ၼႂ်းဝၼ်း ၸိူဝ်ႉၸၢတ်ႈၸိုင်ႈတႆး ၶွပ်ႈၶူပ်ႇထူၼ်ႈ 68 ပီၼႆႉ ၵူၼ်းၼုမ်ႇမိူင်းတႆး ပွတ်းႁွင်ႇ/ၸၢၼ်း/ဢွၵ်ႇ တေႁူမ်ႈၵၼ် ပႆၶိုၼ်ႈလွႆၸၢင်ႉ မိူင်းၵိုင်၊ လွႆဢၼ်သုင်သုတ်းတီႈ 3 ၼႂ်းမိူင်းတႆး။

မိူဝ်ႈၶိုၼ်ႈလွႆလဵင်း ဝၼ်းၸိူဝ်ႉၸၢတ်ႈၸိုင်ႈတႆး ဝၼ်းတီႈ 07/02/2014 ၵႃႈပူၼ်ႉမႃး

ၼႂ်းဝၼ်းတီႈ 07/02/2015 ဢၼ်ပဵၼ် ဝၼ်းၸိူဝ်ႉၸၢတ်ႈၸိုင်ႈတႆး ၶွပ်ႈၶူပ်ႇထူၼ်ႈ 68 ပီၼႆႉ ၵေႃႁူမ်ႈသၢင်ႈၵူၼ်းၼုမ်ႇတႆး (Tai Youth Network- TYN) ဢွၼ်ႁူဝ်ၼမ်းၼႃႈသေ တေမီးၵူၼ်းၼုမ်ႇၼႂ်း 13 ၸႄႈဝဵင်း၊ ၼႂ်းၸိုင်ႈတႆးပွတ်းႁွင်ႇ ပွတ်းၸၢၼ်း ပွတ်းဢွၵ်ႇ ႁူမ်ႈၵၼ်ၶိုၼ်ႈၵႂႃႇပႆၶိုၼ်ႈ လွႆၸၢင်ႉမိူင်းၵိုင်   ဢၼ်မီးတၢင်းသုင် 8,129 ထတ်း။ ယိူင်းဢၢၼ်းၶိုၼ်ႈၵႂႃႇ ၸတ်းပၢင်ပွႆး ၶုၵ်းထူပ်းဝၼ်းၸိူဝ်ႉၸၢတ်ႈၸိုင်ႈတႆး ၶွပ်ႈၶူပ်ႇထူၼ်ႈ 68 ပီ တီႈၼိူဝ်ၸိၵ်းလွႆ- ၸၢႆးဝၼ်းလႅင်း ၵေႃႉပဵၼ်ႁူဝ်ၼႃႈၸုမ်းၶိုၼ်ႈလွႆ လၢတ်ႈ။

ဢၼ်တေၶိုၼ်ႈလွႆပွၵ်ႈၵမ်းၼႆႉ လၢမ်းၶၢတ်ႈဝႆႉဝႃႈ တေမီးႁႅင်းၵူၼ်း ဢမ်ႇယွမ်းမွၵ်ႈ 600 ပၢႆ။ လႅပ်ႈတေၼမ်လိူဝ်ၵူႈပွၵ်ႈၵူႈၵမ်း ဢၼ်ယၢမ်ႈၶိုၼ်ႈလွႆမႃးၸိူဝ်းၼၼ်ႉယူႇ၊ တေၼမ်လိူဝ်ႁူၵ်းပၢၵ်ႇၵေႃႈၸၢင်ႈ ပဵၼ်လႆႈ- ၸၢႆးဝၼ်းလႅင်းသိုပ်ႇလၢတ်ႈ။

ၸၢႆးမိူင်း ၵူၼ်းမိူင်းၵိုင် ၵေႃႈလၢတ်ႈဝႃႈ- လိူဝ်သေၵူၼ်းၼုမ်ႇၼႂ်းလုၵ်ႈၸုမ်း ၵေႃႁူမ်ႈသၢင်ႈၵူၼ်းၼုမ်ႇတႆး (TYN) ယဝ်ႉ၊ ပေႃႈမႄႈၵူၼ်းမိူင်းၵိုင် တင်း သင်ၶၸဝ်ႈမိူင်းၵိုင်ၶဝ်ၵေႃႈ တေၶဝ်ႈႁူမ်ႈၶိုၼ်ႈလွႆၸွမ်း- ဝႃႈၼႆ။

ၸၢႆးၸၢႆးၶမ်း လုၵ်ႈၸုမ်းၵေႃႁူမ်ႈသၢင်ႈၵူၼ်းၼုမ်ႇတႆး (TYN) ၵေႃႈလၢတ်ႈဝႃႈ- မိူဝ်ႈႁဝ်းၶိုၼ်ႈလွႆလဵင်း (ၵမ်းတီႈ 1) တီႈမိူင်းယႆ တၢင်းသုင် 8,777 ထတ်း၊ မီးႁႅင်းၵူၼ်း 300 ပၢႆ။ ၵမ်းတီႈ 2 ၶိုၼ်ႈလွႆၶိူဝ်း ၸႄႈဝဵင်းသီႇပေႃႉ။ ၵမ်းတီႈ 3 ၶိုၼ်ႈလွႆသၢမ်သိပ်း ၸႄႈဝဵင်းၵူတ်ႉၶၢႆ၊ မီးႁႅင်းၵူၼ်း 600 ပၢႆ။ ဢၼ်တေၶိုၼ်ႈၵမ်းၼႆႉ ပဵၼ်ၵမ်းတီႈ 4 ၊ ႁႅင်းၵူၼ်းတေလႅပ်ႈၼမ်လိူဝ်ၵူႈၵမ်းယူႇ- ဝႃႈၼႆ။

ယိူင်းဢၢၼ်း ဢၼ်လႆႈပႆၶိုၼ်လွႆၼႆႉ ၼွၵ်ႈၼိူဝ်သေ သၢင်ႈလွင်ႈမိုတ်ႈၵိုဝ်းၸမ်ၸႂ်ၵၼ်ယဝ်ႉ ပိူဝ်ႈတႃႇႁႂ်ႈၵူၼ်းၼုမ်ႇ မေႃႁၵ်ႉသႃၼမ်ႉလိၼ်ႁိၼ်ၽႃမိူင်းတႆးလႄႈ သၽႃႇဝၾိင်ႈတိုၼ်းပဵၼ်။ ပိူဝ်ႈတႃႇလဵၼ်ႈႁႅင်းႁူမ်ႈၵၼ်လႄႈတူဝ်ၶိင်းၵႅၼ်ႇၶႅင်လႅတ်းၽၢႆ။ ပိူဝ်ႈတႃႇႁႂ်ႈမေႃဝႆႉၵႃႈၶၼ် ပၢႆးယူႇလီလႄႈၵႅတ်ႇၶႄၽေးယႃႈမဝ်းၵမ်။  ပိူဝ်ႈတႃႇလဵပ်ႈႁဵၼ်းၵၢၼ်တူဝ်ထူပ်းမိုဝ်းလႄႈ ၸႃႉႁူမ်ႈၶီ-လီႁူမ်ႈသိူဝ်းၸွမ်းၵၼ်။ ပိူဝ်ႈတႃႇလဵပ်ႈႁဵၼ်းႁူႉ ၵၢၼ်ယူႇသဝ်းၵိၼ်သၢင်ႈၵူၼ်းၼႂ်းပိုၼ်ႉတီႈလႄႈ ၵၢၼ်ႁၵ်ႉၸိူဝ်ႉၸၢတ်ႈ။ ပိူဝ်ႈတႃႇပူၵ်းသူၼ်းၵူၼ်းၼုမ်ႇ ၵေႃႉၼိုင်ႈလႄႈၵေႃႉၼိုင်ႈ၊ ၸုမ်းၼိုင်ႈလႄႈၸုမ်းၼိုင်ႈ မေႃၶဝ်ႈၸႂ်ၸွႆႈထႅမ်ၵၼ် ၼႂ်းၵၢၼ်ပူၵ်းပွင်ဝၢၼ်ႈမိူင်းၶိုၼ်ႈယႂ်ႇ ငမ်းယဵၼ်။

လိူၼ်ၾႅပ်ႊၿိဝ်ႊရီႊ 7 ဝၼ်း ဢၼ်မီးၸိုဝ်ႈလၢႆၸိုဝ်ႈဝႃႈ ဝၼ်းမိူင်းတႆး၊ ဝၼ်းၶိူဝ်းတႆး ႁိုဝ် ဝၼ်းၸိူဝ်ႉၸၢတ်ႈ ၸိုင်ႈတႆး (Shan National Day)ၼႆႉ တႄႇတင်ႈမီးမႃးမိူဝ်ႈ ဝၼ်းထိ 07/02/1947 ။ လိူၼ်ၾႅပ်ႊၿိဝ်ႊရီႊ 11 ဝၼ်း 1947 ၽူႈၼမ်းၸိုင်ႈတႆး တင်း ၸဝ်ႈၾႃႉ လႆႈၸ်ႂၵၼ်တႅပ်းတတ်းလိူၵ်ႈဢဝ် ဝၼ်းထိ 07/02/1947 ပဵၼ်ဝၼ်းၸၢတ်ႈ၊ တုင်းၸၢတ်ႈ လိူင်ၶဵဝ်လႅင် ၼႂ်းၵၢင်ဝူင်းလိူၼ်ၶၢဝ်၊ ၽဵင်းၵႂၢမ်းၸၢတ်ႈ “ၶိူဝ်းႁဝ်းၶိူဝ်းရႃႇၸႃႇ” 3 ပိူင် လႄႈ ႁူဝ်ပဝ်ႈလူင်ၶွင်ႊသီႊၸိုင်ႈတႆး ၸဝ်ႈၾႃႉလူင်ၼမ်ႉသၼ်ႇ ၸဝ်ႈၶုၼ်ပၢၼ်းၸိင်ႇ (ၸၢဝ်းၶိူဝ်းပလွင်ႈ) လႆႈပိုၼ်ၽၢဝ်ႇလွင်ႈမၵ်းမၼ်ႈ 3 ပိူင်ၼၼ်ႉ ပဵၼ်ၶိူင်ႈပိူင်မဵတ်ႇမၢႆ တၢင်တူဝ်ၵူၼ်းမိူင်းတႆးၵူႈၸၢဝ်းၶိူဝ်း။

ၼွၵ်ႈသေၼၼ်ႉ ၾႅပ်ႉၿိဝ်ႊရီႊ 7 ဝၼ်း ယင်းပဵၼ်ၽၵ်းတူ သဵၼ်ႈတၢင်းယၢင်ႈၸူး ၾႅပ်ႉၿိဝ်ႊရီႊ 12 ဝၼ်း ဢၼ်ပဵၼ်ဝၼ်းၸိုင်ႈမိူင်းႁူမ်ႈတုမ် မႃးတေႃႇထိုင်ယၢမ်းလဵဝ်။ ၵွပ်ႈဝႃႈ ပေႃးဢမ်ႇမီးဝၼ်းထိ 7 ၵေႃႈ ဢမ်ႇမီးဝၼ်းထိ 12 ဢၼ်လူင်းလၢႆးမိုဝ်းလိၵ်ႈႁူမ်ႈမၢႆပၢင်လူင်သေ ၵေႃႇတင်ႈမႃးၸိုင်ႈမိူင်းႁူမ်ႈတုမ်မၢၼ်ႈ။