ်းၼႆႉ ၼႂ်းဝၼ်းတီႈ 29
ၵူၺ်းၼင်ႇၵဝ်ႇ၊ ႁွင်ႉဢဝ်ၽူႈယႂ်ႇၵူၼ်းလူင်ဝၢၼ်ႈ တီႈၼွင်မႃႉတႃ
ၵႂႃႇထတ်းထၢမ်တေႃႇထိုင်တဵင်ႈၶိုၼ်း၊ မိူဝ်ႈဝႃႈဝၼ်း တီႈ 30 ၵေႃႈ
ႁွင်ႉၵႂႃႇထႅင်ႈ တင်ႈတႄႇၵၢင်ၼႂ် 6 မူင်းတေႃႇထိုင်တဵင်ႈၶိုၼ်း၊ ၵုမ်းၶင်ဝႆႉ
တင်းဝၼ်းသေ တႄႇထတ်း/ ထၢမ်ၶဝ် ယၢမ်းဝၢႆးဝၼ်း 4 မူင်း တေႃႇထိုင်တဵင်ႈၶိုၼ်း။
လွၵ်ႇငိုတ်ႈဝႆႉဝႃႈ မိူဝ်ႈၼႆႉၵၢင်ၼႂ် 6 မူင်းၵေႃႈ ႁႂ်ႈၵႂႃႇတီႈ
တပ်ႉပၢင်သဝ်းမၢၼ်ႈထႅင်ႈ၊ ပေႃးဢမ်ႇၵႂႃႇ တေဢဝ်ၾႆးၽဝ်ဝၢၼ်ႈ။
ၽႂ်ပၢႆႈတေမႃးဝႅတ်ႉထိုင်ႁိူၼ်းသေ တိၺွပ်း- ၼႆယဝ်ႉ။
ၵူၼ်းၼႂ်းပိုၼ်ႉတီႈၵေႃႉၼိုင်ႈ
ဢၼ်ထုၵ်ႇသိုၵ်းမၢၼ်ႈပေႃႉႁႅမ် လၢတ်ႈဝႃႈ- သိုၵ်းမၢၼ်ႈဝႃႈ
သိုၵ်းမၢၼ်ႈၼိုင်ႈၵေႃႉၼႆႉ မီးၵႃႈၶၼ်သုင်၊ သိုၵ်းမၢၼ်ႈတၢႆၼိုင်ႈၵေႃႉၼႆႉ
ပဵင်းၼမ်ႉၵတ်ႉၵူၼ်းဝၢၼ်ႈ 200 ၵေႃႉ။ ၵွပ်ႈၼၼ် တေတွပ်ႇတႅၼ်းၶိုၼ်း
ဢၼ်သိုၵ်းမၢၼ်ႈလႆႈလူႉတၢႆၵႂႃႇၼႆႉ ႁႂ်ႈၵိုင်ႇၵႃႈၵိုင်ႇႁူဝ် ဝႃႈၼႆ။
ဢိင်ၼိူဝ်လွင်ႈၼႆႉသေ ႁဵတ်းႁႂ်ႈၵူၼ်းဝၢၼ်ႈ ဝၢၼ်ႈၼွင်မႃႉတႃ ႁူဝ်ၵူၼ်း 400 ပၢႆ
လင်ႁိူၼ်း 120 လင်ပၢႆ ပႅတ်ႈႁိူၼ်းယေးသေ ပၢႆႈၶဝ်ႈၵႂႃႇတၢင်းၼွင်တဝ်း
ၼႂ်းမိူင်းၶႄႇ။
သိုၵ်းမၢၼ်ႈၼိုင်ႈၵေႃႉ တေႃႇၵူၼ်းဝၢၼ်ႈ
200 ပၢႆ။ ၵူၼ်းဝၢၼ်ႈသမ်ႉမီး 400 ပၢႆလႄႈ တေလႆႈတၢႆတင်း 400 ၼႆႉ
မၼ်းဢမ်ႇတူၵ်းထုၵ်ႇ၊ ၵွပ်ႈၼၼ်လႄႈ ႁဝ်းၶႃႈၸင်ႇလႆႈ
ဢွၼ်ၵၼ်ပၢႆႈတင်းဝၢၼ်ႈၶႃႈဢေႃႈ- ၵူၼ်းၼႂ်းပိုၼ်ႉတီႈ သိုပ်ႇလၢတ်ႈ။
ၽူႈၵွၼ်းတပ်ႉၽႄ တႂ်ႈတပ်ႉၸုမ်းလူင်
(တပ်ႉမ) 88 ၶုၼ်သိုၵ်းလူင် ဝိၼ်းတူႇရထုၼ်း တင်း ၶုၼ်သိုၵ်းၵေႃႉၼိုင်ႈ
လႆႈထုၵ်ႇၶႃႈတၢႆ တၢင်းၵႂႃႇတႃႈႁိူဝ်းၼွင်ႉမႃႉလႄႈ ႁူဝ်ပဝ်ႈဝၢၼ်ႈၼွင်မႃႉတႃ
ၸၢႆးလႃႉၸိင်ႇ၊ ၽူႈၼမ်းၼႂ်း ၸၢႆးသၢင်ႇၸူဝ်း၊ ၽူႈမၢႆ ၸၢႆးသၢင်ႇလူႇ၊
ၽူႈယႂ်ႇၵူၼ်းလူင်ဝၢၼ်ႈ (ၵေႃးပၵ) ၶိင်းသွႆႈၶမ်းၸၢမ်ႇသႃႇ လႄႈ ၶိင်းသႅင်ႁိူၼ်း
ၶဝ်ၸိူဝ်းၼႆႉ ထုၵ်ႇသိုၵ်းမၢၼ်ႈၵႂႃႇႁွင်ႉ ထဵတ်ႈထၢမ် မိူဝ်ႈဝၼ်းတီႈ
29/07/2014 သေ ပေႃႉထုပ်ႉ။ ၽူႈၵွၼ်းတပ်ႉၵွင် ထတ်းထၢမ်သေပေႃႉထုပ်ႉတင်းၶိုၼ်း။
ဝၼ်းတီႈ 30 ၼၼ်ႉ တင်ႈတႄႇၵၢင်ၼႂ် 6 မူင်း တေႃႇထိုင်ဝၢႆးဝၼ်း 4 မူင်း
ဢဝ်ၵုမ်းၶင်ဝႆႉ တႄႇ 4 မူင်းၶိုင်ႈ ၸင်ႇတႄႇႁွင်ႉထတ်းထၢမ်
တေႃႇထိုင်တဵင်ႈၶိုၼ်း။
ၵေႃႉဢၼ်ထုၵ်ႇပေႃႉထုပ်ႉ သိုပ်ႇလၢတ်ႈထႅင်ႈဝႃႈ- ၵူၼ်းဢမ်ႇပေႃးမေႃၵႂၢမ်းမၢၼ်ႈလီ ႁူဝ်ပဝ်ႈၸၢႆးလႃႉၸိင်ႇလႄႈ ၽူႈမၢႆ ၸၢႆးသၢင်ႇလူႇ ဢိၵ်ႇ လၢမ်ႈၽူႈပိၼ်ႇၽႃသႃၵေႃႉၼိုင်ႈ ၵေႃႈထုၵ်ႇပေႃႉထုပ်ႉ။ ပေႃးဢမ်ႇမေႃၵႂၢမ်းမၢၼ်ႈၼႆႉ ထုၵ်ႇထုပ်ႉ ႁႅင်းဢေႃႈ၊ ထၢမ်ၵူႈလွင်ႈၵူႈပိူင်၊ ပေႃးတွပ်ႇဢမ်ႇၶိုတ်းၸႂ်၊ လၢမ်ႈပိၼ်ႇၽႃသႃ ဢမ်ႇၶိုတ်းၸႂ်ၶဝ်ၸိူဝ်းၼႆႉၵေႃႈ မင်ပႃး လၢမ်ႈ(ၵူၼ်းပိၼ်ႇၽႃသႃ)။ ဢၼ်ၶဝ်ထတ်းထၢမ်ႁဝ်းၶႃႈၼႆႉ ထၢမ်လွင်ႈ ပဵၼ်ၽႂ်ႁဵတ်းၵေႃႉသူင်ႇၶၢဝ်ႇ/ သူင်ႇၶႅပ်းႁၢင်ႈ ပၼ်ၸုမ်းၶၢဝ်ႇၶဝ် ၸဵမ်ၸိူဝ်းၼႆႉ ၵူႈလွင်ႈ။ ဢၼ်ပေႃႉထုပ်ႉမိူဝ်ႈဝႃးၼႆႉ ၶေးထၢင်ႇလုပ်ႈၶီႈၶင်ႈ ၽူႈမၢႆၸၢႆးသၢင်ႇလူႇ ႁၵ်းယဝ်ႉႁိုဝ်ၵေႃႈဢမ်ႇႁူႉ၊ မၼ်းၶၢင်းဝႃႈ လုပ်ႇၶီႈၶင်ႈမၼ်းၸဵပ်းၼႆသေ ၼွၼ်းဢမ်ႇလႆႈတင်းၶိုၼ်း၊ သူပ်း ႁူဝ်တႃ ၸိူဝ်းၼႆႉၵေႃႈၵႂ်ႈ။
ဢၼ်ၶဝ်ထတ်းထၢမ် ဝၼ်းတီႈ 29 ၼၼ်ႉ
တိုၼ်းဢမ်ႇမႅၼ်ႈၶွပ်ႇပိူင် လၢႆးထတ်းသေဢိတ်း။ ႁွင်ႉၵႂႃႇၼႂ်းတပ်ႉယဝ်ႉ
ၽူႈၵွၼ်းတပ်ႉၵွင်ၼႆႉ ၵိၼ်လဝ်ႈသေ ထတ်းထၢမ်၊ ထုၵ်ႇထုပ်ႉ/ႁႅမ်ၵူႈၵေႃႉ၊ ပေႃႉၼႃႈ
ပေႃႉတႃ ပေႃႉၵွၵ်းႁူဝ် ဢဝ်မႅၵ်ႉ ၵွင်ႈတွႆႇ ၸိူဝ်းၼႆႉ။ ဢၼ်ထၢမ်မိူဝ်ႈဝႃးၼႆႉ
ပေႃးမေႃလိၵ်ႈပဵၼ်ပိူင်ၼိုင်ႈ၊ ပေႃးဢမ်ႇမေႃလိၵ်ႈပဵၼ်လၢႆးၼိုင်ႈ၊ ၵႂႃႇထတ်း
ပဵၼ်တီႈပဵၼ်တီႈ ႁၢင်ႈၶႂ်ႈတူၵ်းထုၵ်ႇယူႇသေတႃႉၵေႃႈ တႃႇ 3 ၵေႃႉၼႆႉ
ထုၵ်ႇထုပ်ႉႁႅမ်ႁၢဝ်ႈႁႅင်းၼင်ႇၵၼ်။ ၵွပ်ႈၼၼ် ပေႃးတေသိုပ်ႇယူႇ
ပၼ်ၶဝ်ထတ်းထၢမ်ပေႃႉႁႅမ်ယူႇၸိူင်ႉၼႆတိၵ်းတိၵ်း မၼ်းဢမ်ႇပဵၼ်ၵၢၼ်လႄႈ
ႁဝ်းၶႃႈၸင်ႇလႆႈ ပႃးၵၼ်ပၢႆႈဢေႃႈ။ မိူဝ်ႈလဵဝ် ၵူၼ်းဝၢၼ်ႈတီႈ ၼွင်မႃႉတႃၼႆႉ
ၵိုတ်းမွၵ်ႈၵူၼ်း 2-3 ၵေႃႉၵူၺ်း၊ ၵူၼ်းတုၵ်ႉၶိတ ၵေႃႈၼိုင်ႈလႄႈ ၵူၼ်းထဝ်ႈ 2
ၵေႃႉ ဢၼ်ဢမ်ႇပၢႆႈလႆႈၼၼ်ႉၵူၺ်းယဝ်ႉ၊ လုၵ်ႈလၢင်း/လၢၼ်ၶဝ်ၵေႃႈ
တိုၵ်ႉၶိုင်ႁႃတၢင်း ပိူဝ်ႈတႃႇမိူဝ်းႁပ်ႉၶဝ် သွင်ထဝ်ႈ ပၢႆႈဢွၵ်ႇမႃးယူႇ-
ၵေႃႉထုၵ်ႇသိုၵ်းမၢၼ်ႈပေႃႉထုပ်ႉ လၢတ်ႈထႅင်ႈၼင်ႇၼႆ။
Tags: Human Right, News