ၽူႈၵွၼ်းတိူင်းသိုၵ်းသၢမ်ၸဵင်ႇ (ၵဵင်းတုင်) လၢတ်ႈ တီႈမိူင်းယၢင်းဝႃႈ ဢမ်ႇဝၼ်းၼိုင်ႈၵေႃႈဝၼ်းၼိုင်ႈ တၵ်းတေလႆႈယိုဝ်းၵၼ်တင်း သိုၵ်းၸၢဝ်းၶိူဝ်း၊ မိူၼ်ၼင်ႇၸုမ်းသိုၵ်းဝႃႉ၊ ၸုမ်းမိူင်းလႃး တင်းၸုမ်း RCSS/SSA ။

တပ်ႉသိုၵ်းမိူင်းလႃး တပ်ႉသိုၵ်းဝႃႉ တင်း တပ်ႉသိုၵ်းၸိုင်ႈတႆး

ပူၼ်ႉမႃးမိူဝ်ႈဝၼ်းတီႈ 15/02/2015 ၊ တင်ႈတႄႇဝၢႆးဝၼ်း ယၢမ်း 13:00-14:00 မူင်း၊ ၽူႈၵွၼ်းတိူင်းသိုၵ်း သၢမ်ၸဵင်ႇ (ၵဵင်းတုင်) ၸွမ်သိုၵ်းမျၢတ်ႉထုၼ်းဢူး လႆႈႁူပ်ႉထူပ်းၵၼ်တင်း ၶႃႈႁၢပ်ႇၵၢၼ်ၶုၼ်မၢၼ်ႈ တီႈဝဵင်းမိူင်းယၢင်း ၸႄႈတွၼ်ႈၵဵင်းတုင် ၸိုင်ႈတႆးပွတ်းဢွၵ်ႇ (ယၢၼ်ၾၢႆႇႁွင်ႇဝဵင်းၵဵင်းတုင် မွၵ်ႈ 100 ၵီႊလူဝ်ႊ)။ တီႈပၢင်ႁူပ်ႉထူပ်းၼၼ်ႉ ဢွၼ်တၢင်းသုတ်း မီးၵၢၼ်သိုပ်ႇမိုတ်ႈၵိုဝ်းႁူႉၸၵ်းၵၼ်။ ၸွမ်သိုၵ်းမျၢတ်ႉထုၼ်းဢူးၵေႃႈ ၵပ်းသိုပ်ႇၼႄႉၼမ်းတူဝ်မၼ်း- ၼႆယဝ်ႉ။

ဝၢႆးၼႄႉၼမ်းတူဝ်ယဝ်ႉ မျၢတ်ႉထုၼ်းဢူး လၢတ်ႈပႃးဝႃႈ- ၸုမ်းၸၢဝ်းၶိူဝ်းၶဝ် မိူၼ်ၼင်ႇၸုမ်းသိုၵ်းဝႃႉ၊ ၸုမ်းမိူင်းလႃး လႄႈ တပ်ႉသိုၵ်းၸိုင်ႈတႆး (RCSS/SSA) ၶဝ်ၸိူဝ်းၼႆႉ ပေႃးၶဝ်တိုၵ်ႉယိပ်းၵွင်ႈၵၢင်ႇယူႇတႄႉ ဢမ်ႇဝၼ်းၼိုင်ႈၵေႃႈဝၼ်းၼိုင်ႈ တၵ်းတေလႆႈတေႃႇၼႃႈ ပိုတ်းယိုဝ်းၵၼ်၊ တေလႆႈၽဵဝ်ႈလၢင်ႉၶဝ်- ဝႃႈၼႆ။

ၶႃႈႁၢပ်ႇၵၢၼ်ၶုၼ်ၵေႃႉၼိုင်ႈ ဢမ်ႇၶႂ်ႈဢွၵ်ႇၸိုဝ်ႈလၢတ်ႈဝႃႈ- ၸွမ်သိုၵ်းမျၢတ်ႉထုၼ်းဢူး လၢတ်ႈပႃးဝႃႈ- တပ်ႉသိုၵ်းမိူင်းလႃးၼႆႉၵေႃႈ ၵမ်ႉယၼ်ပၼ်ႁႅင်းၽိူင်ၵျႃးသိူင်း။ တပ်ႉသိုၵ်းၸၢဝ်းၶိူဝ်း ဢၼ်ၵမ်ႉထႅမ် ၽိူင်ၵျႃးသိူင်းယူႇၼႆႉ ဢဵၼ်ႁႅင်းၶဝ်ၵေႃႈ မီးမွၵ်ႈတပ်ႉၸုမ်းဢၼ်ၼိုင်ႈၵူၺ်း၊ ၸၼ်ႉၶဝ်ၵေႃႈမီးမွၵ်ႈ ၽူႈၵွၼ်းတပ်ႉၸုမ်းလူင် (တပ်ႉမ) ဢၼ်ၼိုင်ႈၵူၺ်း၊ ယင်းၵႂႃႇၵမ်ႉထႅမ်ပၼ်ႁႅင်း ၽူႈႁၢႆႉၵူၼ်းၸူၼ် ဢၼ်ပဵၼ်ၸုမ်းၵူဝ်းၵၢင်ႉၼၼ်ႉယူႇ- ဝႃႈၼႆ။

ၸုမ်းဝႃႉ၊ ၸုမ်းမိူင်းလႃး၊ ၸုမ်းၵူဝ်းၵၢင်ႉၸိူဝ်းၼႆႉ ၶဝ်ပဵၼ်ၵူၼ်းသိုၵ်းၶွမ်ႊမိဝ်ႊၼိတ်ႊ ဢၼ်ၵိုတ်းဝႆႉၼၼ်ႉၵူၺ်း၊ ပဵၼ်ၸုမ်းဢၼ်ၵႃႉၶၢႆယႃႈမဝ်းၵမ်။ ၼႂ်းၸိုင်ႈမိူင်းၼိုင်ႈလုၵ်ႈၼႆႉ တၵ်းတေလႆႈမီးတပ်ႉသိုၵ်းၼိုင်ႈဢၼ်၊ ၽူႈၽွင်းငမ်းဝၢၼ်ႈမိူင်း လူင်ပွင်ၸိုင်ႈၵေႃႈ တိုၼ်းတေလႆႈမီးၼိုင်ႈဢၼ်ၵူၺ်း။

ၽိူင်ၵျႃးသိူင်းၼႆႉ မၼ်းမႃးယူႇၸွမ်းလုၵ်ႈၶူၺ်မၼ်း ၸၢႆးလိုၼ်းၼႆၵေႃႈ ၽႂ်ၽႂ်ၵေႃႈႁူႉ၊ ႁဝ်းၵေႃႈႁူႉ။ မိူၼ်ၼင်ႇတပ်ႉၸုမ်းဝႃႉၵေႃႈမိူၼ်ၵၼ်၊ ၶဝ်ၵေႃႈပဵၼ်ၵူၼ်းၶွမ်ႊမိဝ်ႊၼိတ်ႊၵူၺ်း၊ မႃးယူႇတၢင်းမိူင်းၽႅၼ် မိူင်းပွၵ်ႉ တၢင်းပၢင်သၢင်းၼႆႉသေ ႁဵတ်းဢွၵ်ႇယႃႈမဝ်းၵမ် သူင်ႇၶဝ်ႈၶၢႆၼႂ်းမိူင်းထႆး မိူင်းၶႄႇ မိူင်းမၢၼ်ႈ။ မိူဝ်ႈပူၼ်ႉမႃးဢမ်ႇႁိုင်သင်ၼႆႉၵေႃႈ ယင်းတီႉလႆႈၽူႈၵွၼ်းတပ်ႉဝႃႉၵေႃႉၼိုင်ႈ ပႃးတင်းယႃႈမဝ်းၵမ် ယႃႈၶၢဝ် ယႃႈၾိၼ်ႇၽိူၵ်ႇ တီႈမိူင်းၽျၢၵ်ႈ၊ တေဢဝ်ၵႂႃႇၶၢႆတီႈလႂ်ဢမ်ႇႁူႉ။ လွင်ႈၼႆႉၵေႃႈႁဝ်းႁူႉၸွမ်းၵူႈလွင်ႈ- ၽူႈၵွၼ်းတိူင်းသၢမ်ၸဵင်ႇ လၢတ်ႈတီႈၶႃႈႁၢပ်ႇၵၢၼ်ၶုၼ်ၶဝ် ၼင်ႇၼႆ။

လိူဝ်သေၼၼ်ႉ မၼ်းလၢတ်ႈၵဵဝ်ႇၵပ်း တပ်ႉသိုၵ်းၸိုင်ႈတႆး ထႅင်ႈဝႃႈ RCSS ဢၼ်ဝႃႈၼႆႉ ထွမ်ႇတူၺ်းၸိုဝ်ႈ မၼ်းၵေႃႈဝႃႈ ၶွင်ႊသီႊဢဝ်ၶိုၼ်းၸိုင်ႈတႆး။ တေၵႂႃႇဢဝ်ၶိုၼ်းဢီသင်၊ တေၵႂႃႇပူၵ်းပွင်ဢီသင်၊ ၸိုင်ႈမိူင်းၼိုင်ႈဢၼ်ၼႆႉ တေလႆႈမီးတပ်ႉသိုၵ်းၼိုင်ႈဢၼ်၊ တေလႆႈမီးလူင်ပွင်ၸိုင်ႈၼိုင်ႈဢၼ်ၵူၺ်းၼႆ ၶဝ်တေလႆႈႁူႉ။ မိူဝ်းၼႃႈၼႆႉ ပေႃးဝႃႈတေသိုပ်ႇၵႂႃႇႁဵတ်းၼႆတိၵ်းတိၵ်း၊ တေပွႆႇၶဝ်ဝႆႉႁဵတ်းၼႆတိၵ်းတိၵ်းတႄႉ ဢမ်ႇလႆႈ၊ တိုၼ်းတေလႆႈတေႃႇၼႃႈၵၼ် ပိုတ်းယိုဝ်းၵၼ်၊ တိုၼ်းတေလႆႈပဵၼ်ပၼ်ႁႃၵၼ်တိၵ်းတိၵ်းယဝ်ႉ၊ ၵွပ်ႈၼႆ တိုၼ်းတေလႆႈမီးၽႅၼ်ၵၢၼ် တႃႇတေၽဵဝ်ႈလၢင်ႉပႅတ်ႈၸၢဝ်းၶိူဝ်းၶဝ် ဢမ်ႇႁၢင်ႉယဝ်ႉ- ဝႃႈၼႆ။

လိူဝ်သေၼၼ်ႉ ၸွမ်သိုၵ်းမျၢတ်ႉထုၼ်းဢူး လၢတ်ႈၼႄထႅင်ႈဝႃႈ- တူဝ်မၼ်းၼႆႉ လႆႈႁၢပ်ႇပုၼ်ႈၽွၼ်း ၼႂ်းသိုၵ်းမႃး တီႈမိူင်းတႆးၼႆႉ လႆႈသိပ်းပီပၢႆယဝ်ႉ၊ မိူဝ်ႈမၼ်းပႆႇႁွတ်ႈထိုင်တီႈ ၸိုင်ႈတႆးပွတ်းဢွၵ်ႇၼႆႉၵေႃႈ မၼ်းလႆႈယူႇတီႈ ငဝ်ႈငုၼ်းၵုမ်းၵၢၼ်ၽႅၼ်ၵၢၼ်ယၼ်ႇသိုၵ်း (ၸၵၶ) 16 သႅၼ်ဝီ 2 ပီ၊ မႃးယူႇတီႈ ၸၵၶ 18 မိူင်းၽျၢၵ်ႈ 3-4 ပီ၊ သမ်ႉမႃးႁၢပ်ႇၵၢၼ်တီႈ တိူင်းသိုၵ်းသၢမ်ၸဵင်ႇၵဵင်းတုင်ၼႆႉ လႆႈ4 ပီပၢႆယဝ်ႉ- ၼႄႉၼမ်းတူဝ်မၼ်း ၼင်ႇၼႆ။