ပူၼ်ႉမႃးမိူဝ်ႈဝၼ်းတီႈ 23/07/2014 ၵၢင်ၼႂ်မွၵ်ႈယၢမ်း 8 မူင်း၊ ၼၢင်းယိင်းတႆး ဢႃႇယု 32 ပီ၊ ၵူၼ်းဝၢၼ်ႈၼမ်ႉပႃလမ် ဢိူင်ႇမိူင်းဢွတ်ႇၸႄႈဝဵင်းမိူင်းသူႈ ၸိုင်ႈတႆးပွတ်းၸၢၼ်း၊ ထုၵ်ႇသိုၵ်းမၢၼ်ႈ ၶိုၼ်ႈႁိူၼ်းယဝ်ႉ တဵၵ်းၵၼ်ႉၸၼ်လူလၢႆ- ၼႆယဝ်ႉ။

ၽွင်းမၼ်းၼၢင်း ႁုင်ၶဝ်ႈႁုင်ၽၵ်းယဝ်ႉသေ ဢၢင်ႈတေႁၢင်ႈႁႅၼ်းၶဝ်ႈၽၵ်း ၵႂႃႇသူင်ႇပေႃႈမႄႈမၼ်း တီႈၼႂ်းႁႆႈၼႂ်းၼႃး၊ သိုၵ်းမၢၼ်ႈၵေႃႉၼိုင်ႈ ၸိုဝ်ႈသိုၵ်းႁၢၼ်ၵျေႃႇၵျေႃႇၵူဝ်ႇ တပ်ႉၶလယ 9 ဢၼ်ပၵ်းတီႈမိူင်းၼွင် ၶိုၼ်ႈမႃးၼိူဝ်ႁိူၼ်း၊ မႃးပိၵ်ႉဢိုတ်းၽၵ်းတူသေ ဢဝ်ၵွင်ႈၸမ်ႈမၼ်းၼၢင်း၊ တဵၵ်းၸႂ်ႉမၼ်းၼၢင်းထွတ်ႇ ၶူဝ်းလဵင်းသေ ၵၼ်ႉၸၼ်လူလၢႆ- ၼႆယဝ်ႉ။

ၵဵဝ်ႇၵပ်းလွင်ႈၼႆႉ ပီႈၼွင်ႉမၼ်းၼၢင်းၵေႃႉၼိုင်ႈ လၢတ်ႈဝႃႈ- ဢၢႆႈသိုၵ်းမၢၼ်ႈၵေႃႉၼႆႉ ၶိုၼ်ႈမႃးၼိူဝ်ႁိူၼ်း တဵၵ်းဢိုတ်းၽၵ်းတူသေ ဢမ်ႇပၼ်မၼ်းၼၢင်းဢွၵ်ႇႁိူၼ်း၊ မၢင်ၵမ်းၵေႃႈဢဝ်မိတ်ႈၸမ်ႈ၊ မၢင်ၵမ်းၵေႃႈ ဢဝ်ၵွင်ႈၸမ်ႈ တဵၵ်းၸႂ်ႉထွတ်ႇၶူဝ်း၊ မၼ်းၼၢင်းဢၢင်ႈႁွင်ႉလႄႈ သိုၵ်းမၢၼ်ႈၼၼ်ႉဢဝ်မိတ်ႈငႃတႅင်းၶေႃး မၼ်းၼၢင်း၊ ယဝ်ႉၵေႃႈ တဵၵ်းၵၼ်ႉၸၼ်။ မိူဝ်ႈလဵဝ်ၼႆႉ မၼ်းၼၢင်းၵူဝ်ႁႄ မိူၼ်ၵူၼ်းယွင်ႇဝႆႉ။ ဝၢႆးၵၼ်ႉၸၼ်ယဝ်ႉ ၽူႈယႂ်ႇၵူၼ်းလူင်ဝၢၼ်ႈၵေႃႈ ၵႂႃႇတၢင်ႇလၢတ်ႈ ၵႂႃႇတီႈတပ်ႉမၢၼ်ႈ။

ၽူႈယႂ်ႇၵူၼ်းလူင်ဝၢၼ်ႈ လၢတ်ႈဝႃႈ- ႁႂ်ႈသၢႆႈတႅၼ်းပၼ် တႃႇငိုၼ်း 5 သႅၼ် (500,000) ၊ ၵူၺ်းၵႃႈ ၾၢႆႇတပ်ႉမၢၼ်ႈသၢႆႈပၼ်ငိုၼ်း သႅၼ်ႁႃႈ (150,000) သေ လၢတ်ႈဝႃႈ- ႁႂ်ႈယဝ်ႉတူဝ်ႈၵၼ်၊ ယႃႇပေၵႂႃႇတၢင်ႇ ၸၼ်ႉပႃႈၼိူဝ်ယဝ်ႉ။ ပေႃးလၢတ်ႈထႅင်ႈ ၶၢဝ်ႇမၼ်းၽႄႈၵေႃႈ လုၵ်ႈလၢင်းသူၵူၺ်း ဢၼ်တေလႆႈတၢင်းဢူၵ်း တၢင်းဢၢႆ- ဝႃႈၼႆ။

ၵပ်းၵၢႆႇလွင်ႈၼႆႉ ၵူၼ်းၼႂ်းဝူင်းၵၢၼ်မိူင်းတီႈမိူင်းသူႈ ၵေႃႉၼိုင်ႈၵေႃႈလၢတ်ႈဝႃႈ- ဢိင်ၼိူဝ်ၼၢင်းၵေႃႉၼႆႉ လႆႈထုၵ်ႇၵၼ်ႉၸၼ်ၼႆႉသေ ပိူဝ်ႈတႃႇယူတ်းယႃပၢႆးယူႇလီၵေႃႈလီ၊ ပၢႆးၸႂ်ၵေႃႈလီ၊ ပိူဝ်ႈတႃႇႁႂ်ႈၵေႃႉ ဢၼ်ပူၼ်ႉပႅၼ် ႁဵတ်းၽိတ်းၼႆႉ ၺႃးတူတ်ႈတၢမ်ႇၼၼ်ႉၵေႃႈလီ၊ တေၶတ်းၸႂ် တိတ်းတေႃႇၵပ်းသိုပ်ႇသေ ၸွႆႈထႅမ်ပၼ်ၵႂႃႇ- ဝႃႈၼႆ။

ဝၢၼ်ႈၼမ်ႉပႃလမ်ၼႆႉ ယူႇၼႂ်းဢိူင်ႇမိူင်းဢွတ်ႇ ၾၢႆႇႁွင်ႇဝဵင်းမိူင်းသူႈ။ မိူဝ်ႈၽွင်းပၢင်လိူၵ်ႈတင်ႈပီ 2010 ၼၼ်ႉ ၵူၼ်းၼႂ်းထုင်ႉမိူင်းဢွတ်ႇၼႆႉ လႆႈထုၵ်ႇၸုမ်းပျီႇတုၸိတ်ႉၶဝ်ႁူၺ်းသူၼ်းသေ ႁႂ်ႈၵမ်ႉထႅမ်ပႃႇတီႇသၢင်ႇသီႈ၊ ၶဝ်ၵေႃႈ ဢမ်ႇလႆႈၵမ်ႉထႅမ်ပႃႇတီႇသိူဝ်ၽိူၵ်ႇမႃး- ၵူၼ်းပႃႇတီႇသိူဝ်ၽိူၵ်ႇ ၵေႃႉၼိုင်ႈလၢတ်ႈၼင်ႇၼႆ။

ၵူၼ်းဝၢၼ်ႈၵူၼ်းမိူင်း ဢၼ်ယူႇပွတ်းထုင်ႉၼႆႉ ၼႂ်းပီ 2011-12 လႆႈထူပ်းၽေးသိုၵ်းသိူဝ် ဢၼ်သိုၵ်းမၢၼ်ႈ ႁၢင်ႈသိုၵ်း လေႃႇတိုၵ်း တပ်ႉသိုၵ်းၸိုင်ႈတႆး SSPP/SSA ႁၢဝ်ႈႁႅင်း။