ဝႃႉၸတ်းပၢင်ၵုမ်ၸၢဝ်းၶိူဝ်း ႁွင်ႉမွၵ်ႇ 12 ၸုမ်းၶဝ်ႈႁူမ်ႈ၊ ပိူဝ်ႈတႃႇတၢင်ႇၸုမ်း ၶဝ်ႈႁူမ်ႈ တိုၵ်ႉဢုပ်ႇၵၼ်ထႅင်ႈ



ၸုမ်းဝႃႉ UWSA တေၸတ်းပၢင်ၵုမ် ၸုမ်းယိပ်းၵွင်ႈၵၢင်ႇ ၸၢဝ်းၶိူဝ်း တီႈဝဵင်းငဝ်ႈငုၼ်းပၢင်သၢင်း ၽွင်းႁူဝ်လိူၼ်ၼႃႈ၊ ႁွင်ႉမွၵ်ႇၸုမ်းၸၢဝ်းၶိူဝ်းၶဝ်ႈႁူမ်ႈ 12 ၸုမ်း ၸွမ်းၼင်ႇၶွမ်ႊမတီႊ လႆႈၽႅၼ်ၵၢၼ် တမ်းဝၢင်းၼႆႉ။ ပိူဝ်ႈတႃႇ ႁွင်ႉဝွၵ်ႇတင်းမူတ်း တႅပ်းတတ်းလွင်ႈ NCA ၼၼ်ႉ တေႁူပ်ႉဢုပ်ႇၵၼ်ထႅင်ႈ- ဢူးဢွင်ႇမိၼ်ႉလၢတ်ႈ။


ၽူႈၶၢၼ်ပၢၵ်ႇ UWSA ဢူးဢွင်ႇမိၼ်ႉ
ပေႃးထိုင်မႃး ၽွင်းႁူဝ်လိူၼ်ၼႃႈ ဝၼ်းတီႈ 1-3/05/2015 ၸုမ်းၸၢဝ်းၶိူဝ်း 3 မူႇၸုမ်း- 1.ပႃႊတီႊ/တပ်ႉသိုၵ်း မိူင်းဝႃႉၽွမ်ႉႁူမ်ႈ (UWSP/ UWSA) ။ 2.တပ်ႉသိုၵ်းဢူၺ်းလီ ၻီႊမူဝ်ႊၶရႅတ်ႊတိၵ်ႊၸိူဝ်ႉၸၢတ်ႈ (NDAA) ၸုမ်းမိူင်းလႃး။ 3.ၸုမ်းလွတ်ႈလႅဝ်းၶၢင် (KIO) ႁူမ်ႈၵၼ် တေပဵၼ်ၸဝ်ႈတႃႇၼ ၸတ်းႁဵတ်းပၢင်ၵုမ်လူင် ၸုမ်းယိပ်းၵွင်ႈၵၢင်ႇၸၢဝ်းၶိူဝ်း တီႈငဝ်ႈငုၼ်း UWSP/ UWSA ဝဵင်းပၢင်သၢင်း ၼႃႈလိၼ်ၽွင်းငမ်းတူဝ်ၵဝ်ႇဝႃႉ ၼႂ်းၸိုင်ႈတႆးပွတ်းႁွင်ႇ။ ပိူဝ်ႈတႃႇၶဝ်ႈႁူမ်ႈပၢင်ၵုမ်လူင်ၼႆႉ ၽွင်းႁူဝ်လိူၼ်ဢေႊပရိူဝ်ႊလ် (2015) ၼႆႉလႆႈႁွင်ႉဝွၵ်ႇထိုင်ဝႆႉ ၸုမ်းၸၢဝ်းၶိူဝ်းတင်းမူတ်း 12 ၸုမ်း- လႆႈႁူႉၼင်ႇၼႆ။

ၼႂ်းၸုမ်းၸၢဝ်းၶိူဝ်း ဢၼ်လႆႈႁွင်ႉဝွၵ်ႇဝႆႉ 12 ၸုမ်းၼၼ်ႉ 1.ၶွင်ႊသီႊဢဝ်ၶိုၼ်းၸိုင်ႈတႆး (RCSS) ၊ 2.ၸုမ်းလွတ်ႈလႅဝ်းၶၢင် (KIO) ၊ 3.ႁူမ်ႈတုမ်ၸိူဝ်ႉၸၢတ်ႈယၢင်းၽိူၵ်ႇ (KNU) ၊ 4.ပႃႊတီႊမႂ်ႇသုင်ၸိူဝ်ႉၸၢတ်ႈ ယၢင်းလႅင် (KNPP) ၊ 5.ပႃႊတီႊမိူင်းမွၼ်းမႂ်ႇ (NMSP) ၊ 6.ပႃႊတီႊမႂ်ႇသုင်ၸိုင်ႈတႆး (SSPP) ၊ 7.တပ်ႉသိုၵ်းဢူၺ်းလီ ၻီႊမူဝ်ႊၶရႅတ်ႊတိၵ်ႊၸိူဝ်ႉၸၢတ်ႈ (NDAA) ၸုမ်းမိူင်းလႃး၊ 8.ၸုမ်းပူတ်းပွႆႇ ၸိူဝ်ႉၸၢတ်ႈပဢူဝ်း (PNLO) ၊ 9.တႅဝ်းႁူမ်ႈပူတ်းပွႆႇမိူင်းပလွင်ႈ ႁိုဝ် တပ်ႉသိုၵ်းပူတ်းပွႆႇၸိူဝ်ႉၸၢတ်ႈတဢၢင်း (TNLA) ၊ 10.တပ်ႉသိုၵ်းရၶႅင်ႇ (AA) ၊ 11.တပ်ႉသိုၵ်းဢူၺ်းလီ ၻီႊမူဝ်ႊၶရႅတ်ႊတိၵ်ႊ ၵူႈၸၢဝ်းၶိူဝ်းမိူင်းမၢၼ်ႈ (MNDAA) ၸုမ်းၵူဝ်းၵၢင်ႉ၊ ပႃးတင်းၸဝ်ႈတႃႇၼ ၸတ်းပၢင်ၵုမ် တပ်ႉသိုၵ်းမိူင်းဝႃႉၽွမ်ႉႁူမ်ႈ (UWSA) ႁူမ်ႈတင်းမူတ်း 12 ၸုမ်း ၸိူဝ်းၼႆႉ။

ၸုမ်းၸၢဝ်းၶိူဝ်း ၸိူဝ်းဢမ်ႇလႆႈႁွင်ႉမွၵ်ႇပႃးၼၼ်ႉ မိူၼ်ၼင်ႇၸုမ်း ၶွင်ႊသီႊၸိူဝ်ႉၸၢတ်ႈရၶႅင်ႇ (ANC) ၊ တႅဝ်းႁူမ်ႈၸိူဝ်ႉၸၢတ်ႈၶျၢင်း (CNF) ၊ ၶွင်ႊသီႊငမ်းယဵၼ်ၸိူဝ်ႉၸၢတ်ႈယၢင်းၽိူၵ်ႇ (KPC) ၊ တပ်ႉသိုၵ်းယၢင်း ပုတ်ႉထ (DKBA) ၊ ၶွင်ႊသီႊသူဝ်ႇသျႄႊလိတ်ႊၸိူဝ်ႉၸၢတ်ႈ မိူင်းၼႃႇၵ (NSCN-K) ၊ ႁူမ်ႈတုမ်ၻီႊမူဝ်ႊ ၶရႅတ်ႊတိၵ်ႊလႃးႁူႇ (LDU) ၊ ၸုမ်းၸိူဝ်ႉၸၢတ်ႈဝႃႉ (WNO) ၊ ပႃႊတီႊပူတ်းပွႆႇၸိူဝ်ႉၸၢတ်ႈရၶႅင်ႇ (ALP) ၸိူဝ်းၼႆႉ။

ပၢင်ၵုမ်လူင်ၸၢဝ်းၶိူဝ်း ဢၼ်ၸတ်းတီႈဝဵင်းပၢင်သၢင်းပွၵ်ႈၼႆႉ ဢိင်ၼိူဝ် ဢမ်ႇႁွင်ႉမွၵ်ႇထိုင်ၸုမ်းၸၢဝ်းၶိူဝ်း ၵူႈမူႇၵူႈၸုမ်းၶဝ်ႈႁူမ်ႈသေ လၢႆၵေႃႉလၢႆၾၢႆႇထတ်းသၢင်ဝႃႈ- မိူဝ်ႈလဵဝ် ပၼ်ႁႃဢၼ်ယႂ်ႇသုတ်းၼႆႉ ႁဝ်းထုၵ်ႇလႆႈ မႃးဢုပ်ႇၵုမ်/ ထတ်းသၢင်/ တႅပ်းတတ်းလွင်ႈ ၵၢၼ်ၵိုတ်းယိုဝ်းပတ်းပိုၼ်ႉၸိုင်ႈမိူင်း (NCA) ဝႃႈ တေလူင်းလၢႆးမိုဝ်း ႁိုဝ် ဢမ်ႇလူင်းလၢႆးမိုဝ်း၊ ယွၼ်ႉဝႃႈ ၽိုၼ်ယုၵ်းယၢင်ႇလိုၼ်းသုတ်း NCA ၼႆႉ လႆႈတူၵ်းလူင်းၵၼ်ယဝ်ႉ၊ လွင်ႈၸိူဝ်းၼႆႉ ၵူႈမူႇၵူႈၸုမ်း ထုၵ်ႇလႆႈမႃးႁူပ်ႉထူပ်းၵၼ်သေဢုပ်ႇၵၼ်။ ယွၼ်ႉၼၼ် ပေႃးႁွင်ႉဝွၵ်ႇ 12 ၸုမ်းၵူၺ်း တေဢမ်ႇၸၢင်ႈတႅပ်းတတ်းလႆႈလွင်ႈ NCA ၊ ၵွပ်ႈၼၼ် ထုၵ်ႇလီလႆႈမွၵ်ႇပႃး ၸုမ်းၸၢဝ်းၶိူဝ်း ထႅင်ႈ 8 ၸုမ်း ဢၼ်ၵိုတ်းလိူဝ်ယူႇ၊ ၸင်ႇတေၸၢင်ႈတႅပ်းတတ်းလႆႈ - ၸဝ်ႈၶိုၼ်းသႂ် ၽူႈၵွၼ်းလုမ်း ၸိုင်ႈမိူင်းႁူမ်ႈတုမ် (PI) လၢတ်ႈၼႄၼင်ႇၼႆ။

လွင်ႈတၢင်းဢၼ် ဢမ်ႇလႆႈႁွင်ႉဝွၵ်ႇ ၸုမ်းၸၢဝ်းၶိူဝ်းၵူႈၸုမ်းၼၼ်ႉ ၽူႈၶၢၼ်ပၢၵ်ႇၸုမ်းဝႃႉ (UWSA) လၢတ်ႈတီႈ ၸုမ်းၶၢဝ်ႇၽူႈတွႆႇႁွၵ်ႈ ဝႃႈ- ပိူဝ်ႈတႃႇပဵၼ်ႁႅင်းသူၼ်းဢီး ၵမ်ႉထႅမ်လွင်ႈငမ်းယဵၼ်၊ ၼင်ႇႁိုဝ်ဝၢၼ်ႈမိူင်းပေႃးတေၸဵဝ်းလႆႈ လွင်ႈငမ်းယဵၼ်ၼၼ်ႉ ၼႂ်းၶွမ်ႊမတီႊႁဝ်းႁၢင်ႈႁႅၼ်းဝႆႉ ၸဵမ်မိူဝ်ႈၸတ်းႁဵတ်း ပၢင်ၵုမ်လူင်လၢႆႇၸႃႇ/ လေႃႇၶီးလႃႇၸိူဝ်းၼၼ်ႉယဝ်ႉ၊  ႁဝ်းတေၸတ်းပၢင်ၵုမ်ၼႆ ႁဝ်းၶႃႈမီးၽႅၼ်ၵၢၼ်ဝႆႉၸဵမ်မိူဝ်ႈၼၼ်ႉသေ ၼႂ်းၶွမ်ႊမတီႊႁဝ်းလႆႈလၢတ်ႈ လႆႈလူင်းၸိုဝ်ႈဝႆႉၸဵမ်မိူဝ်ႈၼၼ်ႉ။ ၵူၺ်းၵႃႈ ထိုင်မႃးဝၼ်းတီႈ 31 လိူၼ်မၢတ်ႊၶျ်ၼႆႉ လူင်ပွင်ၸိုင်ႈ (ၸုမ်းၶိုင်ပွင်လွင်ႈငမ်းယဵၼ် ၸၼ်ႉၸိုင်ႈမိူင်းႁူမ်ႈတုမ် UPWC) တင်း NCCT ၶဝ်သမ်ႉမႃးလူင်းလၢႆးမိုဝ်းၵၼ်။ ၵွပ်ႈၼၼ် ပၢင်ၵုမ်လူင် ဢၼ်တေႁဵတ်းပၢင်သၢင်းၵမ်းၼႆႉ လွၼ်ႉၵႅၼ် ႁူဝ်ၶေႃႈဢုပ်ႇဢူဝ်းမၼ်းတေပိူင်ႈၵႂႃႇဢိတ်းၼိုင်ႈ။ တၢင်ႇၸုမ်း ဢၼ်ၵိုတ်းဝႆႉၸိူဝ်းၼၼ်ႉၵေႃႈ ၶဝ်ၵေႃႈဝႃႈတေမႃးၶဝ်ႈႁူမ်ႈၸွမ်းၼႆသေ တုၵ်းယွၼ်းမႃး သူင်ႇသၢႆမၢႆၸိုဝ်ႈသဵင်မႃးဝႆႉ မီးထႅင်ႈလၢႆၸုမ်းလႄႈ ၼင်ႇႁိုဝ်တေဢမ်ႇတူၵ်းႁူင်ႈတူၵ်းႁၢႆၼၼ်ႉ ႁဝ်းၶႃႈၵေႃႈတိုၵ်ႉဢုပ်ႇၵၼ်ထႅင်ႈယူႇ- ဝႃႈၼႆ။

ၸုမ်းၸၢဝ်းၶိူဝ်း ၸိူဝ်းလႆႈႁပ်ႉၸိူၼ်း ႁွင်ႉဝွၵ်ႇႇ (ၽိတ်ႈမွၵ်ႇ)ဝႆႉၼၼ်ႉ ၸုမ်းလႂ်တေပဵၼ်ၵႂႃႇၶဝ်ႈႁူမ်ႈၽွင်ႈၼၼ်ႉ ႁၢၼ်ႉတေႃႇထိုင်မိူဝ်ႈလဵဝ် ယင်းပႆႇလႆႈႁူႉ။ လၢႆၵေႃႉလၢႆၾၢႆႇၵေႃႈဝႃႈ ပေႃးပၢင်ၵုမ်တီႈပၢင်သၢင်း ဢမ်ႇပႃးၵူႇမူႇၵူႈၸုမ်း ဢမ်ႇၸၢင်ႈတႅပ်းတတ်းလႆႈ NCA ၵေႃႈ လႅပ်ႈတေလႆႈ ၸတ်းပၢင်ၵုမ်ထႅင်ႈ။ မိူဝ်ႈဝၼ်းတီႈ 09/04/2015 ၼႆႉ ၸွမ်သိုၵ်းၵုၼ်ႇမေႃႇ (ၸုမ်း KIA) ၵေႃႈလၢတ်ႈဝႃႈ ပၢင်ၵုမ်လွင်ႈငမ်းယဵၼ်ၼႆႉ 1.ထုၵ်ႇလႆႈမွၵ်ႇပႃးၵူႈၸုမ်းၸုမ်း။ 2.ထုၵ်ႇလႆႈမွၵ်ႇပႃးၸုမ်းၵူဝ်းၵၢင်ႉ (MNDAA) ။ ၵပ်းၵၢႆႇလွင်ႈၼႆႉ ၽူႈၵွၼ်းလုမ်း PI ၸဝ်ႈၶိုၼ်းသႂ် ၵေႃႈဝႃႈ သင်ဝႃႈႁွင်ႉမွၵ်ႇပႃးၸုမ်း NCCT တႄႉ တိုၼ်းပႃးမူတ်းယဝ်ႉ- ဝႃႈၼႆ။

ၸုမ်းၵပ်းသၢၼ် ၵၢၼ်ၵိုတ်းယိုဝ်းပတ်းပိုၼ်ႉၸိုင်ႈမိူင်း (NCCT) ၼႆႉ တင်းမူတ်းမီး 16 ၸုမ်း။ ၼႂ်းၼႆႉ ၶဝ်ႈပႃးၸိူဝ်းပဵၼ်လုၵ်ႈၸုမ်း ၶွင်ႊသီႊႁူမ်ႈတုမ်ၵူႈၸၢဝ်းၶိူဝ်း (UNFC ) 12 ၸုမ်း လႄႈၸုမ်းၸၢဝ်းၶိူဝ်းထႅင်ႈ 4 ၸုမ်း။ 12 ၸုမ်းၼၼ်ႉ 1.ၸုမ်းၶၢင်လွတ်ႈလႅဝ်း (KIO) ၊ 2.ႁူမ်ႈတုမ်ၸိူဝ်ႉၸၢတ်ႈယၢင်းၽိူၵ်ႇ (KNU) ၊ 3.ပႃႊတီႊမႂ်ႇသုင်ၸိူဝ်ႉၸၢတ်ႈယၢင်းလႅင် (KNPP) ၊ 4.ပႃႊတီႊမိူင်းမွၼ်းမႂ်ႇ (MNSP) ၊ 5.တႅဝ်းႁူမ်ႈ ၸိူဝ်ႉၸၢတ်ႈၶျၢင်း (CNF) ၊ 6.ပႃႊတီႊမႂ်ႇသုင်ၸိုင်ႈတႆး (SSPP) ၊ 7.ၸုမ်းပူတ်းပွႆႇၸိူဝ်ႉၸၢတ်ႈပဢူဝ်း (PNLO) ၊ 8.တႅဝ်းႁူမ်ႈပူတ်းပွႆႇမိူင်းပလွင်ႈ (PSLF) ၊ 9.ၸုမ်းလႃးႁူႇ (LDU) ၊ 10.ၸုမ်းၶျၢင်း (ANC) ၊ 11.ၸုမ်းၸိူဝ်ႉၸၢတ်ႈဝႃႉ (WNO) ၊ 12.တပ်ႉသိုၵ်းဢူၺ်းလီၻီႊမူဝ်ႊၶရႅတ်ႊတိၵ်ႊ ၵူႈၸၢဝ်းၶိူဝ်း မိူင်းမၢၼ်ႈ (MNDAA) ၸုမ်းၵူဝ်းၵၢင်ႉ - ၸိူဝ်းၼႆႉ။ ထႅင်ႈ 4 ၸုမ်း 1.တပ်ႉသိုၵ်းယၢင်းပုတ်ႉထ (DKBA) ၊ ၸုမ်းရၶႅင်ႇ (ALP) ၊ ပႃႊတီႊမိူင်းၵယၢၼ်း (KNLP) ၊ ၸုမ်းယၢင်းၽိူၵ်ႇ (KPC) ၸိူဝ်းၼႆႉ။ ၸုမ်း KPC ၼႆႉ လုၵ်ႉတီႈ KNU တင်း KNLA သွင်ၸုမ်းႁူမ်ႈၵၼ်သေပဵၼ်မႃး။




 
© 2012 All Rights Reserved | Asean Celebrity | Fonts @ AtFonts | Free Templates