ၶွမ်ႊပၼီႊတႅပ်းမႆႉပွတ်းမိူင်းပၼ်ႇ ပၼ်သၢႆၾႆးၾႃႉ ၵူၼ်းမိူင်း
ၶွမ်ႊပၼီႊတိၼ်ႇမျိၼ်ႉယီႇ ဢၼ်လႆႈပႃႊမိတ်ႉတႅပ်းမႆႉ ၼႂ်းၸႄႈဝဵင်းမိူင်းပၼ်ႇ၊
ၼိုင်ႈပီၼပ်ႉႁူဝ်ႁဵင်တၼ်ႊ ပိုတ်ႇပၢင်ၵႅဝ်ႈ ပၼ်သၢႆ/ သဝ်ၾႆးၾႃႉ ၵူၼ်းမိူင်း။
ၵူၺ်းၵႃႈ သၢႆၾႆးတေႃႇၶဝ်ႈႁိူၼ်းတႄႉ ၵူၼ်းမိူင်းလႆႈဢွၵ်ႇငိုၼ်းၵူၺ်း။
ဝၼ်းတီႈ 24/07/2014 ၼႆႉ
ၶွမ်ႊပၼီႊတိၼ်ႇမျိၼ်ႉယီႇ ဢၼ်ၵႂႃႇတႅပ်းမႆႉသၵ်း မႆႉတိုင်း
ၼႂ်းၸႄႈဝဵင်းမိူင်းပၼ်ႇၼၼ်ႉ ဝွၵ်ႇဢဝ်ၽွင်းလူင်ၾၢႆႇၾႆးၾႃႉ
လုင်းၸၢႆးထုၼ်းယိၼ်ႇ ႁွတ်ႈထိုင်ဝဵင်းမိူင်းပၼ်ႇသေ ပိုတ်ႇပၼ်သၢႆၾႆးၾႃႉ
တႃႇၵူၼ်း မိူင်းပၼ်ႇ 5 ဝၢၼ်ႈ၊ ဝၢၼ်ႈႁူဝ်ၾၢႆ၊ ဝၢၼ်ႈၼိူဝ်၊ ဝၢၼ်ႈသူပ်းႁူၺ်ႈ၊
ဝၢၼ်ႈၼႃးလေႃး၊ ဝၢၼ်ႈမွင်းႁွင်း ၸိူဝ်းၼႆႉ။
ၶွမ်ႊပၼီႊၼႆႉ တပ်းဢဝ်မႆႉသၵ်း
ၼႂ်းၸႄႈဝဵင်းမိူင်းပၼ်ႇ ပႃႊမိတ်ႊၼိုင်ႈၵမ်း တႅပ်းဢဝ်တီႈဢေႇသုတ်း 6,500 တၼ်ႊ
ၵူႈပီ။ မႆႉတိုင်း၊ မႆႉမွၵ်ႇသွမ်ႇ ၸိူဝ်းၼႆႉၵေႃႈ
တႅပ်းဢဝ်ၵႂႃႇၼပ်ႉႁူဝ်ႁဵင်တၼ်ႊ ။
ၽူႈႁၵ်ႉသိင်ႇဝႅတ်ႉလွမ်ႉလႄႈ
ပၵ်းတႃတူၺ်းလွမ်ပႃႇမႆႉပႃႇထိူၼ်ႇမိူင်းတႆး ၵူၼ်းမိူင်းပၼ်ႇ
ၵေႃႉၼိုင်ႈလၢတ်ႈဝႃႈ- ဢၼ်ၶဝ်မႃးၸွႆႈပၼ်သၢႆၾႆးၾႃႉၼၼ်ႉ
ဢမ်ႇၸႂ်ႈတိတ်းသၢႆၾႆးပၼ်တေႃႇထိုင်ႁိူၼ်း။ မၢင်ဝၢၼ်ႈၵေႃႈ ပၵ်းလၵ်းသဝ် ဢုတ်ႇ
ထိုင်ၵၢင်တၢင်းယဝ်ႉ ပၵ်းလၵ်းသဝ်မႆႉပၼ်။ မၢင်ဝၢၼ်ႈၵေႃႈ ပၵ်းလၵ်းသဝ်မႆႉပၼ်သေ
ပေႃးၵႂႃႇထိုင်ဝၢၼ်ႈယဝ်ႉ ပိူဝ်ႈတႃႇဢဝ်ၾႆးၾႃႉၶဝ်ႈႁိူၼ်းၼၼ်ႉ
တေလႆႈသိုဝ်ႉသၢႆၾႆး လၵ်းၾႆးႁင်းၵူၺ်းတင်းမူတ်း၊ ၵူၼ်းဝၢၼ်ႈယင်းတိုၵ်ႉ
လႆႈသဵင်ႈငိုၼ်းၸွမ်းယူႇ- ဝႃႈၼႆ။
ဝဵင်းမိူင်းပၼ်ႇၼႆႉ
ယူႇၼႂ်းၸႄႈဝဵင်းလၢင်းၶိူဝ်း ၸိုင်ႈတႆးပွတ်းၸၢၼ်း၊ ၸမ်တၢတ်ႇလူင်ၸူင်ဢၢင်
(ၵဵင်းတွင်း) ဢၼ်ဢွၵ်ႇ ႁႅင်းၾႆးၾႃႉၼမ်လိူဝ်ပိူၼ်ႈသုတ်း
ၼႂ်းၸိုင်ႈမိူင်းႁူမ်ႈတုမ်မၢၼ်ႈ။
ၵူၺ်းၵႃႈ ၵူၼ်းမိူင်းပၼ်ႇၼႆႉ
ယူႇၸမ်တၢတ်ႇလူင်ၸူင်ဢၢင်သေတႃႉ ယင်းတိုၵ်ႉလႆႈၾႆးမိူဝ်ႈလဵဝ်။ ယင်းတိုၵ်ႉမီး
ၵူၼ်းၵႃႉ / လၢဝ်းပၢၼ်းၶဝ် ၾၢႆႇၼိုင်ႈၵေႃႈ မႃးတႅပ်းမႆႉတႅပ်းတွၵ်ႇ၊
ၾၢႆႇၼိုင်ႈၵေႃႈ မႃးဝၵ်ႉဢဝ်တိုဝ်ႉတၢင်းႁဵတ်းလီပၼ် ၵူၼ်းဝၢၼ်ႈၵူၼ်းမိူင်း-
ၵူၼ်းမိူင်းပၼ်ႇဢမ်ႇၶႂ်ႈဢွၵ်ႇၸိုဝ်ႈၵေႃႉၼိုင်ႈ လၢတ်ႈၼင်ႇၼႆ။
Tags: Environment, News