ၵူၼ်းၵေႃႉထၢင်ႇထိူမ်ဝႃႈ ၶႃႈႁႅမ်ၵူၼ်း NLD



ပလိၵ်ႈမၢၼ်ႈဝဵင်းတူၼ်ႈတီး ၵႂႃႇႁႃတီႉၺွပ်းၵူၼ်း ၵေႃႉဢၼ်ထၢင်ႇထိူမ်ဝႃႈ ၶႃႈႁႅမ်ၵႅမ်ႁူဝ်ပဝ်ႈ NLD မိူင်းပဵင်း ၸႄႈဝဵင်း ႁူဝ်ပူင်း။ မၼ်းၸၢႆးလႅၼ်ႈပၢႆႈ ထုၵ်ႇပလိၵ်ႈယိုဝ်းၺႃး လိူတ်ႈဢွၵ်ႇၼမ်တၢႆပႅတ်ႈ။

ႁူဝ်ပဝ်ႈပႃႇတီႇၼူၵ်ႉယုင်း (NLD) ၸႄႈတွၼ်ႈတူၼ်ႈတီး ဢူးတိၼ်ႇမွင်ႇတူဝ်း လၢတ်ႈဝႃႈ- ပူၼ်ႉမႃးမိူဝ်ႈ ဝၼ်းတီႈ 12/09/2014 ၼၼ်ႉ ပလိၵ်ႈဝဵင်းတူၼ်ႈတီး ၶဝ်ႈၵႂႃႇၼႂ်းဝၢၼ်ႈသေ ၵႂႃႇႁႃတီႉၺွပ်း ဢူးသူၺ်ႇ၊ ၵေႃႉပဵၼ် ၽူႈၼမ်းၼႂ်း ဢိူင်ႇ ၼႂ်းမိူင်းပဵင်း ၸႄႈဝဵင်းႁူဝ်ပူင်း (ၸႄႈတွၼ်ႈတူၼ်ႈတီး၊ ၸိုင်ႈတႆးပွတ်းၸၢၼ်း) ၊ ၵွပ်ႈထၢင်ႇထိူမ်ဝႃႈ မၼ်းၸၢႆးပဵၼ် ၵူၼ်းၶႃႈႁႅမ်တၢႆ ၸၢႆးၸၢမ်ႇထုၼ်း ၵေႃႉပဵၼ်ၵႅမ်ႁူဝ်ပဝ်ႈ NLD ဝဵင်းႁူဝ်ပူင်း။

ဢူးသူၺ်ႇ လႅၼ်ႈပၢႆႈၶဝ်ႈၵႂႃႇၼႂ်းသူၼ်ၶဝ်ႈၵၢပ်ႇ၊ ပလိၵ်ႈၶဝ်လမ်းၸွမ်းသေ ဢဝ်ၵွင်ႈယိုဝ်း 3 ၵမ်း၊ တိူဝ်ႉၸပ်း 2 လုၵ်ႈ လႄႈဢဝ်မႃးယူတ်းယႃတီႈႁူင်းယႃၸဝ်ႈၸၢမ်ႇထုၼ်း ဝဵင်းတူၼ်ႈတီး၊ ၵူၺ်းၵႃႈ လိူတ်ႈမၼ်းသမ်ႉဢွၵ်ႇၼမ်ပူၼ်ႉတီႈ လႄႈမိူဝ်ႈၸမ်ထိုင်တီႈႁူင်းယႃၸဝ်ႈၸၢမ်ႇထုၼ်းၼၼ်ႉ လႆႈလူႉသဵင်ႈတၢႆၵႂႃႇပႅတ်ႈ- ဝႃႈၼႆ။

ၸုမ်း NLD ၼႂ်းၸႄႈတွၼ်ႈတူၼ်ႈတီး ၵေႃႈလၢတ်ႈဝႃႈ- ဢူးသူၺ်ႇ ႁွင်ႉတႃႉသူၺ်ႇ ပဵၼ်ၽူႈၼမ်းၼႂ်း-ၼႂ်းဢိူင်ႇမိူင်းပဵင်း၊ မၼ်းၼႆႉ ယၢမ်ႈမီးပၼ်ႁႃၵၼ်တင်း ၸၢႆးၸၢမ်ႇထုၼ်း ၵေႃႉပဵၼ်ၵႅမ်ႁူဝ်ပဝ်ႈ NLD မိူင်းပဵင်း ၵဵဝ်ႇၵပ်းလိၼ်သူၼ် ႁႆႈ ၼႃး။ ၵွပ်ႈယၢမ်ႈမီးပၼ်ႁႃၵၼ်ၸိူင်ႉၼႆလႄႈ NLD လႆႈၵႂႃႇၸွပ်ႇထၢမ် ၵဵပ်းၶေႃႈမုလ်းမႃးသေ မႃးတၢင်ႇလၢတ်ႈၼႄတီႈ ပလိၵ်ႈၸႄႈဝဵင်း တူၼ်ႈတီးဝႆႉ။ ၸဝ်ႈၼႃႈတီႈ ပလိၵ်ႈဝဵင်းတူၼ်ႈတီးၵေႃႈ ၵႂႃႇႁႃတီႉၺွပ်းပွၵ်ႈၼႆႉ။

ၸုမ်းၶၢဝ်ႇပၢင်လူင် လႆႈတိတ်းတေႃႇတွင်ႈထၢမ်တူၺ်း တီႈတပ်ႉပလိၵ်ႈႁူဝ်ပူင်း တင်း ၽူႈၵဵဝ်ႇၶွင်ႈၶဝ်ၼၼ်ႉ ဢမ်ႇမီးၽႂ် ယွမ်းလၢတ်ႈၼႄ ပၼ်ႁႃလွင်ႈၼႆႉ။
ၸၢႆးၸၢမ်ႇထုၼ်း ၵႅမ်ႁူဝ်ပဝ်ႈ NLD မိူင်းပဵင်း ၵေႃႉဢၼ်လႆႈထုၵ်ႇၶႃႈတၢႆ မိူဝ်ႈၼႂ်းလိူၼ်ၵျူၼ်ႊပူၼ်ႉမႃး

ၸၢႆးၸၢမ်ႇထုၼ်းၼႆႉ ဢႃႇယု 47 ပီ၊ ပဵၼ်ၵႅမ်ႁူဝ်ပဝ်ႈ NLD မိူင်းပဵင်း။ ပူၼ်ႉမႃးမိူဝ်ႈဝၼ်းတီႈ 04/06/2014 ၵၢင်ၶိုၼ်း ယၢမ်း 12 မူင်း၊ မီးၵူၼ်းဢမ်ႇႁူႉၸၵ်း 2 ၵေႃႉ မႃးႁွင်ႉဢဝ်ၸၢႆးၸၢမ်ႇထုၼ်းတီႈႁိူၼ်းဢွၵ်ႇၵႂႃႇတၢင်းပၢင်ႇလဵင်ႉဝူဝ်း လဵင်ႉၵႂၢႆးႁိမ်းဝၢၼ်ႈ၊ ၽိူဝ်ႇၵၢင်ၼႂ်မႃးၵေႃႈ ၵူၼ်းဝၢၼ်ႈၶဝ်ၵႂႃႇႁၼ်တူဝ်တၢႆမၼ်း။ ႁၼ်ႁွႆးမၢၵ်ႇၵွင်ႈယိုဝ်းသႂ်ႇတၢင်းလင် တီႈၵွင်ႇၵေႃႈသေ လူမ်ႉၼွၼ်းဢူပ်ႇပူမ်ႇတၢႆဝႆႉ၊ ႁၼ်ၶွၵ်ႇမၢၵ်ႇၽၢင်းၵွင်ႈ 3 လုၵ်ႈ။

ၵႃႈပူၼ်ႉမႃး ဢိင်ၼိူဝ်ၵူၼ်းဝၢၼ်ႈၵူၼ်းမိူင်း ၼႂ်းပိုၼ်ႉတီႈၺႃးယိုတ်းတီႈလိၼ်တင်းၼမ်တင်းလၢႆသေ ပိူဝ်ႈတႃႇၵူၼ်း ဝၢၼ်ႈ တေလႆႈတီႈလိၼ်ၶိုၼ်းၼၼ်ႉ ၸၢႆးၸၢမ်ႇထုၼ်း ပဵၼ်ၵူၼ်း ၵေႃႉၶတ်းသၢင်ႈႁၢင်ႈပွင် ၵေႃႉၼိုင်ႈ။

မိူဝ်ႈဝၼ်းတီႈ 25/04/2014 ၼၼ်ႉၵေႃႈ ၽူႈၶဝ်ႈၸုမ်း NLD ၼမ်ႉၸၢင် ၶုၼ်ႇထိၼ်ႇၵျေႃႇၵေႃႈထုၵ်ႇၵူၼ်းဢမ်ႇႁူႉၸၵ်း တႅင်းတၢႆ၊ ႁၢၼ်ႉတေႃႇထိုင်မိူဝ်ႈလဵဝ် ပဵၼ်ၽႂ်တႅင်းတၢႆ ယင်းပႆႇႁူႉပႆႇႁႃၵေႃႉမၼ်း- ၸုမ်း NLD ဝဵင်းတူၼ်ႈတီးလၢတ်ႈ။




 
© 2012 All Rights Reserved | Asean Celebrity | Fonts @ AtFonts | Free Templates