ၸုမ်းၾိင်ႈငႄႈပုတ်ႉထ လိၵ်ႈလၢႆးတႆး ဢွၼ်ႁူဝ်ၼမ်းၼႃႈပိုတ်ႇပၢင်သွၼ်
လိၵ်ႈတႆးၶၢဝ်းမႆႈ ၼႂ်းမိူင်းပူးဢွၼ်ႇ လၢႆလၢႆဝၢၼ်ႈ ၸႄႈဝဵင်းမိူင်းပဵင်း
ၸိုင်ႈတႆးပွတ်းဢွၵ်ႇၶူင်း။
ပူၼ်ႉမႃးမိူဝ်ႈဝၼ်းတီႈ 11/03/2015 ၊ ဢၼ်ၸုမ်းၾိင်ႈငႄႈပုတ်ႉထ
လိၵ်ႈလၢႆးတႆး ဢွၼ်ႁူဝ်ၼမ်းၼႃႈ ပိုတ်ႇပၢင်သွၼ်လိၵ်ႈတႆးၶၢဝ်းမႆႈ
ၼႂ်းမိူင်းပူးဢွၼ်ႇ ၸႄႈဝဵင်းမိူင်းပဵင်း ၸႄႈတွၼ်ႈၵဵင်းတုင်
ၸိုင်ႈတႆးပွတ်းဢွၵ်ႇ၊ ပွၵ်ႈၵမ်းတီႈ 21 ။ ၽူႈဢွၼ်ႁူဝ်ပိုတ်ႇပၢင်သွၼ်
ပဵၼ်ၸဝ်ႈသြႃႇပၼ်ႇတိ မိူင်းပူးဢွၼ်ႇ၊ ၸဝ်ႈၶူးၸေႃးတိၵ မိူင်းမိတ်ႈ ဢိၵ်ႇတင်း
ၽူႈၵွၼ်ႇဢိူင်ႇလႄႈ ပူႇၵၢင်ႉပူႇၵႄႇ ၵူႈဝၢၼ်ႈဝၢၼ်ႈ။ ၽူႈၵွၼ်းပၢင်သွၼ်
ပဵၼ်ၸဝ်ႈသြႃႇၼၢမ်းၶမ်း၊ ၽူႈၵႅဝ်ပၢင်သွၼ် ပဵၼ်ၸၢႆးတိုၼ်းတႆး - ၼႆယဝ်ႉ။
မေႃသွၼ် ၸၢႆးတိုၼ်းတႆး လၢတ်ႈဝႃႈ- ပီၼႆႉ လုၵ်ႈႁဵၼ်းမီး 300 ၵေႃႉပၢႆ၊
မေႃသွၼ်ၸၢႆး/ယိင်း မီးမွၵ်ႈ 30 ၵေႃႉပၢႆ၊ ၸၼ်ႉလိၵ်ႈမီး 5 ၸၼ်ႉ၊
ၸၼ်ႉငဝ်ႈထိုင်ၸၼ်ႉႁႃႈ၊ လႆႈဢဝ်လိၵ်ႈတႆးမႁႃႈတူဝ်သွၼ်ပၼ်၊ ၸၼ်ႉငဝ်ႈသမ်ႉ
ဢဝ်လိၵ်ႈတႆးၸဵဝ်းမေႃဝႆးသွၼ်၊ ၸၼ်ႉၼိုင်ႈထိုင်ၸၼ်ႉႁႃႈ
ဢဝ်ပပ်ႉလိၵ်ႈမႁႃႈတူဝ်သွၼ်- ဝႃႈၼႆ။
ပၢင်သွၼ်ၼႆႉ ပိုတ်ႇမႃးၵူႈပီ၊ ဝၢၼ်ႈဢၼ်ပိုတ်ႇဢၼ်ပိုတ်ႇပၢင်သွၼ်ၵႂႃႇ မီး 10
ဝၢၼ်ႈ၊ မိူၼ်ၼင်ႇဝၢၼ်ႈၸွမ်ၸဵင်၊ ဝၢၼ်ႈပႅၵ်ႇ၊ ဝၢၼ်ႈၶုမ်ႉ၊ ဝၢၼ်ႈၵၢတ်ႇ၊
ဝၢၼ်ႈၸၢၼ်း၊ ဝၢၼ်ႈပွမ်ႈ၊ ဝၢၼ်ႈၵဵင်းတွင်း၊ ဝၢၼ်ႈၼႃးလိူဝ်ႇ၊ ဝၢၼ်ႈပုင်ႇ လႄႈ
မိူင်းမၢင်းလူင်- ၼႆယဝ်ႉ။
Tags:
Education,
News