ၽွင်းတႅၼ်းပႃႊတီႊႁူဝ်သိူဝ် တင်း ၾၢႆႇႁဵတ်း ဝႂ်ၵပ်းတူဝ် ႁူမ်ႈသၢၼ်မိုဝ်းၵၼ် လူင်းပိုၼ်ႉတီႈ ၵႂႃႇႁဵတ်းပၼ် ဝႂ်ၵပ်းတူဝ်ၵူၼ်းဝၢၼ်ႈ ၾၢႆႇဢွၵ်ႇဝဵင်းလၢႆးၶႃႈ၊ မီးၵူၼ်း ပႆႇမီးဝႂ်ၵပ်းတူဝ် ၼပ်ႉႁူဝ်ပၢၵ်ႇ။

ဝၼ်းတီႈ 27/01/2015 ၽွင်းတႅၼ်းပႃႊတီႊႁူဝ်သိူဝ် (SNLD) ၸၢႆးၵျေႃႇၸေႇယ (လၢႆးၶႃႈ) တင်း ၸဝ်ႈၼႃႈတီႈ ၾၢႆႇႁဵတ်းဝႂ်ၵပ်းတူဝ်ၵူၼ်းမိူင်း (လဝၵ) ၶဝ် ႁူမ်ႈသၢၼ်မိုဝ်းၵၼ် ၵႂႃႇႁဵတ်းပၼ်ဝႂ်ၵပ်းတူဝ် (မၢတ်ႈပူင်ႇတိၼ်ႇ) လႄႈ သဵၼ်ႈမၢႆႁူဝ်ႁိူၼ်း (ဢဵင်ႇထွင်ႇၸုၸယိၼ်း) ပၼ်ၵူၼ်းဝၢၼ်ႈၵူၼ်းမိူင်း ၾၢႆႇဢွၵ်ႇဝဵင်းလၢႆးၶႃႈ၊ ၼႂ်းဢိူင်ႇၼွင်ၵေႃႈ တၢင်းဝၢၼ်ႈၵၢင်းဢုၼ်- ၼႆယဝ်ႉ။

ဢိူင်ႇၼွင်ၵေႃႈ ၸႄႈဝဵင်းလၢႆးၶႃႈၼႆႉ မီး 10 ဝၢၼ်ႈ- ဝၢၼ်ႈၵုင်းၵၢပ်ႇ၊ ဝၢၼ်ႈမႂ်ႇ၊ ဝၢၼ်ႈပုၵ်း၊ ဝၢၼ်ႈၼွင်ၶႄႇ၊ ဝၢၼ်ႈပုင်ႇၵိူဝ်၊ ဝၢၼ်ႈမၢၵ်ႇလၢင်း၊ ဝၢၼ်ႈၵုင်းတွၵ်ႇ၊ ဝၢၼ်ႈၵုင်းလၢင်း၊ ဝၢၼ်ႈၵၢင်းဢုၼ်၊ ဝၢၼ်ႈဝၢၼ် ၸိူဝ်းၼႆႉ။

ၵႂႃႇလႅၵ်ႈလၢႆႈ/ပိၼ်ႇပၼ်ဝႂ်ၵပ်းတူဝ် ဢၼ်မူတ်းဢႃႇယု၊ လႅၵ်ႈလၢႆႈပၼ်သဵၼ်ႈမၢႆႁူဝ်ႁိူၼ်းလႄႈ ႁဵတ်းပၼ်သဵၼ်ႈမၢႆႁူဝ်ႁိူၼ်းဢၼ်မႂ်ႇ ပၼ်ၵူၼ်းၸိူဝ်းပႆႇမီး သဵၼ်ႈမၢႆႁူဝ်ႁိူၼ်း။ ႁဵတ်းပၼ်ဝႂ်ၵပ်းတူဝ် ၵူၼ်းၼုမ်ႇၸိူဝ်းဢႃႇယုပႆႇတဵမ် 18 ပီ လႄႈတဵမ် 18 ယဝ်ႉ ၸိူဝ်းၼႆႉ- ၼႆယဝ်ႉ။

ၵဵဝ်ႇၵပ်းလွင်ႈၼႆႉ မိူဝ်ႈဝႃး မီးၵၢၼ်လၢမ်းၶၢတ်ႈတူၺ်းဝႃႈ- ၵူၼ်းၸိူဝ်းဢမ်ႇမီးဝႂ်ၵပ်းတူဝ် တင်း ၵူၼ်းၸိူဝ်းတေမႃးလႅၵ်ႈလၢႆႈဝႂ်ၵပ်းတူဝ် တေမီးမွၵ်ႈၼိုင်ႈပၢၵ်ႇ (100)။ ၵူၺ်းၵႃႈ ၽိူဝ်ႇမႃးမိူဝ်ႈဝႃးၼႆႉ မီးၸမ်ႁႃႈပၢၵ်ႇ (500) ။ ဢၢၼ်းၵႂႃႇႁဵတ်းပၼ်မိူဝ်ႈဝႃးဝၼ်းလဵဝ်ႁႂ်ႈယဝ်ႉသေတႃႉ ႁဵတ်းဢမ်ႇယဝ်ႉလႆႈ။ တေလႆႈသိုပ်ႇၼွၼ်းထႅင်ႈ 2-3 ၶိုၼ်းသေ ႁဵတ်းပၼ်ၵႂႃႇ။ ၼႂ်းဢိူင်ႇၼွင်ၵေႃႈၼႆႉ ၼႂ်းၵူၼ်းဢၼ်မႃး 500 ပၢႆၼၼ်ႉ ၵူၼ်းၸိူဝ်းပႆႇမီးဝႂ်ၵပ်းတူဝ်ၵူၼ်းမိူင်း မီးဢမ်ႇယွမ်းမွၵ်ႈ 200 - ၵူၼ်းလၢႆးၶႃႈၵေႃႉၼိုင်ႈ လၢတ်ႈၼႄၼင်ႇၼႆ။