ၼွင်ႉၼႅၼ်း တေမႃးဢွၵ်ႇႁၢႆးၵၢၼ် ႁူင်းပွႆႇသဵင် ၸုမ်းၶၢဝ်ႇၽူႈတွႆႇႁွၵ်ႈ
မိူဝ်ႈၼႆႉ ဝၢႆးဝၼ်း ၼွင်ႉၼႅၼ်း ႁိုဝ် ၼွင်ႉၼုတ်း ၵေႃႉဢၼ်ၸိုဝ်ႈသဵင်လင်
ၼႂ်းတူင်ႇဝူင်းထႆး/တႆး ယၢမ်းလဵဝ် တေမႃးဢွၵ်ႇႁၢႆးၵၢၼ် တၢင်းႁူင်းပွႆႇသဵင်
ၸုမ်းၶၢဝ်ႇ ၽူႈတွႆႇႁွၵ်ႈ၊ ပိုတ်ႇလၢတ်ႈ ၸူဝ်ႈပၢၼ်ၽဝမၼ်းၼၢင်း။
ၼွင်ႉၼႅၼ်း ယိပ်းၼႄၽိုၼ်ၶၢဝ်ႇထႆး ဢၼ်ဢွၵ်ႇလွင်ႈမၼ်းၼၢင်း |
ၽွင်းယၢမ်းမိူဝ်ႈလဵဝ်
(ပွတ်းၼႂ်)ၼႆႉတၢင်းထီးဝီးထႆး တိုၵ်ႉထၢႆႇႁၢႆးၵၢၼ် ထီးဝီး
ယူႇတီႈႁေႃသိလ်ၵဵင်းမႆႇယူႇ၊ ၵွပ်ႈၼၼ် ဝၢႆးဝၼ်းမိူဝ်ႈၼႆႉ ဝၼ်းတီႈ 18/08/2014
ၶၢဝ်းယၢမ်းမွၵ်ႈ 1 မူင်း၊ ၼွင်ႉၼႅၼ်း ႁိုဝ် ၼွင်ႉၼုတ်း တေမႃးဢွၵ်ႇႁၢႆးၵၢၼ်
တၢင်းႁူင်းပွႆႇသဵင် (SHAN Radio Online) ။ တေမီးၵၢၼ်တွင်ႈထၢမ်
ပိုတ်ႇလၢတ်ႈၼႄ လွင်ႈၸူဝ်ႈၸၢတ်ႈပၢၼ် မၼ်းၼၢင်း မိူၼ်ၼင်ႇယူႇမိူင်းႁဝ်း
ပဵၼ်ၸိူင်ႉႁိုဝ်၊ မႃးယူႇမိူင်းထႆး ပဵၼ်ၸိူင်ႉႁိုဝ်၊
ယၢမ်ႈႁဵတ်းၵၢၼ်သင်မႃးၽွင်ႈ၊ ၼႂ်းၸူဝ်ႈပၢၼ်ၼႆႉ
ထူပ်းတၢင်းယၢပ်ႇၽိုတ်ႇသင်မႃးၽွင်ႈ၊ သမ်ႉႁဵတ်းႁိုဝ် မီးတိုဝ်ႉတၢင်း
ၸိုဝ်ႈလိုဝ်းလင်မႃး၊ မိူဝ်ႈၼႃးသမ်ႉ မီးယိူင်းဢၢၼ်းၶႂ်ႈပဵၼ်သင် ၸိူင်ႉႁိုဝ်
ၸိူဝ်းၼႆႉ။
ၼွင်ႉၼႅၼ်းၼႆႉ
ဢိင်ၼိူဝ်တၢင်းလဝ်းႁၢင်ႈလီ ပဵၼ်တိုၼ်းပိုၼ်ႉထၢၼ်သေ ၽွင်းႁဵတ်းၵၢၼ်ယူႇတီႈ
ႁၢၼ်ႉၶဝ်ႈၽၵ်း လၢပ်ႈတူၼ်ႈယၢင်း ၼႂ်းၵဵင်းမႆႇၼႆႉၵႃႈပူၼ်ႉမႃး
မီးပီႈၼွင်ႉၵူၼ်းထႆး မႃးႁၢၼ်မႅၼ်ႈသေ ၸၢင်ႈထၢႆႇဝႅပ်ႇ
(ၼၢင်းဝႅပ်ႇ)ဢွၵ်ႇၼႂ်းသိုဝ်ႇထႆး လၢႆလၢႆပွၵ်ႈ။ လိုၼ်းသုတ်း
ႁဵတ်းႁႂ်ႈပဵၼ်ၶၢဝ်ႇယႂ်ႇ ဢွၵ်ႇၼႂ်း ၽိုၼ်ၶၢဝ်ႇထႆး၊ ၼႂ်းႁူင်းပွႆႇႁၢင်ႈသဵင်
(TV) ထႆးသေ တၢင်းတူင်ႇဝူင်း/ လူၵ်ႈဢွၼ်ႊလၢႆႊ ၾဵတ်ႊသ်ၿုၵ်ႊ (Facebook)
ၸိူဝ်းၼႆႉၵေႃႈ ပိုၼ်ၽႄႈၵၼ်ၼမ်လၢႆ။
ပူၼ်ႉမႃးမိူဝ်ႈဝၼ်းတီႈ 15/08/2014
ၸုမ်းၶၢဝ်ႇၽူႈတွႆႇႁွၵ်ႈ လႆႈၵႂႃႇႁူပ်ႉထူပ်းတွင်ႈထၢမ် ၼွင်ႉၼႅၼ်း
တီႈႁၢၼ်ႉၶဝ်ႈၽၵ်း လၢပ်ႈတူၼ်ႈယၢင်း မူႇ 4 ဝၢၼ်ႈသၼ်ၽီသိူဝ်ႉ ဝဵင်းၵဵင်းမႆႇ
(ၼိူဝ်သဵၼ်ႈတၢင်းလူင် သႃလႃးၵၢင် (ၵဵင်းမႆႇ) လႄႈမႄႈၸူဝ်ႈ)။ မၼ်းၼၢင်း
တွပ်ႇလၢတ်ႈဝႃႈ လုၵ်ႉမိူင်းတႆး ၶဝ်ႈႁဵတ်းၵၢၼ်ၼႂ်းမိူင်းထႆး လႆႈ 7-8 ပီယဝ်ႉ၊
ႁဵတ်းၵၢၼ်တီႈႁၢၼ်ႉၼႆႉ လႆႈမႃး 5 ပီ၊ မိူဝ်ႈဢွၼ်တၢင်းႁဵတ်းၵၢၼ်ၵူႈလွင်ႈလွင်ႈ။
ၵၢၼ်ၵေႃႇသၢင်ႈ ႁပ်ႉမဝ်ၽွင်ႈ၊ ႁဵတ်းၵၢၼ်ၼႂ်းႁိူၼ်းယေး လဵင်ႉၵူၼ်းထဝ်ႈ။
မႃးႁဵတ်းၵၢၼ်တီႈၼႆႈသေ မီးၵူၼ်းၵႆႉယွၼ်းထၢႆႇၶႅပ်းႁၢင်ႈလႄႈ မီးၵူၼ်းႁူႉၸၵ်း
ၼမ်မႃး- ၼႆယဝ်ႉ။
Tags: General, News