ပႃႊတီႊမႂ်ႇသုင်ၸိုင်ႈတႆး (SSPP/SSA) တုၵ်းယွၼ်း ထိုင်ၸွမ်ၸိုင်ႈတဵင်းၸဵင်ႇဝႃႈ ဢၼ်ယူႇတီႈ လူင်ပွင်ၸိုင်ႈ ၸီႉၼႄးၵၢဝ်ႇႁႃဝႃႈ SSPP/SSA ၶဝ်ႈပႃးၼႂ်းပၢင်တိုၵ်းသိုၵ်းသိူဝ် ဢၼ်ပဵၼ်ယူႇၼႂ်း ၼႃႈလိၼ်ၵူဝ်းၵၢင်ႉ ၸိုင်ႈတႆးပွတ်းႁွင်ႇၼၼ်ႉ ၵွပ်ႈဢမ်ႇထုၵ်ႇမႅၼ်ႈလႄႈ ႁႂ်ႈလူင်ပွင်ၸိုင်ႈ ႁုပ်ႈယိုတ်း/ ထွၼ်ပၼ်ၶိုၼ်းၶေႃႈၵႂၢမ်း ဢၼ်ၸီႉၼႄးၵၢဝ်ႇႁႃၼႆႉ။

ၽိုၼ်လိၵ်ႈတုၵ်းယွၼ်း ႁႂ်ႈႁုပ်ႈယိုတ်းထွၼ်ပၼ်ၶိုၼ်းၶေႃႈၵႂၢမ်း ၸီႉၼႄးၵၢဝ်ႇႁႃၼႆႉ ယိုၼ်ႈၸူး ၸွမ်ၸိုင်ႈတဵင်းၸဵင်ႇ မိူဝ်ႈဝၼ်းတီႈ 23/02/2015 ၊ တင်းမူတ်းတုၵ်းယွၼ်း 5 ၶေႃႈ။ ၼႂ်းလိၵ်ႈၼၼ်ႉပႃးဝႃႈ- ယူႇတီႈ ပႃႊတီႊမႂ်ႇသုင်ၸိုင်ႈတႆး/ တပ်ႉသိုၵ်းၸိုင်ႈတႆး (SSPP/SSA) သေ ဢမ်ႇလႆႈပႃးၼႂ်းပၢင်တိုၵ်း ဢၼ်ပဵၼ်ၼႂ်းၼႃႈလိၼ်ၵူဝ်းၵၢင်ႉ၊ ယူႇတီႈ SSPP/SSA ၶႂ်ႈတိုၵ်းယွၼ်းႁႂ်ႈဢဝ်ၵၢၼ်မိူင်း ၵႄႈလိတ်ႈပၼ်ႁႃ ၵၢၼ်မိူင်း၊ ယႃႇဢဝ်လၢႆးသိုၵ်းသေ ၵႄႈလိတ်ႈပၼ်ႁႃၵၢၼ်မိူင်း။

ၼွၵ်ႈသေၼၼ်ႉ တုၵ်းယွၼ်းထႅင်ႈၶေႃႈၼိုင်ႈဝႃႈ ၵေႃႉၼိုင်ႈလႄႈၵေႃႉၼိုင်ႈ၊ ၸုမ်းၼိုင်ႈလႄႈၸုမ်းၼိုင်ႈ ႁႂ်ႈဝႆႉၵႃႈၶၼ် ၼပ်ႉယမ်ၵၼ်သေ ပၼ်တိုဝ်ႉတၢင်းၵၢၼ်တေႃႇၼႃႈၵၼ် ပိူဝ်ႈတႃႇဢုပ်ႇဢူဝ်းၵႄႈလိတ်ႈပၼ်ႁႃ ၵၢၼ်မိူင်း၊ လွင်ႈၼႆႉ ပဵၼ်လၢႆးၵႄႈလိတ်ႈပၼ်ႁႃဢၼ်လီသုတ်း- ၼႆယဝ်ႉ။

ၸဝ်ႈၶုၼ်သႅင် ၽူႈၼမ်းၼႂ်းၵူႈလွင်ႈလွင်ႈ SSPP

ၸဝ်ႈၶုၼ်သႅင် ၽူႈၼမ်းၼႂ်းၵူႈလွင်ႈလွင်ႈ SSPP လၢတ်ႈဝႃႈ- ၼင်ႇႁိုဝ်ၶေႃႈတူၵ်းလူင်းၵိၼ်ၵႅၼ်ႇၵိုတ်းယိုဝ်းၵၼ် ၼႂ်းၵႄႈႁဝ်းၶႃႈ တင်းလူင်ပွင်ၸိုင်ႈ တေဢမ်ႇလူႉလႅဝ်ၼႆႉ ႁဝ်းၶႃႈၵေႃႈၶတ်းၸႂ်ႁၵ်ႉသႃပႂ်ႉပႃးမႃး လီလီငၢမ်းငၢမ်း၊ ႁဝ်းၶႃႈမုင်ႈမွင်းဝႆႉ ႁႂ်ႈလႆႈတေႃႇၼႃႈၵၼ်သေ ဢုပ်ႇၵုမ်ၵၢၼ်မိူင်းၵႂႃႇ ၵတ်းၵတ်းယဵၼ်ယဵၼ်ၼၼ်ႉၵူၺ်း။

ၵွပ်ႈၼႆ ဢၼ်ၾၢႆႇလူင်ပွင်ၸိုင်ႈ ၸီႉၼႄးႁဝ်းၶႃႈဝႃႈ ၶဝ်ႈပႃးၵဵဝ်ႇၶွင်ႈၼႂ်းပၢင်တိုၵ်းၵူဝ်းၵၢင်ႉၼႆႉ မၼ်းဢမ်ႇထုၵ်ႇမႅၼ်ႈ။ မိူၼ်ၼင်ႇငဝ်းလၢႆးမိူဝ်ႈလဵဝ်ၼႆႉ တပ်ႉႁဝ်းၶႃႈၶႅၼ်းလႆႈဝႆႉသတိ/ ၾၢင်ႉၵႅမ်း ယႂ်ႇၼမ်၊ ၼင်ႇႁိုဝ်တေဢမ်ႇမီး လွင်ႈမူၵ်းယိုဝ်းတပ်ႉသိုၵ်းလူင်ပွင်ၸိုင်ႈၸိူဝ်းၼႆႉ ႁဝ်းၶႃႈၵေႃႈလႆႈၵုမ်းၼႅၼ်ႈၼႃဝႆႉ ၼႂ်းတပ်ႉသိုၵ်းႁဝ်း။ ၵွပ်ႈၼၼ်လႄႈ ႁႂ်ႈလူင်ပွင်ၸိုင်ႈ ထွၼ်ပၼ်ၶိုၼ်းၶေႃႈၵႂၢမ်း ဢၼ်ၸီႉၼႄးႁဝ်းၶႃႈၼၼ်ႉ- လၢတ်ႈၼႄၸုမ်းၶၢဝ်ႇၽူႈတွႆႇႁွၵ်ႈ ၼင်ႇၼႆ။

ပူၼ်ႉမႃးမိူဝ်ႈဝၼ်းတီႈ 21/02/2015  လူင်ပွင်ၸိုင်ႈမၢၼ်ႈ ႁဵတ်းပၢင်သပ်းၸႅင်ႈၶၢဝ်ႇ တီႈၼေႇပျီႇတေႃႇ၊ လႆႈလၢတ်ႈပႃးဝႃႈ တီႈပၢင်တိုၵ်း ၼႂ်းၼႃႈလိၼ်ၵူဝ်းၵၢင်ႉၼၼ်ႉ တပ်ႉသိုၵ်းၶၢင် KIA ၊ တပ်ႉသိုၵ်းၸိုင်ႈတႆး SSPP/SSA ၊ တပ်ႉသိုၵ်းမိူင်းလႃး NDAA-ESS ၊ တပ်ႉသိုၵ်းမိူင်းဝႃႉၽွမ်ႉႁူမ်ႈ UWSA လႄႈ တပ်ႉသိုၵ်းတဢၢင်း TNLA ၸိူဝ်းၼႆႉ ၶဝ်ႈပႃးၵဵဝ်ႇၶွင်ႈဝႆႉ- ဝႃႈၼႆ။

ဢၼ်လူင်ပွင်ၸိုင်ႈၸီႉၼႄးဝႃႈ ပၼ်ႁႃၵူဝ်းၵၢင်ႉၼႆႉ မၼ်းတုမ်ႉတိူဝ်ႉဢမ်းၼၢတ်ႈ (ဢႃႇၼႃႇ) ၽွင်းငမ်းဝၢၼ်ႈမိူင်း ၸိူဝ်းၼၼ်ႉလႄႈသင်၊ ပိုၼ်ၽၢဝ်ႇႁႂ်ႈတပ်ႉသိုၵ်းမႃးၽွင်းငမ်း ၼႃႈလိၼ်ၵူဝ်းၵၢင်ႉ ၸိူဝ်းၼၼ်ႉလႄႈသင်၊ ဢၼ်ပဵၼ်ပၼ်ႁႃလုၵ်ႈႁဵၼ်းၶဝ် ၼႄၵၢင်ၸႂ်ယူႇမိူင်းမၢၼ်ႈပတ်းပိုၼ်ႉ ၸိူဝ်းၼၼ်ႉ လႄႈသင်၊ ဢၼ်ပဵၼ်ပၼ်ႁႃ လိၼ်သူၼ်ႁႆႈၼႃးၵူၼ်းမိူင်းၸိူဝ်းၼၼ်ႉလႄႈသင်၊ သမ်ႉပဵၼ်ပၼ်ႁႃ ၶုတ်းႁႄႈၶုတ်းၶမ်း တီႈလႅတ်ႉပတွင်း မိူင်းမၢၼ်ႈၸိူဝ်းၼၼ်ႉလႄႈသင်၊ ယွၼ်ႉပိူဝ်ႈပၼ်ႁႃၸိူဝ်းၼၼ်ႉ ယႂ်ႇတိူဝ်းၶိုၼ်ႈမႃးတိၵ်းတိၵ်းလႄႈ ၶႂ်ႈႁႂ်ႈပၢႆးၸႂ် (ဢရူမ်) ၵူၼ်းမိူင်းလႅၵ်ႈလၢႆႈသေ လႆႈသၢင်ႈၶိုၼ်ႈမႃးၵူၺ်း- ၸဝ်ႈၶုၼ်သႅင် လၢတ်ႈၼႄတၢင်းႁၼ်ထိုင် ၼင်ႇၼႆ။