ၵူၼ်းၼုမ်ႇထုင်ႉမၢဝ်း တိုၵ်းသူၼ်းၵူၼ်းၼုမ်ႇတႆး ပတ်းပိုၼ်ႉ  ႁႂ်ႈသၢၼ်မိုဝ်းၵၼ်ၵႅတ်ႇၵင်ႈ ၶူဝ်းႁႄႈ ၶူဝ်းတိုၼ်း သိင်ႇဝႅတ်ႉလွမ်ႉ ထုင်ႉလိၼ်ၽုၵ်ႇသွမ်ႈ ၵူၼ်းဝၢၼ်ႈၵူၼ်းမိူင်း ၼႂ်းၸိုင်ႈတႆး။

ရူတ်ႉၵႃးမိူင်းၶႄႇ ဢၼ်တၢင်ႇမၢၵ်ႇႁိၼ်သီႊလီႊၶုၼ်ႊ

ဢိင်ၼိူဝ် ၶွမ်ႊပၼီႊ ၶုတ်းႁိၼ် သီႊလီႊၶုၼ်ႊ  တေႃႉတၢင်ႇလတ်း ၼႂ်းဝဵင်းၸႄႈလၢၼ်ႉ ၼိုင်ႈဝၼ်း 10-20 လမ်းၵူႈဝၼ်းၼၼ်ႉသေ ႁဵတ်းႁႂ်ႈသဵၼ်ႈတၢင်းလူႉၵွႆ၊ တုမ်ႉလေႃႇတွင်ႈၽႃႇၵူၼ်းဝၢၼ်ႈ ၵႂႃႇမႃးႁႃၵိၼ် ၼႂ်းပိုၼ်ႉတီႈသေ ၵူၼ်းၼုမ်ႇ ၵူႈၾၢႆႇၾၢႆႇ ၼပ်ႉႁူဝ်ပၢၵ်ႇ ထုင်ႉၸႄႈလၢၼ်ႉ ႁူပ်ႉၵၼ်လၢႆလၢႆပွၵ်ႈသေ တူၵ်းလူင်း လႆႈၸႂ်ၵၼ်ၵႅတ်ႇၵင်ႈ သၽႃဝ သိင်ႇဝႅတ်ႉလွမ်ႉ ၶူဝ်းႁႄႈ ၶူဝ်းတိုၼ်း ၼႂ်းပိုၼ်ႉတီႈ။

ၸၢႆးမၢဝ်းဢွၼ်ႇ ၵေႃႉတူင်ႉၼိုင် ၼၼ်ႉလၢတ်ႈဝႃႈ - “ၶႂ်ႈႁႂ်ႈၵူၼ်းၼုမ်ႇၵူႈတီႈတီႈ ႁူမ်ႈၵၼ် သၢၼ်ၶတ်း၊ ၸိူဝ်းမႃးယႃႉၶုတ်း တေႃႉဢဝ်ၶူဝ်းႁႄႈ ၶူဝ်းတိုၼ်း သူင်ႇဢွၵ်ႇၼွၵ်ႈမိူင်း၊ မိူၼ်ၼင်ႇဢၼ်မႃးၶုတ်းတေႃႉ တၢင်းႁဝ်းၶႃႈၼႆႉ ပႃးၵူၼ်းၼွၵ်ႈမိူင်း၊ မႃးတေႃႉတၢင်ႇဢဝ်ၶူဝ်းႁႄႈ ၶူဝ်းတိုၼ်း၊ ယႃႉပႃႇထိူၼ်ႇ သၼ်လွႆ ႁူဝ်ၼမ်ႉမုတ်း ၼမ်ႉဢွၵ်ႇ ၼမ်ႉႁွင်ႈၼမ်ႉၵေး ဢၼ်ပဵၼ်ၶွင်မႄႈမိူင်းတႆး ၶွင်ၵူၼ်းမိူင်းတႆးလႄႈ ႁဝ်းၶႃႈ ထုၵ်ႇလႆႈသၢၼ်မိုဝ်းၵၼ် ႁႄႉၵင်ႈႁႂ်ႈမၼ်းလႆႈဢေႃႈ” - ဝႃႈၼႆ။

မၢၵ်ႇႁိၼ်ၶၢဝ် သီႊလီႊၶုၼ်ႊ Photo: Sai mao

တႄႇဝၼ်းတီႈ 08/04/2015 တေႃႇယၢမ်းလဵဝ် ၵူၼ်းၼုမ်ႇၼႂ်းၸႄႈလၢၼ်ႉ တႄႇၵၢၼ်လူင်းပိုၼ်ႉတီႈ ႁႄႉၵႃးတၢင်ႇႁိၼ်ၽိူၵ်ႇ သီႊလီႊၶုၼ်ႊ ဢမ်ႇပၼ်လတ်းၼႂ်းၸႄႈလၢၼ်ႉ။ ဢၼ်ၶုတ်းယူႇတီႈလွႆတႄးမိူင်း ၾၢႆႇဢွၵ်ႇၸႄႈလၢၼ်ႉ မွၵ်ႈ 2 လၵ်းၼၼ်ႉၵေႃႈ ၵိုတ်းၵႂႃႇယဝ်ႉ - ဝႃႈၼႆ။

သၢႆတေႃႉႁိၼ်သီႊလီႊၶုၼ်ႊ ပွတ်းၸႄႈလၢၼ်ႉ မီးယူႇ သၢမ်ႇသီႇသၢႆ - လွႆတႄးမိူင်း - မႆႉသၵ်း - ၼမ်ႉၵတ်း - ၸႄႈလၢၼ်ႉ - လတ်းၼမ်ႉမၢဝ်းၵႂႃႇ ၼွင်မူၼ်း၊ ၼွင်မူဝ် - တိုင်းလူင် - တႃႈၸၢင်ႉ၊ ဢၼ်လတ်းထိူၼ်ႇ မႃးတၢင်းၼမ်ႉၶမ်းသေ လတ်းတီႈဝၢၼ်ႈၼွင်သႅင်၊ ဝၢၼ်ႈၼွင်ၸၢင်ႉ လတ်းတူင်ႈၼႃး ၶၢမ်ႈၼမ်ႉမၢဝ်းသေ သူင်ႇၶဝ်ႈမိူင်းၶႄႇ။ ၽူႈၵွၼ်းဝၢၼ်ႈဢိူင်ႇ မၢင်ဝၢၼ်ႈသမ်ႉ ယွၼ်ႉႁပ်ႉဢဝ်ငိုၼ်းယဵတ်ႈမွၼ် တီႈၶွမ်ႊပၼီႊသေ ပၼ်ၵႃးတေႃႉႁိၼ်ႁႄႈလတ်းၵေႃႈမီးလႄႈ ပႆႇႁၢမ်ႈႁႄႉလႆႈသဵင်ႈ- ဝႃႈၼႆ။

ၵူၼ်းမိူင်းၵႂႃႇႁႄႉႁၢမ်ႈရူတ်ႉၵႃးတၢင်ႇမၢၵ်ႇႁိၼ် သီႊလီႊၶုၼ်ႊ Photo: Sai mao

ၵူၼ်းဝၢၼ်ႈၼွင်သႅင်ၵေႃႉၼိုင်ႈလၢတ်ႈဝႃႈ - “ၼိုင်ႈဝၼ်းၼႆႉ တၢင်ႇဢွၵ်ႇဢမ်ႇယွမ်းရူတ်ႉၵႃး 6 လေႃႉ 20 လမ်း။ ၵႃးဢၼ်ၶဝ်တၢင်ႇၼၼ်ႉၵေႃႈ ပဵၼ်ၵႃးမိူင်းၶႄႇ မၢႆၵႃးမိူင်းၶႄႇ။ ၼမ်ႉၼၵ်းႁိၼ်ႁႄႈ သီႊလီႊၶုၼ်ႊလၢႆလၢႆၵူၺ်း ၼိုင်ႈလမ်းတေမီးမွၵ်ႈ 8 တၢၼ်ႇ၊ မိူဝ်ႈဝႃးၼႆႉၵေႃႈ တိုၵ်ႉလတ်းယူႇ 10 လမ်းပၢႆ ” - ဝႃႈၼႆ။

ၵူၼ်းၼုမ်ႇတၢင်းပွတ်းၸႄႈလၢၼ်ႉ ထုင်ႉမၢဝ်းၼႆႉ ပိူဝ်ႈတႃႇ သၢၼ်မိုဝ်းလႆႈၵူၼ်းၼုမ်ႇ ပတ်းပိုၼ်ႉတူဝ်မိူင်းတႆးလႆႈၼၼ်ႉ မွၵ်ႇထိုင်ၵူၼ်းၼုမ်ႇၵူႈတီႈ ႁႂ်ႈမႃးႁူမ်ႈၵၼ်ၶိုၼ်ႈလွႆတႄးမိူင်း ၼႂ်းဝၼ်းတီႈ 24 – 26/4/2015။ ပိူဝ်ႈတႃႇႁဵၼ်းႁူႉ ပိုၼ်းၸဝ်ႈဝူင်ႉႁေႃသႅင် သိူဝ်ၶၢၼ်ၾႃႉ သၢင်ႈႁၢင်ႈႁေႃ ၵေႃႇတႅၼ်ႈသၢင်ႈမိူင်း။ ႁႂ်ႈႁဵၼ်းႁူႉသၽႃဝ သိင်ႇဝႅတ်ႉလွမ်ႉထုင်ႉမၢဝ်း။ ႁႂ်ႈမေႃႁူမ်ႈတုၵ်ႉႁူမ်ႈယၢၵ်ႈၸွမ်းၵၼ် ဝႃႈၼႆ။

တႃႈၼွင်မူၼ်း ၼမ်ႉမၢဝ်း Photo: Sai mao