တႆးတင်းပဢူဝ်းတေဢဝ်လၢႆးၵတ်းယဵၼ် ၵႄႈလိတ်ႈပၼ်ႁႃ ၼႃႈလိၼ်တူင်ႉၼိုင်



ဢိင်ၼိူဝ်ပဵၼ်ပၼ်ႁႃၼႂ်းၼႃႈလိၼ်တူင်ႉၼိုင် ထိုင်တီႈသွင်ၾၢႆႇလႆႈတိုၵ်းယိုဝ်းၵၼ် ၼႂ်းၸိုင်ႈတႆး၊ တႆး တင်း ပဢူဝ်း ႁူပ်ႉ ဢုပ်ႇၵၼ် လႆႈၸႂ် တေဢမ်ႇဢဝ်လၢႆးၵၢၼ်သိုၵ်းၵႄႈလိတ်ႈ လႄႈ တေႁူပ်ႉၵၼ်ထႅင်ႈ။


ၸဝ်ႈၸၢႆးယီႈ
ဝၼ်းတီႈ 11/09/2014 ၶွင်ႊသီႊဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး (RCSS/SSA) တင်း ၸုမ်းပူတ်းပွႆႇ ၸိူဝ်ႉၸၢတ်ႈပဢူဝ်း (PNLO) ႁူပ်ႉထူပ်းဢုပ်ႇဢူဝ်းၵၼ် တီႈငဝ်ႈၸိုင်ႈလွႆတႆးလႅင်း။ ၾၢႆႇပဢူဝ်း မီးႁူဝ်ပဝ်ႈၸုမ်းပဢူဝ်း (PNLO) ၶုၼ်ႇမိၼ်ႉထုၼ်း ဢွၼ်ႁူဝ်ၵူၼ်း 5 ၵေႃႉ။ ၾၢႆႇတႆး ၸဝ်ႈၸၢႆးယီႈ ၽူႈဢွၼ်ႁူဝ်ၶွမ်ႊမတီႊ ပိူဝ်ႈတႃႇ ဢုပ်ႇဢူဝ်းၸုမ်းပဢူဝ်း (PNLA) ဢွၼ်ႁူဝ် 5 ၵေႃႉၼင်ႇၵၼ်။ သွင်ၾၢႆႇ လႆႈၸႂ်ၵၼ်ဝႃႈ- လွင်ႈပၼ်ႁႃပိုၼ်ႉတီႈ ၼႃႈလိၼ်တူင်ႉၼိုင် ၼႂ်းၸိုင်ႈတႆးၼၼ်ႉ တေဢမ်ႇၸႂ်ႉလၢႆးၵၢၼ်သိုၵ်းၵႄႈလိတ်ႈ၊ ဢမ်ႇႁိုင်ဢမ်ႇၼၢၼ်းၼႆႉၵေႃႈ တေႁူပ်ႉထူပ်းဢုပ်ႇၵၼ်ထႅင်ႈ- ၼႆယဝ်ႉ။

ပၢင်ဢုပ်ႇဢူဝ်းၼႆႉ ၽူႈၶဝ်ႈႁူမ်ႈထွမ်ႇငိၼ်း ပဵၼ်ၽူႈႁူႉႁၼ်ၸွမ်း မီးၽူႈၵွၼ်းသိုၵ်းသုင်သုတ်း ပႃႇတီႇမႂ်ႇသုင် ၸိူဝ်ႉၸၢတ်ႈယၢင်းလႅင် (KNPP) ၸွမ်ႁၢၼ်ၿီးထူး၊ ၵႅမ်ၽူႈၼမ်းၼႂ်း ၸုမ်းၸိူဝ်ႉၸၢဝ်ႈဝႃႉ (WNO) ၸဝ်ႁၢၼ်လူႇ။

ၵဵဝ်ႇၵပ်းလွင်ႈၼႆႉ ပူၼ်ႉမႃးမိူဝ်ႈဝၼ်းတီႈ 03/09/2014  တပ်ႉသိုၵ်းၸိုင်ႈတႆး (RCSS/SSA) တင်း တပ်ႉသိုၵ်းပဢူဝ်း (PNLA) ပဵၼ်ပၢင်တိုၵ်းၵၼ် ပွတ်းၵၼ်ႇတူးလူင် ၼႂ်းဢိူင်ႇႁူဝ်ၼမ်ႉ ၸႄႈဝဵင်းမွၵ်ႇမႆႇ ၸိုင်ႈတႆးပွတ်းၸၢၼ်း။ လွင်ႈပဵၼ်ပၢင်တိုၵ်းၼႆႉ ၸၼ်ႉပႃႈတႂ်ႈ RCSS/SSA ႁၢႆးငၢၼ်းထိုင်ပႃႈၼိူဝ်ဝႃႈ တၢင်းၸုမ်းပဢူဝ်းပဵၼ်ၾၢႆႇတႄႇ ဢွၼ်တၢင်းလႄႈ ၾၢႆႇ RCSS/SSA လႆႈယိုဝ်းတွပ်ႇၶိုၼ်း - ဝႃႈၼႆ။

တင်ႈတႄႇပီ 2007 မႃး ဝၢႆးၸုမ်းပူတ်းပွႆႇၵူၼ်းမိူင်းတႆးၵူႈၸၢဝ်းၶိူဝ်း (SNPLO) တႅၵ်ႇၵၼ်ယဝ်ႉ RCSS/SSA လႆႈၶဝ်ႈၵႂႃႇ တူင်ႉၼိုင်ဝႆႉ ၼႂ်းၸႄႈဝဵင်းမွၵ်ႇမႆႇ ၾၢႆႇဢွၵ်ႇၼမ်ႉပွၼ်။ ဢိင်ၼိူဝ် SNPLO တႅၵ်ႇၵၼ်သေ ၵမ်ႈၽွင်ႈဝၢင်းၶိူင်ႈ၊ ၵမ်ႈၽွင်း သိုပ်ႇယိပ်းၵွင်ႈႁဵတ်းပီႇတုၸိတ်ႉ၊ ၵမ်ႈၽွင်ႈႁွတ်ႈၽႅဝ်ၼႂ်း RCSS/SSA သေ ႁဵၵ်ႈၸိုဝ်ႈဝႃႈ ၸုမ်းပူတ်းပွႆႇၸိူဝ်ႉၸၢတ်ႈ ပဢူဝ်း (PNLO) ။ ၼင်ႇႁိုဝ်တေဢမ်ႇပဵၼ်ပၼ်ႁႃၼၼ်ႉ RCSS/SSA တင်း PNLO ဢုပ်ႇဢူဝ်းတူၵ်းလူင်းၵၼ်ဝႃႈ RCSS/SSA တူင်ႉၼိုင်ၵႂႃႇၾၢႆႇဢွၵ်ႇၼမ်ႉပွၼ်၊  PNLO တူင်ႉၼိုင်ၾၢႆႇတူၵ်းၼမ်ႉပွၼ် ၵွပ်ႈဝႃႈလူင်ပွင်ၸိုင်ႈ ၸုမ်းသိုၵ်း မၢၼ်ႈၵေႃႈ တတ်းမၵ်းႁပ်ႉႁွင်းဝႆႉ  ၼႃႈလိၼ်ၽွင်းငမ်းတူဝ်ႇၵဝ်ႇၸၢဝ်းၶိူဝ်းပဢူဝ်း 3 ၸႄႈဝဵင်း 1.ပၢင်လွင်း၊ 2.သီႇသႅင်ႇ၊ 3.ႁူဝ်ပူင်း ၸိူဝ်းၼႆႉ။

ဢၼ်လႆႈပဵၼ်ပၢင်တိုၵ်းၵၼ်ၵမ်းၼႆႉ ပိူင်လူင်မၼ်း ၵွပ်ႈတပ်ႉပဢူဝ်း 1. ၵႂႃႇမႃးတူင်ႉၼိုင် ၾၢႆႇဢွၵ်ႇပွၼ်သေ ဢမ်ႇၸႅင်ႈဝွၵ်ႇလူင်ႈၼႃႈတီႈ RCSS/SSA ။ 2.ၶဝ်ႈၵဵပ်းၶွၼ်ႇၼႂ်းၼႃႈလိၼ် RCSS/SSA ၾၢႆႇဢွၵ်ႇပွၼ်။ 3.လိုၼ်း သုတ်း ၶဝ်ႈတင်ႈတပ်ႉ လူၺ်ႈဢမ်ႇပွင်ႇလၢတ်ႈတၢင်း RCSS/SSA ၸိူဝ်းၼႆႉ- RCSS လၢတ်ႈၼင်ႇၼႆ။

ၸၢႆးငိုၼ်း ၽူႈၼမ်းၼႂ်း ၶွမ်ႊမတီႊပွင်သၢင်ႈလွင်ႈငမ်းယဵၼ် RCSS ပိုတ်ႇလၢတ်ႈဝႃႈ- ဢွၼ်တၢင်း မိူဝ်ႈပႆႇပဵၼ် ပၢင်တိုၵ်းၼႆႉ  ႁဝ်းလႆႈလၢတ်ႈတီႈ ၽူႈၼမ်းၼႃႈ (PNLO) ၶုၼ်ႇဢူၵ်ႉၵႃႇဝႃႈ- ဢၼ်ပဵၼ်ပၼ်ႁႃယူႇၼႆႉ တၢင်းငဝ်ႈၸိုင်ႈ လွႆးတႆးလႅင်း RCSS/SSA ဢမ်ႇၶႂ်ႈဢဝ်လၢႆးႁုၵ်းႁၢႆႉၵၢၼ်သိုၵ်းၵႄႈလိတ်ႈ၊ ၶႂ်ႈဢဝ်လၢႆးၵတ်းယဵၼ် ဢုပ်ႇဢူဝ်းၵၼ် ၵႄႈလိတ်ႈ။ လွင်ႈၼႆႉ ၸဵမ်မိူဝ်ႈဝၼ်းတီႈ 20/08/2014 ၾၢႆႇ RCSS/SSA လႆႈၶွတ်ႇၽွတ်ႈၶွမ်ႊမတီႊ ပိူဝ်ႈတႃႇဢုပ်ႇ ဢူဝ်း PNLA ။ ႁဝ်းပႂ်ႉသူၸဝ်ႈမႃးဢုပ်ႇၵၼ်တီႈငဝ်ႈၸိုင်ႈ၊ ၵွပ်ႈဝႃႈ ပၼ်ႁႃလွင်ႈၼႆႉ ပဵၼ်ပၼ်ႁႃၼႂ်းႁိူၼ်းႁဝ်းၵူၺ်း၊ ႁဝ်းမီးပၼ်ႁႃသင်ၵေႃႈ ႁဝ်းပီႈၼွင်ႉဢုပ်ႇၵၼ် ၵႄႈလိတ်ႈလႆႈ- ၼႆယူႇ။


ၵဵဝ်ႇၵပ်းလွင်ႈၼႆႉ ႁူဝ်ပဝ်ႈ PNLO ၶုၼ်ႇမိၼ်ႉထုၼ်း လၢတ်ႈတၢင်းသိုဝ်ႇ လၢႆလၢႆသိုဝ်ႇဝႃႈ- ပဵၼ်ၶူင်းၵၢၼ် လူင်ပွင်ၸိုင်ႈ ႁႂ်ႈၸုမ်းပဢူဝ်းၶဝ်ႈပူၵ်းပွင် ၼႂ်းပိုၼ်ႉတီႈၼႃႈလိၼ် ၾၢႆႇဢွၵ်ႇပွၼ် ၼႂ်းၸႄႈဝဵင်းသီႇသႅင်ႇ။

တၢင်း RCSS/SSA လႆႈတႅမ်ႈလိၵ်ႈၸူးတီႈ PNLA ဝႃႈ ႁႂ်ႈၸုမ်းပဢူဝ်း ထွၼ်ၵႂႃႇတူင်ႉၼိုင် ၼႂ်းပိုၼ်ႉတီႈ ၼႃႈလိၼ် ၵဝ်ႇၵဝ်ႇ ၾၢႆႇတူၵ်းၼမ်ႉပွၼ်၊ ၵွပ်ႈဝႃႈ ဢၼ်တၢင်းလူင်ပွင်ၸိုင်ႈ လႆႈပၼ်ဝႆႉၼႃႈလိၼ်ၽွင်းငမ်း တူဝ်ၵဝ်ႇပဢူဝ်းၼၼ်ႉ မိူၼ်ၼင်ႇၸႄႈဝဵင်းပၢင်လွင်း သီႇသႅင်ႇ ႁူဝ်ပူင်း ၸိူဝ်းၼႆႉ။

ၸိူင်ႉႁိုဝ်ၵေႃႈလီ တၢင်း RCSS/SSA တိုၼ်းယိပ်းၵမ်ဝႆႉ လၢႆးၵႄႈလိတ်ႈပၼ်ႁႃ လူၺ်ႈၵၢၼ်ဢုပ်ႇဢူဝ်း။ မၢင်ၸိူဝ်ႉ မၢင်လွင်ႈၵေႃႈ ၵူၼ်းပႃႈတႂ်ႈဢမ်ႇၶဝ်ႈၸႂ်ၵၼ်သေ ပဵၼ်ၵႂႃႇၵေႃႈပဵၼ်လႆႈ။ ပေႃးႁဝ်းဢဝ်ၵၢၼ်သိုၵ်းၵႄႈလိတ်ႈ မၼ်းၸၢင်ႈတူၵ်းလွၵ်းၽူႈၶဵၼ်။ တႃႇဢဝ်ၵၢၼ်သိုၵ်းသေ ၵႄႈလိတ်ႈၵႂႃႇၼၼ်ႉ တၢင်းငဝ်ႈၸိုင်ႈၵေႃႈတိုၼ်းဢမ်ႇမီး ပေႃႇလသီႇ၊ တိုၼ်းၸုၵ်းၼိူဝ်ၵၢၼ်ဢုပ်ႇဢူဝ်းသေ ၵႄႈလိတ်ႈၵႂႃႇ- ၸၢႆးငိုၼ်း လၢတ်ႈၼင်ႇၼႆ။




 
© 2012 All Rights Reserved | Asean Celebrity | Fonts @ AtFonts | Free Templates