ပႃႇတီႇသိူဝ်ၽိူၵ်ႇ၊ ပႃႇတီႇႁူဝ်သိူဝ် တင်း ၸဝ်ႈႁႆႈၸဝ်ႈၼႃး ႁူပ်ႉထူပ်းဢုပ်ႇၵုမ်ၵၼ် ပိူဝ်ႈတႃႇႁဵတ်းသၢင်ႈၼႃႈၵၢၼ် ၸဝ်ႈႁႆႈၸဝ်ႈၼႃး ၵႂႃႇမိူဝ်းၼႃႈ တီႈဝဵင်းၼမ်ႉၶမ်း ၸိုင်ႈတႆးပွတ်းႁွင်ႇ။

ပၢင်ႁူပ်ႉထူပ်းဢုပ်ႇဢူဝ်း ပႃႇတီႇသိူဝ်ၽိူၵ်ႇ ႁူဝ်သိူဝ် တင်း ၸဝ်ႈႁႆႈၸဝ်ႈၼႃး တီႈၸႄႈဝဵင်းၼမ်ႉၶမ်း

ပူၼ်ႉမႃးမိူဝ်ႈဝၼ်းတီႈ 23/10/2014 တင်ႈတႄႇယၢမ်း 13:30-016:30 မူင်း၊ ပႃႇတီႇသိူဝ်ၽိူၵ်ႇ (SNDP)၊ ပႃႇတီႇႁူဝ်သိူဝ် (SNLD) တင်း ၸုမ်းၸဝ်ႈႁႆႈၸဝ်ႈၼႃး ႁူပ်ႉထူပ်းဢုပ်ႇၵုမ်ၵၼ် တီႈဝၢၼ်ႈၼွင် ၸႄႈဝဵင်းၼမ်ႉၶမ်း၊ ပိူဝ်ႈတႃႇႁဵတ်းသၢင်ႈၵၢၼ်ငၢၼ်း ၸဝ်ႈႁႆႈၸဝ်ႈၼႃး ၵႂႃႇမိူဝ်းၼႃႈ။ ပၢင်ဢုပ်ႇဢူဝ်းၼႆႉ မီးပႃႇတီႇသိူဝ်ၽိူၵ်ႇ ၽွင်းတႅၼ်းၸႄႈဝဵင်း ၸၢႆးတိၼ်ႇဢူး၊ ၵႅမ်ႁူဝ်ပဝ်ႈ ပႃႇတီႇသိူဝ်ၽိူၵ်ႇ လုင်းလိူၼ်မျၢတ်ႈ လႄႈ ၽူႈပွင်ၵၢၼ် ပႃႇတီႇႁူဝ်သိူဝ် ဝဵင်းၼမ်ႉၶမ်း၊ ၽူႈဢွၼ်ႁူဝ် ၸဝ်ႈႁႆႈၸဝ်ႈၼႃး ၸႄႈဝဵင်းၼမ်ႉၶမ်းၸိူဝ်းၼႆႉ ၶိုၼ်ႈႁွတ်ႈၶဝ်ႈႁူမ်ႈ ၼိုင်ႈဝၢၼ်ႈ 2 ၵေႃႉ၊ တင်းမူတ်းမီး 50 ၵေႃႉ။

ႁူဝ်ပဝ်ႈ ၸဝ်ႈႁႆႈၸဝ်ႈၼႃး ၸႄႈဝဵင်းၼမ်ႉၶမ်း လုင်းယီႈထုၼ်း လၢတ်ႈဝႃႈ- မိူဝ်ႈလဵဝ် တီႈၸႄႈဝဵင်းၼမ်ႉၶမ်း ႁဝ်းၼႆႉ မီးၸုမ်းၸဝ်ႈႁႆႈၸဝ်ႈၼႃးတၢင်ႇၸုမ်း မႃးသူၼ်းႁူၺ်း ႁႂ်ႈၸဝ်ႈႁႆႈၸဝ်ႈၼႃး ၸႄႈဝဵင်းၼမ်ႉၶမ်းႁဝ်း ၵႂႃႇပႃးၸုမ်းၸဝ်ႈႁႆႈၸဝ်ႈၼႃးၶဝ်။ ၵွပ်ႈၼႆ ၸုမ်းၸဝ်ႈႁႆႈၸဝ်ႈၼႃး ၸႄႈဝဵင်းၼမ်ႉၶမ်းႁဝ်း ထုၵ်ႇလႆႈ ပၼ်ႈၵႅၼ်ႇၼႅၼ်ႈၼႃၵၼ်- ဝႃႈၼႆ။
ႁူဝ်ပဝ်ႈပႃႇတီႇႁူဝ်သိူဝ် ၸႄႈဝဵင်းၼမ်ႉၶမ်း လုင်းလိူၼ်မျၢတ်ႈ လၢတ်ႈဝႃႈ- မိူဝ်ႈပူၼ်ႉမႃး ပၢင်လိူၵ်ႈတင်ႈ ပီ 2010 ၼၼ်ႉ ၽႂ်ဢမ်ႇၽႂ်ၵေႃႈႁူၺ်းသူၼ်းႁႃသဵင်ဝႃႈ တေႁဵတ်းပၼ် တႃႇပေႃႈမႄႈၵူၼ်းမိူင်း ၸႄႈဝဵင်းၼမ်ႉၶမ်း။ ၵူၺ်းၵႃႈ တေႃႇထိုင်မိူဝ်ႈလဵဝ် ဢၼ်ၶတ်းၸႂ်ၵႄႈလိတ်ႈပၼ်ႁႃ၊ ႁဵတ်းပၼ်ပိူဝ်ႈတႃႇပေႃႈမႄႈၵူၼ်းမိူင်းၼႆႉ ၵူၺ်းလႆႈႁၼ် ပႃႇတီႇသိူဝ်ၽိူၵ်ႇလႄႈ ပႃႇတီႇႁူဝ်သိူဝ်ၵူၺ်း (မိူဝ်ႈပီ 2010 ပႃႇတီႇႁူဝ်သိူဝ်ႇ ပႆႇလႆႈတင်ႈ ပႃႇတီႇၶိုၼ်း) တီႈၼႆႈ ႁဝ်းထုၵ်ႇလီပွင်ႇၸႂ်ယဝ်ႉ၊ ႁဝ်းထုၵ်ႇလီၽွမ်ႉသဵင်ပဵင်းပၢၵ်ႇၵၼ်ယဝ်ႉ- ဝႃႈၼႆ။

ၵႅမ်ႁူဝ်ပဝ်ႈ ပႃႇတီႇသိူဝ်ၽိူၵ်ႇ လုင်းသြႃႇၸေႃးလႃႉၵေႃႈ သင်ႇၵႂၢမ်းဝႃႈ- “ႁႂ်ႈၶတ်းၸႂ်ႁႅင်းႁႅင်း၊ ယႃႇၽၢတ်ႇ ယႃႇယၢႆႈၵၼ်၊ ဢၼ်တေလႆႈတေႃႇသူႈၵႂႃႇ တႃႇၸဝ်ႈႁႆႈၸဝ်ႈၼႃး ၵိုတ်းတင်းၼမ်”- ဝႃႈၼႆ။

လိုၼ်းသုတ်း ပၢင်ၵုမ်လႆႈၸႂ်ၵၼ်ဝႃႈ-  ၸုမ်းလႂ်ၽႂ်မႃးႁူၺ်းသူၼ်းၸိူင်ႉႁိုဝ်ၵေႃႈ ၸုမ်းၸဝ်ႈႁႆႈၸဝ်ႈၼႃး ၸႄႈဝဵင်းၼမ်ႉၶမ်း တိုၼ်းတေဢမ်ႇတႅၵ်ႇယၢႆႈၵၼ်- ၼႆယဝ်ႉ။
ပူၼ်ႉမႃးမိူဝ်ႈဝၼ်းတီႈ 05/09/2014 ၵူၼ်းဝၢၼ်ႈၵူၼ်းမိူင်း ၼႂ်းၸႄႈဝဵင်းၼမ်ႉၶမ်း ၼႄၵၢင်ၸႂ် သၢၼ်ၶတ်း ၵၢၼ်ၶုတ်းႁႄႈ တၢင်းႁူဝ်ၼမ်ႉသီးလီး ၼႂ်းၸႄႈဝဵင်းၼမ်ႉၶမ်း။ လွင်ႈၼႆႉ ပႃႇတီႇႁူဝ်သိူဝ် (SNLD) တင်းပႃႇတီႇသိူဝ်ၽိူၵ်ႇ (SNDP) တီႈဝဵင်းၼမ်ႉၶမ်း ဢွၼ်ႁူဝ်ၵူၼ်းဝၢၼ်ႈၵူၼ်းမိူင်း ၸတ်းပၢင်သၢၼ်ၶတ်း၊ ၵွပ်ႈဝႃႈ ၵၢၼ်ၶုတ်းမိူင်ႁႄႈ ဢမ်ႇမီးၽွၼ်းလီ ပိူဝ်ႈတႃႇၵူၼ်းမိူင်း၊ ၼႄၵၢင်ၸႂ်တုၵ်းယွၼ်း ႁႂ်ႈၵိုတ်းၵၢၼ်ငၢၼ်း ၶုတ်းႁႄႈတင်းသဵင်ႈ။