ၵူၼ်းမိူင်းသၢၼ်ၶတ်း လွင်ႈၶွမ်ႊပၼီႊ လတႃႇတႃႇ တေတႄႇပၼ်ၼမ်ႉ
ၵူၼ်းၼႂ်းပိုၼ်ႉတီႈၼမ်ႉၶမ်း သၢၼ်ၶတ်းသေတႃႉ ၶွမ်ႊပၼီႊ လတႃႇတႃႇ ၵေႃႈ
ၶတ်းၸႂ်တႃႇပၼ်ၼမ်ႉ တီႈၵူၼ်းမိူင်း၊ ႁူမ်ႈႁွမ်းၵၼ်တင်းၽူႈမီးဢမ်းၼၢၸ်ႈ
(ဢႃႇၼႃႇ) ၼႂ်းပိုၼ်ႉတီႈၶဝ်သေ တေတႄႇပၼ်ၼမ်ႉၵႂႃႇ။
လိၵ်ႈယွၼ်းၵၢင်ၸႂ်ၵူၼ်းၼႂ်းပိုၼ်ႉတီႈ ဢၼ်ဢူးၸေႃႇမိၼ်း သူင်ႇၸူးၵူၼ်းမိူင်း |
ၵဵဝ်ႇၵပ်းလွင်ႈၼႆႉ ဢူးၸေႃႇမိၼ်း
ၽူႈၵွၼ်းၸႄႈဝဵင်းလၢတ်ႈဝႃႈ- ၶူင်းၵၢၼ်ပၼ်ၼမ်ႉၼႆႉ တေႁဵတ်းၵႂႃႇႁႂ်ႈပေႃးၼႄၼမ်ႉ
ၼႄတူဝ်လႆႈ။ လွင်ႈၼႆႉ လႆႈယွၼ်းၵၢင်ၸႂ်ၵူၼ်းပိုၼ်ႉတီႈယဝ်ႉ။
လိၵ်ႈယွၼ်းၵၢင်ၸႂ်ၼၼ်ႉ လႆႈသူင်ႇပၼ်တီႈၵူၼ်းမိူင်း ၼႂ်းပိုၼ်ႉတီႈ
မိူဝ်ႈဝၼ်းတီႈ 12/08/2014 ၊ ဝၼ်းတီႈ 15/08/2014 ဝႆႉပဵၼ်ဝၼ်းလိုၼ်းသုတ်း
ႁႂ်ႈၵူၼ်းၼႂ်းပိုၼ်ႉတီႈ တွပ်ႇပၼ်ၶိုၼ်း- ၼႆယဝ်ႉ။
ၽွင်းတႅၼ်းၵူၼ်းမိူင်း
ပႃႇတီႇသိူဝ်ၽိူၵ်ႇ (SNDP) ၸၢႆးတိၼ်ႇဢူး လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ-
ဢၼ်ၽူႈၵွၼ်း ၸႄႈဝဵင်း ပၼ်ၶွမ်ႊပၼီႊလတႃႇတႃႇ ႁဵတ်းသၢင်ႈၵၢၼ်ငၢၼ်းယူႇၼႆႉ
ႁဵတ်းႁႂ်ႈၵူၼ်းပိုၼ်ႉတီႈၶဝ်ထၢင်ႇထိူမ်။ တႃႇတေ ပၼ်ၶွမ်ႊပၼီႊလတႃႇတႃႇ
တေႃႇပၼ်ၼမ်ႉၼႆသေ ၽူႈၵွၼ်းၸႄႈဝဵင်းၵေႃႈ
ၵဵပ်းငိုၼ်းတီႈၼႂ်းပွၵ်ႉၼႂ်းယွမ်ႇယူႇ။ လွင်ႈၶွမ်ႊပၼီႊလတႃႇတႃႇ
တေတေႃႇပၼ်ၼမ်ႉၼႆႉ ၵူၼ်းပိုၼ်ႉတီႈၶဝ်ဢမ်ႇလႆႈၸႂ်၊ ၵွပ်ႈဝႃႈ ၼမ်ႉၵိၼ်ၼမ်ႉၸႂ်ႉ
ၵုမ်ႇထူၼ်ႈယူႇ။ တႃႇတေတေႃႇပၼ်ၼမ်ႉၼႆႉ ၶဝ်မႃးယွၼ်းၵၢင်ၸႂ်တီႈၵူၼ်းမိူင်း
လၢႆပွၵ်ႈလၢႆၵမ်းယဝ်ႉ၊ မိူဝ်ႈလဵဝ်ၵေႃႈ ႁႂ်ႈၽူႈၵွၼ်းၸႄႈဝဵင်းမႃးယွၼ်းထႅင်ႈ၊
လွင်ႈၼႆႉ ႁဵတ်းႁႂ်ႈမၼ်းပွင်ႇသင်ၵေႃႈဢမ်ႇႁူႉ- ဝႃႈၼႆ။
ႁူင်းၸၢၵ်ႈ ဢၼ်မီးၾၢႆႇမိူင်းၶႄႇ
မိူၼ်ၼင်ႇႁူင်းၸၢၵ်ႈႁဵတ်းၸေႈ / ႁုင်လဵၵ်း/ ႁုင်ၵိူဝ်ဝၢၼ်ၸိူဝ်းၼႆႉ
ပွႆႇၼမ်ႉဢမ်ႇလီ ဢမ်ႇငၢမ်း လုၵ်ႉတီႈႁူင်းၸၢၵ်ႈၸိူဝ်းၼႆႉသေ
လႆၶဝ်ႈၼႂ်းမႄႈၼမ်ႉမၢဝ်း၊ ပႃၼႂ်းၼမ်ႉမၢဝ်း လႆႈတၢႆ ႁၢႆလၢႆၵႂႃႇၸိူဝ်းၼႆႉ
ၵူၼ်းမိူင်းၵေႃႈလႆႈႁၼ်။ မိူဝ်ႈလဵဝ် တေဢဝ်ၼမ်ႉမၢဝ်း တေႃႇပၼ်ၵူၼ်းဝၢၼ်ႈ
ၵူၼ်းမိူင်း ႁႂ်ႈလႆႈၵိၼ် ႁႂ်ႈလႆႈၸႂ်ႉၼၼ်ႉ မၼ်းဢမ်ႇသၢင်ႇထုၵ်ႇသေဢိတ်း၊
မၼ်းတေတုမ်ႉတိူဝ်ႉပၢႆးယူႇလီၵူၼ်းမိူင်း။ ယွၼ်ႉၼၼ် ၵူၼ်းမိူင်းၸင်ႇလႆႈ
သၢၼ်ၶတ်း- ၸၢႆးဢၢႆႈ ၵူၼ်းပွၵ်ႉၼွင်ႉၸၢင်ႉ လၢတ်ႈတီႈ ၸုမ်းၶၢဝ်ႇၽူႈတွႆႇႁွၵ်ႈ။
ၵူၼ်းၼုမ်ႇ လုၵ်ႈၸုမ်းပႃႇတီႇႁူဝ်သိူဝ်
(SNLD) ၵေႃႉၼိုင်ႈလၢတ်ႈဝႃႈ- ၶွမ်ႊပၼီႊလတႃႇတႃႇၼႆႉ ပဵၼ်ပႃႈတႂ်ႈၶွမ်ႊပၼီႊ
ဝၼ်ပွင်ႇ၊ ၶွမ်ႊပၼီႊ ဝၼ်ပွင်ႇၼႆႉ ပဵၼ်ၶွမ်ႊပၼီႊႁဵတ်းၼမ်ႉမၼ်းမဵၼ်။
ယွၼ်ႉဢမ်ႇမီးၽွၼ်းလီ တႃႇၵူၼ်းမိူင်း သင်လႄႈ ၸင်ႇလႆႈသၢၼ်ၶတ်း။
လွင်ႈတေပၼ်ၼမ်ႉၼႆႉ ဢမ်ႇၵွမ်ႉၵႃႈၵူၼ်းမိူင်း တီႈၼမ်ႉၶမ်းၵူၺ်း
ၵူၼ်းၶဝ်ႈၸုမ်း လိူမ်ႈလႆႇၶဝ်၊ ၽူႈၵွၼ်းပွၵ်ႉၶဝ်၊
ၽူႈၶဝ်ႈၸုမ်းပႃႇတီႇသိူဝ်ၽိူၵ်ႇ ႁူဝ်သိူဝ်ၶဝ်ၸိူဝ်းၼႆႉၵေႃႈ
ဢွၼ်ၵၼ်သၢၼ်ၶတ်းယူႇ- ဝႃႈၼႆ။
Tags: Human Right, News