မိူဝ်ႈဝၼ်းလုၵ်ႉၽိုၼ်ႉ ၵႅတ်ႇၶႄဢဝ်ၶိုၼ်းမိူင်း ၸိုင်ႈတႆး ႁိုဝ် ဝၼ်းလၢႆးလုၵ်ႉၽိုၼ်ႉ ၸိုင်ႈတႆး ၶွပ်ႈၶူပ်ႇ 57 ပီ၊ လိူၼ်မေႊ 21 ဝၼ်း (2015) ဢၼ်ၶွင်ႊသီႊဢဝ်ၶိုၼ်း ၸိုင်ႈတႆး/ တပ်ႉသိုၵ်းၸိုင်ႈတႆး (RCSS/SSA) ၸတ်းတီႈငဝ်ႈၸိုင်ႈ လွႆတႆးလႅင်းၼၼ်ႉ ၸွမ်ႁၢၼ်ၸၢႆးယီႈ ပိုတ်ႇလၢတ်ႈၶေႃႈၵႂၢမ်း တီႈပၢင်ၵႅဝ်ႈၼင်ႇၼႆ။

ၸဝ်ႈၸၢႆးယီႈ ၵၢဝ်ႇလၢတ်ႈၶေႃႈၵႂၢမ်း

ၸွမ်ႁၢၼ်ၸၢႆးယီႈ ၵၢဝ်ႇလၢတ်ႈဝႃႈ- ဝၼ်းမိူဝ်ႈၼႆႉ ပဵၼ်ဝၼ်းလုၵ်ႉၽိုၼ်ႉ လိူၼ်မေႊ 21 ဝၼ်း၊ ၸုမ်းတႆးလုၵ်ႉၽိုၼ်ႉၼႆႉ ႁဵတ်းၸွမ်းၵူႈၸုမ်း၊ တပ်ႉသိုၵ်းၸိုင်ႈတႆး (SSPP/SSA) ၵေႃႈႁဵတ်းၸွမ်း။ တပ်ႉသိုၵ်းၸိုင်ႈတႆး (RCSS/SSA) ၵေႃႈႁဵတ်းၸွမ်း၊ ၼႆႉတေလႆႈႁၼ်ၾၢင်ႁၢင်ႈ ဢၼ်လီပိူင်ၼိုင်ႈ။ ဝၼ်းမိူဝ်ႈၼႆႉ ႁဝ်းလုၵ်ႉၽိုၼ်ႉမႃး ၶၢဝ်းတၢင်းမီး 57 ပီ။ ၼႂ်း 57 ပီၼႆႉ ဢၼ်ႁဝ်းလႆႈလုၵ်ႉၽိုၼ်ႉမႃး လႆႈလူင်းတိုၼ်းၼိူဝ်ႉလိူတ်ႈသၢႆၸႂ်မႃးၼႆႉ ၵူၼ်းမိူင်းႁဝ်းလႆႈတၢႆၵႃႈႁိုဝ်၊ ၵူၼ်းသိုၵ်းႁဝ်းလႆႈတူၵ်းသုမ်း လႆႈလူႇတၢၼ်းၼိူဝ်ႉလိူတ်ႈသၢႆၸႂ်ၵႂႃႇၵႃႈႁိုဝ်၊ ဝၢၼ်ႈႁၢမ်းၼႃးႁၢမ်းသေ ၽၢၼ်ၵွတ်းၵႂႃႇၼႆႉ မီးၼမ်ၵႃႈႁိုဝ်ၼႆ သွၼ်ႇၼပ်ႉဢမ်ႇလႆႈယဝ်ႉ၊ ပွင်ႇဝႃႈၼႂ်းၶၢဝ်းတၢင်း 57 ပီၼႆႉ ႁဝ်းသုမ်းမႃးတႄႉတႄႉ။ ႁဝ်းတိုၵ်းမႃး ပႆႇထိုင်တီႈမၼ်း။

ၸင်ႇဝႃႈ ဝၼ်းႁဝ်းႁဵတ်းပၢင်ႁူပ်ႉထူပ်း ဢုပ်ႇဢူဝ်းၵၼ်ၼႆႉ ဢဝ်ၵုၼ်းဢဝ်မုၼ် ၵူၼ်းမိူင်းဢိၵ်ႇၵူၼ်းသိုၵ်း ၸိူဝ်းဢၼ်လူႇၼိူဝ်ႉလိူတ်ႈၵႂႃႇတႄႉတႄႉ။ ဢၼ်ႁဝ်းႁႃးၵေႃႉသိုၵ်း ၽူႈမီးၸၼ်ႉၶဝ် ဢမ်ႇလီလူင်လိုမ်း ၵၢၼ်လၢႆးလုၵ်ႉၽိုၼ်ႉႁဝ်းၼႆႉ မၼ်းပႆႇယဝ်ႉတူဝ်ႈ။ ၵွပ်ႈသင်လႄႈ မၼ်းပႆႇယဝ်ႉ၊ ၵွပ်ႈဝႃႈ ၶေႃႈယိူင်းဢၢၼ်းလူင်ႁဝ်း ဢၼ်ႁဝ်းၶႂ်ႈလႆႈ၊ သုၼ်ႇလႆႈတႃႇတေတင်ႈမိူင်းႁဝ်းၼၼ်ႉ ႁဝ်းဢမ်ႇလႆႈသင်။ ၵွပ်ႈပိူဝ်ႈႁဝ်းဢမ်ႇလႆႈသင်လႄႈ လၢႆးလုၵ်ႉၽိုၼ်ႉႁဝ်းၼႆႉ မၼ်းဢမ်ႇယဝ်ႉ၊ ႁဝ်းတေလႆႈသိုပ်ႇလုၵ်ႉၽိုၼ်ႉ ၵႂႃႇထႅင်ႈ။ လွင်ႈၼႆႉ ၶႂ်ႈႁႂ်ႈသိုၵ်းႁၢၼ် ၽူႈမီးၸၼ်ႉၶဝ်ၵူႈၵေႃႉ ႁူႉဝႆႉ။

ဢၼ်ႁဝ်းလႆႈႁဵတ်းပၢင်ပွႆး ပၢင်ၶွၼ်ႈတုမ်ၵၼ်ၼႆႉ 1.ၶႂ်ႈႁႂ်ႈၵူၼ်းႁဝ်းႁူႉဝႃႈ ပၢင်တိုၵ်းပႆႇယဝ်ႉ။ 2.ၵူၼ်းမိူင်းႁဝ်း ႁႂ်ႈႁူႉလွင်ႈၵၢၼ်လၢႆးလုၵ်ႉၽိုၼ်ႉ။ ၵူၼ်းမိူင်းႁဝ်းၵမ်ႈၼမ်ၼႆႉ ႁဝ်းလုၵ်ႉၽိုၼ်ႉမႃး 57 ပီ၊ ၵူၼ်းမိူင်းႁဝ်းၶႃႈၼႆႉ ယူႇတၢင်းၼွၵ်ႈမၼ်းသေတူၺ်း၊ ၵွပ်ႈသင်ဝႃႈ ယူႇတၢင်းၼွၵ်ႈမၼ်းသေတူၺ်း၊ ဢၼ်သိုၵ်းတိုၵ်းယူႇၼႆႉ ၵူၼ်းမိူင်းဢမ်ႇထိုဝ်ဝႃႈ သိုၵ်းၸိူဝ်းၼႆႉပဵၼ်သိုၵ်းတႆးႁဝ်း။ ၵူၼ်းမိူင်းၵမ်ႈၼမ်ၼႆႉ ဢႃ..သိုၵ်းမၢၼ်ႈလႄႈ သိုၵ်းတႆးယိုဝ်းၵၼ်ဝႃႇ ႁူႉမွၵ်ႈၼၼ်ႉၵူၺ်း။

တီႈတႄႉမၼ်း ၵၢၼ်လုၵ်ႉၽိုၼ်ႉၼႆႉ ပဵၼ်တႃႇၵၢၼ်ၵူၼ်းမိူင်းတင်းသဵင်ႈ၊ ဢၼ်ႁဝ်းယိပ်းၵွင်ႈယူႇၼႆႉ ႁဝ်းလုၵ်ႉၼႂ်းၵူၼ်းမိူင်းသေမႃး။ ႁဝ်းဢမ်ႇၸႂ်ႈၵိူတ်ႇဢွၵ်ႇမႃးၵူၺ်းႁင်းၶေႃ၊ ပဵၼ်ထၢၼ်ႈၵူၼ်းမိူင်း ၸၼ်ႉၼိုင်ႈသေ မႃးႁဵတ်းသိုၵ်း၊ လုၵ်ႉတီႈပေႃႈႁႆႈမႄႈၼႃး လုၵ်ႉတီႈၵူၼ်းမိူင်းသေ မႃးယိပ်းၵွင်ႈၵၢင်ႇဢၼ်ဝႃႈၼၼ်ႉ ၵူၼ်းမိူင်းႁဝ်းၵေႃႈလီႁူႉ၊ ၵူၼ်းသိုၵ်းႁဝ်းၵေႃႈ လီပွင်ႇၸႂ်။

ပေႃးႁဝ်းဢမ်ႇပွင်ၸႂ်ၸိူင်ႉၼၼ်ၸိုင် သိုၵ်းႁဝ်းၵေႃႈ ႁဝ်းမီးၵွင်ႈယဝ်ႉ၊ ထိုဝ်ဝႃႈ ႁဝ်းမီးငႃးမီးၵွင်ႉမီးႁႅၼ်ႇယဝ်ႉ ၼႆသေ ၶႂ်ႈပေႉၵိၼ်ၵူၼ်းမိူင်း၊ ၸိူဝ်းၼႆႉ ဢမ်ႇလီပဵၼ်။ ပေႃးယဝ်ႉ ၵူၼ်းမိူင်းၵေႃႈ ၵၢၼ်ဢၼ်ႁဝ်းယိပ်းၵွင်ႈသေ လုၵ်ႉၽိုၼ်ႉယူႇၼႆႉ ၶဝ်ပွင်ႇၸႂ်ဝႃႈပဵၼ်ၵၢၼ်ႁဝ်း (သိုၵ်း)ၵူၺ်း၊ ဢမ်ႇၸႂ်ႈၵၢၼ်ၶဝ်။ ၵွပ်ႈၸိူင်ႉၼၼ်လႄႈ လၢႆးလုၵ်ႉၽိုၼ်ႉၼႆႉ မၼ်းၸင်ႇယိုတ်ႈယၢဝ်းၶၢဝ်းႁိုင်မႃး။ ၵူၺ်းၵႃႈ ၶႂ်ႈလၢတ်ႈၼႄဝႃႈ ၵူၼ်းမိူင်းႁဝ်း ဢၼ်ယူႇဝၢၼ်ႈၼွၵ်ႈၼႃးပၢင်ႇၼႆႉ ၸွႆႈထႅမ်သိုၵ်း၊ ဢမ်ႇၶႂ်ႈၸွႆႈၵေႃႈၸွႆႈ၊ ၶႂ်ႈၸွႆႈၵေႃႈၸွႆႈ၊ တင်းတူဝ်တင်းၸႂ် တင်းၶဝ်ႈတင်းငိုၼ်း။ ၵူၺ်းၵႃႈ ဢၼ်ယူႇၼႂ်းၶူးၼႂ်းဝဵင်းၼႆႉ ဢမ်ႇပေႃးလႆႈလွင်ႈၸွႆႈထႅမ်။ ၵူၼ်းၼႂ်းၶူးၼႂ်းဝဵင်းၼႆႉ တၢင်းႁူႉၵေႃႈမီး၊ တၢင်းႁူႉၵေႃႈဢမ်ႇပၼ်။ ငိုၼ်းတွင်းၵေႃႈမီး ၵူၺ်းၵႃႈဢမ်ႇမႃးၸွႆႈ၊ ၵမ်ႈၼမ် လႆႈႁၼ်ၸိူင်ႉၼၼ်။

ၵွပ်ႈပိူဝ်ႈၼၼ်လႄႈ ၵူၼ်းမိူင်းႁဝ်းၸဵမ်ဝၢၼ်ႈၼွၵ်ႈ ၸဵမ်ၼႂ်းဝဵင်း၊ ၶႂ်ႈႁႂ်ႈပွင်ႇၸႂ်ဝႃႈ ၵၢၼ်လၢႆးလုၵ်ႉၽိုၼ်ႉၼႆႉ ပဵၼ်ၵၢၼ်ႁဝ်းတင်းၸိူဝ်ႉတင်းၶိူဝ်း၊ ဢမ်ႇၸႂ်ႈၵၢၼ်သုၼ်ႇတူဝ် ၵေႃႉလႂ်ၵေႃႉၼၼ်ႉၵူၺ်း၊ ပေႃးပွင်ႇၸႂ်ၸိူင်ႉၼႆၵွၼ်ႇ လၢႆးလုၵ်ႉၽိုၼ်ႉၼႆႉ ၸင်ႇတေဢွင်ႇလႆႈ ယဝ်ႉတူဝ်ႈလႆႈ။

ဢၼ်ပိူၼ်ႈလုၵ်ႉၽိုၼ်ႉမႃး မိူၼ်ၼင်ႇဝႅတ်ႉၼၢမ်းၶဝ်ၸိူဝ်းၼႆႉ၊ ၵၢၼ်လုၵ်ႉၽိုၼ်ႉၼႆႉ ၸဵမ်ၼၢင်းယိင်း ၸဵမ်ၵူၼ်းထဝ်ႈ ပိူၼ်ႈပွင်ႇၸႂ်။ ၵူၼ်းမိူင်းလႄႈသိုၵ်း ပဵၼ်ဢၼ်လဵဝ်ၵၼ်၊ တေႃႇထိုင်မွၵ်ႈၼၼ်ႉ မၼ်းၸင်ႇလႆႈဢွင်ႇပွႆးမႃး၊ ၸင်ႇထိုင်လႆႈတီႈယိူင်းဢၢၼ်း။ ပေႃးဝႃႈပႆႇၸႂ်ႈၸိူင်ႉၼၼ်ၸိုင် ႁဝ်းတိုၵ်ႉတေလႆႈ ၶဝ်ႈပွႆးတိုၵ်းယူႇၶၢဝ်းယၢဝ်းတင်းႁိုင်ယဝ်ႉ။ ၵွပ်ႈပိူဝ်ႈၼၼ်လႄႈ ၶႂ်ႈႁႂ်ႈၵူၼ်းမိူင်းႁဝ်းပွင်ႇၸႂ်ဝႃႈ ၵၢၼ်လၢႆးလုၵ်ႉၽိုၼ်ႉၼႆႉ မၼ်းပဵၼ်ၵၢၼ်ၵူၼ်းမိူင်း၊ ပဵၼ်ၵၢၼ်ၸိူဝ်ႉၶိူဝ်း၊ မၼ်းဢမ်ႇၸႂ်ႈၵၢၼ်ၵူၼ်းသိုၵ်း ၸုမ်းလဵဝ်ၵူၺ်း။

ဢၼ်ၵူၼ်းသိုၵ်းႁဝ်းလႆႈလူႇၼိူဝ်ႉလူႇလိူတ်ႈမႃးၼၼ်ႉ ႁႂ်ႈပေႃးႁူႉဝႃႈ ၵၢၼ်ၸိူဝ်ႉၸၢတ်ႈၼႆႉ သိုၵ်းႁဝ်းတၢင်းလင် တိုၵ်ႉသိုပ်ႇႁဵတ်းယူႇ။ ၸိူဝ်းဢၼ်လူႉသုမ်းၶႅၼ်ၶႃတိၼ်မိုဝ်းတူဝ်ၶိင်း၊ ပဵၼ်တုၵ်ႉၶိတၵႂႃႇၸိူဝ်းၼႆႉၵေႃႈ ယႃႇပေႁႂ်ႈပေႃးလႆႈၼႅင်ၸႂ်ဝႃႈ သုမ်းတိၼ်ၵဝ် မိုဝ်းၵဝ် တႃၵဝ်ၵူၺ်းယဝ်ႉ၊ ယႃႇပေႁႂ်ႈလႆႈႁၼ် လႆႈပဵၼ်ၸိူင်ႉၼၼ်။ ၵွပ်ႈၼၼ်လႄႈ ဝၼ်းမိူဝ်ႈၼႆႉ လႆႈႁွင်ႉတုၵ်ႉၶိတၶဝ် ဢၼ်လႆႈတိူဝ်ႉမၢၵ်ႇၸိူဝ်းၼႆႉမႃး ၼႂ်းပၢင်ပွႆးၼႆႉ။ ၶႂ်ႈၼႄဝႃႈ ၵၢၼ်သူႁဵတ်းဢမ်ႇယဝ်ႉၼႆႉ ႁဝ်းတိုၵ်ႉသိုပ်ႇႁဵတ်းယူႇ။ တီႈၼႆႈ ၶႂ်ႈလူပ်းလိုၼ်းဝႃႈ ၵူၼ်းမိူင်းႁဝ်းၼႆႉ ႁႂ်ႈဢွၼ်ၵၼ်ၶဝ်ႈႁူမ်ႈ ၵၢၼ်လၢႆးလုၵ်ႉၽိုၼ်ႉသေၵမ်း။

(ပႂ်ႉသိုပ်ႇဢၢၼ်ႇထႅင်ႈတွၼ်ႈ 2 ၊ ၸဝ်ႈၸၢႆးယီႈ ၵၢဝ်ႇလၢတ်ႈၵႂၢမ်းလွင်ႈ တႆးတိုၵ်ႉထုၵ်ႇမၢၼ်ႈဢူမ်ဢိုၼ်ယူႇ လၢႆၾၢႆႇလၢႆတၢင်း)။