ၼေႇပျီႇတေႃႇ တမ်းပႃႊမိတ်ႊ (ဢၼုၺၢတ်ႈ)ပၼ်  ၶွမ်ႊပၼီႊၶဝ် ၶုတ်းတေႃႉတၢင်ႇႁိၼ်ႁႄႈဢွၵ်ႇထႅင်ႈလႄႈ ၵူၼ်းဝၢၼ်ႈၵူၼ်းမိူင်း ၸႄႈဝဵင်းၼမ်ႉၶမ်း ဢမ်ႇႁၢၼ်ႉၸႂ်၊ တေၼႄၵၢင်ၸႂ် တုၵ်းယွၼ်းႁႂ်ႈၵိုတ်းယိုတ်း လွင်ႈတေႃႉႁိၼ်ႁႄႈဢွၵ်ႇၼွၵ်ႈမိူင်း။

ၽိုၼ်လိၵ်ႈပၼ်ပႃႊမိတ်ႊ ၶွင်ၸွမ်ၽွင်းလူင်ၾၢႆႇႁိၼ်ႁႄႈ

ၵဵဝ်ႇၵပ်းလွင်ႈၼႆႉ ယူႇတီႈၼေႇပျီႇတေႃႇ ၽွင်းလူင်ၾၢႆႇႁိၼ်ႁႄႈသေ တမ်းဝၢင်း (License)ပၼ် ၶွမ်ႊပၼီႊၶဝ် တေႃႉႁိၼ်ႁႄႈ (ႁိၼ်ၼေႃႇ)ဢွၵ်ႇၼွၵ်ႈမိူင်း ပိူဝ်ႈတႃႇတေႃႉတၢင်ႇၶဝ်ႈမိူင်းၶႄႇ တႃႇၶၢဝ်းတၢင်း 3 လိူၼ်။ လိၵ်ႈဢၼ်ပၼ်ပႃႊမိတ်ႊ တေႃႉတၢင်ႇႁိၼ်ႁႄႈၼႆႉ တူၵ်းမႃးမိူဝ်ႈဝၼ်းတီႈ 26/01/2015 ၊ ပၼ်တေႃႉတၢင်ႇဢွၵ်ႇႁိၼ်ႁႄႈ တႃႇသွင်မိုၼ်ႇ မႅတ်ႊထိၵ်ႊတၼ်ႊ။ လိၵ်ႈၼႆႉ လူင်းမႃးထိုင်တီႈ ၽူႈၵွၼ်းၸႄႈဝဵင်း၊ ၽူႈၵမ်ႉၵႅမ်ၸွႆႈၵၢၼ် ၽူႈၵွၼ်းၸႄႈဝဵင်း (ဢၼ်ၵူၼ်းမိူင်းၶဝ်ၶွတ်ႇၽွတ်ႈဝႆႉ)၊ ႁွတ်ႈထိုင်ပႃး တီႈၽွင်းတႅၼ်းသၽႃးၵူၼ်းမိူင်း ၸၢႆးတိၼ်ႇဢူး ၶဝ်ၸိူဝ်းၼႆႉ- ၼႆယဝ်ႉ။

ၵပ်းၵၢႆႇလွင်ႈၼႆႉ ၶွမ်ႊပၼီႊ ငူၺ်ႇၵပႃႇၵျေႃႇ ယွၼ်းပႃႊမိတ်ႊဝႆႉ တီႈလူင်ပွင်ၸိုင်ႈ ၸဵမ်မိူဝ်ႈၼႂ်းလိူၼ်ၻီႊသႅမ်ၿိူဝ်ႊ (2014)။ ၽွင်းလူင်ၾၢႆႇႁိၼ်ႁႄႈၶဝ် လႆႈႁဵတ်းပၢင်ၵုမ်သေ ဢၼုၺၢတ်ႈပၼ်၊ ၽွင်းလူင်ၾၢႆႇၵႃႉၶၢႆလႄႈပၢႆးမၢၵ်ႈမီး လႆႈဢွၵ်ႇဝႂ်ပႃႊမိတ်ႊပၼ်။ ၵူၺ်းၵႃႈ ၼႂ်းၶၢဝ်းတၢင်းဢၼ်ဢွၵ်ႇပႃႊမိတ်ႊပၼ် 3 လိူၼ်ၼၼ်ႉ ၶွမ်ႊပၼီႊၶဝ် ဢမ်ႇတၼ်းလႆႈတေႃႉဢွၵ်ႇသေ လႆႈယွၼ်းတေႃႇလၢႆႊသႅၼ်ႊထႅင်ႈၵမ်းၼိုင်ႈ၊ ယူႇတီႈၼေႇပျီႇတေႃႇၵေႃႈ ပၼ်မႃးထႅင်ႈ တေႃႇထိုင်လိူၼ်ၾႅပ်ႊၿိဝ်ႊရီႊ (2015)ၼႆႉ။ ၵဵဝ်ႇၵပ်းလွင်ႈၼႆႉ ႁဵတ်းႁႂ်ႈ ၵူၼ်းဝၢၼ်ႈၵူၼ်းမိူင်း ဢမ်ႇႁၢၼ်ႉၸႂ်သေ တေၼႄၵၢင်ၸႂ်ၵႂႃႇ- ၼႆယဝ်ႉ။

ၽူႈဢွၼ်ႁူဝ်ပိူဝ်ႈတႃႇၼႄၵၢင်ၸႂ် လွင်ႈၶုတ်းတေႃႉသူင်ႇႁိၼ်ႁႄႈ ၸၢႆးသၢမ်မူၼ်ႇ လၢတ်ႈၼႄၸုမ်းၶၢဝ်ႇၽူႈတွႆႇႁွၵ်ႈဝႃႈ-  လႆႈႁၼ်လူတ်ႉၵႃး ဢၼ်လုၵ်ႉတၢင်းမိူင်းၶႄႇ လူင်းမႃးမီးတီႈၼမ်ႉၶမ်းၼႆႉၼမ်တႄႉတႄႉ။ ပေႃးဝႃႈပိူၼ်ႈတမ်းဝၢင်းပၼ် ပႃႊမိတ်ႊတႄႉတႄႉယဝ်ႉ၊  ၶဝ်တေပဵၼ်တေႃႉယူႇတႄႉ ႁဝ်းၶႃႈၵူၼ်းဝၢၼ်ႈၵူၼ်းမိူင်းၵေႃႈတေလႆႈ ၼႄၵၢင်ၸႂ်ၵႂႃႇထႅင်ႈတိၵ်းတိၵ်းယဝ်ႉ။ ၵွပ်ႈဝႃႈ ၶေႃႈပူင်သင်ႇ ၽူႈၵွၼ်းၸႄႈဝဵင်းၼမ်ႉၶမ်း ဢၼ်ဢွၵ်ႇဝႆႉဝႃႈ တေဢမ်ႇလႆႈၶုတ်းတေႃႉႁိၼ်ႁႄႈ၊ တေလႆႈၵိုတ်းယိုတ်းဝႆႉၸူဝ်ႈၵႅပ်ႉၼႆၼၼ်ႉ ယူႇတီႈၾၢႆႇၵွၼ်းၸႄႈဝဵင်း ယင်းပႆႇလႆႈႁုပ်ႈယိုတ်း/ ထွၼ်ၶိုၼ်း၊ ၵွပ်ႈၼၼ် ႁဝ်းတေၼႄၵၢင်ၸႂ်ၵႂႃႇ- ဝႃႈၼႆ။

မိူဝ်ႈပီၵၢႆ ဝၼ်းတီႈ 05/09/2014 ၼၼ်ႉ ၵူၼ်းဝၢၼ်ႈၵူၼ်းမိူင်း ဝဵင်းၼမ်ႉၶမ်း သၢမ်ႁဵင်ပၢႆ ႁူမ်ႈၵၼ်ၼႄၵၢင်ၸႂ်၊ ယွၼ်ႉပိူဝ်ႈၶွမ်ႊပၼီႊၶဝ်မႃးၶုတ်းႁိၼ်ႁႄႈ ပွတ်းႁူဝ်ၼမ်ႉသီးရီး၊ ႁဵတ်းႁႂ်ႈတီႈလိၼ်သူၼ် ႁႆႈ ၼႃး ၵူၼ်းဝၢၼ်ႈၵူၼ်းမိူင်း လူႉၵွႆ၊ မႄႈၼမ်ႉသီးရီးၵေႃႈ လႆႈႁႅင်ႈႁိူတ်ႇ။ လႆႈၼႄၵၢင်ၸႂ် တုၵ်းယွၼ်းတီႈ ၽူႈၵွၼ်းၸႄႈဝဵင်းၼမ်ႉၶမ်း ႁႂ်ႈၵိုတ်းယိုတ်းပၼ်။ မိူဝ်ႈၼၼ်ႉ ၽူႈၵွၼ်းၸႄႈဝဵင်းၵေႃႈ လႆႈဢွၵ်ႇၶေႃႈပူင်သင်ႇဝႃႈ- ႁႂ်ႈၵိုတ်းယိုတ်းလွင်ႈၶုတ်းႁိၼ်ႁႄႈၸူဝ်ႈၵႅပ်ႉ။ တေႃႇထိုင်မိူဝ်ႈလဵဝ်ၵေႃႈ ၶေႃႈပူင်သင်ႇၼႆႉ မၼ်းယင်းပႆႇႁုပ်ႈထွၼ်ၶိုၼ်း - ၼႆယဝ်ႉ။

ၽူႈဢွၼ်ႁူဝ်ၾၢႆႇၼႄၵၢင်ၸႂ် ထႅင်ႈၵေႃႉၼိုင်ႈ ၸၢႆးၵျေႃႇတိၼ်ႉ လၢတ်ႈဝႃႈ- မိူဝ်ႈႁဝ်းၶႃႈ လႆႈႁၼ်လိၵ်ႈလူင်ပွင်ၸိုင်ႈၼေႇပျီႇတေႃႇ ပၼ်ပႃႊမိတ်ႊ (ဢၼုၺၢတ်ႈ) မႃးတီႈၶွမ်ႊပၼီႊၶဝ်ၼၼ်ႉ ႁဝ်းၶႃႈၵေႃႈလႆႈႁူႉဝႃႈ လူင်ပွင်ၸိုင်ႈၼေႇပျီႇတေႃႇၼႆႉ ဢမ်ႇႁၼ်ထိုင်ၵၢင်ၸႂ်ၸဝ်ႈႁႆႈၸဝ်ႈၼႃး ၵူၼ်းဝၢၼ်ႈၵူၼ်းမိူင်းဝဵင်းၼမ်ႉၶမ်း၊ ဢၼ်ၸဝ်ႈႁႆႈၸဝ်ႈၼႃး လႆႈလူႉသုမ်းၸိူဝ်းၼၼ်ႉ ၶဝ်ဢမ်ႇႁၼ်ထိုင်တႄႉတႄႉ။ ၶဝ်ဝႆႉလူမ်လၢမ် မဝ်မၢင်ဝၢင်းႁဵဝ်ႇၼိူဝ်ၵူၼ်းဝၢၼ်ႈၵူၼ်းမိူင်းႁဝ်းတႄႉတႄႉ- ႁဝ်းၶႃႈႁၼ်ထိုင်ၼင်ႇၼႆ- ဝႃႈၼႆ။