ၼၢင်းပႅင်း မေးၼၢင်းမေႃတႅမ်ႈ/ ႁွင်ႉၽဵင်းၵႂၢမ်း ၸိုဝ်ႈလိုဝ်းလင် ၸၢႆးမူး (သဵင်ႈၵမ်) လူႉသဵင်ႈသုတ်းမုၼ်၊ မီးၵၢၼ်တင်ႈ ပၢင်ၸႃႇပၼ ႁႅၼ်းတၢၼ်းပၼ်တီႈဝတ်ႉၵူႇတဝ်ႈ ဝဵင်းၵဵင်းမႆႇ ၸိုင်ႈထႆး။

ၶိုၼ်းဝၼ်းတီႈ 19/10/2014 ယၢမ်းတဵင်ႈၶိုၼ်းလိုၵ်း ႁိုဝ် ၼႂ်ဝၼ်းတီႈ 20/10/2014 (မိူဝ်ႈၼႆႉ) ယၢမ်း 01:00 မူင်း၊ ၼၢင်းပႅင်းဢႃႇယု 52 ၵေႃႉပဵၼ်မေးၼၢင်း မေႃၵႂၢမ်းလူင်ၸၢႆးမူး (ၵေႃႉသဵင်ႈၵမ်သုတ်းမုၼ်ၵႂႃႇမိူဝ်ႈ 26/12/1994) သဵင်ႈၵမ်သုတ်းမုၼ်ၵႂႃႇ တီႈႁူင်းယႃလူင် ၼၶွၼ်ႊၽိင်ႊ (ပႃႇငႄႉ) ဝဵင်းၵဵင်းမႆႇ။ မိူဝ်ႈလဵဝ်တၢင်းလုၵ်ႈတဝ်ႈ ပီႈၼွင်ႉၸိူဝ်ႉၶိူဝ်း လႄႈလုၵ်ႈၼွင်ႉပွင်ႈပၢႆ ႁူမ်ႈတႆးၵေႃႉတႆးသေႈ လႆႈၼမ်းဢဝ်ၶၢပ်ႈတူဝ်မႃးဝႆႉ တီႈဝတ်ႉၵူႇတဝ်ႈ ဢိူင်ႇသီၽုမ်း ဝဵင်းၵဵင်းမႆႇသေ ၸတ်းပၢင်ၸႃႇပၼ ႁႅၼ်းတၢၼ်းႁဵတ်းတၢင်းလီပၼ်ၸွမ်းၾိင်ႈပုတ်ႉထသႃသၼႃ။ တေပူၼ်ႉၶၢပ်ႈတူဝ် ႁွပ်ႇႁူဝ်ၶဝ်ႈႁဵဝ်ႈ ၼႂ်းဝၼ်းသဝ်တီႈ 25/10/2014 တီႈပႃႇႁဵဝ်ႈသၼ်တိထမ်း- ၼႆယဝ်ႉ။

ၼၢင်းပႅင်းၼႆႉၸိုဝ်ႈပေႃႈလုင်းယၼ်ႇၼ၊ ၸိုဝ်ႈမႄႈပႃႈလဵၵ်ႉ။ တႄႇၼႃႈႁိူၼ်းၵိုၵ်းမေႃၵႂၢမ်းလူင်ၸၢႆးမူး (မေႃသွၼ်ႁူၺ်ႈ ၸွႆး)၊ မီးလုၵ်ႈလၢင်းႁူမ်ႈၵၼ် 3 ၵေႃႉ- 1. ၼၢင်းၸၢမ်ၶမ်းၵိူတ်ႇပီ 1984 ။ 2.ၸၢႆးၸိူင်းမၢႆၵိူတ်ႇပီ 1990 ။ 3. ၼၢင်းသႅင်ဢိုၼ်မိူင်း ၵိူတ်ႇပီ 1993 ၸိူဝ်းၼႆႉ။ ၼၢင်းပႅင်း ပဵၼ်ၵူႈႁူမ်ႈတုၵ်ႉႁူမ်ႈသိူဝ်း (ၸႃႉႁူမ်ႈၶီ-လီႁူမ်ႈၸၢမ်ႇ) ၸွမ်းၸၢႆးမူးမႃး ၼႂ်းၶၢဝ်းတၢင်းၵၢၼ်လုၵ်ႉၽိုၼ်ႉတႆး တေႃႇပေႃးထိုင် ၶဝ်ႈမိူဝ်းၶိုၼ်းၼႂ်းမိူင်း၊ ထိုင်တီႈၸၢႆးမူး ပေႃးတႅမ်ႈၽဵင်းၵႂၢမ်းႁွင်ႉမၢၵ်ႇဝႃႈ "ပႅင်း" ၼႆၼၼ်ႉယဝ်ႉ။

လုၵ်ႈၼွင်ႉ / လုၵ်ႈႁဵၼ်းၶူးၸၢႆးမူး ဢဝ်ဝတ်ႉထုငိုၼ်းတွင်း ဢၼ်ပီႈၼွင်ႉလၢႆတီႈလၢႆတၢင်း ႁွမ်းတၢၼ်းမႃး မွပ်ႈပၼ်တီႈလုၵ်ႈလၢင်း ၼၢင်းပႅင်း