လူတ်ႉၵႃးလူင်ၶိုတ်ႈၺႃးၼၢင်းယိင်းတၢႆ တီႈဝဵင်းၼမ်ႉၶမ်း



လူတ်ႉၵႃးလူင် ယဵပ်ႇၶိုတ်ႈၺႃး ၼၢင်းယိင်းတူၵ်းလူတ်ႉၶိူင်ႈ တီႈပွၵ်ႉႁူဝ်ၵၢတ်ႇ ၸႄႈဝဵင်းၼမ်ႉၶမ်း ၸိုင်ႈတႆးပွတ်းႁွင်ႇ၊ ယွၼ်ႉၵူၼ်းႁဵတ်းႁိူၼ်းၸိူဝ်းယူႇၸွမ်းၶၢင်ႈတၢင်း ပႅတ်ႈဝႆႉလဵၵ်းႁဵတ်းႁိူၼ်း ဢမ်ႇမီးပိူင်၊ ႁဵတ်းႁႂ်ႈ လူတ်ႉၶိူင်ႈလူမ်ႉ သဵၼ်တူၵ်းၼိူဝ်တၢင်း ထုၵ်ႇလူတ်ႉၵႃးလူင် ၶိုတ်ႈၺႃး။



မိူဝ်ႈဝၼ်းတီႈ 14/09/2014 ယၢမ်းဝၢႆးဝၼ်း ၼၢင်းယိင်း 2 ၵေႃႉ ၶီႇလူတ်ႉၶိူင်ႈ လတ်းမႃးၼႂ်းသဵၼ်ႈတၢင်း ပျီႇထွင်ႇၸု (မိူင်းႁူမ်ႈတုမ်) ၸႄႈဝဵင်းၼမ်ႉၶမ်း။ ၽိူဝ်ႇမႃးၽႅဝ်တၢင်းၼႃႈ ႁိူၼ်းလင်ၼိုင်ႈ၊ ဢၼ်ဝႆႉၶိူင်ႈၶူဝ်းၵေႃႇသၢင်ႈ ႁိမ်းၶၢင်ႈ တၢင်းၼၼ်ႉ လဵၵ်းဢၼ်ၸႂ်ႉၼႂ်းၵၢၼ်ၵေႃႇသၢင်ႈ ၶဝ်ႈၵႂႃႇၼႂ်းမၢၵ်ႇလူတ်ႉၶိူင်ႈ ၼၢင်းယိင်း 2 ၵေႃႉၼၼ်ႉသေ ဢဝ် လူတ်ႉၶိူင်ႈလူမ်ႉ။ ၼၢင်းယိင်းဢွၼ်ႇ ၵေႃႉသွၼ်ႉမႃးတၢင်းလင်ၼၼ်ႉ သမ်ႉသဵၼ်တူၵ်းၵႂႃႇၼိူဝ်တၢင်း။ မိူဝ်ႈလူတ်ႉၶိူင်ႈ လူမ်ႉၼၼ်ႉ သမ်ႉမီးလူတ်ႉလူင်လမ်းၼိုင်ႈ မႃးတၢင်းလင်၊ လူတ်ႉၵႃးလူင် ဢမ်ႇတၼ်းႁၢမ်ႈလေႃႉ (ဢဝ်ပရဵၵ်ႇ) မၼ်းလႄႈ  ယဵပ်ႇၶိုတ်ႈၺႃး ၼၢင်းယိင်းၵေႃႉ တူၵ်းဝႆႉၼိူဝ်တၢင်းၼၼ်ႉတၢႆ။

ၵူၼ်းၼႂ်းပွၵ်ႉ ၵေႃႉဢၼ်ႁၼ်တႂ်ႈတႃၵေႃႉၼိုင်ႈလၢတ်ႈဝႃႈ- လူတ်ႉၵႃးလူင်လမ်းဢၼ်မႃးၶိုတ်ႈၼၢင်းဢွၼ်ႇ ၵေႃႉၼၼ်ႉ ပၢႆႉမၢႆၵႃးမၼ်းပဵၼ်လိၵ်ႈၶႄႇ၊ ပဵၼ်ၵႃးၶႄႇ၊ တၢင်ႇၵုၼ်ႇသိၼ်ၵႃႉ တေၶဝ်ႈၼႂ်းမိူင်းၶႄႇ။ ၼၢင်းဢွၼ်ႇၼၼ်ႉ ပေႃးထုၵ်ႇ လူတ်ႉၶိုတ်ႈယဝ်ႉၵေႃႈ ဢဝ်ၵႂႃႇႁူင်းယႃၼမ်ႉၶမ်းယူႇ၊ ၵူၺ်းၵႃႈ ယွၼ်ႉတၢင်းဝၢတ်ႇၸဵပ်းမၼ်းၼၢင်းႁၢဝ်ႈႁႅင်း ပူၼ်ႉတီႉ လႆႈတၢႆၵႂႃႇပႅတ်ႈၽွင်းႁူဝ်ၶမ်ႈ 5 မူင်းၶိုင်ႈဝၼ်းၼၼ်ႉ။ လွင်ႈပဵၼ်ၵႂႃႇၼႆႉ ၵွပ်ႈၶဝ်ပႅတ်ႈဝႆႉၶိူင်ႈၵေႃႇသၢင်ႈတၢင်းၼွၵ်ႈ ႁိူၼ်း ဢမ်ႇပဵၼ်ပၵ်းပဵၼ်ပိူင်၊ ဢမ်ႇမီးမၢႆမီႈ၊ လွင်ႈၼႆႉ ဢမ်ႇထုၵ်ႇလီပဵၼ်ၵေႃႈလႆႈပဵၼ်- ဝႃႈၼႆ။
ၼၢင်းယိင်း ၵေႃႉဢၼ်ထုၵ်ႇလူတ်ႉၵႃးလူင်ယဵပ်ႇၶိုတ်ႈၺႃး
ၸဝ်ႈႁိူၼ်းလင်ၼၼ်ႉ ပေႃးဝႃႈၵႃးလူင်ၶိုတ်ႈ ၼၢင်းဢွၼ်ႇၼၼ်ႉၵေႃႈ ၼႅတ်ႈၶၢႆႉဢဝ်ၶူဝ်းၶိူင်ႈၵေႃႇသၢင်ႈၶဝ် ၶဝ်ႈမိူဝ်းဝႆႉ တၢင်းၼႂ်းၵမ်းလဵဝ်၊ ယူႇတီႈၾၢႆႇလိူမ်ႈလႆႇဝဵင်းၼမ်ႉၶမ်းၵေႃႈ ဢမ်ႇလူင်းၵူတ်ႇထတ်းတူၺ်းလွင်ႈၼႆႉ။ ၵူၼ်းၼႂ်းပွၵ်ႉၼႂ်း ယွမ်ႇၵေႃႈလၢတ်ႈဝႃႈ ၾၢႆႇလိူမ်ႈလႆႇၶဝ်ၵဵပ်းၵိၼ်ငိုၼ်းလၢႆလၢႆၵူၺ်း၊ ဢမ်ႇႁပ်ႉပုၼ်ႈၽွၼ်းတဵမ်ထူၼ်ႈ၊ ၵူၼ်းဝၢၼ်ႈ ၵူၼ်းမိူင်း ၸင်ႇဝႆႉၶူဝ်းၶိူင်ႈၵေႃႇသၢင်ႈႁိမ်းၶၢင်ႈတၢင်းၸိူင်ႉၼႆ- ဝႃႈၼႆ။

ၸၢႆးသၢင်ႇဢၢႆႈ ၵူၼ်းဝဵင်းၼမ်ႉၶမ်း လၢတ်ႈၼႄဝႃႈ- ၾၢႆႇလိူမ်ႈလႆႇၸိူဝ်းၼႆႉ ပေႃးဝႃႈတေၵေႃႇသၢင်ႈႁိူၼ်းၼႆ ၶဝ်မႃး ၵဵပ်းငိုၼ်း၊ ၵူၺ်းၵႃႈ ဢမ်ႇလူင်းၵူတ်ႇထတ်းတူၺ်းလီလီ။ မိူဝ်ႈလဵဝ် ၸွမ်းသဵၼ်ႈတႃႈသၢႆတၢင်းၼႆႉ ၸိူဝ်းတေၵေႃႇသၢင်ႈ ႁဵတ်းႁိူၼ်းယေးၵေႃႈ မီးထႅင်ႈတင်းၼမ်၊ ၶဝ်ၵေႃႈဢဝ်ၶူဝ်းၶွင်ၶဝ်ဝႆႉၸွမ်းၸိူဝ်းႁိမ်းၶၢင်ႈတၢင်း ၸိူင်ႉၼႆၵူၺ်း၊ ၵမ်ႈၼမ် ပဵၼ်ႁိူၼ်းၶႄႇ- ဝႃႈၼႆ။

ၵူၼ်းႁေႃႈလူတ်ႉၵႃးလူင်ၼၼ်ႉ ၸိုဝ်ႈႁွင်ႉဝႃႈၸၢႆးယီႈမူၼ်ႇ ယူႇဝၢၼ်ႈႁွင်း ၸႄႈဝဵင်းၼမ်ႉၶမ်း။ ၼၢင်းယိင်း ၵေႃႉထုၵ်ႇ လူတ်ႉယဵပ်ႇၶိုတ်ႈတၢႆၼၼ်ႉ ဢႃႇယုမီးမွၵ်ႈ 20 ပီ (ဢမ်ႇႁူႉၸိုဝ်ႈ) ယူႇဝၢၼ်ႈပၢၼ်းသေး။ မိူဝ်ႈလဵဝ် လူတ်ႉၵႃး တင်းၵူၼ်းႁေႃႈမၼ်းၼၼ်ႉ ပလိၵ်ႈဢဝ်ၵႂႃႇတီႈႁူင်းပလိၵ်ႈၼမ်ႉၶမ်းယဝ်ႉ၊ တေဢဝ်လိူင်ႈ ဢဝ်လၢဝ်းမၼ်း ၸိူင်ႉႁိုဝ် တႄႉပႆႇႁူႉ။

ၶူဝ်းၶွင် တႃႇၵေႃႇသၢင်ႈႁိူၼ်း ဢၼ်ဝႆႉၸမ်တၢင်း တီႈၼိုင်ႈ




 
© 2012 All Rights Reserved | Asean Celebrity | Fonts @ AtFonts | Free Templates