ၸဝ်ႈသင်ၶမိူင်းတႆး ဝဵင်းၵုၼ်ႁဵင် ယေႃးတူဝ်ၶဝ်ႈႁူမ်ႈ ပၢင်ပွႆးလုမ်းလႃးၶၢပ်ႈတူဝ် (သၢင်းၵျဵဝ်ႇ) ၸဝ်ႈသြႃႇတႃသႅင် ၼႂ်းမိူင်းထႆး၊ ပွၵ်ႈၶိုၼ်းလူတ်ႉၵႃးၵိူတ်ႇၽေးဢုပၢတ်ႈ ပွတ်းတၢင်း။ သင်ၶၸဝ်ႈၸိုဝ်ႈယႂ်ႇဝဵင်းၵုၼ်ႁဵင် လူႉလွၼ်ႇသဵင်ႈမုၼ် တူၼ်ၼိုင်ႈ၊ ဝၢတ်ႇၸဵပ်းသွင်တူၼ်၊ ၵူၼ်းႁိူၼ်းဝၢတ်ႇၸဵပ်းသွင်ၵေႃႉ။

လူတ်ႉၵႃးလမ်းဢၼ်ပိၼ်ႈလူင်းလွႆ

မိူဝ်ႈဝၼ်းတီႈ 28/01/2015 ဝၢႆးဝၼ်းမွၵ်ႈ 2 မူင်း၊ လူတ်ႉၵႃးသင်ၶၸဝ်ႈ [ဢၼ်မႃးၶဝ်ႈႁူမ်ႈပၢင်ပွႆး လုမ်းလႃး (သၢင်းၵျဵဝ်ႇ) ၽဝ်ၶၢပ်ႈတူဝ် ၸဝ်ႈသြႃႇတႃသႅင် ၼႂ်းမိူင်းထႆး ပွၵ်ႈၶိုၼ်းမိူင်းတႆး] ဢၼ်ၵူၼ်းၶီႇၼိူဝ်လူတ်ႉၵႃး မီး 5 ပုၵ်ႉၵလ ၵိူတ်ႇၽေးဢုပၢတ်ႈ၊ လူတ်ႉၵႃးပိၼ်ႈတူၵ်းလွႆ ဝူင်ႈၵၢင်ႁူဝ်မိူင်းတင်းၾင်ႇၶူင်း၊ ႁိမ်းဝၢၼ်ႈမႄႈယူပ်ႈယၢပ်ႈ။ ႁဵတ်းႁႂ်ႈသင်ၶၸဝ်ႈတူၼ်ၼိုင်ႈ လူႉလွၼ်ႇသဵင်ႈမုၼ်ၵႂႃႇ၊ 2 တူၼ်ဝၢတ်ႇၸဵပ်း၊ ၵူၼ်းႁိူၼ်းဝၢတ်ႇၸဵပ်း 2 ၵေႃႉ- ၼႆယဝ်ႉ။

တူၼ်ၸဝ်ႈဢၼ်လူႉလွၼ်ႇ သဵင်ႈမုၼ် ယွၼ်ႉၽေးဢုပၢတ်ႈၼႆႉ ပဵၼ်ၸဝ်ႈတူၼ်ၶူး (ၸဝ်ႈသြႃႇ) သုၸႃတ ဢႃႇယု 61 ပီ၊ ၸဝ်ႈၵွၼ်းဝတ်ႉသုၶိတႃရူင်ႇ ပွၵ်ႉ 3 ဝဵင်းၵုၼ်ႁဵင်။ ၵူၼ်းႁေႃႈလူတ်ႉၵႃးၵေႃႈ ပဵၼ်တူၼ်ၸဝ်ႈသြႃႇသုၸႃတ ဢၼ်လူႉလွၼ်ႇၵႂႃႇၼႆႉၼင်ႇၵဝ်ႇ။ မၼ်းၸဝ်ႈၼႆႉ ပဵၼ်ၽူႈမၢႆသင်ၶ ၼႂ်းဝဵင်းၵုၼ်ႁဵင်၊ ပဵၼ်ၽူႈမၢႆသင်ၶမႃးလႆႈ 2-3 ပၢၼ်ယဝ်ႉ၊ ၶၢပ်ႈတူဝ်မၼ်းၸဝ်ႈၼႆႉ မိူဝ်းၽႅဝ်ၶိုၼ်းတီႈဝဵင်းၵုၼ်ႁဵင် ယၢမ်း 5 မူင်းၵၢင်ၼႂ် ၶွင်ဝၼ်းတီႈ 29/01/2015 ၼႆႉ။ ဝၼ်းလိူၼ် 3 မူၼ်း (ဝၼ်းတီႈ 03/02/2015)ၼႆႉ တၢင်းတၵ်ႉၵႃႇသတ်ႉထႃး ၸႄႈဝဵင်းၵုၼ်ႁဵင် တေၸတ်းပၢင်ၵုမ်လူင် ပိူဝ်ႈတႃႇဢုပ်ႇဢူဝ်း လွင်ႈလုမ်းလႃး ၶၢပ်ႈတူဝ် ၸဝ်ႈတူၼ်ၶူး သုၸႃတ ၼႆႉ- သင်ၶၸဝ်ႈ တူၼ်ဢၼ်ၸမ်ၸႂ် ၸဝ်ႈသုၸႃတ ဢၼ်လူႉလွၼ်ႇၵႂႃႇ လၢတ်ႈ။
မၼ်းၸဝ်ႈသိုပ်ႇလၢတ်ႈဝႃႈ- သင်ၶၸဝ်ႈ တူၼ်ဢၼ်ဝၢတ်ႇၸဵပ်းတူၼ်ၼိုင်ႈ ၸိုဝ်ႈၸဝ်ႈၼႃၵသေၼ၊ ပဵၼ်ၸဝ်ႈၵွၼ်းဝတ်ႉသီရိမင်ႇၵလႃႇ ၼွင်ငိုၼ်း ဝဵင်းၵႃလိ၊ မၼ်းၸဝ်ႈၼႆႉ ပဵၼ်ႁူဝ်ပဝ်ႈသင်ၶ တီႈဝဵင်းၵုင်ႁဵင်၊ ဢႃႇယု မွၵ်ႈ 60 ပီ။ ထႅင်ႈတူၼ်ၼိုင်ႈၸိုဝ်ႈ ၸဝ်ႈဝိၸ်ႉၸႃၼၼ်တ ၊ ၸဝ်ႈၽူႈၸွႆႈၵၢၼ်ၼႂ်း ဝတ်ႉဢွင်ႇမင်ႇၵလႃႇ ဝဵင်းၵုၼ်ႁဵင်၊ ဢႃႇယု 42 ပီ။ တၵ်ႉၵႃႇယိင်း 2 ၵေႃႉၼၼ်ႉ ၵေႃႉၼိုင်ႈၸိုဝ်ႈပႃႈမျႃႉ၊ ဢႃႇယု 58 ပီ၊ ၵူၼ်းၸႃတိဝဵင်းၵုၼ်ႁဵင်။ ထႅင်ႈၵေႃႉၼိုင်ႈၸိုဝ်ႈပႃႈလၢႆႈ ၵူၼ်းၸႃတိၵဵင်းတွင်း မႃးယူႇတီႈဝဵင်းၵုၼ်ႁဵင်- ဝႃႈၼႆ။

သင်ၶၸဝ်ႈ 2 တူၼ် ဢၼ်ဝၢတ်ႇၸဵပ်းၼႆႉ တၢင်းတၵ်ႉၵႃႇသတ်ႉထႃး ဝဵင်းၵုၼ်ႁဵင်-ၵႃလိ ၶဝ်တိတ်းတေႃႇတၢင်းၾူၼ်ႊမႃးဝႃႈ ႁႂ်ႈဢဝ်လူင်းယူတ်းယႃ တီႈဝဵင်းၵဵင်းမႆႇ။ ၾၢႆႇၼိုင်ႈၵေႃႈ သင်ၶၸဝ်ႈ တူၼ်ဢၼ်ၵႂႃႇယဵမ်ႈတီႈႁူင်းယႃၵေႃႈ ႁၼ်ဝႃႈတၢင်းႁူင်းယႃမႄႈႁွင်ႈသွၼ်ၼၼ်ႉ ၶိူင်ႈမႆႉၶိူင်ႈမိုဝ်းတၢင်းမေႃယႃ ဢမ်ႇပေႃးတဵမ်ထူၼ်ႈၼႆသေ တိုၵ်ႉၶတ်းၸႂ် ႁႂ်ႈလႆႈသိုပ်ႇဢဝ်လူင်းယူတ်းယႃ တီႈၵဵင်းမႆႇယူႇ။ ၵူၺ်းၵႃႈ ႁၢၼ်ႉတေႃႇယၢမ်းၵၢင်ဝၼ်းတဵင်ႈမိူဝ်ႈၼႆႉ (ဝၼ်းတီႈ 30/01/2015) ယင်းပႆႇလႆႈဢၼုၺၢတ်ႈ တီႈမေႃလူင်ၶဝ်- ၼႆယဝ်ႉ။

သင်ၶၸဝ်ႈ ဢၼ်ၶဝ်ႈယူတ်းယႃတူဝ်ဝႆႉတီႈ ႁူင်းယႃမႄႈႁွင်ႈသွၼ်

လွင်ႈတၢင်းဢၼ်လူတ်ႉၵႃးပိၼ်ႈၼႆႉ ယွၼ်ႉပရဵၵ်ႊ (ႁၢမ်ႈလေႃႉ) မၼ်းၵွႆသေ လေႃႈလူင်းၸွမ်းတၢင်း တူၵ်းၾင်ႇႁိုၵ်း ၵိင်ႈလူင်းလွႆၵႂႃႇလၢႆငူပ်ႉလၢႆပိၼ်ႈ။ ဢွၼ်ၼႃႈမိူဝ်ႈတေ ၵိူတ်ႇၽေးဢုပၢတ်ႈၼႆႉ မီးလူတ်ႉၵႃးဢၼ်ပွၵ်ႈမိူဝ်းၸွမ်းၵၼ် မီးလွင်ႈသင်ၵေႃႈၸွႆႈၵၼ်ၼၼ်ႉ မႃးၸွမ်းတၢင်းလင်။ ၵူၼ်းၼႂ်းလူတ်ႉၵႃးလမ်းၼၼ်ႉ ပူၵ်းမိုဝ်းၼႄသေပူၼ်ႉၵႂႃႇ၊ ၵူၺ်းၵႃႈ ပူၵ်းမိုဝ်းၼႄလွင်ႈသင်ဢမ်ႇႁူႉ၊ ပေႃးလူတ်ႉၵႃးသိုပ်ႇႁေႃႈၵႂႃႇထႅင်ႈ 2-3 ဝႃးၵေႃႈဢဝ်ပရဵၵ်ႊမၼ်းဢမ်ႇလႆႈ။ ၸဝ်ႈသြႃႇဢၼ်ႁေႃႈၵႃးၵေႃႈ လၢတ်ႈဝႃႈ ဢဝ်ပရဵၵ်ႊမၼ်းဢမ်ႇလႆႈယဝ်ႉ ၼႆသေၶတ်းၸႂ်ၵုမ်းၽူင်ႊမႃႊလႆႊ (ႁူဝ်လူတ်ႉ) လူင်းၵႂႃႇ။ လူတ်ႉၵႃးလမ်းတၢင်းၼႃႈၼၼ်ႉ သမ်ႉၵႂႃႇထိူင်းလႄႈၵႂႃႇတမ်သႂ်ႇၵူၼ်ႈလူတ်ႉလမ်းၼၼ်ႉသေ ဢဝ်ၾႆးမၼ်းတႅၵ်ႇၵႂႃႇ။ ၼင်ႇႁိုဝ်လူတ်ႉလမ်းၼႃႈၼၼ်ႉ တေဢမ်ႇလူႉၵွႆၼမ်ၼၼ်ႉ ၸဝ်ႈသြႃႇၵေႃႈငႅၵ်း/လဵဝ်ႉႁူဝ်လူတ်ႉငိူင်ႉဝႄႈ၊ ၵူၺ်းၵႃႈ သမ်ႉဝႄႈၵႂႃႇၺႃးတၢင်းၾင်ႇႁိုၵ်းသေ လူတ်ႉၵေႃႈပိၼ်ႈတူၵ်းလွႆၵႂႃႇလၢႆၵိင်ႈလၢႆငူပ်ႉ- ၸဝ်ႈသင်ၶ တူၼ်တိူဝ်ႉဝၢတ်ႇၸဵပ်း လၢတ်ႈၼႄတီႈ သင်ၶၸဝ်ႈတူၼ်ဢၼ်ၵႂႃႇယဵမ်ႈၸႂ်း တီႈႁူင်းယႃမႄႈႁွင်ႈသွၼ်ၼင်ႇၼႆ။

မိူဝ်ႈဢၼ်တၢင်းတၵ်ႉၵႃႇ တီႈမိူင်းထႆး ၼိမၼ်တၼမိူဝ်းၼၼ်ႉ တင်ႈတႄႇဢဝ် ၼႃးၵူင်းႁွတ်ႈထိုင်လႅၼ်လိၼ်ထႆး လႄႈၼႂ်းမိူင်းထႆး တေမီးတၢင်းတၵ်ႉၵႃႇသတ်ႉထႃးမႃးႁပ်ႉ၊ မီးၵူၼ်းၶပ်းလူတ်ႉႁပ်ႉသူင်ႇပၼ်။ ၵူၺ်းၵႃႈ ၽိူဝ်ႇမႃးသမ်ႉဢမ်ႇၸႂ်ႈ၊ ဢမ်ႇမီးၵူၼ်းႁပ်ႉသူင်ႇ။ ၵွပ်ႈၼၼ် ဢမ်ႇလႅၼ်ႇသဵၼ်ႈတၢင်းၵေႃႈ တူၼ်ၸဝ်ႈၶဝ် ၵႃႈလႆႈႁေႃႈဢဝ်ႁင်းၵူၺ်း- သင်ၶၸဝ်ႈ တူၼ်ဢၼ်ၸမ်ၸႂ် ၸဝ်ႈသုၸႃတ ဢၼ်သဵင်ႈမုၼ်ၵႂႃႇ သိုပ်ႇလၢတ်ႈၼႄၼင်ႇၼႆ။

တူၼ်ၸဝ်ႈၵွၼ်းဝတ်ႉ သၼ်ပႅၵ်ႇ ဢိူင်ႇပဵင်းလူင် ယဵမ်ႈၸႂ်းသင်ၶၸဝ်ႈ ဢၼ်ၶဝ်ႈယူတ်းယႃတူဝ်ဝႆႉတီႈ ႁူင်းယႃမႄႈႁွင်ႈသွၼ်

လူတ်ႉၵႃးလမ်းဢၼ်ၵိူတ်ႇၽေးဢုပၢတ်ႈၼႆႉ ပဵၼ်သႅၼ်း SHARP ။ တီႈလူတ်ႉၵႃးပိၼ်ႈၼႆႉ ၵူႈပွၵ်ႈမီးႁေႃၸဝ်ႈမိူင်းၵဝ်ႇ၊ တီႈၼႆႈ လူတ်ႉၵႃးၵႆႉၵႆႉပိၼ်ႈလၢႆလၢႆပွၵ်ႈ၊ ပဵၼ်တီႈဢၼ်ၵႆႉၵိူတ်ႇၽေးဢၼ်ႇတရႄႇတႃႇသေႇ- ၼႆယဝ်ႉ။

ၵူၼ်းၵႃႉ ယၢမ်ႈဢွၵ်ႇတၢင်း ၼိူဝ်သဵၼ်ႈတၢင်းလူင် ႁူဝ်မိူင်း-ၼႃးၵူင်း ၵေႃႉၼိုင်ႈၵေႃႈလၢတ်ႈဝႃႈ- သဵၼ်ႈတၢင်းလႅၼ်လိၼ် ႁူဝ်မိူင်း-ၾင်ႇၶူင်းၼႆႉ ယၢပ်ႇတႄႉတႄႉ။ ပဵၼ်သဵၼ်ႈတၢင်းၸၼ်း တၢင်းၵူတ်ႉ ၶိုၼ်ႈလွႆလူင်းလွႆး၊ ပေႃးပဵၼ်ၵူၼ်းဢမ်ႇယၢမ်ႈၵႂႃႇမႃးလႄႈသင်၊ ဢမ်ႇလႅၼ်ႇၵၢၼ်ႁေႃႈလူတ်ႉၵႃးၸိူဝ်းၼႆႉလႄႈသင်၊ ဢမ်ႇထုၵ်ႇလီႁေႃႈလူတ်ႉၵႃး- တိုၵ်းသူၼ်းၼင်ႇၼႆ။

လႆႈႁူႉထႅင်ႈဝႃႈ ၸဝ်ႈသြႃႇတူၼ်ဢၼ်လူႉလွၼ်ႇ သဵင်ႈၵႂႃႇၼႆႉ မိူဝ်ႈပီၵၢႆၵေႃႈ ၾႆးမႆႈဝတ်ႉ/ၵျွင်းမၼ်းၸဝ်ႈ၊ မိူဝ်ႈမႃးမိူင်းထႆး ၼႂ်းတိုဝ်ႉတၢင်းပၢင်ပွႆးလုမ်းလႃးၽဝ်ၶၢပ်ႈတူဝ် ၸဝ်ႈသြႃႇတႃသႅင်ပွၵ်ႈၼႆႉ ပိူဝ်ႈတႃႇသၢင်ႈၶိုၼ်းဝတ်ႉဝႃးမႂ်ႇၼႆသေ မၼ်းၸဝ်ႈယင်းမႃးႁႃ ၸဝ်ႈၽူႈၵူၼ်းလီ ၸိူဝ်းတေႁပ်ႉႁဵတ်းၸဝ်ႈတႃႇၼ ၼၼ်ႉယူႇ- ၼႆယဝ်ႉ။