လူင်ပွင်ၸိုင်ႈမၢၼ်ႈ ပိုၼ်ၽၢဝ်ႇ တီႉၺွပ်းၸဝ်ႈၼႃႈတီႈ ၾၢႆႇၸႅင်ႈၶၢဝ်ႇ တပ်ႉသိုၵ်းၵူဝ်းၵၢင်ႉ MNDAA ထုၼ်းမျၢတ်ႉလိၼ်း၊ ၵၢဝ်ႇႁႃၸီႉၼႄးဝႃႈ ပဵၼ်ၵူၼ်းယႃႉၵဝ်း လွင်ႈငမ်းယဵၼ်ၼႂ်းပိုၼ်ႉတီႈ၊ ယႃႉၸိုဝ်ႈသဵင်ၼႃႈတႃ တပ်ႉသိုၵ်းမၢၼ်ႈ။

ထုၼ်းမျၢတ်ႉလိၼ်း ၾၢႆႇၸႅင်ႈၶၢဝ်ႇ တပ်ႉသိုၵ်းၵူဝ်းၵၢင်ႉ MNDAA  Photo: 7daydaily

လွင်ႈၼႆႉ ပလိၵ်ႈတီႈဝဵင်းလၢဝ်ႇၵၢႆး ၸႅင်ႈၵႂၢမ်းတီႈလူင်ပွင်ၸိုင်ႈ၊ ၵၢဝ်ႇႁႃၸီႉၼႄး ထုၼ်းမျၢတ်ႉလိၼ်း ၵေႃႉပဵၼ်ၽူႈၶၢၼ်ပၢၵ်ႇလႄႈ ၽူႈၼမ်းၼႂ်းၵူႈလွင်ႈလွင်ႈ တပ်ႉသိုၵ်းဢူၺ်းလီ ၻီႊမူဝ်ႊၶရႅတ်ႊတိၵ်ႊ ၵူႈၸၢဝ်းၶိူဝ်း မိူင်းမၢၼ်ႈ (MNDAA) ၸုမ်းၵူဝ်းၵၢင်ႉဝႃႈ-  ပဵၼ်ၽူႈယႃႉၵဝ်းလွင်ႈၵတ်းယဵၼ် ၼႂ်းပိုၼ်ႉတီႈ၊ ယႃႉၸိုဝ်ႈသဵင်သရေႇၼႃႈတႃတပ်ႉသိုၵ်းမၢၼ်ႈ၊ ႁဵတ်းႁႂ်ႈၵၢၼ်သိုၵ်းၶွင်လူင်ပွင်ၸိုင်ႈ ဢမ်ႇၶၢမ်ႈပူၼ်ႉလႆႈ လွင်ႈၼႆႉ ယူႇတီႈလူင်ပွင်ၸိုင်ႈမၢၼ်ႈ လႆႈပိုၼ်ၽၢဝ်ႇတီႉၺွပ်း တူဝ်ထုၼ်းမျၢတ်ႉလိၼ်း- ၼႆယဝ်ႉ။


ၵဵဝ်ႇၵပ်းလွင်ႈၼႆႉ ထုၼ်းမျၢတ်ႉလိၼ်း လၢတ်ႈဝႃႈ- ပေႃးပိုၼ်ၽၢဝ်ႇတီႉၺွပ်းၵဝ်ၶႃႈၵေႃႈ ထုၵ်ႇလႆႈတီႉပႃး ၵူၼ်းၶဝ် (ၸုမ်းလူင်ပွင်ၸိုင်ႈ တပ်ႉသိုၵ်းမၢၼ်ႈ) ဢၼ်တႅမ်ႈလွင်ႈၶၢဝ်ႇ လွင်ႈၵူဝ်းၵၢင်ႉ။ ဢၼ်ၵဝ်ၶႃႈလၢတ်ႈၼႆႉ ပဵၼ်ဢၼ်ၸိုဝ်ႈၸႂ်ႈထုၵ်ႇမႅၼ်ႈမၼ်းၵူၺ်း၊ ဢၼ်ၶဝ်လၢတ်ႈသမ်ႉ ပဵၼ်ဢၼ်မၢပ်ႇၽၢမ်းလႅၼ်လၢတ်ႈ လွၼ်ႉလွၼ်ႉ။ ၵွပ်ႈၼၼ်လႄႈ ပေႃးပဵၼ်ဝၢၼ်ႈမိူင်း ၻီႊမူဝ်ႊၶရေႊၸီႊၼိုင်ႈလုၵ်ႈၼႆႉ မူႇၸုမ်းၼိုင်ႈဢၼ် ဢမ်ႇၼၼ် ၵူၼ်းၼိုင်ႈၵေႃႉၼႆႉ တၵ်းလႆႈမီးတိုဝ်ႉတၢင်း တႃႇတေလၢတ်ႈၸႃ၊ လွင်ႈၼႆႉ မၼ်းဢမ်ႇမႅၼ်ႈ ၸွမ်းလွၵ်းပိူင် ၻီႊမူဝ်ႊၶရေႊၸီႊ။ ၵွပ်ႈၼၼ် ပေႃးတီႉၵဝ်ၶႃႈၵေႃႈ တေလႆႈတီႉပႃးၵူၼ်းၶဝ်၊ ၵွပ်ႈဝႃႈ ၵဝ်ၶႃႈလၢတ်ႈဢၼ်ထုၵ်ႇမႅၼ်ႈ၊ ၵူၼ်းၶဝ်သမ်ႉ လၢတ်ႈလွင်ႈမၢပ်ႇၽၢမ်းဢဝ်လူးၵွၼ်ႇ- ဝႃႈၼႆ။

ၽူႈၶၢၼ်ပၢၵ်ႇၸုမ်းဝႃႉ UWSA ဢူးဢွင်ႇမိၼ်ႉ ၵေႃႈလၢတ်ႈဝႃႈ- ဢၼ်ပဵၼ်ပၢင်တိုၵ်းႁၢဝ်ႈႁႅင်းၼႆႉ မၼ်းပဵၼ်ၼႂ်းၸိုင်ႈတႆးပွတ်းႁွင်ႇ၊ ၼႂ်းၼႃႈလိၼ်ၽွင်းငမ်းတူဝ်ၵဝ်ႇၵူဝ်းၵၢင်ႉ၊ ဢၼ်ၸုမ်းၵူဝ်းၵၢင်ႉ ၵုမ်းၵုမ်။ ၵၢၼ်ႁဵတ်းသၢင်ႈၸိူင်ႉၼႆ မၼ်းသၢၼ်ၶတ်းဝႆႉ ဢၼ်လူင်ပွင်ၸိုင်ႈ ၶႂ်ႈၵေႃႇသၢင်ႈလွင်ႈငမ်းယဵၼ်၊ ၵွပ်ႈၼၼ် လွင်ႈၼႆႉထုၵ်ႇလႆႈလူတ်းယွမ်း၊ ၵၢၼ်သိုၵ်းၵေႃႈ ထုၵ်ႇလႆႈလူတ်းယွမ်း- ဝႃႈၼႆ။

ၵူဝ်းၵၢင်ႉၼႆႉ ထုၵ်ႇလႆႈၶဝ်ႈပႃးမႃး ၼႂ်းၶၵ်ႉၵၢၼ် ဢုပ်ႇဢူဝ်းလွင်ႈငမ်းယဵၼ်၊ ထုၵ်ႇလႆႈၶဝ်ႈၼႂ်း ၵၢၼ်ၵိုတ်းယိုဝ်းပတ်းပိုၼ်ႉၸိုင်ႈမိူင်း (NCA) မိူၼ်တၢင်ႇၸုမ်း။ ၼႂ်းၸုမ်းၸၢဝ်းၶိူဝ်းဢၼ်ၵိုတ်းယိုဝ်းၼႆႉ ၶႂ်ႈႁႂ်ႈၸုမ်းၵူဝ်းၵၢင်ႉ လႆႈၶဝ်ႈပႃး၊ ပေႃးဝႃႈ ဢမ်ႇလႆႈၶဝ်ႈပႃးၸိုင်  ပွင်ႇဝႃႈမၼ်းဢမ်ႇၵိုတ်းယိုဝ်းလႆႈ ပတ်းပိုၼ်ႉတင်းၸိုင်ႈမိူင်းတႄႉ။ ၵွပ်ႈၼၼ် ၸင်ႇလႆႈသႂ်ႇပႃးၶဝ် လႆႈႁွင်ႉပႃးၶဝ်၊ ႁႂ်ႈမၢၼ်ႈၵေႃႈယွမ်းႁပ်ႉ။ ပေႃးၼၼ်ၸင်ႇ ၵၢၼ်လွင်ႈငမ်းယဵၼ်ၼႆႉ ၸင်ႇတေၶိုၼ်ႈသင်ႉမႃး- ဢူးဢွင်ႇမိၼ်ႉ လၢတ်ႈပႃးၼင်ႇၼႆ။

ဝဵင်းလၢဝ်ႇၵၢႆးၼႆႉ ပဵၼ်ၼႃႈလိၼ်ၽွင်းငမ်းတူဝ်ၵဝ်ႇၵူဝ်းၵၢင်ႉ၊ ယူႇၼႂ်းၸိုင်ႈတႆးပွတ်းႁွင်ႇ။