မၢၼ်ႈႁၢမ်ႈၶူဝ်းၵုၼ်ႇသိၼ်ၵႃႉ လတ်းၽၢၼ်ႇၵႂႃႇ တၢင်းမိူင်းလႃး



ၶၢဝ်းတၢင်းလိူၼ်ပၢႆမႃးၼႆႉ ၾၢႆႇၸဝ်ႈၼႃႈတီႈမၢၼ်ႈ ဢၼ်ပႂ်ႉၶူဝ်တႃႈပိင်း (ၼမ်ႉလူၺ်) ဢမ်ႇပၼ်ၶူဝ်းၵုၼ်ႇ သိၼ်ၵႃႉ ဢၼ်ဢွၵ်ႇၼႂ်းၸိုင်ႈတႆးပွတ်းဢွၵ်ႇ လတ်းၶၢမ်ႈၵႂႃႇတၢင်းမိူင်းလႃး။


ၶူဝ်တႃႈပိင်းလႄႈတပ်ႉမၢၼ်ႈ
ဝၼ်းတီႈ 24/03/2015 (မိူဝ်ႈဝႃး) ၵူၼ်းဝၢၼ်ႈၵူၼ်းမိူင်း တၢင်းမိူင်းယွင်း၊ မိူင်းယု၊ မိူင်းလႃးၶဝ်လၢတ်ႈဝႃႈ မီးၶၢဝ်းတၢင်းလိူၼ်ပၢႆယဝ်ႉ သိုၵ်းမၢၼ်ႈဢၼ်ပၵ်းပႂ်ႉတီႈတႃႈပိင်း (ၼမ်ႉလူၺ်) လႅၼ်ၶႅၼ်ႈ ၼႃႈလိၼ်ၸႄႈတွၼ်ႈၵဵင်းတုင် တင်း ၼႃႈမိူင်းမိူင်းလႃး (ၼႃႈလိၼ်ၶိုၵ်ႉတွၼ်းမၢႆ 4) ဢမ်ႇပၼ်ၶူဝ်းၵုၼ်ႇ သိၼ်ၵႃႉ ဢၼ်ဢွၵ်ႇၼႂ်း ၸႄႈတွၼ်ႈၵဵင်းတုင်၊ ၸႄႈတွၼ်ႈတႃႈၶီႈလဵၵ်းၸိူဝ်းၼႆႉ လတ်းၽၢၼ်ႇၶၢမ်ႈၵႂႃႇတၢင်းမိူင်းလႃး- ၼႆယဝ်ႉ။

ၶူဝ်းၵုၼ်ႇသိၼ်ၵႃႉ ဢၼ်ၸဝ်ႈၼႃႈတီႈမၢၼ်ႈ ဢမ်ႇပၼ်လတ်းၶၢမ်ႈ ၽၢၼ်ႇၵႂႃႇတၢင်းၼႃႈလိၼ်မိူင်းလႃးၼႆႉ ပိူင်လူင်မၼ်း ပဵၼ်ၶဝ်ႈသၢၼ် ၶဝ်ႈၵၢပ်ႇ ဢၼ်ဢွၵ်ႇၼႂ်းမိူင်းယွင်းၸိူဝ်းၼႆႉ။ လွင်ႈၼႆႉ ပေႃးဢမ်ႇၸၢင်ႈ ဢဝ်လတ်းမိူင်းလႃးၵေႃႈ ဢမ်ႇၸၢင်ႈဢဝ်ၶဝ်ႈၵႂႃႇၶၢႆတေႃႇမိူင်းၶႄႇ၊ ႁဵတ်းႁႂ်ႈၵူၼ်းမိူင်းထူပ်းတၢင်းယၢပ်ႇၽိုတ်ႇ- ၼႆယဝ်ႉ။

ၸဝ်ႈၵႃးဢၼ်လႅၼ်ႈၵႂႃႇမႃး ၵဵင်းတုင်- မိူင်းလႃး ၵေႃႉၼိုင်ႈလၢတ်ႈဝႃႈ- ဢၼ်ၶဝ်ႁႄႉၵိုတ်းႁွင်ႉဝႆႉတီႈၶူဝ်တႃႈပိင်း ၼႆႉ တင်ႈတႄႇဝၼ်းတီႈ 13/02/2015 မႃးတေႃႇထိုင်မိူဝ်ႈလဵဝ်၊ လႆႈမႃးၶၢဝ်းတၢင်းလိူၼ်ပၢႆယဝ်ႉ- ဝႃႈၼႆ။

လွင်ႈႁၢမ်ႈၶူဝ်းၵုၼ်ႇသိၼ်ၵႃႉ လတ်းၶၢမ်ႈၵႂႃႇတၢင်းမိူင်းလႃးၼႆႉ ပဵၼ်မႃးဝၢႆးသေၸုမ်းၵူဝ်းၵၢင်ႉ (MNDAA)  တင်းတပ်ႉသိုၵ်းမၢၼ်ႈယိုဝ်းၵၼ် တင်ႈတႄႇႁူဝ်လိူၼ်ၾႅပ်ႊၿိဝ်ႊရီႊ (2015)မႃး/  ၾၢႆႇတပ်ႉသိုၵ်းမၢၼ်ႈ ၸီႉၼႄး ပိုၼ်ၽၢဝ်ႇဝႃႈ- ၸုမ်းဝႃႉ တင်းၸုမ်းမိူင်းလႃး ၵမ်ႉၸွႆႈၸုမ်းၵူဝ်းၵၢင်ႉ။ ၾၢႆႇမၢၼ်ႈၵေႃႈၸီႉသင်ႇ ဢမ်ႇပၼ်ၶူဝ်းၵုၼ်ႇသိၼ်ၵႃႉ ၶဝ်ႈတၢင်းမိူင်းလႃး ပွၵ်ႈၵမ်းၼႆႉ။




 
© 2012 All Rights Reserved | Asean Celebrity | Fonts @ AtFonts | Free Templates