ဢူးဢွင်ႇမိၼ်း သပ်းၸႅင်ႈၼႄ ၶၵ်ႉၵၢၼ် ငမ်းယဵၼ်ထႅင်ႈ တီႈဝဵင်းတူၼ်ႈတီး
ႁူဝ်ပဝ်ႈၸုမ်းၶိုင်ပွင်လွင်ႈငမ်းယဵၼ် ဢူးဢွင်ႇမိၼ်း ႁွင်ႉပႃႇတီႇၵၢၼ်မိူင်း၊
ၸုမ်းပီႇတုၸိတ်ႉသေ သပ်းၸႅင်ႈၼႄ ၶၵ်ႉၵၢၼ်ငမ်းယဵၼ်ထႅင်ႈ တီႈဝဵင်းတူၼ်ႈတီး၊
ဝၢႆးသပ်းၸႅင်ႈၼႄ ၶၵ်ႉၵၢၼ်တီႈၼေႇပျီႇတေႃႇ။
ပၢင်သပ်းၸႅင်ႈၼႄၶၵ်ႉၵၢၼ်ငမ်းယဵၼ် တီႈဝဵင်းတူၼ်ႈတီး |
ဝၼ်းတီႈ 24/07/2014 ၼႆႉ ဢူးဢွင်ႇမိၼ်း
ၵႅမ်ႁူဝ်ပဝ်ႈ 2 ၸုမ်းၶိုင်ပွင်လွင်ႈငမ်းယဵၼ် ၸၼ်ႉၸိုင်ႈမိူင်းႁူမ်ႈတုမ်
ႁွတ်ႈၽႅဝ်ဝဵင်းတူၼ်ႈတီး
ၸိုင်ႈတႆးပွတ်းၸၢၼ်းသေသပ်းၸႅင်ႈၼႄၶၵ်ႉၵၢၼ်ငမ်းယဵၼ်တီႈႁူင်းႁႅမ်း
ၶျႄႇရီႇၵႂိၼ်း။ မီးၸုမ်းတူင်ႇဝူင်းၵူၼ်း၊ ၸုမ်းပႃႇတီႇၵၢၼ်မိူင်း၊
ၸုမ်းတပ်ႉသိုၵ်း ဢၼ်ပၵ်းလုမ်းတီႈ ဝဵင်းတူၼ်ႈတီး ၸိူဝ်းၼႆႉၶဝ်ႈႁူမ်ႈ
ထွမ်ႇငိၼ်း။
ပႃႇတီႇၵၢၼ်မိူင်း မီးႁူဝ်ပဝ်ႈ
ပႃႇတီႇငဝ်ႈငုၼ်းၻီႊမူဝ်ႊၶရေႊၸီႇၸိူဝ်ႉၶိူဝ်းတႆး ႁိုဝ် ပႃႇတီႇႁူဝ်သိူဝ်
(SNLD) ဝဵင်းတူၼ်ႈတီး ၸဝ်ႈၶမ်းပိူင်ႇၾႃႉ၊
တူဝ်တႅၼ်းပႃႇတီႇမႂ်ႇသုင်ၸိုင်ႈတႆး/ တပ်ႉသိုၵ်းၸိုင်ႈတႆး (SSPP/SSA) ၊
တူဝ်တႅၼ်း ပျီႇတုၸိတ်ႉ ၸုမ်းပဢူဝ်း၊ တူဝ်တႅၼ်းပျီႇတုၸိတ်ႉ
ၼႂ်းပိုၼ်ႉတီႈၸိူဝ်းၼႆႉၶဝ်ႈႁူမ်ႈ။
ပၢင်သပ်းၸႅင်ႈၼႄၶၵ်ႉၵၢၼ်ငမ်းယဵၼ် တီႈဝဵင်းတူၼ်ႈတီး |
ဢူးဢွင်ႇမိၼ်းၼႆႉ ပဵၼ်ၵႅမ်ႁူဝ်ပဝ်ႈ (2)
ၸုမ်းၶိုင်ပွင်လွင်ႈငမ်းယဵၼ် ၸၼ်ႉၸိုင်ႈမိူင်း ႁူမ်ႈတုမ် (UPWC) ဢိၵ်ႇတင်း
ပဵၼ်ႁူဝ်ပဝ်ႈ သုၼ်ငမ်းယဵၼ်မၢၼ်ႈ (MPC) ။ ပူၼ်ႉမႃးမိူဝ်ႈဝၼ်းတီႈ 20/07/2014
ၼၼ်ႉ ယူႇတီႈ MPC သေ ႁွင်ႉဝွၵ်ႇ ဢဝ်ၽွင်းတႅၼ်းၸၢဝ်းၶိူဝ်းၵမ်ႈၼမ်၊
ပႃးၸဵမ်ၽွင်းတႅၼ်းပႃႇတီႇသၢင်ႇသီႈ (USDP) ၵမ်ႈၽွင်ႈ မႃးႁူပ်ႉထူပ်းဢုပ်ႇဢူဝ်း
ၵၼ်တီႈ ၼေႇပျီႇတေႃႇယဝ်ႉ ၵိၼ်ၶဝ်ႈႁူမ်ႈမူႇၵၼ်။ ၼႂ်းၼၼ်ႉ
ပႃးၶႅၵ်ႇၼွၵ်ႈမိူင်းဢၼ်လူင်ႉလႅၼ်ႇ ၾၢႆႇၵေႃႇသၢင်ႈ လွင်ႈငမ်းယဵၼ်
မိူင်းၾိလိပ်ႊပိၼ်ႊ ၶဝ်ႈႁူမ်ႈၸွမ်း။
ပၢင်သပ်းၸႅင်ႈၼႄၶၵ်ႉၵၢၼ်ငမ်းယဵၼ်
တီႈဝဵင်းတူၼ်ႈတီး ၵမ်းၼႆႉ
ဢူးဢွင်ႇမိၼ်းလႆႈၸီႉၸႅင်ႈသပ်းလႅင်းပိုတ်ႇလၢတ်ႈၼႄဝႃႈ
ပေႃးတႅၵ်ႈၵၼ်တင်းၵူႈပွၵ်ႈ မိူဝ်ႈလဵဝ်ပၢင်တိုၵ်း လူတ်းယွမ်းၵႂႃႇၼမ် -
ၸွမ်းၼင်ႇၸုမ်းၶၢဝ်ႇၽူႈတွႆႇႁွၵ်ႈႁၢႆးငၢၼ်း ၵႂႃႇၼိူဝ်ဝႅပ်ႉသႆႉ ပၢင်လူင်
မိူဝ်ႈဝၼ်းတီႈ 22/07/2014 ၼၼ်ႉ။
Tags: News, Politic