သိုၵ်းမၢၼ်ႈတီႉၵူၼ်းဝၢၼ်ႈ ၼႄးပဵၼ်သိုၵ်းတႆး ဢဝ်ႁၢႆလၢႆတေႃႇမိူဝ်ႈလဵဝ်



ပူၼ်ႉမႃးဝၼ်းလိူၼ် 11 မူၼ်း၊ သိုၵ်းမၢၼ်ႈတပ်ႉၸုမ်းလူင် (တပ်ႉမ) 77 ဢၼ်ၵႂႃႇတူင်ႉၼိုင် ၼႂ်းၸႄႈဝဵင်းၼမ်ႉတူႈ တီႉၺွပ်းဢဝ်ၵူၼ်းဝၢၼ်ႈ ၵွင်းႁုင်း ဢိူင်ႇမိူင်းယဵၼ် ၸႄႈဝဵင်းၼမ်ႉတူႈ၊ ဢဝ်ႁၢႆလၢႆဝႆႉ ႁၢၼ်ႉတေႃႇယၢမ်းလဵဝ်။

ၵူၼ်းဝၢၼ်ႈၵေႃႉထုၵ်ႇ တီႉၺွပ်းဝၼ်းလိူၼ်သိပ်းဢဵတ်းမူၼ်း (ဝၼ်းတီႈ 08/10/2014) ၼၼ်ႉ ၸိုဝ်ႈလုင်းထွၼ်း ဢႃႇယု 54 ၊ မီးလုၵ်ႈလၢင်း 3 ၵေႃႉ၊ ၵေႃႉလိုၼ်းသုတ်း မီး 11 ၶူပ်ႇ။ ၼႂ်းဝၼ်း ဝၼ်းလိူၼ် 11 မူၼ်း/ဢွၵ်ႇဝႃႈၼၼ်ႉ လုင်းထွၼ်း ၵႂႃႇပိတ်းမၢၵ်ႇမႆႉမၢၵ်ႇတွၵ်ႇသေ တေမႃးလူႇတၢၼ်း တီႈဝတ်ႉ၊ ၽွင်းမၼ်းၵႂႃႇသေတိုၵ်ႉပွၵ်ႈမႃးၶိုၼ်း ၸွမ်းတၢင်းယူႇၼၼ်ႉ ၼႂ်းထူင်ၼႂ်းထွင်းမၼ်းသမ်ႉ မီးပႃးၸၢၵ်ႈလၢတ်ႈ။ ထူပ်းၺႃး သိုၵ်းမၢၼ်ႈတပ်ႉမ 77 ၸွမ်းတၢင်းသေ သိုၵ်းမၢၼ်ႈသွၵ်ႈထူင်ထွင်းမၼ်း။ ပေႃးဝႃႈႁၼ်မႅၼ်ႈၸၢၵ်ႈလၢတ်ႈမၼ်းၵေႃႈ ၼႄးဝႃႈပဵၼ်ၵူၼ်းထိူၼ်ႇယဝ်ႉ မတ်ႉပေႃႉထုပ်ႉသေလၢၵ်ႈၵႂႃႇ။ တင်ႈတႄႇၼၼ်ႉမႃးႁၢၼ်ႉတေႃႇမိူဝ်ႈလဵဝ် ဢဝ်ၵႂႃႇႁၢႆလၢႆဝႆႉ၊ ပႆႇပွၵ်ႈႁိူၼ်းၶိုၼ်း- ၼႆယဝ်ႉ။

ဝၢႆးလုင်းထွၼ်း ႁၢႆလၢႆၵႂႃႇၼၼ်ႉ ၵူၼ်းတင်းႁိူၼ်း တင်းၵူၼ်းဝၢၼ်ႈၵူၼ်းသူၼ် ႁူမ်ႈၵၼ်ၶႆႈႁႃၵေႃႈဢမ်ႇႁၼ်၊ ၵႂႃႇထၢမ်သိုၵ်းမၢၼ်ႈၵေႃႈ တွပ်ႇလၢတ်ႈဝႃႈဢမ်ႇႁူႉ ၼႆတိၵ်းတိၵ်း- ၼႆယဝ်ႉ။

ၵဵဝ်ႇၵပ်းလွင်ႈၼႆႉ ၵူၼ်းၼမ်ႉတူႈ ၵေႃႉၼိုင်ႈလၢတ်ႈဝႃႈ- သိုၵ်းတႆးတင်းသိုၵ်းမၢၼ်ႈၼႆႉ သမ်ႉပေႃးတူၵ်းလူင်းၵိုတ်းတိုၵ်းၵၼ်ယဝ်ႉ။ တီႈတႄႉမၼ်း ဢၼ်သိုၵ်းတႆး မႃးပၼ်ဝႆႉၸၢၵ်ႈလၢတ်ႈတီႈၵူၼ်းဝၢၼ်ႈၼႆႉ ပိူဝ်ႈတႃႇပွင်ႇၶၢဝ်ႇ ႁဵတ်းႁႂ်ႈသိုၵ်းသွင်ၾၢႆႇ လူတ်းယွၼ်ႇလႆႈ လွင်ႈၶဵင်ႈၶႅင်တေႃႇၵၼ်၊ လွင်ႈတွၵ်ႉတႅၵ်ႉၵၼ်၊ လွင်ႈတေႃႇၼႃႈၵၼ်ၸိူဝ်းၼႆႉ ႁႂ်ႈလူတ်းယွမ်း။ ပေႃးလွင်ႈၸိူဝ်းၼႆႉ လူတ်းယွမ်းၵေႃႈ ၵူၼ်းဝၢၼ်ႈၵူၼ်းသူၼ် တေယူႇငၢႆႈလူမ်ၸႂ်။ ပေႃးဝႃႈ ဢမ်ႇပၼ်ၵူၼ်းဝၢၼ်ႈၵူၼ်းသူၼ် ယိပ်းၶိူင်ႈၸၢၵ်ႈၸိူင်ႉၼႆသေ ၸီႉၼႄးဝႃႈပဵၼ်တၢင်းၽိတ်းၼႆႉတႄႉ ပၼ်ႁႃၵေႃႈတေယႂ်ႇ။ ၵွပ်ႈဝႃႈ သိုၵ်းၼႆႉပေႃးၺႃးၵၼ်ၵေႃႈ မၼ်းဢမ်ႇလႆႈ၊ ပေႃးၺႃးၵၼ်ၵေႃႈ လေႃႇၵၼ် တိုၵ်းၵၼ်၊ ႁဵတ်းႁႂ်ႈၵူၼ်းဝၢၼ်ႈၵူၼ်းသူၼ် တူၵ်းတၢင်းယၢပ်ႇၽိုတ်ႇ/ ဢမ်ႇၸၢင်ႈၵႂႃႇႁႆႈၵႂႃႇသူၼ်/ ၵူဝ်ႁႄတူၵ်းၸႂ်လႂ်တိုၼ်ႇ ပဵၼ်မႃးၸိူင်ႉၼႆ။ ၵွပ်ႈၼၼ်လႄႈ ယူႇတီႈၵူၼ်းဝၢၼ်ႈၵူၼ်းသူၼ်သေ မႆႈၸႂ်ၸွမ်းလုင်းထွၼ်း ၵေႃႉဢၼ်လႆႈႁၢႆလၢႆၵႂႃႇ၊ ဢမ်ႇႁူႉဝႃႈတၢႆႁိုဝ်လိပ်းႁိုဝ် တေႃႇထိုင်မိူဝ်ႈလဵဝ်ၼႆႉယူႇ- ဝႃႈၼႆ။

ၾၢႆႇၼိုင်ႈၵေႃႈ လုင်းထွၼ်းၼႆႉ လုၵ်ႈလၢင်းမၼ်းၵေႃႈပႆႇပေႉတူဝ်၊ မေးၼၢင်းမၼ်းၵေႃႈ တႃႇတေၵွၼ်းၼႃႈႁိူၼ်းၵေႃႈယၢပ်ႇ၊ တၢႆႁိုဝ်လိပ်းႁိုဝ်ၵေႃႈဢမ်ႇႁူႉ။ ၵွပ်ႈၼႆ ၵဵဝ်ႇၵပ်းလွင်ႈလုင်းထွၼ်းၼႆႉ ယူႇတီႈၵူၼ်းဝၢၼ်ႈၵူၼ်းသူၼ်ၸႂ်သေ တုၵ်းယွၼ်းႁႂ်ႈလၢႆၾၢႆႇလၢႆပႃႈ ႁႂ်ႈၸွႆႈထႅမ်ပၼ်သေၵမ်း- ၵူၼ်းၼမ်ႉတူႈ သိုပ်ႇလၢတ်ႈ။

ၾၢႆႇၼိုင်ႈတၢင်းၼိုင်ႈ၊ တၢင်းပွတ်းမိူင်းပၼ်ႇၵေႃႈ ဝၢႆးသေပဵၼ်ပၢင်တိုၵ်းၵၼ် တၢင်းၸဵတ်းႁၢတ်ႇယဝ်ႉ သိုၵ်းမၢၼ်ႈထဵတ်ႈထၢမ်/ ၵူတ်းထတ်းၵူၼ်းၶဝ်ႈဝဵင်းဢွၵ်ႇဝဵင်း ႁၢဝ်ႈႁႅင်း။ ၵူၼ်းဝၢၼ်ႈၸိူဝ်းယူႇတၢင်းဝၢၼ်ႈၼွၵ်ႈၼၼ်ႉ ပေႃးတေလုၵ်ႉၼႂ်းဝဵင်းပွၵ်ႈမိူဝ်းၼႆ ယၢပ်ႇတႄႉတႄႉ။ ၵူၺ်းၵႃႈ ပေႃးလုၵ်ႉဝၢၼ်ႈၼွၵ်ႈ မႃးၼႂ်းဝဵင်းတႄႉငၢႆႈယူႇ။ လွင်ႈၼႆႉ ႁဵတ်းႁႂ်ႈၵူၼ်းဝၢၼ်ႈၵူၼ်းသူၼ် ဢမ်ႇၸၢင်ႈပွၵ်ႈႁိူၼ်းပွၵ်ႈယေး၊ ႁူပ်ႉတၢင်းယၢပ်ႇၽိုတ်ႇၵၼ်- ၼႆယဝ်ႉ။

ပေႃးၵူၼ်းဝၢၼ်ႈဢွၵ်ႇတၢင်း မိူၼ်ၼင်ႇဢွၵ်ႇဝဵင်းမိူင်းပၼ်ႇ တေၵႂႃႇတၢင်းတႃႈသူပ်းပၢတ်ႈၸိူဝ်းၼႆႉ ထဵတ်ႈထၢမ်ႁႅင်းတႄႉတႄႉ၊ ၵူတ်ႇထတ်းဝႂ်ၵပ်းတူဝ်/ တူၺ်းၼႃႈ/ ထူၵ်းၶူဝ်းၸိူဝ်းၼႆႉ- ၼႆယဝ်ႉ။




 
© 2012 All Rights Reserved | Asean Celebrity | Fonts @ AtFonts | Free Templates