ဢိင်ၼိူဝ်ၾူၼ်လူင်လူမ်းလူင်မႃးႁႅင်း၊ မၢၵ်ႇႁဵပ်းတူၵ်း ႁႅင်းသေ ၶူဝ်းႁႆႈၶူဝ်းသူၼ် မၢၵ်ႇၶဝ်ႈတဝ်ႈၼမ်ႉ ၵူၼ်းဝၢၼ်ႈၵူၼ်းမိူင်း ၼႂ်းၵိင်ႇၸႄႈဝဵင်းပၢင်လူင် လူႉသုမ်းၼမ် ၼပ်ႉႁူဝ်ပၢၵ်ႇဢေႊၵႃႊ၊ ၵႃႈၶၼ်ငိုၼ်း ၼပ်ႉႁူဝ်ပၢၵ်ႇသႅၼ်။

မၢၵ်ႇႁဵပ်းတူၵ်းႁႅင်း ၶူဝ်းႁႆႈၶူဝ်းသူၼ် ၵူၼ်းဝၢၼ်ႈၵူၼ်းမိူင်း ပွတ်းပၢင်လူင် လူႉသုမ်းၼမ်

မိူဝ်ႈဝၼ်းတီႈ 25/03/2015 (မိူဝ်ႈဝႃး) ယၢမ်းဝၢႆးဝၼ်း 1 မူင်း၊ ၾူၼ်လူင်တူၵ်းႁႅင်း မၢၵ်ႇႁဵပ်းတူၵ်းႁႅင်း တီႈၼႂ်းၵိင်ႇၸႄႈဝဵင်းပၢင်လူင် ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း၊ ႁဵတ်းႁႂ်ႈမၢၵ်ႇၶဝ်ႈတဝ်ႈၼမ်ႉ ၵူၼ်းဝၢၼ်ႈၵူၼ်းမိူင်း လူႉသုမ်းယႂ်ႇလူင် ၼပ်ႉႁူဝ်ပၢၵ်ႇဢေႊၵႃႊ၊ ၼပ်ႉၵႃႈၶၼ်ငိုၼ်း ၼပ်ႉႁူဝ်ပၢၵ်ႇသႅၼ်။ ၾူၼ်မၢၵ်ႇႁဵပ်းလူင်ၼႆႉ မိူဝ်ႈၵၢင်ၶိုၼ်းၶမ်ႈဝႃးၼႆႉၵေႃႈ ယင်းတိုၵ်ႉသိုပ်ႇတူၵ်းထႅင်ႈယူႇ- ၼႆယဝ်ႉ။

မၢၵ်ႇႁဵပ်းၼႆႉ ပဵင်းလုၵ်ႈမၢၵ်ႇၶၢမ်ၸိူဝ်းၼႆႉ၊ ၸွမ်းႁိမ်းႁွမ်းဝဵင်းပၢင်လူင်ၼႆႉ သူၼ်မၢၵ်ႇၶဝ်ႈတဝ်ႈၼမ်ႉ လူႉၵွႆၵႂႃႇ 200 ဢေႊၵႃႊပၢႆ။ တၢင်းဝၢၼ်ႈၼွင်မိူင်း ၸိူဝ်းၼႆႉလူႉသုမ်းယႂ်ႇၼမ်၊ ၵႃႈၶၼ်လူႉသုမ်းတင်းၼမ်သႅၼ် 300 ပၢႆ။ ယွၼ်ႉပိူဝ်ႈလူႉသုမ်း ၶူဝ်းသူၼ်ၶူဝ်းႁိူၵ်ႈ မၢၵ်ႇၶဝ်ႈတဝ်ႈၼမ်ႉလႄႈ ၵူၼ်းဝၢၼ်ႈၵူၼ်းသူၼ်ၵေႃႈ ဢွၼ်ၵၼ်ႁွင်ႉႁွင်ႉႁႆႈႁႆႈ ပဵၼ်ၼမ်ႉႁူၼမ်ႉတႃ- ၽူႈယႂ်ႇၵူၼ်းလူင် ၼႂ်းဝၢၼ်ႈၼွင်မိူင်း လုင်းဢုတ်ႉတမ လၢတ်ႈ။

ဝၢၼ်ႈၼွင်မိူင်းၼႆႉ မီးလင်ႁိူၼ်း 45 လင်၊ ႁဵတ်းၵၢၼ်သူၼ် ႁႆႈ ၽုၵ်ႇၵိၼ်မၢၵ်ႇၶဝ်ႈတဝ်ႈၼမ်ႉၵူႈႁိူၼ်း။ ၶၢဝ်းၼႆႉ ၵူၼ်းဝၢၼ်ႈၵူၼ်းသူၼ်ၽုၵ်ႇ ဢႃႇလူး၊ တႅင်၊ တႅင်ႁွမ်၊ မၢၵ်ႇပၢၵ်ႉ၊ မီႇႁေႃ၊ တူၼ်ႈမွၵ်ႇ ၸိူဝ်းၼႆႉ။

လုင်းၺုၼ်ႉ ၵူၼ်းဝၢၼ်ႈၼွင်မိူင်းလၢတ်ႈဝႃႈ- မၢၵ်ႇၶဝ်ႈတဝ်ႈၼမ်ႉ ႁဝ်းပေႃးႁၢမ်ႇပေႃးသုၵ်းယဝ်ႉ၊ ပေႃးၸမ်တေလႆႈၵဵပ်းယဝ်ႉ၊ ဢၼ်ႁဝ်းၶႃႈလႆႈလူင်းတိုၼ်းလၢင်းဝႆႉၼၼ်ႉ ၵွႆၵမ်းၼႆႉမူတ်းယဝ်ႉ၊ ငိုၼ်းတိုၼ်းလၢင်းၼႆႉ မၢင်ႁိူၼ်းတူၵ်းယူႇ 40-50 သႅၼ်၊ တေလႆႈၵႂႃႇႁႃႁဵတ်းၵၢၼ်မိူင်းထႆးၵူၺ်းယဝ်ႉယူဝ်ႉ- ဝႃႈၼႆ။

မၢၵ်ႇႁဵပ်းတူၵ်းႁႅင်း ပွတ်းပၢင်လူင်

ဝၢၼ်ႈပၢင်မူင်ႈ ဢၼ်မီးၾၢႆႇၸဵင်ႇႁွင်ႇဝၼ်းတူၵ်း ဝဵင်းပၢင်လူင်ၼၼ်ႉၵေႃႈ ၸဝ်ႈႁႆႈၸဝ်ႈသူၼ် 6 ၵေႃႉ လူႉသုမ်းၶူဝ်းႁႆႈၶူဝ်းသူၼ် တႅင်၊ ဢႃႇလူး၊ မၢၵ်ႇၶိူဝ်သူမ်ႈ 8 ဢေႊၵႃႊပၢႆ၊ ၵႃႈၶၼ်ငိုၼ်းမွၵ်ႈ 24 သႅၼ်- ၼႆယဝ်ႉ။

ဝၢၼ်ႈလူင် ဢၼ်မီးၾၢႆႇၸၢၼ်းဝဵင်းပၢင်လူင်ၵေႃႈ မၢၵ်ႇၶဝ်ႈတဝ်ႈၼမ်ႉၵူၼ်းဝၢၼ်ႈ မိူၼ်ၼင်ႇဢႃႇလူး၊ တႅင်ၸမ်ႇပူႇ၊ တႅင်ၸိင်၊ ၽၵ်းမီးလႅင် ၸိူဝ်းၼႆႉ 20 ဢေႊၵႃႊပၢႆ လူႉသုမ်းယွၼ်ႉမၢၵ်ႇႁဵပ်းတူၵ်း- လုင်းလႃႉဢူး ၵူၼ်းလူင်ဝၢၼ်ႈလူင်လၢတ်ႈ။

ၼွၵ်ႈသေၼၼ်ႉ ၼႂ်းၵိင်ႇၸႄႈဝဵင်းပၢင်လူင်ၼႆႉ သဝ်ၾႆးၾႃႉၵေႃႈလူမ်ႉ၊ တူၼ်ႈမႆႉၵူၼ်ႇႁၵ်း၊ ၵႃႇပိူင်ႈသႂ်မုင်းႁိူၼ်းၸိူဝ်းၼႆႉၵေႃႈတႅၵ်ႇ/ပွင်ႇ၊ တူၼ်ႈမႆႉၺွင်ႇလူမ်ႉသႂ်ႇႁေႃၸဝ်ႈမိူင်းၵူၼ်ႇ လူႉၵွႆၸိူဝ်းၼႆႉ။

ဝၼ်းတီႈ 25 မိူဝ်ႈဝႃးၼႆႉၼင်ႇၵဝ်ႇ တီႈဝဵင်းတူၼ်ႈတီး ၵေႃႈၾူၼ်လူမ်းႁႅင်း။ တီႈပၢင်ဢူလူင် (ပိၼ်ႇဢူးလုၼ်ႇ) ၵေႃႈၾူၼ်လူမ်းႁႅင်း မီးမၢၵ်ႇႁဵပ်းတူၵ်း။ တီႈမိူင်းလႃးၵေႃႈ မၢၵ်ႇႁဵပ်းတူၵ်း၊ ဝၢႆးဝၼ်း တီႈႁၢႆးႁူဝ်းၵေႃႈ ၾူၼ်တူၵ်းႁႅင်း မီးပႃးမၢၵ်ႇႁဵပ်း- ၼႆယဝ်ႉ။