ၸုမ်းၶၢင် KIA ႁွင်ႉႁူပ်ႉထူပ်း ၸဝ်ႈၼႃႈတီႈၾၢႆႇယေးငိုၼ်း ၼႂ်းဝဵင်းမူႇၸေႈၵူႈယေးငိုၼ်း၊ ဝၼ်းလိုၼ်းသုတ်း လိူၼ်မေႊ 30 ဝၼ်း။ ၾၢႆႇၵမ်ႉၸွႆႈပၢႆးပၺ်ၺႃၶွင် KIO ဝႃႈ ထိုင်ၶၢဝ်းယၢမ်းႁၢင်ႈႁႅၼ်းလွင်ႈႁူမ်ႇလူမ်ႈ။

ႁွင်ႈၵၢၼ်လူင်ၾၢႆႇၶၢဝ်ႇ လူင်ပွင်ၸိုင်ႈမၢၼ်ႈ ဢွၵ်ႇလိၵ်ႈပိုၼ်ၽၢဝ်ႇမိူဝ်ႈဝၼ်းတီႈ 23/03/2015 ဝႃႈ- တီႈဝဵင်းမူႇၸေႈၼႆႉ တပ်ႉသိုၵ်းၶၢင် KIA ၶဝ် တႅမ်ႈလိၵ်ႈထိုင်တီႈ ယေးငိုၼ်းၵူႈယေး ဢၼ်ပၵ်းၼႂ်းဝဵင်းမူႇၸေႈ ဝႃႈ ႁႂ်ႈမႃးႁူပ်ႉထူပ်းၸဝ်ႈၼႃႈတီႈ KIA ၊ ဝၼ်းလိုၼ်းသုတ်း တတ်းမၵ်းဝႆႉ လိူၼ်မေႊ 30 ဝၼ်း (30/05/2015)- ၼႆယဝ်ႉ။

ၵဵဝ်ႇၵပ်းလွင်ႈၼႆႉ ဢူးတွင်ႇၶႃး ၾၢႆႇၵမ်ႉၸွႆႈပၢႆးပၺ်ၺႃၶွင် KIO လၢတ်ႈဝႃႈ- ယၢမ်းၽွင်းမိူဝ်ႈလဵဝ်ၼႆႉ ပဵၼ်ၶၢဝ်းပၢင်တိုၵ်း၊ ပဵၼ်ၶၢဝ်းဝၢၼ်ႈမိူင်းဢမ်ႇၼိမ်သဝ်း၊ ပဵၼ်ၶၢဝ်းၵူၼ်းငုမ်းပႃမိူဝ်ႈၼမ်ႉၶုၼ်ႇ၊ ၵူၼ်းဢၼ်ယိပ်း ၸုမ်ႈ KIA ဢၼ်ပွမ်သေ ႁဵတ်းၸိူင်ႉၼႆမီးတင်းၼမ်။ ၵွပ်ႈၼႆလႄႈ ယူႇတီႈၾၢႆႇၽူႈႁဵတ်းၵၢၼ်မၢၵ်ႈမီးၶဝ်ၵေႃႈလီ၊ ယူႇတီႈၾၢႆႇၸဝ်ႈၼႃႈတီႈၶဝ်ၵေႃႈလီ၊ လီလႆႈႁူပ်ႉထူပ်းဢုပ်ႇၵုမ်ၵၼ်သေ ႁၢင်ႈႁႅၼ်းလွင်ႈႁူမ်ႇလူမ်ႈယဝ်ႉ- ဝႃႈၼႆ။

ဢမ်ႇၵွမ်ႉၵႃႈၼႂ်းမူႇၸေႈၵူၺ်း၊ မိူၼ်ၼင်ႇၼႂ်းၸႄႈမိူင်းၶၢင် မျိတ်ႉၵျီးၼႃး ၽႃၵၢၼ်ႉၸိူဝ်းၼႆႉၵေႃႈ ၵူၼ်းၸိူဝ်းဢဝ်ၸုမ်ႈ KIA ဢၼ်ပွမ်သေ ႁဵတ်းၵိၼ်ၸိူင်ႉၼႆ မီးတင်းၼမ်တင်းလၢႆ။ ၵွပ်ႈၼႆ ယူႇတီႈ KIA သေ တေၵူတ်ႇထတ်းၵႂႃႇႁၢဝ်ႈႁႅင်း- ၼႆယဝ်ႉ။

ၼႂ်းဝဵင်းမူႇၸေႈၼႆႉ မီးယေးငိုၼ်းမိူၼ်ၼင်ႇ ဢိရႃႇဝၻီႇ၊ ယူဝ်းမ၊ ၵမ်ႇပေႃးၸ၊ မျၢၼ်ႇမၸေႉၸွင်ႇ ၸဵမ်ၸိူဝ်းၼႆႉ။

ၼႂ်းၸိုင်ႈတႆးပွတ်းႁွင်ႇၼႆႉ မီးၸုမ်းယိပ်းၵွင်ႈၵၢင်ႇလၢႆလၢႆၸုမ်း။ ၼွၵ်ႈၼိူဝ်သေ တပ်ႉသိုၵ်းမၢၼ်ႈယဝ်ႉ မီးတပ်ႉသိုၵ်းၸၢဝ်းၶိူဝ်း မိူၼ်ၼင်ႇတပ်ႉသိုၵ်းတဢၢင်း TNLA ၊ တပ်ႉသိုၵ်းၶၢင် KIA ၊ တပ်ႉသိုၵ်းၵူဝ်းၵၢင်ႉ MNDAA ၊ တပ်ႉသိုၵ်းၸိုင်ႈတႆး SSPP/SSA ၊  တပ်ႉသိုၵ်းၸိုင်ႈတႆး RCSS/SSA လႄႈ ၸုမ်းပီႇတုၸိတ်ႉ ၸိူဝ်းၼႆႉ။