ၽိတ်ႈမွၵ်ႇၶဝ်ႈႁူမ်ႈပၢင်ပွႆး တႅမ်ႈတွပ်ႇၶူၼ်ႉၶႆႈလိၵ်ႈ ပရိယတ်ႉတိသတ်ႉထမ်မပႃလၵႅၼ်ႇၸဝ်ႈ ပီၵွၼ်းၶမ်း ဝဵင်းမိူင်းပၼ်ႇ ဢိၵ်ႇပၢင်ပွႆးၶုၵ်းထူပ်း မေႃၵႂၢမ်းၸၢႆးမူး လူႉၶွႆႈၶွပ်ႈတဵမ် 20 ပီ။

ဝၼ်းတီႈ 23-29/04/2015 ၼႆႉ တီႈဝဵင်းမိူင်းပၼ်ႇ ၸိုင်ႈတႆးပွတ်းၸၢၼ်း မီးၶပ်ႉမၢႆ ၸတ်းႁဵတ်းပၢင်ပွႆး တႅမ်ႈတွပ်ႇၶူၼ်ႉၶႆႈလိၵ်ႈ ပရိယတ်ႉတိသတ်ႉထမ်မပႃလၵႅၼ်ႇၸဝ်ႈ ပီၵွၼ်းၶမ်း ဝဵင်းမိူင်းပၼ်ႇ ၶွပ်ႈထူၼ်ႈ 50 ပီတဵမ်၊ တီႈတိူၵ်ႈသွၼ်လိၵ်ႈ ဝတ်ႉမူၺ်ႇတေႃႇ ပွၵ်ႉတူၵ်း ဝဵင်းမိူင်းပၼ်ႇ။ ဢိင်ၼိူဝ်လွင်ႈၼႆႉသေ တၢင်းသင်ၶ ဢိၵ်ႇတၵ်ႉၵႃႇသတ်ႉထႃးပီႈၼွင်ႉ ဝဵင်းမိူင်းပၼ်ႇ တေမီးၵၢၼ်ၸတ်းႁဵတ်းပၢင်ပွႆး မႁႃၵုသူလ် ပီၵွၼ်းၶမ်းၼႆလႄႈ လႆႈၽိတ်ႈမွၵ်ႇ (ဝွၵ်ႇၸိူၼ်း) ပီႈၼွင်ႉၸမ်ၵႆ ၼႂ်းမိူင်း ၼွၵ်ႈမိူင်း မိူဝ်းႁွတ်ႈႁူမ်ႈသိူဝ်း ႁွမ်းတၢၼ်းသႃထုၸွမ်း- ၼႆယဝ်ႉ။

ၶပ်ႉမၢႆပၢင်ပွႆး ဝၼ်းတီႈ 23-25/04/2015 ပဵၼ်ပၢင်ပွႆးတႅမ်ႈတွပ်ႇ ၶူၼ်ႉၶႆႈလိၵ်ႈၸဝ်ႈသင်ၶ၊ ဝၼ်းတီႈ 25-29/04/2015 ပဵၼ်ပၢင်ပွႆးလူႇတၢၼ်းလႄႈ ပွႆးႁူမ်ၸူမ်းမူၼ်ႈသိူဝ်းပီၵွၼ်းၶမ်း။ ၼွၵ်ႈသေၼၼ်ႉ တေမီးၵၢၼ်ၸတ်းပႃးပၢင်ပွႆးၶုၵ်းထူပ်းမေႃၵႂၢမ်းၸၢႆးမူး (မေႃသွၼ်ႁူၺ်ႈၸွႆး) ၼႂ်းတိုဝ်ႉတၢင်းလပ်းတႃလိုမ်းမိူင်း လူႉၶွႆႈၶွပ်ႈတဵမ် 20 ပီ၊ ပၢင်ပွႆးၼႆႉ တေၸတ်းတီႈဝတ်ႉမူၺ်ႇတေႃႇ ပွၵ်ႉတူၵ်း ဝဵင်းမိူင်းပၼ်ႇ- ဝႃႈၼႆ။

ဝဵင်းမိူင်းပၼ်ႇ ပဵၼ်ဝဵင်းၵဝ်ႇဢႃယုယိုၼ်း ၵိုၵ်းပိုၼ်းၸိုင်ႈတႆး လႄႈ ယၢမ်းပဵၼ်မိူင်းဢၼ်ၸဝ်ႈၾႃႉၽွင်းငမ်း မႃးဝဵင်းၼိုင်ႈ၊ မီးယူႇၼိူဝ်သဵၼ်ႈတၢင်းလူင် ၵႄႈၵၢင်ဝဵင်းလၢင်းၶိူဝ်းလႄႈ မိူင်းတူၼ်။ ဝဵင်းမိူင်းပၼ်ႇ မီးဢွင်ႈတီႈၵိုၵ်းပိုၼ်း ဢၼ်လီႁွတ်ႈထိုင်ဢႅဝ်ႇယဵမ်ႈလၢႆတီႈ မိူၼ်ၼင်ႇ 1.ၵျွင်းႁေႃၸဝ်ႈၵေႃးလီႇ (ၸဝ်ႈၶူးမေႃတႆး)။ 2.ၼွင်ၼၢင်းယေႈသႅင်ၵေႃႇ။ 3.လွႆမေႃႇမႃႉ။ 4.ၵျွင်းၸဝ်ႈမျၢတ်ႈၼမ်ႉႁူး။ 5.ထၢတ်ႈၸေႇတီႇ (ၵွင်းမူး) ၵျွင်းၺွင်ႇၽေႃးထိ။ 6.ထၢတ်ႈၸေႇတီႇ (ၵွင်းမူး) ၵျွင်းသၢဝ်းပႅတ်ႇ ၸိူဝ်းၼႆႉ။