ပၢင်ဢုပ်ႇလၢတ်ႈတၢၼ်ႈၶႆႈလွင်ႈတႆး ဝၼ်းႁႅၵ်ႈ တီႈဝဵင်းတူၼ်ႈတီး
ပၢင်ဢုပ်ႇလၢတ်ႈတၢၼ်ႈလႆႈ ၵဵဝ်ႇၵပ်းလွင်ႈတႆး တီႈဝဵင်းတူၼ်ႈတီး ဝၼ်းႁႅၵ်ႈသုတ်း
မီးၽူႈလူင်ႉလႅၼ်ႇ မွၵ်ႇလၢတ်ႈၵႂၢမ်းလၢႆၸဝ်ႈလၢႆၵေႃႉ။ လၢတ်ႈလွင်ႈတႆး/
တႆးဢႃးႁူမ်/ တႆးၸူင်ႉ ၸိူဝ်းၼႆႉ။
Photo: Sai Arntai |
ၻွၵ်ႊတိူဝ်ႊၸၢႆးဢွင်ႇသၢၼ်း ႁူဝ်ပဝ်ႈၶွမ်ႊမတီႊၾၢႆႇလူလိၵ်ႈ မွၵ်ႇလၢတ်ႈၶေႃႈၵႂၢမ်းပိုတ်ႇပၢင်။ ႁူဝ်ၶေႃႈ ဢၼ်လႆႈလၢတ်ႈၵႂႃႇၼၼ်ႉ 1.တႆးဢႃးႁူမ်၊ လွင်ႈယုမ်ႇယမ်ၼပ်ႉထိုဝ်တႆးဢႃးႁူမ်မိူဝ်ႈၵွၼ်ႇ။ 2.လွင်ႈယုမ်ႇယမ် ၼပ်ႉထိုဝ်ၸၢဝ်းၶိူဝ်းတႆး ယၢမ်းလဵဝ်။ 3.လွင်ႈပိုၼ်း ၾိင်ႈငႄႈၾိင်ႈထုင်းတႆးၸူင်ႉ ဢၼ်ယူႇၼႂ်းၸိုင်ႈမိူင်းၶႄႇ။ 4.လွင်ႈၶုတ်းၶုမ် ၶုၼ်ႁေႃၶမ်း တီႈၼႂ်းမိူင်းဢယုတ်ႉထယႃး ၸိုင်ႈမိူင်းထႆး။ 5.လွင်ႈၶိူဝ်းၶုၼ်တႆးဢႃးႁူမ် ႁၢႆၵႂႃႇၸိူင်ႉႁိုဝ်။ 6.တႆးႁူၺ်ႈယၢဝ်း ဢၼ်ယူႇႁိမ်းမႄႈၼမ်ႉလႅင် ၼႂ်းမိူင်းၶႄႇ- ၸိူဝ်းၼႆႉ။ လၢတ်ႈၾၢႆႇဢိင်းၵလဵတ်ႈ- ၸုမ်းၶၢဝ်ႇၽူႈတွႆႇႁွၵ်ႈ ၼၢင်းႁွမ် ၵေႃႉၵႂႃႇၶဝ်ႈႁူမ်ႈပၢင်ပွႆး ပီမႂ်ႇတႆး တီႈဝဵင်းတူၼ်ႈတီး လၢတ်ႈမႃးၼင်ႇၼႆ။
Photo: Sai Arntai |
တီႈပၢင်ပွႆးၼႆႉ တင်ႈတႄႇဝၼ်းတီႈ 19-24/11/2014 (ၶၢဝ်းတၢင်း 6 ဝၼ်း) တေပိုတ်ႇဝႂ်ၸူၵ်ႈ ၽူႈမီးမုၼ်ၵၢမ်ႇလီ လႆႈလူတ်ႉၵႃး TOYOTA VIGO 6 လမ်း၊ ၸႅၵ်ႇပၼ်ၽူႈမီးသုၼ်ႇမုၼ်လီၶဝ် ၼိုင်ႈဝၼ်း ၼိုင်ႈလမ်းၵႂႃႇ- ၼႆယဝ်ႉ။
ပၢင်ပွႆး ဢၼ်ႁဵတ်းတီႈဝဵင်းတူၼ်ႈတီးၵမ်းၼႆႉ ပဵၼ်ပီႈၼွင်ႉတႆး ၼွၵ်ႈမိူင်းၼႂ်းမိူင်းႁူမ်ႈၵၼ်ၸတ်းႁဵတ်း၊ ပဵၼ်ၵၢၼ်ၸတ်းပၢင်ပွႆးယႂ်ႇလူင် ပွၵ်ႈၵမ်းသွင်။ ပၢင်ပွႆးပီမႂ်ႇတႆး ယႂ်ႇသုတ်းတီႈၼိုင်ႈ ၸတ်းယဝ်ႉတူဝ်ႈၵႂႃႇမိူဝ်ႈပီ 2012 တီႈဝဵင်းၵဵင်းတုင် ၸိုင်ႈတႆးပွတ်းဢွၵ်ႇၶူင်း၊ မိူဝ်ႈပီတႆး 2107 ၼီႈ။
Tags: Culture, News