ၽွင်းၵၢင်လိူၼ်ၼူဝ်ႊဝႅမ်ႊၿိူဝ်ႊ (2014)ၼႆႉ မီးၶၢဝ်ႇၽႄႈ ၸွတ်ႇၼိူဝ်ဢွၼ်ႊလၢႆႊ လွင်ႈဢၼ်သိုၵ်းမၢၼ်ႈၶႃႈႁႅမ် ၵူၼ်းတႆးၸၢဝ်းဝၢၼ်ႈတၢႆ။ ၵူၼ်းဝၢၼ်ႈၼၼ်ႉ ပဵၼ်ၵူၼ်းပွတ်းထုင်ႉပၢင်ႇၸေႈ ၸႄႈဝဵင်းၵေးသီး၊ သိုၵ်းမၢၼ်ႈဢၼ်ၶႃႈၵူၼ်းဝၢၼ်ႈ ပဵၼ်တပ်ႉၶမယ 114 ၼွင်ၶဵဝ်၊ တႂ်ႈတပ်ႉၸုမ်းလူင် (တပ်ႉမ) 55 ၵလေႃး- ၸုမ်းဢၼ်ၵဵပ်းၶေႃႈမုလ်းၾၢႆႇၵၢၼ်မိူင်း ၸဝ်ႈၼိုင်ႈလၢတ်ႈ။

သိုၵ်းမၢၼ်ႈလႄႈၵူၼ်းဝၢၼ်ႈ ဢၼ်ထုၵ်ႇၶႃႈႁႅမ်တၢႆ

ၵဵဝ်ႇၵပ်းလွင်ႈၼႆႉ မိူဝ်ႈဝၼ်းတီႈ 10/08/2011 သိုၵ်းမၢၼ်ႈတပ်ႉၶလယ 114 ပႃႈတႂ်ႈတပ်ႉၸုမ်းလူင် 55 ၵလေႃး၊ ၸိုင်ႈတႆးပွတ်းၸၢၼ်း ထႅမ်သိုၵ်းၶဝ်ႈၵႂႃႇတူင်ႉၼိုင် ၼႂ်းၸႄႈဝဵင်းၵေးသီးသေ ႁၢင်ႈသိုၵ်းလေႃႇတိုၵ်း တပ်ႉသိုၵ်းၸိုင်ႈတႆး (SSPP/SSA) ၸႄႈဝဵင်းၵေးသီး။ မိူဝ်ႈၽွင်းၼၼ်ႉ မိူဝ်ႈၽွင်းၵႂႃႇလေႃႇတိုၵ်း တပ်ႉပၢင်သဝ်း တပ်ႉသိုၵ်းၸိုင်ႈတႆး တီႈပၢင်ႇၸေႈၼၼ်ႉ ၵႂႃႇထူပ်းႁၼ်လုင်းၸၢႆးမုင်ႉ တီႈတႃႈၼမ်ႉ၊ ၽွင်းလုင်းၸၢႆးမုင်ႉ တိုၵ်ႉတဵၵ်းၼမ်ႉယူႇ၊ သိုၵ်းမၢၼ်ႈၸႂ်ႉၵိုတ်း၊ လုင်းၸၢႆးမုင်ႉသမ်ႉလႅၼ်ႈပၢႆႈလႄႈ သိုၵ်းမၢၼ်ႈဢဝ်ၵွင်ႈယိုဝ်းသႂ်ႇ တၢႆထင်တီႈ- ၼႆယဝ်ႉ။

ဝၢႆးၼၼ်ႉ သိုၵ်းမၢၼ်ႈၵႂႃႇယိုဝ်း တပ်ႉသိုၵ်းၸိုင်ႈတႆး (SSPP/SSA) တီႈပၢင်ႇၸေႈ၊ သမ်ႉၵႂႃႇတီႉၺွပ်းလႆႈၵူၼ်းဝၢၼ်ႈ ၸိုဝ်ႈၸၢႆးထုၼ်းၶိၼ်ႇ၊ ထၢမ်သင်ၵေႃႈ သမ်ႉဢမ်ႇပွင်ႇၵႂၢမ်းၵၼ်သေ ၸၢႆးထုၼ်းၶိၼ်ႇ ၺႃးမတ်ႉၵိုၵ်းတူၼ်ႈမႆႉသေ ပၢတ်ႇထိူဝ်ၶေႃးတၢႆၵႂႃႇ- ၼႆယဝ်ႉ။

ၵဵဝ်ႇၵပ်းလွင်ႈၼႆႉ ၽူႈယႂ်ႇၵူၼ်းလူင်ဝၢၼ်ႈပၢင်ႇၸေႈ ၵေႃႉၼိုင်ႈလၢတ်ႈဝႃႈ- မိူဝ်ႈဝၼ်းဢၼ်ၶႃႈတၢႆၼၼ်ႉ ပဵၼ်လိူၼ်ၵဝ်ႈလွင်ႈ 10 ၶမ်ႈ၊ ပီ 1373 ၼီႈ၊ မႅၼ်ႈဝၼ်းတီႈ 10/08/2011 ။ သိုၵ်းမၢၼ်ႈၶဝ်ၵႂႃႇယိုဝ်းတပ်ႉပၢင်ႇၸေႈသေ ၶိုၼ်းပွၵ်ႈမႃးၼႂ်းဝၢၼ်ႈ၊ မီးသိုၵ်းမၢၼ်ႈၵေႃႉၼိုင်ႈ မႃးလၢတ်ႈၼႄၵူၼ်းဝၢၼ်ႈဝႃႈ မီးၵူၼ်းဝၢၼ်ႈ 2 ၵေႃႉ ထုၵ်ႇၶႃႈတၢႆယဝ်ႉ၊ မၼ်းတႄႉဝႃႈ ပဵၼ်ၵူၼ်းဝၢၼ်ႈသူ၊ ၵူၺ်းၵႃႈ ထၢမ်ၸိုဝ်ႈၸဝ်ႈၼင်ႈဝတ်ႉ/ ၵျွင်း သမ်ႉဢမ်ႇႁူႉလႄႈ လႆႈၶႃႈႁႅမ်တၢႆပႅတ်ႈယဝ်ႉ။ ၽူႈၵွၼ်းငႃးသိုၵ်းၵေႃႈ ဝႃႈမၼ်းပဵၼ်သိုၵ်းတႆးၼႆသေ သင်ႇႁႅမ်တၢႆပႅတ်ႈ။ တႃႇၵေႃႉၼိုင်ႈသမ်ႉ ယိုဝ်းတၢႆႁိမ်းတႃႈၼမ်ႉ ယွၼ်ႉပိူဝ်ႈၸႂ်ႉၵိုတ်းလႄႈဢမ်ႇၵိုတ်း- ဝႃႈၼႆ။

ဝၢႆးသေငႃးသိုၵ်းမၢၼ်ႈ ဢွၵ်ႇဝၢၼ်ႈၵႂႃႇယဝ်ႉ ၵူၼ်းဝၢၼ်ႈၶဝ်ပႃးတင်း သင်ၶၸဝ်ႈ ၵႂႃႇဢဝ်ၶၢပ်ႈတူဝ်မႃးႁဵတ်း ပၢင်ၸႃပၼ ႁႅၼ်းတၢၼ်းပၼ်- လႆႈႁူႉၼင်ႇၼႆ။

ၵဵဝ်ႇၵပ်းလွင်ႈၼႆႉ ၽူႈမီးၸၼ်ႉၼႂ်း SSPP/SSA ၵေႃႉၼိုင်ႈလၢတ်ႈဝႃႈ- ၶႅပ်းႁၢင်ႈဢၼ်ၼႆႉ ႁဝ်းၶႃႈယိုတ်းလႆႈမႃးၼႂ်းပၢင်တိုၵ်း၊ ယိုတ်းလႆႈၶွမ်ႊၽိဝ်ႊတိူဝ်ႊမႃးလုၵ်ႈၼိုင်ႈသေ လႆႈမႃး။ မိူဝ်ႈၶဝ်ၶႃႈႁႅမ်ၵူၼ်းဝၢၼ်ႈတၢႆၼႆႉ ၶဝ်ၼင်ႇၵၼ်ထၢႆႇၶႅပ်းႁၢင်ႈပၼ်ၵၼ်ဝႆႉ။ မိူဝ်ႈၽွင်းသိုၵ်းမၢၼ်ႈမႃး တိုၵ်းတပ်ႉပၢင်ႇၸေႈၼၼ်ႉ ၵူၼ်းဝၢၼ်ႈသမ်ႉပၢႆႈၵၢၼ်ႁၢပ်ႇၶျေႃးသေ မႃးၽႅဝ်တီႈတပ်ႉသိုၵ်းၸိုင်ႈတႆး၊ သိုၵ်းမၢၼ်ႈသမ်ႉမႃးလေႃႇတိုၵ်း။ မိူဝ်ႈၽွင်းၼၼ်ႉ ယွၼ်ႉပိူဝ်ႈႁႅင်းဢမ်ႇငၢမ်ႇၵၼ်လႄႈ ၾၢႆႇတပ်ႉသိုၵ်းၸိုင်ႈတႆး လႆႈထွၼ်ဢွၵ်ႇပၼ်။

ၾၢႆႇတပ်ႉသိုၵ်းၸိုင်ႈတႆး လၢတ်ႈဝႃႈ- ၸၢႆးထုၼ်းၶိၼ်ႇဢိူၺ် ပွၵ်ႈမိူဝ်းယူႇတီႈႁိူၼ်းသေတႃႉ၊ ယႃႇပေၵႂႃႇၸွမ်းငႃးသိုၵ်း၊ ယွၼ်ႉပိူဝ်ႈဢမ်ႇၸႂ်ႈသိုၵ်း၊ ႁဝ်းဢမ်ႇၸၢင်ႈႁွင်ႉၵႂႃႇ၊ ႁဝ်းၶႃႈၵေႃႈလၢတ်ႈမၼ်းၸိူင်ႉၼၼ်။ ၾၢႆႇၼိုင်ႈၵေႃႈ သမ်ႉပဵၼ်ပၢင်တိုၵ်းယူႇလႄႈ မၼ်းသိုပ်ႇၵႂႃႇတၢင်းလႂ်ၼႆၵေႃႈ ႁဝ်းၶႃႈဢမ်ႇလႆႈႁူႉၸွမ်း၊ ၽိူဝ်ႇမႃးႁႅၼ်းသွမ်းၸဵတ်းပၼ်မၼ်းယဝ်ႉ ႁဝ်းၶႃႈၸင်ႇလႆႈႁူႉလႄႈ ႁဝ်းၶႃႈပဵၼ်ၸႂ်ဢမ်ႇလီၸွမ်းတႄႉတႄႉ- ဝႃႈၼႆ။

ၸိူင်ႉၼၼ်ၼင်ႇၵဝ်ႇ မိူဝ်ႈဝၼ်းတီႈ 03/10/2014 ၼႆႉၵေႃႈ ငႃးသိုၵ်းမၢၼ်ႈတပ်ႉပိဝ်ႇႁႃႇ လူတ်ႉၵႃး 5 လမ်း၊ မႃးထႅမ်ႁႅင်းသိုၵ်းပွတ်းၼႃႈသိုၵ်း ၼႂ်းၸႄႈဝဵင်းၵေးသီး၊ သမ်ႉၺႃးတပ်ႉသိုၵ်းၸိုင်ႈတႆး မူၵ်းယိုဝ်းၸွမ်းတၢင်း၊ သိုၵ်းမၢၼ်ႈၸႂ်လမ်သေ ႁူပ်ႉၺႃးၵူၼ်းဝၢၼ်ႈ ၸၢႆးမူၼ်း ၸၢဝ်းၶိူဝ်းဝႃႉၸွမ်းတၢင်း ဢိၵ်ႇတင်း ၸၢႆးသူၺ်ႇ ၵူၼ်းဝၢၼ်ႈလွႆ ဢိူင်ႇဝၢၼ်ႈပၢတ်ႈ ၸႄႈဝဵင်းတၢင်ႉယၢၼ်း၊ ၼႄးၶႃသွင်ၵေႃႉ ပဵၼ်ၵူၼ်းထိူၼ်ႇသေ ၽဝ်လူတ်ႉၶိူင်ႈၶႃပႅတ်ႈတင်းသွင်လမ်းယဝ်ႉ ယိုဝ်းတၢႆပႅတ်ႈ။

လုင်းမူၼ်း ၸၢဝ်းဝႃႉၼႆႉ ပဵၼ်ပူႇၵႄႇဝၢၼ်ႈၼႂ်းၼမ်ႉပွင်ႈ။ ၸၢႆးသူၺ်ႇ ပဵၼ်ၸၼ်ႉၶုၼ်ႁၢၼ် ၼႂ်းတပ်ႉပီႇတုၸိတ်ႉပူဝ်ႇမူၼ်း ဝၢၼ်ႈပၢင်ႇ။ ၶႃသွင်ၵေႃႉၼႆႉ ၵႂႃႇႁႃသိုဝ်ႉဝူဝ်းသေ ၺႃးသိုၵ်းမၢၼ်ႈယိုဝ်းတၢႆ။

သိုၵ်းမၢၼ်ႈၼႆႉ မႃးလေႃႇတိုၵ်းတပ်ႉပၢင်သဝ်း တပ်ႉသိုၵ်းၸိုင်ႈတႆး (SSPP/SSA) ပွတ်းပၢင်ႇၸေႈ လွႆယွႆး ဝၢၼ်ႈဝၢပ်ႈၸိူဝ်းၼႆႉ ၸဵမ်မိူဝ်ႈပီ 2011 ၵမ်းၼိုင်ႈႁၢဝ်ႈႁႅင်း။ ထိုင်မႃးပီ 2014 ၼႆႉၵေႃႈ သိုၵ်းမၢၼ်ႈမႃးလေႃႇတိုၵ်းထႅင်ႈ ႁၢဝ်ႈႁႅင်းလႄႈ ၾၢႆႇတပ်ႉသိုၵ်းၸိုင်ႈတႆးၵေႃႈ လႆႈထွႆထွၼ်ဢွၵ်ႇ တပ်ႉတႃႈၽႃသွင်ႇ။