ဝၢႆးတီႉၺွပ်းယႃႈမဝ်းၵမ် လႆႈတီႈပလိၵ်ႈမၢၼ်ႈ ၶၢဝ်းၵၢင်ၶိုၼ်း တီႈၼမ်ႉၶမ်းယဝ်ႉ ၵူၼ်းဝၢၼ်ႈ ဢဝ်ႁူမ်ႇလူမ်ႈ ပွၵ်ႉ/ဝၢၼ်ႈ၊ ၵူၼ်းလူင်ဝၢၼ်ႈ တီႈဝဵင်းၼမ်ႉၶမ်း ထုၵ်ႇပလိၵ်ႈႁွင်ႉၵႂႃႇထဵတ်ႈထၢမ်၊ သဵင်ႈၶၢဝ်းယၢမ်း လုတ်ႈၵၢၼ်ၼႃႈႁိူၼ်း။

ၸၢႆးထုၼ်းၸၢမ်ႇ လႄႈ ပလိၵ်ႈတဵင်းထေးဢွင်ႇ ဢိၵ်ႇယႃႈမႃႉ ဢၼ်ၾၢႆႇႁူမ်ႇလူမ်ႈဝၢၼ်ႈတီႉၺွပ်းလႆႈ

ၵဵဝ်ႇၵပ်းလွင်ႈၼႆႉ ပူၼ်ႉမႃးမိူဝ်ႈၶမ်ႈၶိုၼ်းဝၼ်းတီႈ 23/01/2015 ၶၢဝ်းယၢမ်းၸမ်တဵင်ႈၶိုၼ်း၊ ၵူၼ်းဝၢၼ်ႈၸိူဝ်းဢဝ်ႁူမ်ႇလူမ်ႈ ၼႂ်းပွၵ်ႉယွမ်ႇ ၵႂႃႇဢႅဝ်ႇလဵပ်ႈၼႂ်းပွၵ်ႉယွမ်ႇသေ တီႉၺွပ်းလႆႈယႃႈတီႈ ပလိၵ်ႈမၢၼ်ႈ ၸိုဝ်ႈမွင်ႇတဵင်းထေးဢွင်ႇ (ပလိၵ်ႈၼမ်ႉၶမ်း) လႄႈ ၵူၼ်းၸွမ်းၵေႃႉၼိုင်ႈ ၸိုဝ်ႈၸၢႆးထုၼ်းၸၢမ်ႇ ၵူၼ်းပွၵ်ႉၼိူဝ် ဝဵင်းၼမ်ႉၶမ်း၊ တီႈၼႃႈလၢၼ်ႉ ၵႃႊရႃႊဢူဝ်ႊၵေႊ မူဝ်းၸိၼ်ႇၵႄႇ ၼႂ်းပွၵ်ႉၵွင်းသႃႇ ဝဵင်းၼမ်ႉၶမ်း။

တီႈတူဝ်ပလိၵ်ႈၼၼ်ႉ လႆႈယႃႈမႃႉ 97 မဵတ်ႉ၊ ယႃႈၽွင်ၶၢဝ် ၶိုင်ႈတဝ်ႈလီႊပူဝ်ႊ၊ ငိုၼ်းမၢၼ်ႈ 25,000 ၵျၢတ်ႈ၊ ငိုၼ်းၶႄႇ 70 ယႂၼ်လႄႈလူတ်ႉၶိူင်ႈလမ်းၼိုင်ႈ။ ပလိၵ်ႈ တဵင်းထေးဢွင်ႇ ၵေႃႈယွမ်းႁပ်ႉ လၢတ်ႈတီႈ ၵူၼ်းလူင်ပွၵ်ႉဝႃႈ- ယႃႈၸိူဝ်းၼၼ်ႉ ပဵၼ်ၶွင်မၼ်းတင်းမူတ်း၊ ယွၼ်ႉပိူဝ်ႈမၼ်းၶႂ်ႈမီးငိုၼ်း၊ ၵူၼ်းႁိူၼ်းၵူၼ်းယေးမၼ်း ဢမ်ႇမီးငိုၼ်းၸႂ်ႉၸၢႆႇလႄႈ မၼ်းတေၸႂ်ႉၸၢႆးထုၼ်းၸၢမ်ႇ ၶၢႆပၼ်မၼ်း- ဝႃႈၼႆ။

ပေႃးဝႃႈတီႉၺွပ်းလႆႈယဝ်ႉၵေႃႈ လႆႈဢဝ်တိၼ်သႂ်ႇထၢင်ႇမႆႉသေ ၶင်ဝႆႉတီႈလုမ်းၵွၼ်းပွၵ်ႉၶိုၼ်းၼိုင်ႈ၊ ထိုင်ၵၢင်ၼႂ်မႃး ၸင်ႇဢဝ်မွပ်ႈပၼ်တီႈတပ်ႉပလိၵ်ႈ- ၽူႈၵွၼ်းပွၵ်ႉၵွင်းသႃႇ လၢတ်ႈ။

ၵပ်းၵၢႆႇလွင်ႈၼႆႉ ထိုင်မႃးဝၼ်းတီႈ 24 , 25  ၸိူဝ်းၼႆႉ  ၼိုင်ႈဝၼ်းၵူၺ်း ၵူၼ်းလူင်ဝၢၼ်ႈလႄႈ ၾၢႆႇဢဝ်ႁူမ်ႇလူမ်ႈဝၢၼ်ႈၶဝ် ထုၵ်ႇပလိၵ်ႈၸႄႈတွၼ်ႈမူႇၸေႈ ႁွင်ႉၵႂႃႇထတ်း ထဵတ်ႈထၢမ်တီႈလုမ်း ဢမ်ႇယွမ်း 2 ပွၵ်ႈ။ ပိူင်လူင်မၼ်း ထဵတ်ႈထၢမ်မိူၼ်ၼင်ႇ လွင်ႈတၢင်းလႆႈတီႉၺွပ်းပလိၵ်ႈၼႆႉ ပိူင်ပဵၼ်မၼ်းပဵၼ်ၸိူင်ႉႁိုဝ် ၸိူဝ်းၼႆႉ။

ဝၼ်းတီႈ 25 ႁွင်ႉၵႂႃႇထတ်းထၢမ် တင်ႈတႄႇ ၵၢင်ဝၼ်း 12 မူင်း တေႃႇထိုင်ဝၢႆးဝၼ်း 3 မူင်း၊ ၽိူဝ်ႇဝၢႆးဝၼ်း 4 မူင်းမႃးၵေႃႈ ႁွင်ႉၵႂႃႇထတ်းထၢမ်ထႅင်ႈၵမ်းၼိုင်ႈ တေႃႇထိုင်ၵၢင်ၶမ်ႈ 7 မူင်း။ ထိုင်ဝၼ်းတီႈ 26 မႃးၵေႃႈ ႁွင်ႉထဵတ်ႈထၢမ်ၸွမ်းၵၼ်ထႅင်ႈတင်းမူတ်း တင်ႈတႄႇၵၢင်ၼႂ် 9 မူင်းတေႃႇထိုင်ဝၢႆးဝၼ်း 1 မူင်း။ တင်ႈတႄႇၵၢင်ၼႂ် 9 မူင်းတေႃႇထိုင်ဝၢႆးဝၼ်း 1 မူင်းၼၼ်ႉ ထတ်းယဝ်ႉ 7 ၵေႃႉ၊ ထိုင်ၵၢင်ၶမ်ႈ 8 မူင်း ၸင်ႇယဝ်ႉတင်း 10 ၵေႃႉသေ ၸင်ႇလႆႈဢွၼ်ၵၼ်ပွၵ်ႈႁိူၼ်းၶိုၼ်း။ လွင်ႈၸိူဝ်းၼႆႉ ႁဵတ်းႁႂ်ႈသဵင်ႈ ၶၢဝ်းယၢမ်းၸွမ်း၊ လုတ်ႈႁၢမ်းၵၢၼ်ၼႃႈႁိူၼ်းတႃယေး- ၵူၼ်းၼမ်ႉၶမ်းၵေႃႉၼိုင်ႈ လၢတ်ႈ။

ဝၢႆးမီးၵၢၼ်တီႉၺွပ်းပလိၵ်ႈၵႃႉယႃႈမႃးၼႆႉ မီးၸဝ်ႈၼႃႈတီႈပလိၵ်ႈၶဝ် မႃးပႂ်ႉၸွမ်းတၢင်းၶဝ်ႈတၢင်းဢွၵ်ႇ ၼႂ်းပွၵ်ႉၼႂ်းယွမ်ႇၵူႈၶမ်ႈ၊ ၵူၼ်းၼႂ်းပွၵ်ႉၵႂႃႇလႂ်ပႆလႂ်ၵေႃႈ ဢမ်ႇမီးလွင်ႈထၢင်ႇႁၢင်ႈလွတ်ႈလႅဝ်း။ ၵဵဝ်ႇၵပ်းလွင်ႈလွင်ႈတီႉၺွပ်း ပလိၵ်ႈၵႃႉၶၢႆယႃႈၼႆႉသေ ပူၼ်ႉမႃးမိူဝ်ႈ 2 ဝၼ်းၼႆႉ ၾၢႆႇတပ်ႉပလိၵ်ႈ ၸႄႈဝဵင်းၼမ်ႉၶမ်းၵေႃႈ ႁွင်ႉဢဝ်ၽူႈသိုဝ်ႇၶၢဝ်ႇ လူင်ပွင်ၸိုင်ႈ မႃးႁဵတ်းပၢင်သပ်းၸႅင်ႈၶၢဝ်ႇ- ၼႆယဝ်ႉ။

ၵူၼ်းၼႂ်းပွၵ်ႉၼႂ်းယွမ်ႇၶဝ် တုၵ်းယွၼ်းဝႃႈ- ၾၢႆႇၵွၼ်းႁွင်ႈၵၢၼ်ၽဵဝ်ႈမူၺ်ႉယႃႈမဝ်းၵမ်လႄႈသင်၊ ၾၢႆႇလူင်ပွင်ၸိုင်ႈၸႄႈမိူင်းၸိူဝ်းၼႆႉလႄႈသင်၊ ႁႂ်ႈၵူတ်ႇထတ်းပၼ်တူၺ်းလီလီ။ ပေႃးဢမ်ႇမီးလွင်ႈသင်ၵေႃႈ ယႃႇပေႁွင်ႉၵူၼ်းဝၢၼ်ႈၵူၼ်းသူၼ် ၵႂႃႇၵူတ်ႇထတ်းၸိူင်ႉၼၼ်ယူႇၶိူဝ်းၶိူဝ်း- ဝႃႈၼႆ။