ၼွင်ႉၼႅၼ်း မႃးဢွၵ်ႇႁၢႆးၵၢၼ် ႁူင်းပွႆႇသဵင် ၸုမ်းၶၢဝ်ႇၽူႈတွႆႇႁွၵ်ႈ
မိူဝ်ႈၼႆႉ ဝၢႆးဝၼ်း ၼွင်ႉၼႅၼ်း ႁိုဝ် ၼွင်ႉၼုတ်း ၵေႃႉဢၼ်ၸိုဝ်ႈသဵင်လင်
ၼႂ်းတူင်ႇဝူင်းထႆး/တႆး ယၢမ်းလဵဝ် မႃးဢွၵ်ႇ လၢႆးၵၢၼ် တၢင်းႁူင်းပွႆႇသဵင်
ၸုမ်းၶၢဝ်ႇ ၽူႈတွႆႇႁွၵ်ႈ၊ ပိုတ်ႇလၢတ်ႈ ၸူဝ်ႈပၢၼ်ၽဝမၼ်းၼၢင်း။
ၼွင်ႉၼႅၼ်း မႃးဢွွၵ်ႇႁၢႆးၵၢၼ် တီႈၸုမ်းၶၢဝ်ႇၽူႈတွႆႇႁွၵ်ႈ |
ဝၼ်းတီႈ 18/08/2014
တင်ႈတႄႇၶၢဝ်းယၢမ်းဝၢႆးဝၼ်း မွၵ်ႈ 2 မူင်း တေႃႇထိုင် 3 မူင်း ၼွင်ႉၼႅၼ်း
ႁိုဝ် ၼွင်ႉၼုတ်း မႃးဢွၵ်ႇလၢႆးၵၢၼ် တၢင်းႁူင်းပွႆႇသဵင် (SHAN Radio Online)
ၶွင်ၸုမ်းၶၢဝ်ႇ ၽူႈတွႆႇႁွၵ်ႈ ၸွမ်းၼင်ႇႁပ်ႉဝွၵ်ႇၸိူၼ်းဝႆႉ။
မီးၵၢၼ်တွင်ႈထၢမ်သေ မၼ်းၼၢင်းပိုတ်ႇလၢတ်ႈၼႄ လွင်ႈၸူဝ်ႈၸၢတ်ႈပၢၼ်မၼ်းၼၢင်း
မိူဝ်ႈလဵၵ်ႉ၊ မိူဝ်ႈယူႇမိူင်းတႆး၊ လွင်ႈလႆႈၶဝ်ႈႁဵတ်းၵၢၼ်မိူင်းထႆး၊
ယၢမ်ႈႁဵတ်းၵၢၼ်သင်မႃးၽွင်ႈ၊ လွင်ႈလႆႈထူပ်းတၢင်းယၢပ်ႇၽိုတ်ႇမႃးၼႂ်းၸူဝ်ႈပၢၼ်
လႄႈ လွင်ႈလႆႈ မီးတိုဝ်ႉတၢင်း ၸိုဝ်ႈလိုဝ်းလင်မႃး- ၸိူဝ်းၼႆႉ။
ဢိင်ၼိူဝ်တွင်ႈထၢမ်ဝႃႈ
ၵၢၼ်ၸိူဝ်ႉၸၢတ်ႈတႆးၼႆႉ ၼွင်ႉၼႅၼ်း ယိူင်းဢၢၼ်းဝႃႈၸွႆႈလႆႈၾၢႆႇလႂ် ၼႆၼၼ်ႉ
လႆႈၵႂၢမ်း တွပ်ႇဝႃႈ- ပေႃးပဵၼ်ပွႆးတႆး ဢမ်ႇဝႃႈပီမႂ်ႇတႆး
ပွႆးသၢင်ႇလွင်းၸိူဝ်းၼႆႉ ၶႃႈၵေႃႈၵႂႃႇၶဝ်ႈယူႇၵူႈပီ။ ပေႃးဝႃႈပီႈၼွင်ႉတႆးႁဝ်း
ပၼ်တိုဝ်ႉတၢင်းၸိုင် ၶႃႈၸွႆႈလႆႈၾၢႆႇလႂ် ၶႃႈၵေႃႈယိၼ်းလီယိၼ်းၸူမ်းသေ
တေၵႂႃႇၸွႆႈပၼ်။ တွင်ႈထၢမ်ထႅင်ႈဝႃႈ ပေႃးထိုင်ပွႆးပီမႂ်ႇတႆးမႃး
ဢၼ်တၢင်းႁူဝ်ပဝ်ႈ ၵေႃလိၵ်ႈလၢႆးလႄႈၾိင်ႈငႄႈတႆး ႁွင်ႉဝွၵ်ႇၸိူၼ်းဝႆႉ
ႁႂ်ႈၵႂႃႇႁွင်ႉၵႂၢမ်း ပၼ်ၼၼ်ႉ ၼွင်ႉၼႅၼ်း တွပ်ႇလၢတ်ႈဝႃႈ
လႆႈႁပ်ႉပၢၵ်ႇဝႆႉယူႇၶႃႈ၊ ၵူၼ်းၵေႃႈတေလႆႈႁူႉၸၵ်းႁဝ်းၼမ်၊ တင်ႈတႄႇ
မိူဝ်ႈၼႆႉၵႂႃႇ တေလႆႈၾိုၵ်းႁွင်ႉၵႂၢမ်းယဝ်ႉ- ဝႃႈၼႆ။
ၼွင်ႉၼႅၼ်းၼႆႉ
ဢိင်ၼိူဝ်တၢင်းလဝ်းႁၢင်ႈလီတူဝ်ၵဝ်ႇ ပဵၼ်တိုၼ်းသေ ၽွင်းႁဵတ်းၵၢၼ်ယူႇတီႈ
ႁၢၼ်ႉၶဝ်ႈၽၵ်း လၢပ်ႈတူၼ်ႈယၢင်း ၼႂ်းၵဵင်းမႆႇၼႆႉၵႃႈပူၼ်ႉမႃး
မီးပီႈၼွင်ႉၵူၼ်းထႆး မႃးႁၢၼ်မႅၼ်ႈသေ ၸၢင်ႈထၢႆႇဝႅပ်ႇ (ၼၢင်းဝႅပ်ႇ)
ဢွၵ်ႇၼႂ်းသိုဝ်ႇထႆး လၢႆလၢႆပွၵ်ႈ။ လိုၼ်းသုတ်း ႁဵတ်းႁႂ်ႈပဵၼ်ၶၢဝ်ႇယႂ်ႇ
ဢွၵ်ႇၼႂ်းၽိုၼ်ၶၢဝ်ႇထႆး၊ ၼႂ်းႁူင်းပွႆႇႁၢင်ႈသဵင် (TV) ထႆးသေ
တၢင်းတူင်ႇဝူင်း/ လူၵ်ႈဢွၼ်ႊလၢႆႊ ၾဵတ်ႊၶ်ၿုၵ်ႊ (Facebook) ၸိူဝ်းၼႆႉၵေႃႈ
ပိုၼ်ၽႄႈၵၼ်ၼမ်လၢႆ။
ပူၼ်ႉမႃးမိူဝ်ႈဝၼ်းတီႈ 15/08/2014
ၸုမ်းၶၢဝ်ႇၽူႈတွႆႇႁွၵ်ႈ လႆႈၵႂႃႇႁူပ်ႉထူပ်းတွင်ႈထၢမ် ၼွင်ႉၼႅၼ်း တီႈႁၢၼ်ႉ
ၶဝ်ႈၽၵ်း လၢပ်ႈတူၼ်ႈယၢင်း မူႇ 4 ဝၢၼ်ႈသၼ်ၽီသိူဝ်ႉ ဝဵင်းၵဵင်းမႆႇ
(ၼိူဝ်သဵၼ်ႈတၢင်းလူင် သႃလႃးၵၢင် (ၵဵင်းမႆႇ) လႄႈမႄႈၸူဝ်ႈ)။ မၼ်းၼၢင်း
တွပ်ႇလၢတ်ႈဝႃႈ လုၵ်ႉမိူင်းတႆး ၶဝ်ႈႁဵတ်းၵၢၼ်ၼႂ်းမိူင်းထႆး လႆႈ 7-8 ပီယဝ်ႉ၊
ႁဵတ်းၵၢၼ် တီႈႁၢၼ်ႉၼႆႉမႃး 5 ပီ၊ ဢွၼ်တၢင်းႁဵတ်းၵၢၼ်ၵူႈလွင်ႈလွင်ႈ။
ၵၢၼ်ၵေႃႇသၢင်ႈ ႁပ်ႉမဝ်ၽွင်ႈ၊ ႁဵတ်းၵၢၼ်ၼႂ်းႁိူၼ်းယေး လဵင်ႉၵူၼ်းထဝ်ႈ။
မႃးႁဵတ်းၵၢၼ်တီႈၼႆႈ မီးၵူၼ်းၵႆႉယွၼ်းထၢႆႇၶႅပ်းႁၢင်ႈလႄႈ မီးၵူၼ်းႁူႉၸၵ်း
ၼမ်မႃး- ၼႆယဝ်ႉ။
Tags: Migrant-Worker, News