ဢိင်ၼိူဝ်ၾူၼ်တူၵ်းႁႃႇယႂ်ႇ မုင်ႈတူၺ်းသဵၼ်ႈတၢင်း ဢမ်ႇႁၼ်လီသေ ရူတ်ႉၵႃးၵူၼ်းႁဵတ်းၵၢၼ်ၵေႃႇသၢင်ႈ ၸၢဝ်းတႆး ၶၢမ်ႈတၢင်းရူတ်ႉၾႆး၊ ထုၵ်ႇရူတ်ႉၾႆးၽႃႇၺႃး တၢႆတင်းမူတ်း 8 ၵေႃႉ။

Photo: manager online

ဝၼ်းတီႈ 24/03/2015 ယၢမ်းႁူဝ်ၶမ်ႈ ၵိူတ်ႇၽေးဢုပၢတ်ႈ လူတ်ႉၾႆးၽႃႇၺႃးသႂ်ႇ ရူတ်ႉၵႃးသီႇလေႃႉ ၶွင်ၵူၼ်းႁဵတ်းၵၢၼ်ၵေႃႇသၢင်ႈ တီႈသဵၼ်ႈတၢင်းၶၢမ်ႈတၢင်းရူတ်ႉၾႆး ႁိမ်းလင်ႁူင်းယႃ သႃရၽီး ၸႄႈဝဵင်းသႃရၽီး ၸႄႈတွၼ်ႈၵဵင်းမႆႇ၊ ႁဵတ်းႁႂ်ႈမီးၵူၼ်းတၢႆတင်းမူတ်း 8 ၵေႃႉ။ ၵူၼ်းၸိူဝ်းၼႆႉ ပဵၼ်တႆး၊ ႁဵတ်းၵၢၼ်ယဝ်ႉသေ ၶီႇရူတ်ႉၵႃးပွၵ်ႈမိူဝ်းတီႈလိုဝ်ႈသဝ်း ၵူၼ်းႁဵတ်းၵၢၼ်- ၼႆယဝ်ႉ။

သိုဝ်ႇထႆးဢွၵ်ႇဝႃႈ ၽွင်းပွၵ်ႈၸွမ်းတၢင်းၼၼ်ႉ ၾူၼ်လူင်လူမ်းလူင်ႁႅင်းသေ တူၺ်းၵႂႃႇတၢင်းၼႃႈ လႅပ်ႈဢမ်ႇႁၼ်သဵၼ်ႈတၢင်းလီလႄႈ ပေႃးၶၢမ်ႈတၢင်းရူတ်ႉၾႆးၵေႃႈ ထုၵ်ႇရူတ်ႉၾႆး သၢႆၵဵင်းမႆႇ- ၵုင်းထဵပ်ႈ မႃးၽႃႇသႂ်ႇ၊ ႁဵတ်းႁႂ်ႈတၢႆထင်တီႈ 7 ၵေႃႉ၊ ပဵၼ်ၸၢႆး 6 ၵေႃႉ ၼၢင်းယိင်း 1 ၵေႃႉ။ တႃႇၵေႃႉၼိုင်ႈ ဝၢတ်ႇၸဵပ်းလိူဝ်ႁႅင်းသေ သူင်ႇၵႂႃႇႁူင်းယႃ တၢႆၵႂႃႇထႅင်ႈ 1 ၵေႃႉ၊ ႁူမ်ႈတင်းသဵင်ႈ 8 ၵေႃႉ- ၼႆယဝ်ႉ။

ရူတ်ႉၵႃး လမ်းဢၼ်တၢင်ႇၵူၼ်းႁဵတ်းၵၢၼ် ပွၵ်ႈၶိုၼ်းတီႈလိုဝ်ႈသဝ်းသေ ထုၵ်ႇရူတ်ႉၾႆးၽႃႇၺႃး ၸွမ်းတၢင်းၼႆႉ မၢႆပၢႆႉၵႃး ผย 7404 ။ ပဵၼ်ရူတ်ႉထႆး ဢၼ်တိုၵ်ႉဢွၵ်ႇတီႈတႃႈရူတ်ႉၾႆး ၵဵင်းမႆႇ မုင်ႈၼႃႈၸူးမိူင်းၵွၵ်ႇ (ၵုင်းထဵပ်ႈ)- ၼႂ်းသိုဝ်ႇထႆး ဢွၵ်ႇၵႂႃႇၼင်ႇၼႆ။