ဢိင်ၼိူဝ်ၼႃႈႁိူၼ်းယုင်ႈယၢင်ႈ၊ ၶိုၼ်ႈလုမ်းတြႃး လွင်ႈပႅတ်ႈၵၼ်သေ ၽူဝ်မၢၼ်ႈ ၵေႃႉႁၢပ်ႇၵၢၼ်ၶုၼ် ၾၢႆႇလိူမ်ႈလႆႇ တီႈမိူင်းယၢင်း တိုတ်ႉပွႆႇမၢၵ်ႇတႅၵ်ႇၼိူဝ်ႁိူၼ်း၊ ႁဵတ်းႁႂ်ႈတိူဝ်ႉၺႃးမေးၼၢင်း ဝၢတ်ႇၸဵပ်းလႄႈ ပီႈၼွင်ႉတၢႆၸွမ်းလၢႆၵေႃႉ။

ဢူးတဵင်းၸေႃႇ ၵေႃႉပွႆႇမၢၵ်ႇတႅၵ်ႇသႂ်ႇတၢင်ႇၵေႃႉ ၼိူဝ်ႁိူၼ်းတူဝ်ၵဝ်ႇ Photo: Saisang Woon FB

ဝၼ်းတီႈ 23/10/2014 (မိူဝ်ႈဝႃး) ယၢမ်း 11:30 မူင်း၊ မၢၵ်ႇတႅၵ်ႇတီႈ ႁိူၼ်းဢူးတဵင်းၸေႃႇ+ ၼၢင်းၼူႉ တီႈဝၢၼ်ႈၵဵင်းႁိၼ် ဝဵင်းမိူင်းယၢင်း ၸႄႈတွၼ်ႈၵဵင်းတုင် ၸိုင်ႈတႆးပွတ်းဢွၵ်ႇ။ ႁဵတ်းႁႂ်ႈမၢၵ်ႇတႅၵ်ႇတိူဝ်ႉ ၼၢင်းၼူႉ ၸဝ်ႈႁိူၼ်း လႆႈၶဝ်ႈႁူင်းယႃဝႆႉ၊ ၵူၼ်းတႃႈၶီႈလဵၵ်း ၼၢင်းယိင်း တၢႆၵေႃႉၼိုင်ႈ၊ ၵူၼ်းၼႂ်းၶႃႈႁၢပ်ႇၵၢၼ်ၶုၼ် ၾၢႆႇလိူမ်ႈလႆႇ တၢႆၸွမ်း 2 ၵေႃႉ၊ မေးသိုၵ်းမၢၼ်ႈ ၸၼ်ႉႁူဝ်သိုၵ်းလူင် (သြႃႇသၢမ်မႆ) တပ်ႉမိူင်းယၢင်း တၢႆၵေႃႉၼိုင်ႈ- ၼႆယဝ်ႉ။

ၵဵဝ်ႇၵပ်းလွင်ႈၼႆႉ ဢိင်ၼိူဝ်ၼႃႈႁိူၼ်း ဢူးတဵင်းၸေႃႇ တင်းၼၢင်းၼူႉယုင်ႈယၢင်ႈ၊ မီးလွင်ႈၶႂ်ႈပႅတ်ႈ/ ၽၢတ်ႇ ၵၼ်လႄႈ မိူဝ်ႈဝႃးၵၢင်ၼႂ် ၵႂႃႇၶိုၼ်ႈလုမ်းတြႃး၊ တၢင်းလုမ်းတြႃးတႅပ်းတတ်းဝႃႈ- သူသွင်ၵေႃႉ တေပႅတ်ႈၵၼ် ဢၼ်ဝႃႈၼၼ်ႉ မိူဝ်းဝူၼ်ႉတူၺ်းလီလီသေၵွၼ်ႇ၊ တၢင်းလုမ်းတြႃးၵိုင်ႉၵၢင်ႉ ပႆႇၶႂ်ႈတႅပ်းတတ်းပၼ်။ ဝၢႆးၼၼ်ႉၵေႃႈ ဢွၼ်ၵၼ်ပွၵ်ႈၶိုၼ်းတီႈႁိူၼ်း။

ၽွင်းၵႂႃႇၶိုၼ်ႈလုမ်းတြႃးၼၼ်ႉ မီးၼၢင်းယိင်း 4 ၵေႃႉ ၵႂႃႇၸွမ်း၊ ပႃးၼၢင်းၼူႉ မီးၼၢင်းယိင်း 5 ၵေႃႉ၊ ပႃးဢူးတဵင်းၸေႃႇ ႁူမ်ႈၵူၼ်း 6 ၵေႃႉ။ ၼၢင်းယိင်းၼၼ်ႉ ၵူၼ်းၾၢႆႇလိူမ်ႈလႆႇ 2 ၵေႃႉ၊ ၵူၼ်းတႃႈၶီႈလဵၵ်း ၵေႃႉၼိုင်ႈ တင်း မေးၼၢင်းႁူဝ်သိုၵ်းလူင်ၵေႃႉၼိုင်ႈ။ မိူဝ်ႈပွၵ်ႈၶိုၼ်းထိုင်ႁိူၼ်း (ဢူးတဵင်းၸေႃႇ-ၼၢင်းၼူႉ)ၼၼ်ႉ ၼၢင်းယိင်းၵေႃႉၼိုင်ႈဝႃႈ ဢမ်ႇၶႂ်ႈၵိၼ်ၶဝ်ႈၼႆသေ ပွၵ်ႈမိူဝ်းႁိူၼ်းၵႂႃႇ။ ဝၢႆးၼၼ်ႉ ဢူးတဵင်းၸေႃႇ ၵေႃႈတိုတ်ႉမၢၵ်ႇတႅၵ်ႇၵမ်းၼိုင်ႈ၊ သမ်ႉႁၼ်ၵူၼ်းၸိူဝ်းတိူဝ်ႉမၢၵ်ႇပႆႇတၢႆသေ တိုတ်ႉထႅင်ႈၵမ်းသွင်၊ ဝိုတ်ႉသေ ဝႅၼ်တူၵ်းႁိူၼ်း- ၼႆယဝ်ႉ။

ၵူၼ်းတိူဝ်ႉဝၢတ်ႇၸဵပ်းလႄႈ လူမ်ႉတၢႆ ၼိူဝ်ႁိူၼ်းဢူးတဵင်းၸေႃႇ ၼၢင်းၼူႉ Photo: Saisang Woon FB

ၵေႃႉဢၼ်ဢမ်ႇၶႂ်ႈၵိၼ်ၶဝ်ႈသေပွၵ်ႈမိူဝ်းၼၼ်ႉ လွတ်ႈတၢႆၵႂႃႇ။ ၼၢင်းယိင်းၵေႃႉၼိုင်ႈ မၢၵ်ႇတႅၵ်ႇတိူဝ်ႉ တီႈၶေႃးသေ လႅၼ်ႈၵႂႃႇထိုင်ၸွမ်းတၢင်းၵေႃႈတၢႆ။ ၵူၼ်းတႃႈၶီႈလဵၵ်းၼၼ်ႉ ၶေႃးပုတ်း ၸွမ်းတူဝ်ၶိင်းၵေႃႈပွင်ႇ။ မေးသြႃႇသၢမ်မႆၼၼ်ႉ တိူဝ်ႉၸွမ်းၼႃႈယွၵ်းယွႆ တၢႆၼင်ႇၵဝ်ႇ။ ၼၢင်းၼူႉ (မေးၼၢင်းဢူးတဵင်းၸေႃႇ) တိူဝ်ႉဝၢတ်ႇၸဵပ်းသေ မိူဝ်ႈလဵဝ်ၶဝ်ႈႁူင်းယႃဝႆႉ။ ဢူးတဵင်းၸေႃႇ ၵေႃႉဢၼ်တိုတ်ႉပွႆႇမၢၵ်ႇသေ ဝႅၼ်တူၵ်းႁိူၼ်း ၼၼ်ႉ ၶႃမၼ်းႁၵ်းတင်းသွင်ၶွၼ်၊ မိူဝ်ႈဝႃး ယၢမ်းဝၢႆးဝၼ်း ၸဝ်ႈၼႃႈတီႈပလိၵ်ႈၶဝ် တီႉၺွပ်းတူဝ်မၼ်းၵႂႃႇ- ၵူၼ်းမိူင်းယၢင်း ၵေႃႉၼိုင်ႈလၢတ်ႈ။

လွင်ႈတၢင်းဢၼ် ၼၢင်းယိင်း ၵူၼ်းတႃႈၶီႈလဵၵ်းလႆႈတၢႆၸွမ်းၵႂႃႇၼႆႉ ဢွၼ်ၼႃႈၼႆႉ ဢိင်ၼိူဝ်ၼႃႈႁိူၼ်း ယုင်ႈယၢင်ႈသေ ၼၢင်းၼူႉ ႁွင်ႉမႃး ပိူဝ်ႈတႃႇႁဵတ်းၽူႈႁူႉႁၼ်ၸွမ်း (သၢၵ်ႈသေႇ)လႄႈ ပဵၼ်ၵူၼ်းၶပ်းၶိုင်ပၼ် လွင်ႈၼႃႈၵၢၼ်ၶိုၼ်ႈလုမ်းတြႃး- ၼႆယဝ်ႉ။

ဢူးတဵင်းၸေႃႇၼႆႉ တႄႇၼႃႈႁိူၼ်းၵိုၵ်းၼၢင်းၼူႉ ၵူၼ်းလၢႆးၶႃႈ။ ၵမ်ႈၽွင်ႈဝႃႈ မၼ်းၸၢႆးၶႂ်ႈမီးလူမ်းယွင်ႇ လူမ်းမႃႈဝႆႉ။  ပူၼ်ႉမႃးမိူဝ်ႈဝၼ်းတီႈ 29/09/2014 ၼၼ်ႉၵေႃႈ ယွၼ်ႉၼႃႈႁိူၼ်းၶႃပူႇဢွၵ်ႇယုင်ႈယၢင်ႈသေ ဢူးတဵင်းၸေႃႇ  ဢၢင်ႈၵိၼ်ယႃႈမိူဝ်ႇၶႃႈတူဝ်တၢႆၼႂ်းႁွင်ႈၼမ်ႉ ၵမ်းၼိုင်ႈ- ၼႆယဝ်ႉ။
မၢၵ်ႇဢၼ်ၸႂ်ႉပွႆႇၼႆႉ ပဵၼ်မၢၵ်ႇတႅၵ်ႇသႅၼ်းၼိုင်ႈ၊ လဵၵ်ႉလိူဝ်သေမၢၵ်ႇတႅၵ်ႇ ဢၼ်သိုၵ်းၸႂ်ႉပွႆႇၼႂ်းပၢင်တိုၵ်း၊ ၵမ်ႈၽွင်ႈဝႃႈ ပဵၼ်မၢၵ်ႇမႃးမိူင်းလၢဝ်း။ လွင်ႈမၢၵ်ႇၼႆႉ ၵမ်ႈၽွင်ႈၵေႃႈ ထၢင်ႇထိူမ်ဝႃႈ ၶဝ်ပဵၼ်ၾၢႆႇလိူမ်ႈလႆႇ ၶဝ်ဢဝ်မၢၵ်ႇတႅၵ်ႇတီႈလႂ်မႃး၊ ၵႃႈပူၼ်ႉမႃး ပေႃးမၢၵ်ႇတႅၵ်ႇၸွမ်းၵူၺ်ယုၵ်းယၵ်း ၸိူဝ်းၼႆႉၵေႃႈ သမ်ႉတိူဝ်ႉၾၢႆႇ လိူမ်ႈလႆႇၶဝ်ၶိုၼ်းလၢႆလၢႆပွၵ်ႈၼင်ႇၵဝ်ႇ- ဝႃႈၼႆ။