သိုၵ်းလူင်ပွင်ၸိုင်ႈမၢၼ်ႈ ၵႂႃႇသွၵ်ႈတဝ် ႁိူၼ်းၸၢဝ်းၶိူဝ်း တဢၢင်း (ပလွင်ႈ) ၼႂ်းၸႄႈဝဵင်းၼမ်ႉၶမ်း၊ ၸီႉၼႄးဝႃႈ ၵမ်ႉထႅမ်သိုၵ်းတဢၢင်း။

ဝၼ်းတီႈ 20/10/2014 ပွတ်းၼႂ်ဢွၼ်ဝၼ်း ယၢမ်း 11 မူင်း၊ သိုၵ်းမၢၼ်ႈ တပ်ႉၸုမ်းလူင် (တပ်ႉမ) 88 ၼႄးဝႃႈ ၵမ်ႉထႅမ်သိုၵ်းတဢၢင်း (ပလွင်ႈ) တပ်ႉသိုၵ်းပူတ်းပွႆႇၸိူဝ်ႉၸၢတ်ႈတဢၢင်း (TNLA) ၼႆသေ ၵႂႃႇသွၵ်ႈတဝ်ႁိူၼ်း ၵူၼ်းဝၢၼ်ႈလွႆသႃႇ ၼႂ်းၸႄႈဝဵင်းၼမ်ႉၶမ်း ၸိုင်ႈတႆးပွတ်းႁွင်ႇ။ ႁွင်ႉဢဝ်ပူႇၵႄႇ ဝၢၼ်ႈလွႆသႃႇသေ ၶိုၼ်ႈႁိူၼ်း လူင်းႁိူၼ်း၊ သွၵ်ႈတဝ်ၶူဝ်းၶွင်ႁိူၼ်းၼိုင်ႈယဝ်ႉ ႁိူၼ်းၼိုင်ႈ။

ၵူၼ်းဝၢၼ်ႈဢၼ်ထုၵ်ႇသိုၵ်းမၢၼ်ႈထတ်းထၢမ် ၵေႃႉၼိုင်ႈလၢတ်ႈဝႃႈ-သိုၵ်းမၢၼ်ႈႁွင်ႉဢဝ်ၽူႈၵွၼ်းဝၢၼ်ႈသေ မႃးသွၵ်ႈ တဝ်ႁိူၼ်းႁဝ်းၶႃႈ၊ ၶိုၼ်ႈႁိူၼ်းၼိုင်ႈယဝ်ႉႁိူၼ်းၼိုင်ႈ၊ ၶဝ်ဢမ်ႇဢဝ်ၶူဝ်းသင်၊ ၵူၺ်းၵႃႈ ၶဝ်ဢဝ်ပၢႆၵွင်ႈၶဝ်သႄႇတမ် ၶူဝ်းၶွင် ၶူဝ်းႁိူၼ်းၶူဝ်းယေး ႁၢဝ်ႈႁၢႆႉ၊ လွင်ႈလၢတ်ႈတၢင်းၸႃၶဝ်ၵေႃႈ ဢမ်ႇလၢတ်ႈလီ- ဝႃႈၼႆ။

ၵဵဝ်ႇၵပ်းလွင်ႈ ဢၼ်သိုၵ်းမၢၼ်ႈမႃးသွၵ်ႈတဝ်ၼႆႉ ပူၼ်ႉမႃးမိူဝ်ႈဝၼ်းတီႈ 17/10/2014 ယၢမ်းၵၢင်ၶမ်ႈ 7 မူင်းၵမ်းၼိုင်ႈ၊ 9 မူင်းၵမ်းၼိုင်ႈ၊ သိုၵ်းမၢၼ်ႈဢၼ်ပၵ်းတပ်ႉမႂ်ႇတီႈ ႁူဝ်ဝဵင်းၼမ်ႉၶမ်း၊ ထုၵ်ႇၸုမ်းယိပ်း ၵွင်ႈၵၢင်ႇၸုမ်းၼိုင်ႈ ဢမ်ႇႁူႉ ၸၵ်းၸုမ်း မႃးလေႃႇတိုၵ်း 2 ၵမ်း။ ယွၼ်ႉလွင်ႈၼႆႉသေ တပ်ႉမ 88 ၶဝ် လၢတ်ႈဝႃႈ ၼႆႉပဵၼ်သိုၵ်းတဢၢင်းမႃးယိုဝ်း၊ ယွၼ်ႉပိူဝ်ႈၵူၼ်းၸၢဝ်း တဢၢင်း ဢၼ်ယူႇၼႂ်းဝၢၼ်ႈၼႂ်းသူၼ်ၸိူဝ်းၼႆႉ ၵမ်ႉထႅမ်သိုၵ်းတဢၢင်းလႄႈ ၸင်ႇပဵၼ်ၸိူင်ႉၼႆ၊ ၸင်ႇဝႃႈမႃးငွႆးယိုဝ်းၶဝ်လႆႈ- ဝႃႈၼႆ။

လွင်ႈၼႆႉ ၵူၼ်းထဝ်ႈၸၢဝ်းတဢၢင်း ၵေႃႉၼိုင်ႈလၢတ်ႈဝႃႈ- ႁဝ်းၶႃႈတေၵႂႃႇဢဝ်ၵွင်ႈတီႈလႂ်၊ တေႁဵတ်းႁိုဝ် ႁဵတ်းမၢၵ်ႇ၊ တေႁဵတ်းႁိုဝ်ၵေႃႇၵၢၼ်ႁၢႆႉ။ ႁဝ်းၶႃႈၼႆႉ ပဵၼ်ၵူၼ်းပုတ်ႉထၽႃသႃ၊ ယႃႇဝႃႈဢႃႇယုသၢႆၸႂ်ၵူၼ်းလူးၵွၼ်ႇ၊ တေႃႈ ၶူဝ် ႁၢဝ်းၶူဝ်ၸိူဝ်းၼႆႉ ႁဝ်းၶႃႈယင်းဢမ်ႇယႃႉလႅဝ်- ဝႃႈၼႆ။

ဝၢၼ်ႈလွႆသႃႇၼႆႉ တိတ်းၸပ်းဝဵင်းၼမ်ႉၶမ်း တွၼ်ႈတၢင်းၸၢၼ်း၊ လင်ႁိူၼ်းမီးမွၵ်ႈ 30 ပၢႆ၊ ၼႂ်းၼၼ်ႉ လင်ႁိူၼ်း ၸၢဝ်းတဢၢင်း မီး 7 လင်။ ၼွၵ်ႈသေၼၼ်ႉ တၢင်ႇဝၢၼ်ႈၵေႃႈ လႆႈႁူႉဝႃႈ သိုၵ်းမၢၼ်ႈၵေႃႈၵႂႃႇသွၵ်ႈတဝ်။