ပၢင်ဢၢၼ်ႇၶႆႈလိၵ်ႈလၢႆးတႆး ၸတ်းတီႈ ဝဵင်းလၢႆးၶႃႈ
တီႈပၢင်ဢၢၼ်ႇၶႆႈ လိၵ်ႈလၢႆးတႆး ၸတ်းႁဵတ်းတီႈ ဝဵင်းလၢႆးၶႃႈ
ၸိုင်ႈတႆးပွတ်းၸၢၼ်း ပွၵ်ႈဢွၼ်တၢင်းသုတ်း။ မီးၶူးသွၼ် လူင်မႁႃႈတူဝ်
ၸၢႆးၾႃႈ ၶဝ်ႈႁူမ်ႈမွၵ်ႇလၢတ်ႈလွင်ႈလိၵ်ႈလၢႆးတႆး။
လုင်းၸၢႆးၾႃႈ ၶူးမေႃပူင်သွၼ်လိၵ်ႈလၢႆးတႆး |
ပူၼ်ႉမႃးမိူဝ်ႈဝၼ်းတီႈ 17/08/2014
မီးၵၢၼ်ၸတ်းပၢင်ဢၢၼ်ႇၶႆႈလိၵ်ႈလၢႆးတႆး တီႈပွၵ်ႉႁူဝ်ၼွင်လူင်
ႁူင်းႁေႃၸွမ်သႅင် ဝဵင်းလၢႆးၶႃႈလႄႈၽူႈမႃးၶဝ်ႈႁူမ်ႈမွၵ်ႈ ႁဵင်ပၢႆ။
တီႈပၢင်ဢၢၼ်ႇၶႆႈလိၵ်ႈလၢႆးတႆးၼႆႉ
ၽူႈၵၢဝ်ႇလၢတ်ႈၵႂၢမ်း မီးမေႃသွၼ်လူင်မႁႃႈတူဝ် ၸၢႆးၾႃႈ၊ ၶုၼ်ယုင်းၶဵဝ်၊
ၸၢႆးမိူင်းလႅင်း၊ ၸၢႆးဢူးၶမ်း ၸိူဝ်းၼႆႉ။ ပိူဝ်ႈတႃႇပဵၼ်မႃး
ပၢင်ဢၢၼ်ႇၶႆႈလိၵ်ႈလၢႆးပွၵ်ႈၼႆႉ ၵူၼ်းၼုမ်ႇဝဵင်းလၢႆးၶႃႈ
ႁူမ်ႈၵၼ်ဢွၼ်ႁူဝ်ၸတ်းႁဵတ်း- ၽူႈဢွၼ်ႁူဝ် ၸၢႆးႁိူင်းလႅင်း လၢတ်ႈၼႄ
တီႈၸုမ်းၶၢဝ်ႇၽူႈတွႆႇႁွၵ်ႈၼင်ႇၼႆ။
ၸၢႆးၾႃႈ ၵၢဝ်ႇလၢတ်ႈဝႃႈ-
လွင်ႈဢမ်ႇႁူႉၼၼ်ႉ ပဵၼ်တၢင်းယၢပ်ႇၽိုတ်ႇ တႃႇၸၢဝ်းၶိူဝ်းတႆးယဝ်ႉ။
ဢၼ်ၶႃႈႁဝ်းၶႂ်ႈသင်ႇ လၢတ်ႈၼၼ်ႉ ပိူင်လူင်မၼ်းပဵၼ်ပေႃႈမႄႈ၊
ပေႃးပေႃႈမႄႈဢမ်ႇလီၵေႃႈ လုၵ်ႈလၢင်းဢမ်ႇလီ၊ ပေႃးဝႃႈ ၶူးသွၼ်မေႃသွၼ်
ဢမ်ႇလီၵေႃႈ လုၵ်ႈႁဵၼ်းဢမ်ႇလီ။ ယွၼ်ႉၼၼ် ႁဝ်းတေတၢင်ႇတၢင်းၽိတ်း
တီႈလုၵ်ႈဢွၼ်ႇလၢႆလၢႆၵူၺ်း ဢမ်ႇလႆႈ။ တႃႇလုၵ်ႈဢွၼ်ႇတႆးႁဝ်း
ပေႃးတေၶိုၼ်ႈယႂ်ႇမႂ်ႇသုင်ၵႂႃႇဝၼ်းမိူဝ်းၼႃႈၼႆႉ ပုၼ်ႈၽွၼ်းမီးတီႈပေႃႈမႄႈ/
ၶူးသွၼ်- ဝႃႈၼႆ။
ၽွင်းတႅၼ်းၸႄႈမိူင်း ဝဵင်းလၢႆးၶႃႈ
ၸၢႆးပၢင်ႇ ၵေႃႈလၢတ်ႈဝႃႈ- ပၢင်ဢၢၼ်ႇၶႆႈလိၵ်ႈလၢႆးတႆးၼႆႉ တႃႇတေႁဵတ်းထႅင်ႈ
တီႈမိူင်းၵိုင်ၵေႃႈ ႁဝ်းၶႃႈယိူင်းဢၢၼ်းဝႆႉယူႇ။
ယွၼ်ႉႁဝ်းၶႃႈလႆႈမႃးထွမ်ယိိၼ်းလႄႈ ဢၼ်ႁဝ်းၶႃႈဢမ်ႇႁူႉၸိူဝ်းၼၼ်ႉ ၵေႃႈ
လႆႈႁူႉမႃး။ ဢၼ်ႁဝ်းၶႃႈႁူႉဝႆႉၼၼ်ႉၵေႃႈ ၶႅၼ်းၶဝ်ႈၸႂ်ပွင်ႇၸႂ်မႃး လိူဝ်ၵဝ်ႇ-
ဝႃႈၼႆ။
ၸၢႆးၾႃႈၼႆႉ ပူၼ်ႉမႃးမိူဝ်ႈပီ 1973 ၵေႃႈ
မႃးၽႅဝ်တီႈဝဵင်းလၢႆးၶႃႈသေ ပူင်သွၼ်ပၼ်လိၵ်ႈလၢႆးတႆး။ မိူဝ်ႈပီ 2012
ပိူဝ်ႈတႃႇလိၵ်ႈလၢႆးတႆး တေပူင်သွၼ်လႆႈ ၼႂ်းႁူင်းႁဵၼ်းလူင်ပွင်ၸိုင်ႈၵေႃႈ
လႆႈဢွၼ်ၵၼ် ၸတ်းႁဵတ်းပၢင်ၵုမ်တီႈ ၼႂ်းဝတ်ႉ/ၵျွင်း 9 လၵ်း ဝဵင်းတႃႈၵုင်ႈသေ
ဢုပ်ႇၵုမ်ၵၼ်မႃး။ တင်ႈတႄႇ လိူၼ်ၵျူႊလၢႆႊ 2014 မႃး လိၵ်ႈလၢႆးတႆးၼႆႉ
ပူင်သွၼ်ပၼ်ၼႂ်းႁူင်းႁဵၼ်းလူင်ပွင်ၸိုင်ႈယဝ်ႉ- ၸၢႆးၾႃႈ သပ်းလႅင်းၵႂႃႇ
ၼင်ႇၼႆ။
ပၢင်ဢၢၼ်ႇၶႆႈလိၵ်ႈလၢႆးတႆးၼႆႉ
ယၢမ်ႈၸတ်းႁဵတ်းမႃးတီႈ ဝဵင်းတၢင်ႉယၢၼ်း ဝဵင်းမိူင်းယႆ ၸိုင်ႈတႆးပွတ်းႁွင်ႇ
ၸိူဝ်းၼႆႉ၊ မီးၶူးႁိုၼ်း ၵႃယၢင်း၊ မႄႈၶူးၶိူဝ်းသႅၼ်၊ ၶုၼ်ယုင်းၶဵဝ် တင်း
ၸၢႆးသႅင်မိူင်းၸိူဝ်းၼႆႉ ၵၢဝ်ႇလၢတ်ႈ ၶေႃႈၵႂၢမ်း။
Tags: Education, News