ပၢင်ၵုမ် ၶွၼ်ႊၾရႅၼ်ႊ ပႃႇလိ တီႈဝဵင်းတူၼ်ႈတီး၊ မီးၽူႈလူင်ႉလႅၼ်ႇ ၼႂ်းသင်ၶၸဝ်ႈ၊ ၽူႈလူင်ႉလႅၼ်ႇ ၼွၵ်ႈမိူင်း/ ၼႂ်းမိူင်းၶဝ်ႈႁူမ်ႈတင်းၼမ်။ မီးပၢင်ၵုမ် ၶွၼ်ႊၾရႅၼ်ႊ ပႃလိ၊ ႁေႃးထမ်း လွင်ႈသတိပတ်ႉထၢၼ်၊ ပိုတ်ႇႁွင်ႈၼႄပိုၼ်းပုတ်ႉထ လႄႈ ၽုၵ်ႇတူၼ်ႈမႆႉ ၸိူဝ်းၼႆႉ။

ပၢင်ပွႆး ပၢင်ၵုမ်ၶွၼ်ႊၾရႅၼ်ႊၼႆႉ- ၵူၼ်းၼွၵ်ႈမိူင်းၸိူဝ်းမႃးၶဝ်ႈႁူမ်ႈ မီးမိူင်းသီရိလင်းၵႃ မွၵ်ႈ 10 ၵေႃႉ။ မိူင်းဢိၼ်ႊၻီႊယိူဝ်ႊ 3 ၵေႃႉ၊ မိူင်းၼီႊပေႃႊလ် မႃး 4 ၵေႃႉ၊ မိူင်းသိင်ႊၵပူဝ်ႊ 2-3 ၵေႃႉ၊ မိူင်းဢွတ်ႊသထြေႊလီႊယိူဝ်ႊ 1 ၵေႃႉ၊ မိူင်းထႆး 40 ၵေႃႉပၢႆ၊ မိူင်းမလေႊသျိူဝ်ႊ 1 ၵေႃႉ။  ၶႅၵ်ႇၼွၵ်ႈမိူင်း ၸိူဝ်းမႃးၶဝ်ႈႁူမ်ႈပၢင်ၵုမ် ၶွၼ်ႊၾရႅၼ်ႊ ပႃႇလိၼႆႉ တင်းမူတ်း 60 ပၢႆ။ ဢၼ်လႆႈဝွၵ်ႇၸိူၼ်း (ၽိတ်ႈမွၵ်ႇ)လႄႈသင်၊ ဢမ်ႇလႆႈဝွၵ်ႇၸိူၼ်းလႄႈသင်၊ ဢၼ်လုၵ်ႉၼွၵ်ႈမိူင်းမႃး မီး 9 မိူင်း၊ တႃႇ 16 ၸၼ်ႉၸွမ်- ၼႆယဝ်ႉ။

ၶပ်းမၢႆပၢင်ၵုမ် ၶွၼ်ႊၾရႅၼ်ႊ ဝၼ်းတီႈ 17/12/2014 တၢမ်းၶမ်ႈၶၢဝ်းယၢမ်း 19:00-21:00 မူင်း၊ မီးပၢင်ႁေႃးထမ်း/တြႃး။

ပၢင်ၽုၵ်ႇတူၼ်ႈမႆႉ

ဝၼ်းတီႈ 18/12/2014 ။ ၵၢင်ၼႂ်ယၢမ်း 07:00-08:00 မူင်း၊ ပီႈၼွင်ႉၶႅၵ်ႇၼွၵ်ႈမိူင်း/ၼႂ်းမိူင်း ႁူမ်ႈၵၼ်ၽုၵ်ႇတူၼ်ႈမႆႉ၊ တင်းမူတ်း 25 တူၼ်ႈ၊ ၼႂ်းတူၼ်ႈမႆႉၸိူဝ်းၼၼ်ႉ ပဵၼ်တူၼ်ႈမွၵ်ႇၵွၼ်၊ တူၼ်ႈမွၵ်ႇသပေႇ၊ တူၼ်ႈမႆႉၵမ်ႉၵေႃႇ 3 သႅၼ်းၼႆႉ- ၼႆယဝ်ႉ။

ဝၢႆးလင် 08:00 မူင်း ပိုတ်ႇပၢင်ပွႆး ၶွၼ်ႊၾရႅၼ်ႊပႃလိ၊ မီးသင်ၶလၢႆၸိုင်ႈမိူင်း ပိုတ်ႇပၢင်ပွႆး၊ မိူဝ်ႈပိုတ်ႇပၢင်ပွႆးၼႆႉ မီးၵူၼ်းမွၵ်ႈ 200-300 ၵေႃႉ။ ၵေႃႉမႃးပိုတ်ႇပၢင်ပွႆး မွၵ်ႇလၢတ်ႈၶေႃႈၵႂၢမ်း ပဵၼ်ႁူဝ်ပဝ်ႈငဝ်ႈငုၼ်းသင်ၶၸိုင်ႈတႆး ၸဝ်ႈသြႃးပၺ်ၺႃၼၼ်တ ။ ၾၢႆႇၵူၼ်းႁိူၼ်း မီးၸွမ်ၽွင်းလူင်မိူင်းတႆး ၸဝ်ႈဢွင်ႇမျၢတ်ႈ၊ ႁူဝ်ၼႃႈပႃႊတီႊသိူဝ်ၽိူၵ်ႇ ၸၢႆးဢၢႆႈပဝ်း လႄႈၽွင်းလူင် ဢၼ်ၸပ်းၸွမ်းႁွမ်းပႆ ၸဝ်ႈဢွင်ႇမျၢတ်ႈ ၸိူဝ်းၼႆႉ။

ပၢင်လူလိၵ်ႈပႃလိ လၢတ်ႈၵႂၢမ်းပႃလိ

ယၢမ်း 09:30-10:00 မူင်း၊ ပိုတ်ႇႁွင်ႈၼႄပိုၼ်း။ ႁွင်ႈၼႄပိုၼ်းၼႆႉ မီး 2 တွၼ်ႈ။ ၶၢဝ်းယၢမ်း 09:30-12:00 ၊ တွၼ်ႈၼိုင်ႈ- ပဵၼ်ႁွင်ႈၼႄပိုၼ်း ၽူႈၼမ်းသႃသၼႃ ထေရဝႃတ ၼွၵ်ႈမိူင်းလႄႈၼႂ်းမိူင်း ၵမ်ႈၽွင်ႈ။ တွၼ်ႈသွင်- ပိုတ်ႇႁွင်ႈၼႄပိုၼ်း ၸၼ်ႉၸွမ်ၼလၼ်ႇတ လႄႈ ၾိင်ႈပၢႆးမွၼ်းပုတ်ႉထ (ၸႄႈမိူင်းတီႇႁဢိၼ်ႊၻီႊယိူဝ်ႊ)- ၼႆယဝ်ႉ။

ယၢမ်း 12:00 မူင်း မီးပၢင်လမ်ႁူဝ် (ၵၼ်ႇတေႃး) ၸဝ်ႈၶူးဝႃး တူၼ်ဢၼ်ယၢမ်ႈပဵၼ်ၸဝ်ႈတူၼ်ၶူး လႆႈသွၼ်ႁဵၼ်းပၼ်ပၺ်ၺႃ တႃႇၸဝ်ႈတူၼ်ၶူးလူင် ထမ်မသႃမိ၊ တင်းမူတ်းတေမီး 19 တူၼ်- ၼႆယဝ်ႉ။

ၶၢဝ်းယၢမ်း 13:00-17:00 မူင်း၊ မီးပၢင်လူလိၵ်ႈပႃလိ၊  လၢတ်ႈၵႂၢမ်းပႃလိ တင်းမူတ်း။ ပေႃးဝႃႈ မီးလွင်ႈဢမ်ႇၶဝ်ႈၸႂ်ၵေႃႈ တေမီးၵၢၼ်လၢတ်ႈသပ်းလႅင်း ၾၢႆႇဢိင်းၵလဵတ်ႈၸွမ်း- ၼႆယဝ်ႉ။

ပၢင်ပိုတ်ႇပၢင်ပွႆး ၶွၼ်ႊၾရႅၼ်ႊပႃလိ

ၶၢဝ်းယၢမ်း 18:30-20:30 မူင်း၊ မီးပၢင်ပိုၼ်ႉႁူႉပၢႆးႁၼ်၊ လွင်ႈသတိပတ်ႉထၢၼ်လႄႈပၢႆးသၢႆႈ၊ ၵေႃႉမႃးပၼ်ပိုၼ်ႉႁူႉ ပဵၼ်ပႃႇမွၵ်ႉၶ မိူင်းဢွတ်ႊသထြေႊလီႊယိူဝ်ႊ။ ပၢင်ၼႆႉ ၸတ်းႁဵတ်းတီႈ ႁူင်းၵေႃလိၵ်ႈလၢႆးလႄႈၾိင်ႈငႄႈတႆး ဝဵင်းတူၼ်ႈတီး။ ယၢမ်း 20:30-19:00 မူင်း၊ မီးတၢင်းၵႃႈၾိင်ႈငႄႈၾိင်ႈထုင်း၊ ၵႃႈၼူၵ်ႉၵႃႈတူဝ်း၊ တီႈႁူင်းႁေႃၵေႃလိၵ်ႈလၢႆး လႄႈၾိင်ႈငႄႈတႆး ဝဵင်းတူၼ်ႈတီး ၼင်ႇၵဝ်ႇ။

ဝၼ်းတီႈ 19/12/2014 ၊ တင်ႈတႄႇယၢမ်းၵၢင်ၼႂ် 08:00-15:00 မူင်းဝၢႆးဝၼ်း၊ မီးပၢင်လူလိၵ်ႈ ပႃလိ၊ ဢွင်ႈတီႈ ထမ်မရူင်ႇ ၽြႃးပဵၼ်ၸဝ်ႈမႁႃမျၢတ်ႈမုၼိ။ ဝၢႆးဢိုတ်းပၢင်ပွႆးယဝ်ႉ မီးပႃးပၢင် ယိုၼ်ႈမွပ်ႈၽိုၼ်ဝႂ်ယွင်ႈယေႃးထႅင်ႈ။

ၵၢင်ၶမ်ႈယၢမ်း 18:30-20:30 မူင်း၊ မီးပၢင် မီးပၢင်ပိုၼ်ႉႁူႉပၢႆးႁၼ်၊ လွင်ႈသတိပတ်ႉထၢၼ်လႄႈပၢႆးသၢႆႈ တီႈႁူင်းႁေႃ ၵေႃလိၵ်ႈလၢႆးလႄႈၾိင်ႈငႄႈတႆး ဝဵင်းတူၼ်ႈတီး။ ၽူႈဢၼ်မႃးပၼ်ပိုၼ်ႉႁူႉတၢင်းမေႃ ပဵၼ်ၸၢဝ်းမလေႊသျိူဝ်ႊ။ သိုပ်ႇၼၼ်ႉ မီးတၢင်းၵႃႈၾိင်ႈငႄႈၾိင်ႈထုင်း၊ တၢင်းၵႃႈၼူၵ်ႉၵႃႈတူဝ်း- ၼႆယဝ်ႉ။

ဝၼ်းတီႈ 20/12/2014 ။ ၽူႈမီးပုၼ်ႈၽွၼ်းႁပ်ႉၶႅၵ်ႇ/ တူၺ်းထိုင်လူလွမ်ပီႈၼွင်ႉၶႅၵ်ႇ တေဢွၼ်ဢဝ်ပီႈၼွင်ႉၶႅၵ်ႇ ၵႂႃႇဢႅဝ်ႇယဵမ်ႈၼွင်ႁၢႆးယႃႈ။ သင်ၶၸဝ်ႈသမ်ႉ ၸႅၵ်ႇဝႆႉ 2 ၸုမ်း၊ ၸုမ်းၼိုင်ႈ တေယေႃးတူဝ်ၵႂႃႇၸွမ်း ပီႈၼွင်ႉၶႅၵ်ႇၼွၵ်ႈမိူင်း ၵႂႃႇဢႅဝ်ႇယဵမ်ႈ ၼွင်ႁၢႆးယႃႈ၊ ထႅင်ႈၸုမ်းၼိုင်ႈသမ်ႉ တေယေႃးတူဝ် မိူဝ်းၸွမ်းပီႈၼွင်ႉၵူၼ်းၼွၵ်ႈမိူင်း/ၼႂ်းမိူင်း ပိူဝ်ႈတႃႇမိူဝ်းပိုတ်ႇပၢင်ပွႆး တီႈဝဵင်းလၢႆးၶႃႈ- ၼႆယဝ်ႉ။

ပိူဝ်ႈတႃႇ ပွင်ပဵၼ်မႃးပၢင်ပွႆး ၶွၼ်ႊၾရႅၼ်ႊပႃလိ ဢၼ်ၸတ်းႁဵတ်းတီႈဝဵင်းတူၼ်ႈတီး တီႈဝတ်ႉဝေလုဝၼ် ပွၵ်ႉဝႃးပျႃးၼႆႉ ၾၢႆႇတႅင်ႇႁၢင်ႈၶိူင်ႈမွၵ်ႇမႂ်၊ ၶပ်ႉၽိူၼ်ၶပ်ႉတင်ႇ၊ ပဵၼ်ဢွၼ်ႇယိင်းဢွၼ်ႇၸၢႆး ၵူႈမူႇၵူႈၸုမ်း ၼႂ်းတူင်ႇဝူင်းတႆး ဝဵင်းတူၼ်ႈတီး၊ ၸုမ်းၵူၼ်းၼုမ်ႇတႆး၊ ၸုမ်းၵေႃလိၵ်ႈလၢႆးလႄႈၾိင်ႈငႄႈတႆး ၵူႈမူႇၵူႈၸုမ်း။ ၶွမ်ႊမတီႊ ပွင်ပဵၼ်ပၢင်ပွႆး ပဵၼ်လုင်းၸၢႆးပၢၼ်းဢွင်ႇ။

ၶွမ်ႊမတီႊၾၢႆႇလိၵ်ႈလၢႆးလႄႈ ၾၢႆႇၸတ်းၵၢၼ်ၵူႈလွင်ႈလွင်ႈၼႆႉ ယူႇတီႈငဝ်ႈငုၼ်းသင်ၶၸိုင်ႈတႆး ဢွၼ်ႁူဝ်ၼမ်းၼႃႈ ၼႂ်းမိူင်း/ၼွၵ်ႈမိူင်းသေ တူင်ႉၼိုင်ၶိုင်ပွင်မႃး- ၼႆယဝ်ႉ။