တဝ်တိူဝ်ၵျိင်း ပပ်ႉဝႃႈလူၺ်ႈ သဵၼ်ႈတၢင်း လႄႈ ဢူငဝ်း ၵၼ် 75-77
တဝ်တိူဝ်ၵျိင်း ပပ်ႉဝႃႈလူၺ်ႈ သဵၼ်ႈတၢင်း လႄႈ ဢူငဝ်း ၵၼ် 75-77 ။
ၵူၼ်းမိူင်းဢိုပ်းယၢၵ်ႈ မိူဝ်ႈၶုၼ်မိူင်း ၵဵပ်းၶွၼ်ႇၶွင်ၵိၼ်ၼမ်
ၵူၼ်းမိူင်းဢိုပ်းယၢၵ်ႈ။
ၵၼ် 75
ၵူၼ်းမိူင်းဢိုပ်းယၢၵ်ႈ
မိူဝ်ႈၶုၼ်မိူင်း ၵဵပ်းၶွၼ်ႇၶွင်ၵိၼ်ၼမ်
ၵူၼ်းမိူင်းဢိုပ်းယၢၵ်ႈ။
ၵူၼ်းမိူင်းၽွင်းငမ်းယၢပ်ႇ
မိူဝ်ႈၶုၼ်မိူင်း မိုင်ႉႁႃၽွၼ်းလီသႂ်ႇတူဝ်
ၵူၼ်းမိူင်း ၽွင်းငမ်းယၢပ်ႇ။
ၵူၼ်းမိူင်းဢမ်ႇၵူဝ်တၢႆ
မိူဝ်ႈၶုၼ်မိူင်း ႁၵ်ႉၸၢတ်ႈပၢၼ်ၵူၼ်းၶဝ်ပူၼ်ႉ
ၵူၼ်းမိူင်းဢမ်ႇၵူဝ်တၢႆ။
ဢမ်ႇၶိုင်ပွင် ပိူဝ်ႈၸၢတ်ႈပၢၼ်ၵူၼ်းတူဝ်ၵဝ်ႇပူၼ်ႉ
ပိူၼ်ႈၸင်ႇဝႃႈ ၼပ်ႉယမ်ၸၢတ်ႈပၢၼ်ၵူၼ်း။
ၵၼ် 76
ၵူၼ်းႁဝ်း မိူဝ်ႈမီးသၢႆၸႂ်ယူႇ မီးတူဝ်ၶိင်းဢူၼ်ႈဢွၼ်ႇ
ပေႃးတၢႆ မၼ်းၵေႃႈၶႅင်
တူၼ်ႈတင်းလူင် မိူဝ်ႈယင်းမီးၸႂ်ၵေႃႈဢူၼ်ႈဢွၼ်ႇ
ပေႃးတၢႆ ၵေႃႈႁဵဝ်ႇႁႅင်ႈ။
ၵႅၼ်ႇလႄႈၶႅင် ပဵၼ်ၵေႃႉသေႈၽီမရၼ
ဢူၼ်ႈလႄႈဢွၼ်ႇ ပဵၼ်ၵေႃႉသေႈ ၸီႇဝိတ်ႉတသၢႆၸႂ်။
ၸင်ႇဝႃႈ တပ်ႉသိုၵ်း ၵွမ်ႉၵႃႈၵႅၼ်ႇၶႅင် ဢမ်ႇပေႉၽႂ်
တူၼ်ႈမႆႉ ၵႅၼ်ႇၶႅင် ၵေႃႈၸၢင်ႈႁၵ်း
ၸိူဝ်းၶႅင်ယႂ်ႇ တေၸူမ်လူင်း
ၸိူဝ်းဢူၼ်ႈဢွၼ်ႇ တေလုၵ်ႉၶိုၼ်ႈ။
ၵၼ် 77
တဝ်ၾႃႉ မိူၼ်ယိုဝ်းပိုၼ်ၵၢင်ႇ
တိုတ်ႉတွၼ်ႈၼိူဝ်မၼ်းလူင်း
တိုတ်ႉတွၼ်ႈတႂ်ႈမၼ်းၶိုၼ်ႈ
သၢႆမၼ်းယၢဝ်းပူၼ်ႉ ၼႆတတ်း
သၢႆမၼ်းပွတ်းပူၼ်ႉ ၼႆထႅမ်။
သဵၼ်ႈတၢင်းၵူၼ်း မၼ်းဢမ်ႇမိူၼ်ၼၼ်
လူတ်းတီႈၵူၼ်းၽၢၼ်
ၵႂႃႇထႅင်ႈတီႈၵူၼ်းမီး။
ၽႂ်မီးလိူဝ်လႄႈ
တိုၵ်ႉၶႂ်ႈၽိူဝ်ႇၽႄႇပၼ်ပိူၼ်ႈ ?
ၸိူဝ်းဢၼ်မီး တဝ် ၼၼ်ႉၵူၺ်း။
ၸင်ႇဝႃႈၽူႈလူင်ႉပွင်ႇၼႆႉ
ၸွႆႈပိူၼ်ႈယဝ်ႉ ဢမ်ႇမုင်ႈမွင်းသင်
ႁဵတ်းယဝ်ႉတူဝ်ႈ ဢမ်ႇၸပ်းႁွႆႈဝႆႉတီႈၼၼ်ႈ
ဢမ်ႇမီးၸႂ် ပိူဝ်ႈတႃႇပိုဝ်းၼိူဝ်ႉပိုဝ်းၶူၼ်။
Tags: Feature, General Knowledge