ပၢင်ဢုပ်ႇလၢတ်ႈတၢၼ်ႈလႆႈ ၵဵဝ်ႇၵပ်းလွင်ႈတႆး တီႈဝဵင်းတူၼ်ႈတီး ဝၼ်းႁႅၵ်ႈသုတ်း မီးၽူႈလူင်ႉလႅၼ်ႇ မွၵ်ႇလၢတ်ႈၵႂၢမ်းလၢႆၸဝ်ႈလၢႆၵေႃႉ။ လၢတ်ႈလွင်ႈတႆး/ တႆးဢႃးႁူမ်/ တႆးၸူင်ႉ ၸိူဝ်းၼႆႉ။

Photo: Sai Arntai

ပၢင်ဢုပ်ႇလၢတ်ႈတၢၼ်ႈၶႆႈ လိၵ်ႈလၢႆး ၽႃသႃ ၵႂၢမ်းလၢတ်ႈ လႄႈ ပိုၼ်းတႆး ဢၼ်ၸတ်းၼႂ်း ဝၼ်းတီႈ 18/11/2014 ယၢမ်းဝၢႆးဝၼ်းၼၼ်ႉ မီးၽူႈလူင်ႉလႅၼ်ႇ ၽႃသႃ ၵႂၢမ်းလၢတ်ႈ လႄႈ ပိုၼ်း လၢႆလၢႆၵေႃႉ မိူၼ်ၼင်ႇသြႃႇၸၢႆးဢွင်ႇထုၼ်း၊ ၻွၵ်ႊတိူဝ်ႊၸၢႆးသၢင်ႇဢၢႆႈ၊ မႄႈၶူးၶိူဝ်းသႅၼ်၊ ၸဝ်ႈမျႃႉဝတီႇ ဢိၵ်ႇပႃး ၽူႈလူင်ႉလႅၼ်ႇၶဝ် လုၵ်ႉတီႈတၢင်းမိူင်းထႆး မိူင်းဢိၼ်ႊၻီႊယိူဝ်ႊ၊ မိူင်းၶႄႇၸိူဝ်းၼႆႉ မႃးၶဝ်ႈႁူမ်ႈမွၵ်ႇလၢတ်ႈ တၢၼ်ႈၶႆႈ။

ၻွၵ်ႊတိူဝ်ႊၸၢႆးဢွင်ႇသၢၼ်း ႁူဝ်ပဝ်ႈၶွမ်ႊမတီႊၾၢႆႇလူလိၵ်ႈ မွၵ်ႇလၢတ်ႈၶေႃႈၵႂၢမ်းပိုတ်ႇပၢင်။ ႁူဝ်ၶေႃႈ ဢၼ်လႆႈလၢတ်ႈၵႂႃႇၼၼ်ႉ 1.တႆးဢႃးႁူမ်၊ လွင်ႈယုမ်ႇယမ်ၼပ်ႉထိုဝ်တႆးဢႃးႁူမ်မိူဝ်ႈၵွၼ်ႇ။ 2.လွင်ႈယုမ်ႇယမ် ၼပ်ႉထိုဝ်ၸၢဝ်းၶိူဝ်းတႆး ယၢမ်းလဵဝ်။ 3.လွင်ႈပိုၼ်း ၾိင်ႈငႄႈၾိင်ႈထုင်းတႆးၸူင်ႉ ဢၼ်ယူႇၼႂ်းၸိုင်ႈမိူင်းၶႄႇ။ 4.လွင်ႈၶုတ်းၶုမ် ၶုၼ်ႁေႃၶမ်း တီႈၼႂ်းမိူင်းဢယုတ်ႉထယႃး ၸိုင်ႈမိူင်းထႆး။ 5.လွင်ႈၶိူဝ်းၶုၼ်တႆးဢႃးႁူမ် ႁၢႆၵႂႃႇၸိူင်ႉႁိုဝ်။ 6.တႆးႁူၺ်ႈယၢဝ်း ဢၼ်ယူႇႁိမ်းမႄႈၼမ်ႉလႅင် ၼႂ်းမိူင်းၶႄႇ- ၸိူဝ်းၼႆႉ။ လၢတ်ႈၾၢႆႇဢိင်းၵလဵတ်ႈ- ၸုမ်းၶၢဝ်ႇၽူႈတွႆႇႁွၵ်ႈ ၼၢင်းႁွမ် ၵေႃႉၵႂႃႇၶဝ်ႈႁူမ်ႈပၢင်ပွႆး ပီမႂ်ႇတႆး တီႈဝဵင်းတူၼ်ႈတီး လၢတ်ႈမႃးၼင်ႇၼႆ။

Photo: Sai Arntai

ပၢင်ပွႆးပီမႂ်ႇတႆးပီၼႆႉ ပဵၼ်ပၢင်ပွႆးသူင်ႇသင်ႇပီၵဝ်ႇ 2108 ၼီႈ၊ ႁပ်ႉတွၼ်ႈပီမႂ်ႇ 2109 ၼီႈ (ပီလပ်းမဵတ်ႉ-ပီပႄႉ) ပီမႃႉသုတ်းသဵင်ႈ ယၢင်ႈၶဝ်ႈၸူးပီပႄႉ။ မီးၵၢၼ်လဵၼ်ႈၸဵင် ပၢင်ပွႆးပိတ်ႉမၢၵ်ႇၼင်မူၼ်း၊ ၶေႉၶႅင်ႇႁူင်းၾႆးဝိၼ်/ တၢင်းၵႃႈ/ ၵႃႈၼူၵ်ႉၵႃႈတူဝ်း ၸိူဝ်းၼႆႉ။ ၼွၵ်ႈသေၼၼ်ႉ တီႈၼႂ်းၸၼ်ႉၸွမ်ဝဵင်းတူၼ်ႈတီးၵေႃႈ မီးပႃးပၢင်ဢုပ်ႇလၢတ်ႈတၢၼ်ႈၶႆႈ ၵဵဝ်ႇၵပ်းလွင်ႈတႆး၊ လၢတ်ႈ 3 ၽႃသႃ ဢိင်းၵလဵတ်ႈ၊ မၢၼ်ႈ၊ တႆး။

တီႈပၢင်ပွႆးၼႆႉ တင်ႈတႄႇဝၼ်းတီႈ 19-24/11/2014 (ၶၢဝ်းတၢင်း 6 ဝၼ်း) တေပိုတ်ႇဝႂ်ၸူၵ်ႈ ၽူႈမီးမုၼ်ၵၢမ်ႇလီ လႆႈလူတ်ႉၵႃး TOYOTA VIGO 6 လမ်း၊ ၸႅၵ်ႇပၼ်ၽူႈမီးသုၼ်ႇမုၼ်လီၶဝ် ၼိုင်ႈဝၼ်း ၼိုင်ႈလမ်းၵႂႃႇ- ၼႆယဝ်ႉ။

ပၢင်ပွႆး ဢၼ်ႁဵတ်းတီႈဝဵင်းတူၼ်ႈတီးၵမ်းၼႆႉ ပဵၼ်ပီႈၼွင်ႉတႆး ၼွၵ်ႈမိူင်းၼႂ်းမိူင်းႁူမ်ႈၵၼ်ၸတ်းႁဵတ်း၊ ပဵၼ်ၵၢၼ်ၸတ်းပၢင်ပွႆးယႂ်ႇလူင် ပွၵ်ႈၵမ်းသွင်။ ပၢင်ပွႆးပီမႂ်ႇတႆး ယႂ်ႇသုတ်းတီႈၼိုင်ႈ ၸတ်းယဝ်ႉတူဝ်ႈၵႂႃႇမိူဝ်ႈပီ 2012 တီႈဝဵင်းၵဵင်းတုင် ၸိုင်ႈတႆးပွတ်းဢွၵ်ႇၶူင်း၊ မိူဝ်ႈပီတႆး 2107 ၼီႈ။