ၵူၼ်းဝၢၼ်ႈၵူၼ်းမိူင်း ၸႄႈဝဵင်းၼမ်ႉၶမ်း ၸိုင်ႈတႆးပွတ်းႁွင်ႇ၊ ႁူမ်ႈမိုဝ်းၵၼ် ႁႄႉႁၢမ်ႈလူတ်ႉၵႃး ၸိူဝ်းတေႃႉတၢင်ႇႁိၼ်ႁႄႈ ၼႂ်းၸႄႈဝဵင်းၼမ်ႉၶမ်း တေၶဝ်ႈၶၢႆတေႃႇမိူင်းၶႄႇ။ ထိုင်တူဝ်ၽူႈၵွၼ်းၸႄႈတွၼ်ႈ လႆႈမႃးလၢတ်ႈဝႃႈ ႁဵတ်းသင်ၵေႃႈ ႁႂ်ႈလႆႈၵၢင်ၸႂ်ၵူၼ်းမိူင်း။

ဝၼ်းတီႈ 26/02/2015 (မိူဝ်ႈဝႃး) ယၢမ်းဝၢႆးဝၼ်း 3 မူင်းၶိုင်ႈ၊ ၵူၼ်းမိူင်းၼမ်ႉၶမ်း ႁူမ်ႈမိုဝ်းၵၼ်သေ လႆႈၵႂႃႇႁႄႉႁၢမ်ႈ တီႉၺွပ်းလူတ်ႉၵႃးတၢင်ႇႁိၼ်ႁႄႈ၊ ဢၼ်တၢင်ႇႁိၼ်ႁႄႈယဝ်ႉသေ တေတေႃႉတၢင်ႇ ၵႂႃႇၶၢႆမိူင်းၶႄႇ။ လူတ်ႉၵႃးၸိူဝ်းၼႆႉ ပဵၼ်လူတ်ႉၵႃး ၶွမ်ႊပၼီႊၶုတ်းႁိၼ်ႁႄႈ ငူၺ်ႇၵပႃႇၵျေႃႇ၊ လူတ်ႉၵႃးၶွမ်ႊပၼီႊတၢင်ႇဢၼ် ဢၼ်ၶဝ်ၶၢတ်ႈဝႆႉ လူတ်ႉၵႃးၵူၼ်းမိူင်းၽွင်ႈ။ ၵူၼ်းမိူင်းၼမ်ႉၶမ်း လႆႈၵႂႃႇႁႄႉႁၢမ်ႈ ၽွင်းလူတ်ႉၵႃးတၢင်ႇႁိၼ်ႁႄႈၶဝ် လုၵ်ႉတီႈဝၢၼ်ႈႁူၺ်ႈဢူဝ်ႈသေ ဢၢင်ႈတေၵႂႃႇမိူင်းၶႄႇၼၼ်ႉ- ႁူဝ်ပဝ်ႈပႃႊတီႊႁူဝ်သိူဝ် (SNLD) ဝဵင်းၼမ်ႉၶမ်း ၸၢႆးလိူၼ်မျၢတ်ႈ လၢတ်ႈ။

ၸၢႆးလိူၼ်မျၢတ်ႈ သိုပ်ႇလၢတ်ႈဝႃႈ- “ယွၼ်ႉပိူဝ်ႈႁဝ်းၶႃႈႁၼ်လူတ်ႉၵႃး တေၵႂႃႇတၢင်ႇႁိၼ်ႁႄႈလႄႈ မိူဝ်ႈသိုၼ်းၼႆႉ ႁဝ်းၶႃႈလႆႈၵႂႃႇႁူပ်ႉထူပ်း ၽူႈၵွၼ်းၸႄႈဝဵင်း။ ယွၼ်ႉပိူဝ်ႈ ဢမ်ႇၶႂ်ႈႁႂ်ႈၵူၼ်းမိူင်းၼင်ႇၵၼ် မႃးႁၢမ်ႈႁႄႉ မီးပၼ်ႁႃၵၼ်လႄႈ ႁဝ်းၶႃႈၸင်ႇလႆႈၵႂႃႇတၢင်ႇလၢတ်ႈဝႆႉ ၸဵမ်မိူဝ်ႈသိုၼ်းပုၼ်ႉ၊ ႁႂ်ႈၸွႆႈႁၢမ်ႈႁႄႉပၼ်။ ၵူၺ်းၵႃႈ ၾၢႆႇၽူႈၵွၼ်းၸႄႈဝဵင်းၶဝ်သမ်ႉ ဢမ်ႇတူင်ႉၼိုင် ဢမ်ႇလူင်းမိုဝ်းႁဵတ်းၵၢၼ်သင်လႄႈ ၸင်ႇလႆႈမႃးပဵၼ်ပၼ်ႁႃၸိူင်ႉၼႆ- ဝႃႈၼႆ။

ၽိူဝ်ႇထိုင်ပဵၼ်ပၼ်ႁႃၵၼ်ယဝ်ႉ ၽူႈၵွၼ်းတပ်ႉပလိၵ်ႈ ၸႄႈဝဵင်းၼမ်ႉၶမ်းၵေႃႈ လႆႈတိတ်းတေႃႇတၢင်းၾူၼ်ႊ လၢတ်ႈမႃးတီႈၸုမ်း ၾၢႆႇၵမ်ႉၵႅမ် ၾၢႆႇၵွၼ်းၸႄႈဝဵင်းဝႃႈ- ဝၢႆးလင်သူၸဝ်ႈမႃးပၼ်ၶၢဝ်ႇယဝ်ႉ ၸုမ်းပလိၵ်ႈႁဝ်းၵေႃႈလႆႈ ၵႂႃႇပႂ်ႉႁၢမ်ႈႁႄႉၶဝ် ၽွင်းၶဝ်ၵႂႃႇတၢင်ႇႁိၼ်ႁႄႈသေ ပွၵ်ႈမႃးၶိုၼ်းတီႈဝၢၼ်ႈၵွင်းၵၢတ်ႇ။ ၵူၼ်းၵႃႈ ႁဝ်းလၢတ်ႈသင်ၵေႃႈ ၶဝ်ဢမ်ႇထွမ်ႇၵႂၢမ်းႁဝ်းၶႃႈ၊ ယွၼ်ႉပိူဝ်ႈၶဝ်ပဵၼ်တပ်ႉပီႇတုၸိတ်ႉ KDA ၵွင်းၶႃး၊ ယိပ်းတင်းၵွင်ႈၵၢင်ႇသေလူင်းမႃးလႄႈ ႁဝ်းယင်းလႆႈထဵင်ၵၼ် မေႃးၵၼ်ယူႇ။ ၶဝ်ဢမ်ႇထွမ်ႇၵႂၢမ်းႁဝ်း ၵူၺ်းပႆႇပေႃး ယင်းသိုပ်ႇတေႃႉတၢင်ႇႁိၼ်ႁႄႈမႃးထႅင်ႈလႄႈ ၸင်ႇလႆႈပဵၼ်ပၼ်ႁႃ- ဝႃႈၼႆ။

လွင်ႈဢၼ်ၾၢႆႇၵူၼ်းမိူင်းႁူမ်ႈမိုဝ်းၵၼ်ႁႄႉႁၢမ်ႈၼႆႉ ပေႃးဝႃႈလႆႈငိၼ်းၶၢဝ်ႇလူတ်ႉၵႃးတေႃႉတၢင်ႇႁိၼ်ႁႄႈ တေမႃးၵေႃႈ မီးၵူၼ်းမိူင်းမွၵ်ႈ 300 ဢဝ်မႆႉၸလွမ်း မႆႉပူၵ်ႇၸိူဝ်းၼႆႉပိၵ်ႉဢိုတ်း တတ်းတၢင်းပႅတ်ႈ။ ပိၵ်ႉဢိုတ်းပႅတ်ႈသဵၼ်ႈတၢင်း တင်ႈတႄႇဝၢႆးဝၼ်းယၢမ်း 3 မူင်းၶိုင်ႈတေႃႇထိုင်မွၵ်ႈ 5 မူင်း။ ပဵၼ်ပၼ်ႁႃၵၼ် ငႃၵၼ် လႃႇၵၼ်ယူႇၸိူင်ႉၼၼ်  တေႃႇပေႃးထိုင်တူဝ်ၽူႈၵွၼ်းၸႄႈတွၼ်ႈ တင်း ၽူႈၵွၼ်းၸႄႈဝဵင်း ၽႅဝ်မႃးတီႈပဵၼ်ပၼ်ႁႃ ပၢင်ႁၢမ်ႈႁႄႉၵၼ်ၼၼ်ႉသေ မႃးဢုပ်ႇလၢတ်ႈၵၼ်လီလီယဝ်ႉ ပၼ်ႁႃၼႆႉၸင်ႇၵွႆႈၵတ်းယဵၼ်ၵႂႃႇ- ၽူႈၼမ်းၼႂ်း ပႃႊတီႊသိူဝ်ၽိူၵ်ႇ ဝဵင်းၼမ်ႉၶမ်း ၸၢႆးထုၼ်းလႃႉ လၢတ်ႈ။

ၸၢႆးထုၼ်းလႃႉ သိုပ်ႇလၢတ်ႈဝႃႈ- ၽူႈၵွၼ်းၸႄႈတွၼ်ႈလၢတ်ႈတီႈ ဢူးဢွင်ႇဝိၼ်းၵူဝ်ႇ ဢၼ်ပဵၼ်ၽူႈႁပ်ႉပုၼ်ႈၽွၼ်း ၾၢႆႇၶွမ်ႊပၼီႊငူၺ်ႇၵပႃႇၵျေႃႇဝႃႈ- ပေႃးဢမ်ႇလႆႈဢုပ်ႇၵုမ် တင်းပေႃႈမႄႈပီႈၼွင်ႉၵူၼ်းမိူင်းၼႆႉ ယႃႇပေႁဵတ်းသင်၊ တေႁဵတ်းသင်ၵေႃႈ ႁႂ်ႈဢုပ်ႇၵၼ်တင်းၵူၼ်းမိူင်း၊ လႆႈၸႂ်တီႈၵူၼ်းမိူင်းၵွၼ်ႇ သူၸင်ႇတေႁဵတ်းၵၢၼ်ငၢႆႈ။ ပေႃးသူၶႂ်ႈႁဵတ်းၵၢၼ်ငၢႆႈ ၶုတ်းႁႄႈငၢႆႈၵေႃႈ ဢၼ်ပဵၼ်မႄႈၼမ်ႉသီးရီး ဢၼ်ၵူၼ်းမိူင်းလႆႈပိုင်ႈဢိင် ၸႂ်ႉတိုဝ်း တႃႇၽုၵ်ႇသွမ်ႈ၊ ဢၼ်မီးၾၢႆႇဢွၵ်ႇ ဝဵင်းၼမ်ႉၶမ်းၼၼ်ႉၵေႃႈ ဢၼ်လူႉလႅဝ် ဢၼ်ႁႅင်ႈၵႂႃႇၸိူဝ်းၼႆႉ ႁႂ်ႈမူၼ်ႉမႄးပၼ်ၶိုၼ်း- လႆႈလၢတ်ႈတီႈၶွမ်ႊပၼီႊ ၼင်ႇၼႆ။

လွင်ႈၶွမ်ႊပၼီႊငူၺ်ႇၵပႃႇၵျေႃႇ လႆႈယွၼ်းပႃႊမိတ်ႊ (ဢၼုၺၢတ်ႈ)သေ ၶုတ်းႁိၼ်ႁႄႈၶိုၼ်းပွၵ်ႈၵမ်းၼႆႉ ၾၢႆႇပႃႊတီႊသိူဝ်ၽိူၵ်ႇ လၢတ်ႈဝႃႈ- လွင်ႈၼႆႉ ယူႇတီႈလူင်ပွင်ၸိုင်ႈမိူင်းတႆး၊ ဢၼ်ပဵၼ်ၽွင်းလူင်ၾၢႆႇႁိၼ်ႁႄႈ ႁူဝ်ပဝ်ႈပႃႊတီႊသိူဝ်ၽိူၵ်ႇ (SNDP) လုင်းၸၢႆးဢၢႆႈပဝ်း လၢတ်ႈဝႃႈမၼ်းၸဝ်ႈဢမ်ႇလႆႈႁူႉၸွမ်း - ၼႆယဝ်ႉ။

ဢၼ်ၶုတ်းႁိၼ်ႁႄႈယူႇ တီႈၼႂ်းၸႄႈဝဵင်းၼမ်ႉၶမ်းၼႆႉ ၶွမ်ႊပၼီႊဢၼ်ယႂ်ႇလူင် မီးၶွမ်ႊပၼီႊငူၺ်ႇၵပႃႇၵျေႃႇ၊ ၸဵင်ႇပတေႇတႃႇ၊ မျၢၼ်ႇမႃႉမျႃးဢူး၊ GSM ၸိူဝ်းၼႆႉ။ လိူဝ်သေၼၼ်ႉ မီးၶွမ်ႊပၼီႊတၢင်ႇဢၼ်ထႅင်ႈ လၢႆလၢႆဢၼ် ဢၼ်ၵူၼ်းမိူင်းၶႄႇၶဝ် မႃးၶဝ်ႈႁုၼ်ႈ (Share) ၸွမ်း- ၼႆယဝ်ႉ။