ၶၢဝ်းယၢမ်းၵေႃႇသၢင်ႈလွင်ႈငမ်းယဵၼ် ဢမ်ႇထုၵ်ႇလီၸႂ်ႉ မၢႆမီႈ 17/1
ၽွင်းၶၢဝ်းလူင်ပွင်ၸိုင်ႈလႄႈ ၸုမ်းယိပ်းၵွင်ႈၵၢင်ႇ ၸၢဝ်းၶိူဝ်းၶဝ်
ၵေႃႇသၢင်ႈလွင်ႈငမ်းယဵၼ်ယူႇ ပတ်းပိုၼ်ႉၸိုင်ႈမိူင်းၼႆႉ ပၵ်းပိူင်မၢႆမီႈ 17/1
ဝႃႈလူၺ်ႈၵၢၼ်ၵပ်းသိုပ်ႇတိတ်းတေႃႇ ၸုမ်းၼွၵ်ႈမၢႆမီႈၼၼ်ႉ ဢမ်ႇထုၵ်ႇလီၸႂ်ႉ၊
ထုၵ်ႇလီၵိုတ်းလိုဝ်ႈဝႆႉ။
ၽူႈၼမ်းၼႂ်းၵူႈလွင်ႈလွင်ႈ ပႃႇတီႇႁူဝ်သိူဝ် (SNLD) ၸၢႆးၼုတ်း |
ၵႅမ်ႁူဝ်ပဝ်ႈ တႅဝ်းႁူမ်ႈၻီႊမူဝ်ႊၶရႅတ်ႊတိၵ်ႊ လုၵ်ႈႁဵၼ်းမိူင်းမၢၼ်ႈပတ်းပိုၼ်ႉ (ABSDF) ယႄးပေႃႇမဵဝ်းဝိၼ်း လၢတ်ႈဝႃႈ- မၢႆမီႈ 17/1 ၼႆႉ တုမ်ႉယွၼ်ႈၼိူဝ်လွင်ႈငမ်းယဵၼ်တႄႉတႄႉ။ ဢၼ်ႁဝ်းၶႃႈလႆႈတူင်ႉၼိုင ်ႁဵတ်းသၢင်ႈ တွၼ်ႈတႃႇလွင်ႈငမ်းယဵၼ်ၸိူဝ်းၼႆႉ မၢင်ၵေႃႉၶဝ်ဝႃႈ ဢမ်ႇၶႂ်ႈၶဝ်ႈမႃး / ဢမ်ႇႁတ်းၶဝ်ႈမႃးႁူမ်ႈမိုဝ်း လွင်ႈတူင်ႉၼိုင်ၸွမ်းႁဝ်း ၶဝ်ဝႃႈၸိူင်ႉၼႆ။ ၵွပ်ႈၼႆ လႆႈႁႅင်းဢေႇၵႂႃႇတႄႉတႄႉ ၵွပ်ႈပိူဝ်ႈဝႃႈၶဝ်ၵူဝ်- ဝႃႈၼႆ။
ၸုမ်းလုၵ်ႈႁဵၼ်း ABSDF ၼႆႉ ပေႃးဝႃႈၶဝ်တေၸတ်းႁဵတ်းပၢင်ပွႆး တၵ်ႉယမ် ယုၵ်ႉယွင်ႈၵုၼ်းမုၼ်ၵူၼ်းသိုၵ်း ၸိူဝ်းဢၼ်လႆႈလူႇတၢၼ်းၼိူဝ်ႉလိူတ်ႈသၢႆၸႂ်ၵႂႃႇ ၼႂ်းပၢင်တိုၵ်းၸိူဝ်းၼၼ်ႉ တႃႇတေႁဵတ်းပၢင်တၵ်ႉယမ် ၶုၵ်းထူပ်းၼႆႉၵေႃႈ လႆႈႁဵတ်းယၢပ်ႇ၊ ယွၼ်ႉပိူဝ်ႈမီးမၢႆမီႈ 17/1 လႄႈလႆႈၶဝ်ႈႁႃလူင်ပွင်ၸိုင်ႈ၊ လႆႈဢုပ်ႇၵုမ်ၵၼ်သေ လႆႈၸႂ်ႉၶၢဝ်းယၢမ်းႁိုင်၊ ငၢႆႈၵေႃႈဢမ်ႇငၢႆႈ။ ပေႃးဝႃႈၵႂႃႇဢုပ်ႇၵုမ်ၵၼ် တင်းၸဝ်ႈၼႃႈတီႈၾၢႆႇၽွင်းငမ်းယဝ်ႉ သမ်ႉလႆႈၶိုၼ်ႈၸူးထႅင်ႈ လူင်ပွင်ၸိုင်ႈၸႄႈမိူင်း၊ လႆႈၶိုၼ်ႈၸူးၵူႈၸၼ်ႉၸၼ်ႉၸိူဝ်းၼႆႉ မၼ်းလႆႈၸႂ်ႉ ၶၢဝ်းယၢမ်းႁိုင်တႄႉတႄႉ၊ မၼ်းယၢပ်ႇၽိုတ်ႇတွၼ်ႈတႃႇႁဝ်း၊ ၼႆႉပဵၼ်ယွၼ်ႉ မၢႆမီႈ 17/1 - ဝႃႈၼႆ။
ယႄးပေႃႇမဵဝ်းဝိၼ်း လၢတ်ႈၼႄတၢင်းႁၼ်ထိုင်တူဝ်ၵဝ်ႇ ဝႃႈ- မၢႆမီႈ 17/1 ၼႆႉ ႁဵတ်းသင်ၶဝ်ဝႆႉလႃႇ၊ ၶဝ်ၵေႃႈၶႂ်ႈႁူႉလွင်ႈငဝ်းလၢႆးၸုမ်းႁဝ်းၶႃႈ လႄႈ ၸုမ်းယိပ်းၵွင်ႈၵၢင်ႇတင်းမူတ်းတင်းသဵင်ႈ တူင်ႉၼိုင်ၸိူင်ႉႁိုဝ် ၸိူဝ်းၼႆႉ ၶဝ်ၸင်ႇဝႆႉ။ မၢႆမီႈဢၼ်ၼႆႉ ၶဝ်ၶႂ်ႈႁႂ်ႈႁဝ်းၶႃႈ ယႃႇပေႁဵတ်းၵၢၼ်ငၢႆႈငၢႆႈလီလီလႄႈၶဝ်ဝႆႉ- ဝႃႈၼႆ။
တေႃႇတွႆးပူႇ ၵေႃႉပဵၼ်ၽူႈၶဝ်ႈၶွမ်ႊမတီႊ ပိူဝ်ႈတႃႇၵေႃႇသၢင်ႈလွင်ႈငမ်းယဵၼ် ၼႂ်းမိူင်း လႄႈ ၸုမ်းၸၢဝ်းၶိူဝ်း လၢတ်ႈၼႄတၢင်းႁၼ်ထိုင်ဝႃႈ- 17/1 ၼႆႉ မၼ်းပဵၼ်ဢၼ်ႁႄႉႁၢမ်ႈၵူၼ်းမိူင်း တွၼ်ႈတႃႇၵူၼ်းမိူင်းၶဝ်ႈမႃးပႃးၼႂ်း ၶၵ်ႉၵၢၼ်လွင်ႈငမ်းယဵၼ်- ဝႃႈၼႆ။
ၻွၵ်ႊတိူဝ်ႊမိၼ်းၸေႃႇဢူး ၽူႈၵမ်ၵပ်းၾၢႆႇၸိသင်ႇၵၢၼ်ၵိုတ်းယိုဝ်း ပတ်းပိုၼ်ႉၸိုင်ႈမိူင်း လႄႈ ပဵၼ်ပႃးၽူႈၶဝ်ႈ ၸုမ်း သုၼ်ၵၢၼ်လွင်ႈငမ်းယဵၼ်မၢၼ်ႈ (MPC) လၢတ်ႈဝႃႈ- ပေႃးဝႃႈလူင်ပွင်ၸိုင်ႈ တင်းၸုမ်းၸၢဝ်းၶိူဝ်းၶဝ် လႆႈၸႂ်တူၵ်းလူင်း ၵိုတ်းယိုဝ်းပတ်းပိုၼ်ႉၸိုင်ႈမိူင်း ယဝ်ႉတူဝ်ႈယဝ်ႉၼႆ မီးၶေႃႈလႆႈၸႂ်တူၵ်းလူင်းၵၼ်ဝႆႉဝႃႈ တေၵႂၢတ်ႇလၢင်ႉပႅတ်ႈ ၸုမ်းဢမ်ႇၶဝ်ႈထမ်း/ ၶဝ်ႈၶႂၢင်ႇတြႃးၼႆလႄႈ 17/1 ၼႆႉ ပေႃးထိုင်ၶၢဝ်းဢုပ်ႇၵုမ် လွင်ႈငမ်းယဵၼ်ၵၼ်မႃးတႄႉ ႁဵတ်းႁိုဝ်ၵေႃႈၶဝ်တေ ယႃႉဝႆႉၵမ်းၼိုင်ႈယူႇ၊ ၶဝ်တေဢမ်ႇၸႂ်ႉၼင်ႇၵဝ်ႇ- လၢတ်ႈၼႄၼင်ႇၼႆ။
Tags: News, Politic