ၸုမ်းလူင်ပွင်ၸိုင်ႈမၢၼ်ႈ ၵႂႃႇႁူပ်ႉၸုမ်းမိူင်းလႃး တင်းၸုမ်းဝႃႉ  တီႈမိူင်းလႃး။ လၢတ်ႈယုၵ်ႉယွင်ႈ ဢဝ်မုၼ် လွင်ႈငမ်းယဵၼ် ဢၼ်ၵိုတ်းယိုဝ်းမႃးသေ သဵင်ၵွင်ႈ ဢမ်ႇတႅၵ်ႇသေပွၵ်ႈ၊ ႁႂ်ႈႁဵတ်းၸွမ်း လၵ်းၵၢၼ် 6 ၶေႃႈ။  သူၼ်းႁႂ်ႈပိုတ်ႇၵၢၼ်တွင်ႈတဵဝ်း တီႈမိူင်းလႃး၊ ႁႂ်ႈၸုမ်းဝႃႉ တင်းၸုမ်းမိူင်းလႃး လူင်းတိုၼ်းထၢင်ႇႁၢင်ႈ။

ဢူးတဵင်းၸေႃႇ ၵႅမ်ႁူဝ်ပဝ်ႈ 2 UPWC

ပူၼ်ႉမႃးမိူဝ်ႈဝၼ်းတီႈ 22/10/2014 ၸုမ်းလူင်ပွင်ၸိုင်ႈမၢၼ်ႈ ဢူးတဵင်းၸေႃႇ ၵႅမ်ႁူဝ်ပဝ်ႈ 2 ၸုမ်းၶိုင်ပွင်လွင်ႈငမ်းယဵၼ် ၸၼ်ႉၸိုင်ႈမိူင်းႁူမ်ႈတုမ် (UPWC) ဢွၼ်ႁူဝ် လုၵ်ႉၵဵင်းတုင်ၵႂႃႇတီႈမိူင်းလႃး။ ႁွတ်ႈထိုင်မိူင်းလႃး ယၢမ်း 01:45 မူင်း၊ ပေႃးႁွတ်ႈၽႅဝ်ယဝ်ႉၵေႃႈ မီးၵၢၼ်ဢုပ်ႇဢူဝ်းၵၼ် 3 ၾၢႆႇ တီႈမိူင်းလႃး (မၢၼ်ႈ UPWC ၊ ဝႃႉ UWSP/UWSA ၊ ၸုမ်းမိူင်းလႃး NDAA)။

ပၢင်ၵုမ်ၼႆႉ ၾၢႆႇမိူင်းလႃးမီး ၽူႈယႂ်ႇၵူၼ်းလူင်ၼႂ်းၸုမ်းမိူင်းလႃး။ ၾၢႆႇဝႃႉ ပၢင်သၢင်း မီးၵႅမ်ႁူဝ်ပဝ်ႈ သႅဝ်းမိၼ်ႇလျႅင် ဢွၼ်ႁူဝ်၊ လုၵ်ႉတၢင်းပၢင်သၢင်းမႃး တႃႇလူတ်ႉၵႃး 10 ပၢႆ။ ၾၢႆႇလူင်ပွင်ၸိုင်ႈမၢၼ်ႈ မီးဢူးတဵင်းၸေႃႇ၊ ၽူႈၵွၼ်းတိူင်းသိုၵ်းသၢမ်ၸဵင်ႇ (ၵဵင်းတုင်)၊  ၽွင်းလူင်ၾၢႆႇႁူမ်ႇလူမ်ႈလႄႈ လႅၼ်လိၼ် ၸဝ်ႈသိုၵ်းလူင်ဢွင်ႇတူႇ ၸိူဝ်းၼႆႉ- ၼႆယဝ်ႉ။

ၼႂ်းပၢင်ဢုပ်ႇဢူဝ်းၵၼ်ၼၼ်ႉ ၾၢႆႇဢူးတဵင်းၸေႃႇၶဝ် မွၵ်ႇလၢတ်ႈသပ်းလႅင်းၼႄ ငဝ်းလၢႆးဢၼ်လႆႈႁူပ်ႉထူပ်း ပႃႇတီႇမႂ်ႇသုင်ၸိုင်ႈတႆး / တပ်ႉသိုၵ်းၸိုင်ႈတႆး (SSPP/SSA) တီႈလႃႈသဵဝ်ႈ။ ၼွၵ်ႈသေၼၼ်ႉ လၢတ်ႈယုၵ်ႉယွင်ႈဢဝ်မုၼ်  ၸုမ်းမိူင်းလႃး တင်းၸုမ်းဝႃႉ လႄႈ တိုၵ်းသူၼ်း ႁႂ်ႈပိုတ်ႇၵၢၼ်တွင်ႈတဵဝ်း တီႈမိူင်းလႃးသေ ႁႂ်ႈၸုမ်းဝႃႉ တင်းၸုမ်းမိူင်းလႃး လူင်းတိုၼ်းႁဵတ်းၵၢၼ်မၢၵ်ႈမီး ထၢင်ႇႁၢင်ႈလွတ်ႈလႅဝ်း။

ဢၼ်ၾၢႆႇဢူးတဵင်းၸေႃႇ လၢတ်ႈၵႂႃႇၼၼ်ႉ 1.သွင်ၸုမ်းၼႆႉ တင်ႈတႄႇၵိုတ်းယိုဝ်းၵၼ်မႃး ဢမ်ႇမီးပၼ်ႁႃ သဵင်ၵွင်ႈဢမ်ႇလႆႈတႅၵ်ႇ။ လွင်ႈၼႆႉ လီဢဝ်ၵုၼ်းမုၼ် ယွင်ႈယေႃး၊ လီဢဝ်မၵ်းမၢႆတၢင်ႇပိုၼ်း။ မိူဝ်းၼႃႈထႃႇပၢႆမႃးၵေႃႈ သိုပ်ႇတိုဝ်းၵမ်ႁဵတ်းၵႂႃႇႁႂ်ႈပဵၼ်လွင်ႈလီ။ ၸုမ်းဝႃႉ တင်းမိူင်းလႃးၼႆႉ ဢၼ်ၵိုတ်းတိုၵ်းၵေႃႈ ၵိုတ်းတိုၵ်းဢွၼ်တၢင်းပိူၼ်ႈ၊ ပဵၼ်တူဝ်ယၢင်ႇလီ။ ၵွပ်ႈၼႆ ပိူဝ်ႈတႃႇ ၵၢၼ်ၵိုတ်းတိုၵ်းပတ်းပိုၼ်ႉၸိုင်ႈမိူင်းၼၼ်ႉၵေႃႈ ႁႂ်ႈၸုမ်းဝႃႉ တင်းမိူင်းလႃး ပဵၼ်တူဝ်ယၢင်ႇလီ တႃႇတၢင်ႇမူႇတၢင်းၸုမ်းၵႂႃႇထႅင်ႈ- ဝႃႈၼႆ။

2. ႁႂ်ႈၸုမ်းဝႃႉ တင်းၸုမ်းမိူင်းလႃး တိုဝ်းၵမ်ႁဵတ်းၸွမ်း လၵ်းၵၢၼ် 6 ၶေႃႈ။ ၼွၵ်ႈသေၼၼ်ႉ ၶႂ်ႈဢဝ်မိူင်းလႃးၼႆႉ ႁဵတ်းတီႈတွင်ႈတဵဝ်းဢႅဝ်ႇမိူင်း၊ ၵွပ်ႈၼၼ် ၶႂ်ႈႁႂ်ႈၸုမ်းဝႃႉ တင်း ၸုမ်းမိူင်းလႃး လႆႈလူင်းတိုၼ်းႁဵတ်းၵၢၼ်ပၢႆးမၢၵ်ႈမီး ထၢင်ႇႁၢင်ႈလွတ်ႈလႅဝ်း- ဝႃႈၼႆ။

လၵ်းၵၢၼ် တပ်ႉသိုၵ်းမၢၼ်ႈ 6 ၶေႃႈၼၼ်ႉ 1.တၵ်းတေလႆႈမီးၵၢင်ၸႂ် ၶႂ်ႈလႆႈလွင်ႈငမ်းယဵၼ်။ 2.တၵ်းတေလႆႈမီးၶေႃႈမၼ်ႈၵႅၼ်ႇ ၼိူဝ်လိၵ်ႈၵိၼ်ၵႅၼ်ႇ။ 3.တေဢမ်ႇလႆႈဢဝ်ၼမ်ႉတွၼ်းၼိူဝ် ၶေႃႈလႆႈၸႂ်ၼႂ်းၵၢၼ်ငမ်းယဵၼ်။ 4.တေဢမ်ႇလႆႈပဵၼ်ႁၢပ်ႇပဵၼ်ၵွၼ်း ႁဵတ်းႁႂ်ႈၵူၼ်းမိူင်းလႆႈ တုၵ်ႉၶယၢပ်ႇၸွမ်း။ 5.တေလႆႈၸွမ်းပၵ်းပိူင် မၢႆမီႈ ဢၼ်ၸိုင်ႈမိူင်းပိုၼ်ၽၢဝ်ႇၸႂ်ႉဝႆႉ။ 6.တေလႆႈႁပ်ႉ လၵ်းၵၢၼ် 3 ပိူင် (ဢယေးတူင်းပႃး။ 1.ၸိုင်ႈမိူင်းႁူမ်ႈတုမ် ယႃႇႁႂ်ႈတႅၵ်ႇယၢႆႈ။ 2.လွင်ႈၽွမ်ႉႁူမ်ႈၸၢဝ်းၶိူဝ်း ယႃႇႁႂ်ႈတႅၵ်ႇယၢႆႈ။ 3. ဢႃႇၼႃႇၸိၵ်းၸွမ်ၸိုင်ႈမိူင်း ႁႂ်ႈမၼ်ႈၵိုမ်း) သေ တေလႆႈဢဝ် ပိူင်ငဝ်ႈပိုင်းမိူင်း 2008 ယၢင်ႈၸူး လွၵ်းပိူင်ဝၢၼ်ႈမိူင်း ၻီႊမူဝ်ႊၶရေႊသီႊ။

မီးၶၢဝ်ႇဢမ်ႇယိုၼ်ယၼ်ဝႃႈ- တီႈပၢင်ဢုပ်ႇၵုမ် တီႈမိူင်းလႃးၼၼ်ႉ ဢိင်ၼိူဝ်ၸုမ်းဝႃႉ UWSA ၊ ၸုမ်းမိူင်းလႃး NDAA တင်းၸုမ်း ဝၢၼ်ႈႁႆး SSPP/SSA ပဵၼ်ၸုမ်းဢူၺ်းလီၵၼ်သေ ယူႇတီႈၸုမ်းဝႃႉ ၵႆႉၵႆႉတူၵ်ႇၶိူဝ်းလွင်ႈ တပ်ႉသိုၵ်းမၢၼ်ႈ ႁၢင်ႈသိုၵ်းလေႃႇတိုၵ်း  ၸုမ်းဝၢၼ်ႈႁႆး SSPP/SSA တင်းယၢင်းၽိူၵ်ႇ။ လၢတ်ႈဝႃႈ- ႁဝ်းပေႃးၵိုတ်းတိုၵ်းယဝ်ႉ ၵွပ်ႈသင်သူၸဝ်ႈသမ်ႉ မႃးလေႃႇတိုၵ်းဝၢၼ်ႈႁႆး၊ ယၢင်းၽိူၵ်ႇၵေႃႈ ပေႃးၵိုတ်းတိုၵ်းယဝ်ႉ ၵွပ်ႈသင်သူၸဝ်ႈၵႂႃႇတိုၵ်းယၢင်းၽိူၵ်ႇ ၸိူဝ်းၼႆႉ။ လွင်ႈသိုၵ်းမၢၼ်ႈ ႁၢင်ႈသိုၵ်းလေႃႇတိုၵ်းသိုၵ်းတႆး ဝၢၼ်ႈႁႆး တင်းယၢင်းၽိူၵ်ႇၼႆႉ ၸုမ်းဝႃႉဢမ်ႇႁၼ်လီ- ၵူၼ်းၸမ်ၸႂ် ၾၢႆႇတပ်ႉသိုၵ်းဝႃႉလၢတ်ႈ။

ဝၼ်းတီႈ 22 ၵၢင်ၶမ်ႈ ၸုမ်းဢူးတဵင်းၸေႃႇ လိုဝ်ႈၼွၼ်းတီႈမိူင်းလႃး၊ မိူဝ်ႈဝႃးၵၢင်ၼႂ် ၵႂႃႇဢႅဝ်ႇၸွမ်းၽၵ်းတူတႃႈလေႃး တူၺ်းထုင်ႉသၢပ်ႇ ၶွပ်ႇၼမ်ႉလႅၼ်လိၼ်သေ ပွၵ်ႈၶိုၼ်း ၵၢင်ၼႂ်ယၢမ်း 08:30 မူင်း၊ ၽူႈယႂ်ႇၵူၼ်းလူင်ၸုမ်းမိူင်းလႃး ၸွမ်းသူင်ႇထိုင်ၶူဝ်တႃႈပိင်း (ၼမ်ႉလူၺ်)- ၼႆယဝ်ႉ။