ပူၼ်ႉမႃးမိူဝ်ႈဝၼ်းတီႈ 16/08/2014 ႁူဝ်ၶမ်ႈ မွၵ်ႈယၢမ်း 6 မူင်းၶိုင်ႈ ၼၢင်းယိင်းၵေႃႉၼိုင်ႈ ႁွင်ႉလုၵ်ႈၸၢႆးမၼ်းၼၢင်း ဢႃႇယု 6 ၶူပ်ႇပၢႆ လုၵ်ႉတၢင်းၾင်ႇမိူင်းၶႄႇ မႃးတေႃႇလွင်းတီႈႁိူၼ်းၶႄႇလင်ၼိုင်ႈ တီႈပွၵ်ႉၵၢတ်ႇ ဝဵင်းမူႇၸႄႈ။ မိူဝ်ႈၽွင်းမႄႈမၼ်းတေႃႇလွင်းယူႇၼၼ်ႉ လုၵ်ႈၸၢႆးမၼ်းသမ်ႉငဝ်လပ်းလႄႈ မႄႈမၼ်းဢဝ်လုၵ်ႈၸၢႆးၵႂႃႇၼွၼ်းဝႆႉ တီႈၼႂ်းႁိူၼ်းၼၼ်ႉသေတီႈတီႈယဝ်ႉ ၵႂႃႇသိုပ်ႇတေႃႇလွင်းထႅင်ႈ။

ၵူၼ်းၼုမ်ႇ ၸၢႆးသႅင် ၵေႃႉယူႇပွၵ်ႉၵၢတ်ႇ လၢတ်ႈၼႄဝႃႈ- ၸဝ်ႈႁိူၼ်းၵူၼ်းၸၢႆး ၸၢဝ်းၶိူဝ်းၶႄႇ သမ်ႉၵိၼ်ယႃႈမႃႉလႄႈ မဝ်းယွင်ႇယႃႈမႃႉယူႇသေ ၵႂႃႇတႅပ်းၶေႃး တႅပ်းၶႅၼ် ဢဝ်မိတ်ႈထႅၵ်ႇပုမ်သေ ၸၼ်သႆႈလၢႆးၶူင်းၼႂ်း လုၵ်ႈဢွၼ်ႇ ၵေႃႉၼွၼ်းယူႇၼၼ်ႉဢွၵ်ႇထူင်ႇယႂ်းလူင်ၵႂႃႇသဵင်ႈ။ ၸၢဝ်းၶႄႇ ၵေႃႉဢၼ်ၶႃႈတၢႆလုၵ်ႈဢွၼ်ႇၼႆႉ ဢႃႇယုမွၵ်ႈ 30 ပၢႆ၊  လုၵ်ႈဢွၼ်ႇ ၵေႃႉထုၵ်ႇၶႃႈတၢႆၼႆႉၵေႃႈ ပဵၼ်လုၵ်ႈၸၢႆးၵေႃႉလဵဝ်ၶွင်မႄႈၶီႈလွင်းၵေႃႉၼၼ်ႉ- ဝႃႈၼႆ။

ၼၢင်းၸၢမ် ၵူၼ်းၼႂ်းပိုၼ်ႉတီႈလၢတ်ႈၼႄဝႃႈ- ၸဝ်ႈၼႃႈတီႈၶဝ် မႃးတီႉၺွပ်းၸဝ်ႈႁိူၼ်း ၸၢဝ်းၶႄႇၵေႃႉၶႃႈႁႅမ် လုၵ်ႈဢွၼ်ႇ ၶမ်ႈၼၼ်ႉၵမ်းလဵဝ်။ ၽူႈမီးပုၼ်ႈၽွၼ်းၶဝ် ပလိၵ်ႈၶဝ်ထၢမ်မၼ်းသင်ၵေႃႈ ယွၼ်ႉပိူဝ်ႈမၼ်းတိုၵ်ႉ မဝ်းယွင်ႇမႃႈယူႇလႄႈ ဢမ်ႇလႆႈႁူႉသင်။ ပေႃႈမႄႈလုၵ်ႈဢွၼ်ႇတႄႉ လၢတ်ႈဝႃႈ- ၶဝ်ဢမ်ႇၶႂ်ႈလႆႈၵႃႈသၢႆႈတႅၼ်းသင်၊ ၶႂ်ႈႁႂ်ႈဢဝ်မၢႆမီႈသေ ပၼ်တၢင်းၽိတ်းမၼ်းၵူၺ်း- ဝႃႈၼႆ။

ၵူၼ်းၼုမ်ႇမူႇၸႄႈ ၸၢႆးမဵဝ်း ၵေႃႈလၢတ်ႈၼႄဝႃႈ- တီႈမူႇၸႄႈၼႆႉ ပၢင်လွင်းၵေႃႈလိူင်ႇၼမ်၊ တီႈပၢင်လွင်းၼႆႉ ယႃႈမဝ်းၵမ်ၵေႃႈႁႃလႆႈငၢႆႈ၊ ၶႂ်ႈလႆႈၸိူင်ႉႁိုဝ်ၵေႃႈလႆႈ မီးၵူႈသႅၼ်း၊ ၽူႈမီးပုၼ်ႈၽွၼ်းၶဝ်ၵေႃႈ ဢမ်ႇၽဵဝ်ႈမူၺ်ႉလႆႈ ထိုင် တီႈထိုင်လႅၼ်။ ပေႃးဝႃႈ ပၢင်တေႃႇလွင်းတိုၵ်ႉမီးယူႇတႄႉ ယႃႈမဝ်းၵမ်ၵေႃႈတိုၼ်းတေလိူင်ႇၼမ်ယူႇ- ဝႃႈၼႆ။

လုင်းသွႆႈၶမ်း ၵူၼ်းမူႇၸႄႈၵေႃႈလၢတ်ႈဝႃႈ- ယႃႈမဝ်းၵမ်ၼႆႉ မၼ်းႁဵတ်းႁႂ်ႈၸၢတ်ႈပၢၼ်ၵူၼ်းၼုမ်ႇၶဝ်လူႉ၊ ပေႃးဝႃႈ ၵူၼ်းၼုမ်ႇၶဝ် ဢမ်ႇၵုမ်းၸႂ်ၶဝ်လႆႈၵေႃႈ ယဵၼ်းၵႂႃႇပဵၼ်ၶီႈယႃႈ။ ယွၼ်ႉယႃႈမဝ်းၵမ် ယႃႈမႃႉၸိူဝ်းၼႆႉလႄႈ လွင်ႈၶႃႈႁႅမ်ၵၼ်တၢႆၵေႃႈမီးမႃး၊ ၸိူဝ်းၼႆႉ ႁဝ်းၶႃႈထုၵ်ႇလႆႈဢဝ်ပဵၼ်တွၼ်ႈသွၼ်ႁဝ်း- ဝႃႈၼႆ။