ထၢမ်-မိူဝ်ႈဝႃးမိူဝ်ႈသိုၼ်းၼႆႉ (ဝၼ်းတီႈ 21-22/07/2014) လႆႈငိၼ်းဝႃႈငဝ်ႈငုၼ်းၻီႊမူဝ်ႊၶရေႊၸီႇ ၸိူဝ်ႉၶိူဝ်းတႆး (SNLD) ႁဝ်းၶႃႈ လႆႈႁဵတ်းပၢင်ၵုမ် ၸုမ်းပွင်ၵၢၼ်ငဝ်ႈငုၼ်း၊ လွင်ႈၼႆႉ ပဵၼ်ပၢင်ၵုမ်သင်တႄႉတႄႉၶႃႈ။

တွပ်ႇ-ပဵၼ်ပၢင်ၵုမ် ၸုမ်းပွင်ၵၢၼ်ငဝ်ႈငုၼ်း လႄႈတင်း ၵေႃပွင်ၵၢၼ်လွင်ႈၽွမ်ႉႁူမ်ႈ၊ သွင်ႇၾၢႆႇလႆႈမႃး ႁူပ်ႉထူပ်းၵၼ်။ ၸတ်းႁဵတ်းၵႂႃႇမိူဝ်ႈဝၼ်းတီႈ 21-22/07/2014 ။ ဢၼ်မႃးၶဝ်ႈႁူမ်ႈ ၸုမ်းပွင်ၵၢၼ်ငဝ်ႈငုၼ်းတင်းသဵင်ႈ၊ ၵေႃပွင်ၵၢၼ် လွင်ႈၽွမ်ႉႁူမ်ႈ၊ ပႃႇတီႇသိူဝ်ၽိူၵ်ႇ (SNDP) ၶဝ်ႈႁူမ်ႈ 6 ၵေႃႉ၊ တင်းသဵင်ႈမီးၵူၼ်း ၶဝ်ႈႁူမ်ႈ 14 ၵေႃႉ။

ထၢမ်- ဢိင်ၼိူဝ်ပၢင်ၵုမ်ၼႆႉသေ ၵဵဝ်ႇၵပ်းလွင်ႈၽွမ်ႉႁူမ်ႈၼႆႉ ငိၼ်းၶၢဝ်ႇဝႃႈယူႇတီႈ SNLD ႁဝ်းၶႃႈ တႅမ်ႈလိၵ်ႈထိုင် ပႃႇတီႇသိူဝ်ၽိူၵ်ႇ SNDP ။ ၵဵဝ်ႇၵပ်းလွင်ႈၼႆႉ ပဵၼ်ၸိူင်ႉႁိုဝ်ၶႃႈ။

တွပ်ႇ- ၵဵဝ်ႇၵပ်းလွင်ႈၼႆႉ ႁဝ်းတႅပ်းတတ်းၵႂႃႇမိူဝ်ႈဝၼ်းတီႈ 21 ၊ ဝၼ်းတီႈ 22 ႁဝ်းၶႃႈလႆႈဢွၵ်ႇလိၵ်ႈထိုင်ၵႂႃႇတီႈ ၽူႈဢွၼ်ႁူဝ် ၸုမ်းပွင်ၵၢၼ်လွင်ႈၽွမ်ႉႁူမ်ႈ ၾၢႆႇသိူဝ်ၽိူၵ်ႇ SNDP ။ လွင်ႈတၢင်းမၼ်းတႄႉ ႁဝ်းၶႃႈဝႃႈ မိူဝ်ႈလိူၼ်ၵျုၼ်ႊ 10 ဝၼ်းၼၼ်ႉ ၶဝ်ၸဝ်ႈလႆႈယိုၼ်ႈယွၼ်းမႃးဝႃႈ ႁႂ်ႈလႆႈႁူပ်ႉထူပ်းၵၼ် ၸွမ်းၼင်ႇလႆႈတူၵ်းလူင်းၵၼ်မႃး တီႈပၢင်ႁူပ်ႉ ထူပ်းၵၼ်တီႈတူၼ်ႈတီး၊ ဝႃႈဝႆႉ ၶၢဝ်းတၢင်း 2 လိူၼ် ႁႂ်ႈလႆႈႁူပ်ႉထူပ်းၵၼ်ထႅင်ႈၵမ်းၼိုင်ႈ ပိူဝ်ႈတႃႇဢုပ်ႇၵၼ် လွင်ႈၽွမ်ႉႁူမ်ႈ။ ၽိူဝ်ႇထိုင် 2 လိူၼ်မႃး ၶဝ်ၸဝ်ႈၵေႃႈ တႅမ်ႈလိၵ်ႈပွင်ႇထိုင်မႃးဝႃႈ ႁႂ်ႈလႆႈႁူပ်ႉၵၼ်တီႈၼေႇပျီႇတေႃႇ လိူၼ်ၵျူႊလၢႆႊ ဝၼ်းတီႈ 3 ။ ၵူၺ်းၵႃႈ ဢမ်ႇလႆႈႁဵတ်းမႃး၊ ၵွပ်ႈဝႃႈ ၽွင်းဢၼ်ၶဝ်သူင်ႇလိၵ်ႈမႃးၼၼ်ႉ ၽူႈဢွၼ်ႁူဝ် ၾၢႆႇႁဝ်းၶႃႈ လုင်းၸေႃးဢွင်ႇသမ်ႉ ဢွၵ်ႇၶၢဝ်းတၢင်းဝႆႉလႄႈ လိၵ်ႈသမ်ႉတႅမ်ႈဝႆႉၸိုဝ်ႈမၼ်းၸဝ်ႈ၊ ႁဝ်းၶႃႈၵေႃႈ ဢမ်ႇၸၢင်ႈၵွၵ်းတူၺ်း၊ ၽိူဝ်ႇဝၼ်းတီႈ 7 မၼ်းၸဝ်ႈပွၵ်ႈၶၢဝ်းတၢင်းမႃးယဝ်ႉ ၸင်ႇမႃးၵွၵ်းတူၺ်း၊ ၸင်ႇလႆႈႁူႉဝႃႈ ပဵၼ်လွင်ႈယိုၼ်ႈယွၼ်း တႃႇတေႁူပ်ႉထူပ်းၵၼ်။

ၵမ်းၼႆႉ ႁဝ်းၸင်ႇမႃးတႅမ်ႈလိၵ်ႈၸႅင်ႈဝႃႈ လႆႁပ်ႉလိၵ်ႈၼၼ်ႉ လႆႈႁူႉလွင်ႈတၢင်းမၼ်းတူၵ်းလိုၼ်းလႄႈ လႆႈၶိုၼ်းပွင်ႇ ၶၢဝ်ႇၸူး ၵေႃပွင်ၵၢၼ်လွင်ႈၽွမ်ႉႁူမ်ႈ လွင်ႈၼႆႉယူႇ။ ဢိင်ၼိူဝ်ၼၼ်ႉသေ  မိူဝ်ႈဝႃးမိူဝ်ႈသိုၼ်း ပူၼ်ႉမႃးၼႆႉ ၸင်ႇဢွၵ်ႇ လိၵ်ႈၵႂႃႇထႅင်ႈဝႃႈ- ၼင်ႇႁိုဝ်ငဝ်ႈငုၼ်းၻီႊမူဝ်ႊၶရေႊၸီႇၸိူဝ်ႉၶိူဝ်းတႆးလႄႈ ၻီႊမူဝ်ႊၶရႅတ်ႉတိၵ်ႊပႃႇတီႇၸၢဝ်းၶိူဝ်းတႆး တေၸၢင်ႈႁူမ်ႈမိုဝ်းၵၼ် ပဵၼ်ဢၼ်လဵဝ်ၵႂႃႇလႆႈၼၼ်ႉ ႁဝ်းၶႃႈတိုၵ်ႉၶႆႈၸႂ်ဝူၼ်ႉႁႃ လၢႆးတၢင်းဢၼ်လီတီႈသုတ်း၊ ဢၼ်တေပဵၼ်ၵၢၼ်လႆႈတႄႉတႄႉၼၼ်ႉယူႇ- ႁဝ်းၶႃႈလႆႈပွင်ႇၶၢဝ်ႇဝႆႉၼင်ႇၼႆၶႃႈ။

ထၢမ်- လွင်ႈၼႆႉ ၸွင်ႇပွင်ႇဝႃႈ မိူဝ်ႈလဵဝ် ပႆႇၸၢင်ႈႁူမ်ႈၵၼ်ၼႆၶႃႈႁႃႉ၊ ၶႂ်ႈဝႃႈၸိူင်ႉႁိုဝ်တႄႉတႄႉၶႃႈ။

တွပ်ႇ- ၾၢႆႇႁဝ်းၶႃႈမႃးထတ်းသၢင်တူၺ်း ၵဵဝ်ႇၵပ်းလွင်ႈၶဝ်ၸဝ်ႈၵႂႃႇဢုပ်ႇၵၼ်မႃး တီႈတူၼ်ႈတီးၼၼ်ႉ တႃႇတေပဵၼ်မႃး ၸုမ်းလဵဝ်ၵၼ်ၼၼ်ႉ ယူႇတီႈၽူႈမီးပုၼ်ႈၽွင်းတင်းသွင်ပႃႇတီႇၼႆႉ ၼိုင်ႈၸုမ်းလႂ် 8 ၵေႃႉႁိုဝ် 10 ၵေႃႉ ႁႂ်ႈလိူၵ်ႈမႃး ၽူႈတၢင်တူဝ်ယဝ်ႉ ႁူမ်ႈၵၼ်ၵႂႃႇတၢင်းယွၼ်းထႅင်ႈပႃႇတီႇမႂ်ႇ၊ ၵႂႃႇတၢင်းလဝ်ႈပႃႇတီႇမႂ်ႇသေ ပေႃးၸိုဝ်ႈတူၵ်းမႃး ယႃႉပႅတ်ႈ တင်းသွင်ပႃႇတီႇ၊ ႁူမ်ႈၵၼ်ၵႂႃႇၶဝ်ႈၼႂ်းၼၼ်ႉမူတ်းမူတ်း။ ၼႂ်းပၢင်ၵုမ်းၼၼ်ႉ ႁဝ်းၶႃႈတုၵ်းယွၼ်းၸိူင်ႉၼၼ်ယူႇ လၢႆလၢႆပွၵ်ႈသေတႃႉၵေႃႈ တႃႇတေယႃႉပႅတ်ႈပႃႇတီႇသိူဝ်ၽိူၵ်ႇၼႆႉ ၾၢႆႇၶဝ်ၸဝ်ႈသမ်ႉဢမ်ႇပဵၼ်လႆႈ။ ႁူမ်ႈတႄႉတေႁူမ်ႈ ယူႇ ၵူၺ်းၵႃႈပႃႇတီႇတႄႉ ဢမ်ႇယႃႉလႆႈ၊ ဝႃႈၶေႃႈၼႆႉတိၵ်းတိၵ်း။ မႃးထႅင်ႈၵမ်းၼိုင်ႈ လႆႈငိၼ်းဢၼ်ၶဝ်ၸဝ်ႈ လၢတ်ႈ ၸွမ်းသိုဝ်ႇၶၢဝ်ႇ သမ်ႉဝႃႈၾၢႆႇႁဝ်းၶႃႈတႄႉတိုၼ်းဢမ်ႇယႃႉလႆႈယဝ်ႉ၊ ၵူၺ်းၵႃႈ ပေႃးၾၢႆႇပႃႇတီႇႁူဝ်သိူဝ်ယႃႉပႃႇတီႇၶဝ် သေ မႃးၶဝ်ႈႁူမ်ႈႁွမ်းၸွမ်းႁဝ်းတႄႉၵေႃႈ တေႁပ်ႉႁွင်းယူႇ ဝႃႈၼႆ။

ဢိင်ၼိူဝ်ငဝ်းလၢႆးၸိူဝ်းၼႆႉသေ ႁဝ်းမႃးထတ်းသၢင်တူၺ်းဝႃႈ ပေႃးတင်းဝႃႈ ဢမ်ႇယႃႉပႅတ်ႈပႃႇတီႇ တင်းသွင်ဢၼ်သေ ၵႂႃႇႁဵတ်းဢၼ်လဵဝ်ၼႆႉ မၼ်းဢမ်ႇပဵၼ်လႆႈယဝ်ႉ- ၼႆလႄႈ တႃႇတေႁူမ်ႈၵၼ်ၼၼ်ႉ သၢႆငၢႆမၼ်းသမ်ႉဢေႇ၊ ငဝ်းလၢႆး မၼ်းဢမ်ႇပေႃးၶႅမ်ႉ။ ၵွပ်ႈပိူဝ်ႈၸိူင်ႉၼႆ ဢုပ်ႇၵၼ်ၵေႃႈ တေပႆႇၵိုင်ႉၵၢင်ႉဢွၵ်ႇမႃးလႆႈ ၶေႃႈတွပ်ႇဢၼ်လီတီႈသုတ်း။ ၵွပ်ႈၼႆ  တေႁႃလၢႆးတၢင်းၼင်ႇႁိုဝ်ၼၼ်ႉ ႁဝ်းၶႃႈတိုၵ်ႉၶႂ်ႈဝူၼ်ႉထႅင်ႈ ႁႃလၢႆးတၢင်းဢၼ်လီမၼ်းထႅင်ႈ၊ ၸင်ႇဝႃႈၶႂ်ႈဢဝ် ၶၢဝ်းယၢမ်းသေ ႁႃလၢႆးတၢင်းထႅင်ႈယူႇ။

ထၢမ်- ၵဵဝ်ႇၵပ်းလွင်ႈၽႅၼ်ၵၢၼ် မိူၼ်ၼင်ႇငဝ်ႈငုၼ်းႁဝ်းၶႃႈၵေႃႈ ဢုပ်ႇဢူဝ်းပႃးလွင်ႈဝၢင်းၽႅၼ် SNLD ၊  ဢၼ်တေ ႁႂ်ႈၵူၼ်းမိူင်းႁူႉ ၵဵဝ်ႇၵပ်းၵၢၼ်ၸိူဝ်ႉၸၢတ်ႈၼႆႉ မီးသင်ၽွင်ႈၶႃႈ။

တွပ်ႇ- ၵႃႈပူၼ်ႉမႃး ဢၼ်ႁဝ်းၶႃႈႁဵတ်းၵၢၼ်မိူင်းၼႆႉ ပဵၼ်တႃႇပေႃႈမႄႈၵူၼ်းမိူင်း၊ ႁဝ်းၶႃႈလႆႈလွတ်ႈလႅဝ်းသဝ်းၶေႃ မႃးၸွမ်းပီႈၼွင်ႉမၢၼ်ႈ၊ လႆႈႁူမ်ႈဢဝ်လွတ်ႈလႅဝ်းသဝ်းၶေႃမႃးမိူဝ်ႈပီ 1948 သေတႃႉၵေႃႈ ၸွမ်းၼင်ႇၼႂ်း လိၵ်ႈႁူမ်ႈ မၢႆပၢင်လူင် ႁဝ်းၶႃႈလႆႈတူၵ်းလူင်းႁူမ်ႈၵၼ်မႃးဝႆႉၼၼ်ႉ သုၼ်ႇလႆႈသုၼ်ႇပဵၼ် တႃႇမိူင်းတႆးၶိူဝ်းတႆးၼႆႉပႆႇလႆႈမႃး၊ ပႆႇတဵမ်ထူၼ်ႈမႃးသေပွၵ်ႈ။ ၼင်ႇႁိုဝ် တေလႆႈသုၼ်ႇဢၼ်ႁဝ်းထုၵ်ႇလႆႈ ဢၼ်ႁဝ်းတူၵ်းလူင်းၵၼ်ဝႃႈ သုၼ်ႇလႆႈတႅပ်း တတ်းႁင်းၶေႃ၊ သုၼ်ႇၵွၼ်းၵုမ်းလႆႈႁင်းၶေႃ၊      သုၼ်ႇလႆႈၽွင်းငမ်းတူဝ်ၵဝ်ႇႁင်းၶေႃႁဝ်း၊ သုၼ်ႇလၼ်ၸတ်းပွင်လႆႈ ၶူဝ်းၶွင်ႁႄႈၼိူဝ်လိၼ်တႂ်ႈလိၼ် ၶွင်ဝၢၼ်ႈမိူင်းႁဝ်းၼၼ်ႉ လွတ်ႈလွတ်ႈလႅဝ်းလႅဝ်း။ တႄႇဢဝ်ၸိူဝ်းၼႆႉၵႂႃႇ ၼင်ႇႁိုဝ် ပေႃးတေလႆႈ တဵမ်ထူၼ်ႈၼၼ်ႉ ႁဝ်းၶႃႈ ၸင်ႇဝႃႈမီးဝႆႉမူႇပိူင် တူၺ်းထိုင်ၵူၼ်းမိူင်းတႆး သိုပ်ႇမႃးတီႈပၢင်လူင်၊ ဢၼ်ဝႃႈ 8 ၸႄႈမိူင်း တၵ်းလႆႈၽဵင်ႇပဵင်းၵၼ်ၼၼ်ႉ။ ပီႈၼွင်ႉမၢၼ်ႈၵေႃႈ ၼႃႈလိၼ်ၶဝ်ၶႂ်ႈၵႂၢင်ႈၵႃႈႁိုဝ်ၵႂၢင်ႈ မီး 7 တိူင်း ၸိူင်ႉၼင်ႇ ၶဝ်တႅပ်းတတ်းၼၼ်ႉၵေႃႈ လီယဝ်ႉ၊ ၵူၺ်းၵႃႈ ႁႂ်ႈၶဝ်ႁပ်ႉယူႇၼိတ်ႉၵူၺ်း၊ ဢၼ်ၵိုတ်းယူႇ ၶၢင် ၶျၢင်း ယၢင်း တႆး ၸိူဝ်းၼႆႉၵေႃႈ ႁႂ်ႈမၼ်းပဵၼ်ၼိုင်ႈယူႇၼိတ်ႉ ၼင်ႇၵၼ်၊ ႁႂ်ႈလႆႈလွင်ႈၽဵင်ႇပဵင်းၵၼ် ပႅတ်ႇယူႇၼိတ်ႉ ၸိူင်ႉၼၼ်။ ၾၢႆႇႁဝ်းၶႃႈတႄႉ ဢိင်ၼိူဝ်လၵ်းၼမ်းဢၼ်ၼႆႉသေ ပွင်သၢင်ႈၵၢၼ်မိူင်းဝႆႉ။

တီႈၼႆႈၼႆႉ SNLD မၼ်းပႅၵ်ႇပိူင်ႈၵၼ်တင်း SNDP ၊ ၶဝ်ၸဝ်ႈပိုၼ်ၽၢဝ်ႇဢွၵ်ႇမႃးဝႃႈ ယွမ်းႁပ်ႉပိူင် 14 ၸႄႈမိူင်း၊ ႁဝ်းၶႃႈသမ်ႉႁပ်ႉဝႆႉမိူင်း 8 ၸႄႈမိူင်း၊ ဢၼ်ၼႆႉ ပဵၼ်ပိူင်လူင် တႃႇႁဝ်းၶႃႈသွင်မူႇၸုမ်းႁူမ်ႈႁွမ်းၵၼ်။ ႁဝ်းၶႃႈႁၼ်ဝႃႈ ပိူင် 14 ၸႄႈမိူင်းၼႆႉ ပီႈၼွင်ႉမၢၼ်ႈဢဝ်ဝႆႉယူႇ 7 ဢၼ်လႄႈ ပိူဝ်ႈတႃႇၸၢဝ်းၶိူဝ်းတင်းသဵင်ႈ မၼ်းဢမ်ႇမီးလွင်ႈၽဵင်ႇပဵင်း ၵၼ်။ လွင်ႈၼႆႉ ၶႂ်ႈႁႂ်ႈပီႈၼွင်ႉၵူၼ်းမိူင်းတႆးႁူႉၸွမ်း ထတ်းသၢင်ၸွမ်း။ ႁဝ်းၶႃႈထုၵ်ႇလီႁၵ်းလင် ၵွင်လင်ပႅတ်ႈ လိၵ်ႈႁူမ်ႈ မၢႆပၢင်လူင်ယူႇႁိုဝ်ႉ၊ ဢမ်ႇၼၼ်ၵေႃႈ တေလႅၵ်ႈလၢႆႈၸွမ်းငဝ်းလၢႆး ပၢၼ်ပဵၼ်မိူဝ်ႈလဵဝ်သေ ဢိင်ၼိူဝ်ဢဵၼ်ႁႅင်း ၾၢႆႇႁဝ်း ယူပ်ႈယွမ်းလႄႈ တေယႃႉပႅတ်ႈၶေႃႈတူၵ်းလူင်းၵၼ် တီႈပၢင်လူင်ၼၼ်ႉယဝ်ႉႁိုဝ်ႉ ဢၼ်ဝႃႈၼၼ်ႉ ၶႂ်ႈႁႂ်ႈပီႈၼွင်ႉၵူၼ်း မိူင်းတႆး ဝူၼ်ႉထတ်းသၢင်ၸွမ်း ၼၵ်းၼၵ်းၼႃၼႃယူႇၶႃႈ။

ထၢမ်-ဢိင်ၼိူဝ်ႁဝ်းၶႃႈ လႆႈႁူပ်ႉၵေႃႁူမ်ႈသၢင်ႈၸိုင်ႈတႆး (CSSU)သေ မီးၵူၼ်းတွင်ႈထၢမ်ဝႃႈ တႃႇတေႁူမ်ႈႁွမ်းၵၼ်ၼႆႉ သင်ပဵၼ်မူႇၶဝ်ႈႁူၺ်းပၢႆး ဢၼ်မီးဝႆႉသွင်ၽိူၼ်ၵေႃႈ ႁဝ်းၽဵဝ်ႈပႅတ်ႈတင်းမူတ်းသေ မႄးတမ်းဝၢင်းၽိူၼ်လဵဝ် ႁူမ်ႈၵၼ် ၼင်ႈၽိူၼ်လဵဝ်။ သင်ႁဝ်းပၢၵ်ႈပႅတ်ႈပိူင်ၵဝ်ႇမူတ်းမူတ်း ၸင်ႇၵွႆႈမႄးတမ်းဝၢင်းပိူင်မႂ်ႇၼႆ ၸွင်ႇ SNLD တေၽွမ်ႉယူႇ ၶႃႈႁႃႉ။

တွပ်ႇ- တႃႇႁဝ်းၶႃႈတႄႉ ဢမ်ႇမီးပၼ်ႁႃသင် တိုၼ်းၽွမ်ႉလႆႈယူႇ။ ႁဝ်းၶႃႈၵေႃႈတိုၼ်းဝႃႈ ယႃႉပႅတ်ႈပႃႇတီႇတင်း သွင်ၾၢႆႇသေ ၶိုၼ်းတင်ႈမႂ်ႇမႂ်ႇ၊ ပွင်ႇဝႃႈႁဝ်းၶႃႈႁုပ်ႈၵဵပ်းပႅတ်ႈ ၽိူၼ်ၶဝ်ႈတင်းသွင်ၾၢႆႇသွင်ႈပႃႈယဝ်ႉၶႃႈလူး။ တီႈဢေႇ သုတ်းတႄႉ ယႃႇႁႂ်ႈႁဝ်းလႆႈႁၵ်ႉလင်ၵၢၼ်ၸိူဝ်ႉၸၢတ်ႈၼၼ်ႉၵူၺ်း၊ ပေႃးဝႃႈပဵၼ်ၽွၼ်းလီ တႃႇၵၢၼ်ၸိူဝ်ႉၸၢတ်ႈယူႇ ဢၼ်ဝႃႈၼၼ်ႉ ယႃႉပႅတ်ႈမိူဝ်ႈလႂ်ၵေႃႈ ႁဝ်းၶႃႈၽွမ်ႉယူႇ။ လွင်ႈၽွမ်ႉႁူမ်ႈၵၼ်ၼႆႉ တေလႆႈၽဵင်ႇပဵင်းၵၼ် ႁူဝ်ဝႃႇ ပဵၼ်ၵၼ်သေ ႁူမ်ႈႁွမ်းၵၼ်ၵႂႃႇ။ ယႃႉၵေႃႈယႃႉတေႃႇယႃႉ၊ ၶိုၼ်းမႄးတမ်းပိူင်ဢၼ်မႂ်ႇ ဢၼ်ၵူၼ်းမိူင်းတႆး တင်းၼမ် လႆႈၸႂ်ၼၼ်ႉ၊ မိူဝ်ႈလႂ်ဢမ်ႇဝႃႈ ႁဝ်းၶႃႈၽွမ်ႉယူႇ၊ ႁၢင်ႈႁႅၼ်းတူဝ်ႈတၼ်းဝႆႉယူႇၶႃႈ။

ထၢမ်- မိူဝ်ႈလဵဝ်ၼႆႉ လႆႈႁၼ်ဝႃႈ ၾၢႆႇလူင်ပွင်ၸိုင်ႈမၢၼ်ႈၵေႃႈ ၵေႃႇသၢင်ႈလွင်ႈၶိုၼ်းမႄးလီၵၼ်ၼႂ်းၸိူဝ်ႉၸၢတ်ႈ၊ ၾၢႆႇတႆးႁဝ်းၵေႃႈ ၶတ်းၸႂ်ၵေႃႇသၢင်ႈလွင်ႈၽွမ်ႉႁူမ်ႈၵၼ်။ ပိူဝ်ႈတႃႇတႆးႁဝ်း ၽွမ်ႉႁူမ်ႈၵၼ်ၼႆႉ တေၽွမ်ႉႁူမ်ႈၵၼ် ၸိူင်ႉႁိုဝ် ဢၼ်လီတီႈသုတ်း၊ ၵဵဝ်ႇၵပ်းလွင်ႈၽွမ်ႉႁူမ်ႈၸိူဝ်ႉၸၢတ်ႈႁဝ်းၶႃႈၼႆႉသေ ယူႇတီႈႁူဝ်သိူဝ် SNLD ႁဝ်းၶႃႈ ၶႂ်ႈလၢတ်ႈၸိူင်ႉႁိုဝ်ၶႃႈ။

တွပ်ႇ- ပိူင်လူင်မၼ်း ႁဝ်းတေဢမ်ႇလႆႈၶၢတ်ႇ ဢဵၼ်းဢၢၼ်းၵၢၼ်မိူင်းႁဝ်းၵူၺ်း။ ဢဵၼ်းဢၢၼ်းၵၢၼ်မိူင်းယၢမ်းလဵဝ် လူင်ပွင်ၸိုင်ႈၵေႃႈမၼ်း ၶိုၼ်းမႄးၵေႃႇတင်ႈၸိုင်ႈမိူင်း ဢၼ်ဝႃႈ State Building ။ ယူႇတီႈႁဝ်း ၸိူဝ်းပဵၼ်ၸၢဝ်းၶိူဝ်း ၼႆႉသမ်ႉ တေလႆႈၵေႃႇတင်ႈၵၢၼ်ၸၢဝ်းၶိူဝ်းႁဝ်း၊ ပေႃးဢမ်ႇၼၼ် ႁဝ်းတေၸူမ်ႁၢႆပႅတ်ႈ။ ဢၼ်ဝႃႈ Nation Building ၼၼ်ႉ ပေႃးႁဝ်းဢမ်ႇႁဵတ်း မၼ်းတေၸူမ်ႁၢႆၵႂႃႇပႅတ်ႈ ၼႂ်းဢၼ်ပိူၼ်ႈၶိုၼ်းမႄးၵေႃႇတင်ႈဝၢၼ်ႈမိူင်းမႂ်ႇၼၼ်ႉ။ ၵွပ်ႈၼၼ် ၾၢႆႇၼိုင်ႈ တင်းဢၼ်ပၼ်ႁႅင်းပိူၼ်ႈ ၶိုၼ်းမႄးၵေႃႇတင်ႈဝၢၼ်ႈမိူင်းမႂ်ႇၼၼ်ႉ ၾၢႆႇၼိုင်ႈၵေႃႈသမ်ႉတေလႆႈ ႁဵတ်းၵႂႃႇလွင်ႈၵၢၼ် ၵေႃႇတင်ႈၸၢဝ်းၶိူဝ်းႁဝ်း။ ပေႃးဝႃႈ ႁူႉထိုင်ၸိူင်ႉၼၼ်ယူႇၼႆ တီႈ/ၸုမ်းၼႆႉ မၼ်းဢမ်ႇၸႂ်ႈပိူင်လူင် ယဝ်ႉ၊ ႁဝ်းၵႂႃႇႁူမ်ႈၵၼ်တီႈဢၼ်ဢဵၼ်းဢၢၼ်းၼၼ်ႉၼႆတႄႉ ၸိုဝ်ႈၸုမ်းႁဝ်းပႅၵ်ႇၵၼ်၊ ၼႃႈတီႈပုၼ်ႈၽွၼ်းႁဝ်း ပႅၵ်ႇၵၼ်သေတႃႉၵေႃႈ မၼ်းတိုၼ်းႁူမ်ႈႁွမ်း/ ၽွမ်ႉၵၼ်လႆႈယူႇ ႁဝ်းၶႃႈႁၼ်ထိုင်ၼင်ႇၼႆၶႃႈ။

ထၢမ်- လိုၼ်းသုတ်း ယူႇတီႈ SNDP ႁဝ်း ၶႂ်ႈသင်ႇတီႈပီႈၼွင်ႉၵူၼ်းမိူင်းတႆးႁဝ်း ၵဵဝ်ႇၵပ်းၼႃႈဝၢၼ်ႈတႃမိူင်း မိူဝ်ႈလဵဝ် မီးၸိူင်ႉႁိုဝ်ၶႃႈ။

တွပ်ႇ- တီႈဢေႇသုတ်းမၼ်း မိူဝ်ႈလဵဝ် ဢၼ်ႁဝ်းလႆႈၵႂင်ၸွမ်းၼႆႉ ပေႃးဝႃႈၵႂၢမ်းၸၢတ်ႈၵႂၢမ်းသႅင်းၵေႃႈ ႁဝ်းလႆႈၵႃႈၸွမ်း သဵင်ႁႆႇတူႇရိယႃႇပိူၼ်ႈၵူၺ်း၊ ပေႃးတေၵုမ်ႇမဝ်းမိင်းၸွမ်း သဵင်ႁႆႇတွႆႇတိုင်ႈပိူၼ်ႈသေ ၵႃႈယူႇတိၵ်းတိၵ်း။ ပေႃးႁဝ်း ဢမ်ႇတႅမ်ႈၸိူင်းမႂ်ႇႁင်းၵူၺ်းႁဝ်းသေ ႁႆႇတိုင်ႈၵူၺ်းႁဝ်း ၵႃႈၵူၺ်းႁဝ်းတႄႉ မိူဝ်ႈလႂ်ၵေႃႈ ႁဝ်းတေဢမ်ႇၸၢင်ႈပူၼ်ႉလႆႈ ၸၢတ်ႈဢၼ်ဝႃႈပူတ်းပွႆႇထၢင်ႇႁၢင်ႈ။ ၵွပ်ႈၼႆ ယႃႇပေၵႂင်ၵႃးၸွမ်း လွင်ႈၵၢၼ်လိူၵ်ႈတင်ႈ လွၵ်းပိူင်ၵၢၼ်လိူၵ်ႈတင်ႈ ၸိူဝ်းၼႆႉသေယဝ်ႉ ႁႂ်ႈလႆႈမုင်ႈႁၼ်တီႈယိူင်းဢၢၼ်း ဢၼ်ႁဝ်းထုၵ်ႇပဵၼ်၊ ဢၼ်ႁဝ်းလီလႆႈပဵၼ်ၼၼ်ႉ ၸႅင်ႈၸႅင်ႈလႅင်း လႅင်းသေ သိုပ်ႇလိူၵ်ႈ ပၼ်ႁႅင်းၵႂႃႇ ၸုမ်းလႂ် ၽႂ်တေႁဵတ်းၵၢၼ်တႄႉတႄႉၼၼ်ႉသေၵမ်း၊ ၶႂ်ႈတိုၵ်းသူၼ်းၼင်ႇၼႆၶႃႈ။

(တွၼ်ႈၼႃႈ ၸုမ်းၶၢဝ်ႇၽူႈတွႆႇႁွၵ်ႈ တိတ်းတေႃႇတွင်ႈထၢမ် ႁူဝ်ပဝ်ႈပႃႇတီႇသိူဝ်ၽိူၵ်ႇ လုင်းၸၢႆးဢၢႆႈပဝ်း ၵဵဝ်ႇၵပ်း လွင်ႈၵၢၼ်ၽွမ်ႉႁူမ်ႈတႆး)။