ၸဝ်ႈယွတ်ႈသိုၵ်းဝႃႈ ပၼ်ႁႃၵူႈလွင်ႈလွင်ႈ ယူႇတီႈလူင်ပွင်ၸိုင်ႈမၢၼ်ႈ
ၸဝ်ႈယွတ်ႈသိုၵ်း ႁူဝ်ႈပဝ်ႈၶွင်ႊသီႊဢဝ်ၶိုၼ်းၸိုင်ႈတႆး လၢတ်ႈဝႃႈ
ပၼ်ႁႃၵူႈလွင်ႈလွင်ႈ ယူႇတီႈလူင်ပွင်ၸိုင်ႈ မၢၼ်ႈ၊ ဝၼ်းမိူဝ်ႈၼႆႉ
ဢၼ်ႁဝ်းထုၵ်ႇလႆႈဢုပ်ႇ ပဵၼ်လူင်ပွင်ၸိုင်ႈၵူၺ်း၊ မၼ်းဢမ်ႇၸႂ်ႈတပ်ႉသိုၵ်း။
ၸွမ်းၼင်ႇၸုမ်းၶၢဝ်ႇ ၽူႈတွႆႇႁွၵ်ႈ ႁူပ်ႉထူပ်းတွင်ႈထၢမ် ဝႆႉၼၼ်ႉ
မၼ်းၸဝ်ႈတွပ်ႇလၢတ်ႈဝႆႉ ၼင်ႇၼႆ။
ၸဝ်ႈယွတ်ႈသိုၵ်း ႁူဝ်ႈပဝ်ႈၶွင်ႊသီႊဢဝ်ၶိုၼ်းၸိုင်ႈတႆး |
ထၢမ်- လူင်ပွင်ၸိုင်ႈမၢၼ်ႈၶဝ်ဝႃႈ
ဝၢႆးတူၵ်းလူင်းၵိုတ်းယိုဝ်းၵၼ်လႆႈ 3 လိူၼ်ယဝ်ႉ တေႁႂ်ႈမီးပၢင်ၵုမ်လူင်
လွင်ႈၼႆႉ ႁၼ်ထိုင်ၸိူင်ႉႁိုဝ်ၶႃႈ။
တွပ်ႇ-လွင်ႈၵိုတ်းတိုၵ်းပတ်းပိုၼ်ႉၼႆႉ
မိူဝ်ႈႁဝ်းႁူပ်ႉဢူးဢွင်ႇမိၼ်းၵေႃႈ ႁဝ်းလၢတ်ႈတႃႇသေႇ။ ဢၼ်ပဵၼ်တႄႉမၼ်း
ၵူႈၸုမ်းၸုမ်းပေႃးလူင်းလၢႆးမိုဝ်း ၸၼ်ႉမိူင်းႁူမ်ႈတုမ်ယဝ်ႉမူတ်းယဝ်ႉ။
ႁဝ်းႁွင်ႉၵၼ်မႃးသေ မႃးဢုပ်ႇဢူဝ်းၵၼ် တႄႇၽိူၼ်ၵၢၼ်မိူင်းၵႂႃႇၵမ်းလဵဝ်ၵေႃႈ
ပေႃးလႆႈယဝ်ႉ။ ၶႃႈထၢမ်ၶဝ်ၼႆႉ ဢူးဢွင်ႇမိၼ်းၵေႃႈ ဢမ်ႇသပ်းလႅင်းၼႄ။ လွင်ႈၼႆႉ
ၶဝ်လၢတ်ႈဝႃႈ ၶႂ်ႈႁႂ်ႈမၼ်းပႃးၵၼ်မူတ်းမူတ်း၊ မၼ်းလၢတ်ႈၶေႃႈၵႂၢမ်းဢၼ်ၼႆႉ
ၶေႃႈလဵဝ်ၵူၺ်း။ ၸိူဝ်းၼႆႉ ပွင်ႇဝႃႈမၼ်းလိင်ႉသေလၢတ်ႈၵူၺ်း။
ထၢမ်-ႁဝ်းမႃးတူၺ်းၼႂ်းလူင်ပွင်ၸိုင်ႈ
ဢူးဢွင်ႇမိၼ်းၶဝ် မိူၼ်ၼင်ႇသူၼ်ႇ/ပုၼ်ႈၼိုင်ႈႁင်းၵူၺ်း၊ ၾၢႆႇတပ်ႉသိုၵ်းၵေႃႈ
မိူၼ်ၼင်ႇပုၼ်ႈၼိုင်ႈႁင်းၵူၺ်း။ ၵႃႈပူၼ်ႉမႃး
လူင်းလၢႆးမိုဝ်းၵိုတ်းယိုဝ်းၵၼ် ၼႆသေတႃႉ တၢင်းၾၢႆႇဢူးဢွင်ႇမိၼ်း ၶဝ် ၵေႃႈ
ဢုပ်ႇလွင်ႈငမ်းယဵၼ်ယူႇတိၵ်းတိၵ်း၊ တၢင်းၾၢႆႇသိုၵ်းၵေႃႈ လႅပ်ႈဢမ်ႇထွမ်ႇ
ဢမ်ႇလႆႈငိၼ်း ဢမ်ႇၶဝ်ႈႁူၶဝ်သေ ဢၼ်တိုၵ်းၵေႃႈတိုၵ်းယူႇတိၵ်းတိၵ်း၊
ဢမ်ႇပဵၼ်ၼၼ်ဝႆႉၶႃႈႁႃႉ။ လွင်ႈၼႆႉ ႁၼ်ထိုင်ၸိူင်ႉႁိုဝ်ၶႃႈ။
တွပ်ႇ-
မိူဝ်ႈႁဝ်းတႄႇႁူပ်ႉဢူးဢွင်ႇမိၼ်း ပွၵ်ႈတီႈၼိုင်ႈၵေႃႈ
ႁဝ်းတိုၼ်းထၢမ်ၵမ်းလဵဝ်၊ တပ်ႉသိုၵ်းၼႃႇ ယုမ်ႇၸွမ်ၸိုင်ႈ ယူႇႁႃႉ။
ဢူးဢွင်ႇမိၼ်း လၢတ်ႈဝႃႈ ပိူင်ၶွတ်ႇၽွတ်ႈၼႆႉ တပ်ႉသိုၵ်း
ယူႇတႂ်ႈလူင်ပွင်ၸိုင်ႈၵူၺ်း။ ၵူၺ်းၵႃႈ ဢဝ် သၽေႃးတြႃး
(ပိူင်ပဵၼ်တႄႉမီးတႄႉ)ဝႃႈၵေႃႈ တပ်ႉသိုၵ်းယူႇတႂ်ႈလူင်ပွင်ၸိုင်ႈ
ၵူၺ်းၼင်ႇၵဝ်ႇ။ ပေႃးၸိူင်ႉၼႆ ဝၼ်းမိူဝ်ႈၼႆႉ ဢၼ်ႁဝ်းထုၵ်ႇလႆႈဢုပ်ႇ
ပဵၼ်လူင်ပွင်ၸိုင်ႈၵူၺ်း၊ မၼ်းဢမ်ႇၸႂ်ႈတပ်ႉသိုၵ်း၊ ပေႃးလူင်ပွင်ၸိုင်ႈသူ
လူင်းလၢႆးမိုဝ်း ပေႃးလူင်ပွင်ၸိုင်ႈသူၽွမ်ႉယဝ်ႉၼႆၵေႃႈ မၼ်းၵေႃႈယဝ်ႉၵႂႃႇ။
တပ်ႉသိုၵ်းၽွမ်ႉ ဢမ်ႇၽွမ်ႉ မၼ်းယူႇတီႈ လူင်ပွင်ၸိုင်ႈၵူၺ်း၊
လူင်ပွင်ၸိုင်ႈၶဝ်ထုၵ်ႇလႆႈဢုပ်ႇတပ်ႉသိုၵ်းၵူၺ်း၊ မိူၼ်ၼင်ႇ
မီးပၼ်ႁႃၵၼ်ၸိူဝ်းၼႆႉ ႁႂ်ႈႁဝ်းၵႂႃႇဢုပ်ႇ တပ်ႉသိုၵ်းၼႆ ဢမ်ႇၸႂ်ႈ၊
ဝၼ်းမိူဝ်ႈၼႆႉ ႁဝ်းဢုပ်ႇလူင်ပွင်ၸိုင်ႈ၊
ႁဝ်းဢမ်ႇၵႂႃႇဢုပ်ႇတပ်ႉသိုၵ်းၵမ်းသိုဝ်ႈ၊ ပၼ်ႁႃ တင်းမူတ်းၼႆႉ
မၼ်းယူႇတီႈလူင်ပွင်ၸိုင်ႈၵူၺ်း။
ႁဝ်းထၢမ် KNU ဝႃႈ မိူဝ်ႈလဵဝ်ၼႆႉ
ပေႃးဝႃႈဢုပ်ႇဢူဝ်းၵၢၼ်မိူင်း တပ်ႉသိုၵ်းၵေႃႈလီလႆႈပႃး၊ လူင်ပွင်ၸိုင်ႈ
ၵေႃႈလႆႈပႃး၊ သၽႃးၵေႃႈ လီလႆႈပႃး ဢၼ်မၢၼ်ႈဝႃႈၼႆႉမၼ်းၶႂ်ႈဝႃႈၸိူင်ႉႁိုဝ်။
ပေႃးၸိူင်ႉၼႆ ႁဝ်းမီးဢၼ်လဵဝ်ၶဝ်မီး 3 ဢၼ်။ ဝၼ်းမိူဝ်ႈၼႆႉ ၵဝ်ၶႃႈပွင်ႇၸႂ်ဝႃႈ
ႁဝ်းဢုပ်ႇလူင်ပွင်ၸိုင်ႈ၊ လူင်ပွင်ၸိုင်ႈၼႆႉ ပဵၼ်ၽူႈမီးဢမ်းၼၢၸ်ႈ (ဢႃႇၼႃႇ)
ၽွင်းငမ်း ၼႂ်းၸိုင်ႈမိူင်း၊
ပေႃးပဵၼ်ၽူႈဢုပ်ႉပိူင်ႇ/ၽွင်းငမ်းတင်းၸိုင်ႈမိူင်း ပၼ်ႁႃ တင်းမူတ်းၼႆႉ
ၶဝ်တေဢဝ်ၶဝ်ႈၼႂ်းသၽႃးၶဝ်၊ တပ်ႉသိုၵ်းၵေႃႈ ယူႇၼႂ်းသၽႃး၊
သၽႃးၵေႃႈယူႇၼႂ်းသၽႃး၊ လူင်ပွင်ၸိုင်ႈၼႆႉ လီလႆႈဢဝ်ၶေႃႈတူၵ်းလူင်းတီႈၼၼ်ႈသေ
မႃးဢုပ်ႇႁဝ်း။ တပ်ႉသိုၵ်းႁင်းၶေႃၵေႃႈဢမ်ႇလႆႈ၊ သၽႃးႁင်းၶေႃၵေႃႈဢမ်ႇလႆႈ၊
ထုၵ်ႇလီပႃးမႃးဢၼ်ဝႃႈၼႆႉ လူင်ပွင် ၸိုင်ႈသူ ထုၵ်ႇလႆႈဢုပ်ႇၵၼ်ၵေႃႉလဵဝ်ၵူၺ်း၊
သူဢမ်ႇတၢပ်ႈမႃးဢုပ်ႇႁဝ်း 3 ၾၢႆႇ။ သင်ဝႃႈၶႂ်ႈဢုပ်ႇႁဝ်း 3 ၾၢႆႇၵေႃႈ
တပ်ႉသိုၵ်းပႃးမႃးၵေႃႈ ယူႇတီႈသူ၊ သၽႃးၶႂ်ႈပႃးမႃးၵေႃႈယူႇတီႈသူ၊ ၵူၺ်းၵႃႈ
ယူႇတီႈၾၢႆႇတပ်ႉသိုၵ်းသေ လၢတ်ႈၵႂၢမ်း ဢမ်ႇလႆႈ၊ ယူႇတီႈလူင်ပွင်ၸိုင်ႈသေ
လၢတ်ႈၵႂၢမ်းၵူၺ်း၊ ၼႆႉပဵၼ်ဢၼ်ထုၵ်ႇမႅၼ်ႈမၼ်း။
Tags: Interview, Politic